كان يا مكان فيه لاعيب لسه صغير يدوبك عنده 20 سنة بيلعب قلب دفاع في فرقة مانشستر سيتي إسمه (إيريك جارسيا Eric Garcia) .. الواد ده تقدر تقول عليه شاب واعد متوعد .. بتتكلم عن لاعيب صحيح لسه صغير بس بطل أوروبا مع منتخب إسبانيا تحت 17 سنة و كمان تحت 19 سنة .. بتتكلم عن لاعيب في رصيده 4 ماتشات دولية مع منتخب إسبانيا الأول .. حاجة كده كأنك بتتكلم عن (جيرارد بيكية Gerard Pique) أيام ما كان لسه صغير و فاكر يعني إيه كرة قدم في برشلونة أو (سيرجيو راموس Sergio Ramos) وقت ما كان لسه ناشيء في إشبيلية .. طبيعي إن لاعيب في سنه عايز يلعب بس لأجل حظه الأسود قلبين الدفاع الأساسيين في مانشستر سيتي دلوقتي اللي هم (روبين دياز Ruben Diaz) و (جون ستونز John Stones) فعلياً قاطعين مياه و نور عن أي مهاجم يلعب ضدهم .. جه الواد قال أنا عايز أمشي عشان ألعب أساسي .. حقه .. حتي إدارة مانشستر سيتي مش طالبه فيه كتير يدوبك هم 2.65 مليون جنيه إسترليني اللي هو عايز تقولهم ده إيه الكرم اللي نازل عليكوا ده .. مين بقي شبطان في الواد؟ .. برشلونة .. حلو أوي .. علي الورق الصفقة المفروض تمشي زي السكينة في الجاتوه .. مانشستر سيتي و برشلونة مش أغراب يعني عن بعض و حتي المبلغ المطلوب مش كبير يعني .. بس اللي إنت متعرفوش إنه كبير .. كبير أوي علي ميزانية برشلونة دلوقتي.
عشان بس أحطك في الصورة فال2.65 مليون جنيه إسترليني اللي السيتي طالبهم في (إيريك جارسيا) دول تقريباً كده مرتب (ليونيل ميسي Lionel Messi) في 10 أيام بس فعلاً الوضع المالي لبرشلونة زي الزفت بناء علي التقرير السنوي لحسابات النادي .. إنت بتتكلم عن نادي مديون ب10.4 مليار جنيه إسترليني.. بتتكلم عن نادي الفلوس السايلة المتاحة الكاش المتاحة ليها قلت بحوالي 531 مليون جنيه إسترليني .. نادي عليه فلوس شراء لاعيبة حوالي 283 مليون جنيه إسترليني .. نادي عليه فلوس مرتبات لاعيبة بس وصلت 177 مليون جنيه إسترليني .. ده غير 248 مليون جنيه إسترليني قروض واخدها من البنوك .. زود عليهم 177 مليون جنيه إسترليني قيمة سندات مطلوب سدادها .. و فيه كمان 74 مليون جنيه إسترليني مطلوب يتدفعوا لموردين زي موردي الأكل و الشرب و المعدات الرياضية .. و أخيراً و ليس أخراً 49 مليون جنيه إسترليني مصروفات إدارية .. فكك من كل الفلوس دي كلها لإن أهم مبلغ لازم يتسدد هو مرتبات اللاعيبة اللي هم 177 مليون جنيه إسترليني .. النادي خد منحة من الحكومة الإسبانية بقيمة 129 مليون جنيه إسترليني عشان يدفع مرتبات اللاعيبة في الست شهور اللي فاتوا .. بدأت تفهم حجم المصيبة اللي هم فيها؟ .. ده يفسرلك ليه إدارة برشلونة سابت (لويس سواريز Luis Suarez) يمشي .. هم مسابهوش يمشي يروح لمتصدر الدوري الإسباني حالياً أتليتيكو مدريد عشان (رونالد كومان Ronald Koeman) مكنش عايزه لا سمح الله .. هم سابوه يمشي عشان مكانوش قادرين يدفعوله مرتبه.
طب و الحل؟ .. الحل إن الإتحاد الإسباني لكرة القدم يبطل يدلع برشلونة و إلا برشلونة مش بس حيغرق ده حياخد الدوري الإسباني كله معاه .. الحل إن فيه زفت إختراع إسمه لائحة اللعب المالي العادل Financial Fair Play و إختصاراً بتتسمي FFP و لازم اللايحة دي تتطبق .. لازم إدارة برشلونة تحس إنها مجبرة إنها تغير لايحة المرتبات بتاعة اللاعيبة و إلا إنت قدام واقع إن نادي برشلونة بجلالة قدره حيتعرض للبيع زي ما حصل مع ميلان الإيطالي .. عشان كده أنا عايز أقف للحظة قدام الإنتخابات الرئاسية الجاية لنادي برشلونة .. اللإنتخابات دي داخلها إتنين قصاد بعض .. الأولاني إنت إحتمال تكون عارفه كويس اللي هو (خوان لابورتا Juan Laporta) و الرجل ده فعلياً عايش في اللالاند .. ليه بقول كده؟ .. الرجل ده شايف إن (ميسي) مينفعش يمشي .. حلو .. حضرتك (ميسي) مرتبه في الأسبوع 500,000 جنيه إسترليني و ده الصافي علي فكرة بعد خصم الضرائب .. لو (ميسي) فضل في برشلونة بنفس مرتبه ده فإنت تقدر تقول إن برشلونة حيغرق .. اللي مترشح قصاده هو (أجوستي بينيديتو Agusti Benedito) و ده رجل منطقي جداً و يمكن بسبب إنه عاقل أوي إحتمال ميكسبش الإنتخابات .. الرجل ده عارف إن برشلونة ككيان لابس في الحيط و عشان كده هو معندوش مشكلة يبيع (ميسي) لأي نادي مش حتفرق بس يخلص من مرتبه اللي قاطم ظهر النادي .. أنا عمري ما كنت متخيل إني حقول كده بس صدقني لو قلتلك إن نجاة برشلونة من الأزمة المالية اللي هم فيه مرتبط إنهم يخلصوا من (ميسي) في أسرع وقت.
المصادر:
مقالة بعنوان Barcelona cannot afford Man City kid Eric Garcia let alone Lionel Messi with their debt at 1bn. نشرت في جريدة The Daily Mail البريطانية و ده لينك المقالة الأصلية:
https://www.dailymail.co.uk/sport/football/article-9199271/MARTIN-SAMUEL-Barcelona-afford-Man-City-kid-Eric-Garcia-let-Lionel-Messi.html
