لما المواطنين العرب الغلابة صحيوا علي خبر إن البحرين و الإمارات و بعد كده إنضملهم السودان و المغرب مضوا إتفاية سلام مع إسرائيل سموها إتفاقيات إبراهيم Abraham Accords يا عيني جالهم حالة من الصدمة و هم بيحاولوا يفهموا المنطق ورا الأمور .. ولا دولة من الدول العربية اللي مضيت علي الإتفاقية دي ضربت علي إسرائيل طلقة واحدة توحد ربنا في أي حرب مباشرة يبقي إتفاقية سلام إيه يا ولاد التيييت .. لما إتكلمت عن الموضوع ده في مقالة قديمة قلت إن الحاجة اللي خلت الإتفاقية دي تتمضي هي إن الإماراتيين كانوا شبطانين في تكنولوجيا السلاح اللي عند الإسرائيليين و مستعدين يعملوا أي حاجة عشان يحطوا إيدهم علي التكنولوجيا دي و يمكن أهم واحدة فيهم هي برنامج بيجاسوس Pegasus Software.
فيه شركة إسرائيلي إسمها NSO Group و دي شركة بتعمل برامج إختراق للكومبيوترات و الشبكات .. هاكرز يعني .. أكتر برنامج عملوه و بيتباع هو بيجاسوس Pegasus و كلمة بيجاسوس دي علي فكرة يعني الحصان المجنح في الأساطير الإغريقية و أخص بالذكر هنا الإصدار الثالث من البرنامج Pegasus 3 .. البتاع ده بالذات الإماراتيين كانوا حيموتوا عليه لإنه يقدر يخترق أي موبايل و ياخد نسخة من محتوياته من غير ما تحتاج الطريقة التقليدية للهاكرز إني إبعتلك ميل أو رسالة فيها لينك و بمجرد ما تتك علي اللينك ده موبايلك بيعمل Download للفيروس بتاعي و أقدر أخترقك .. ده بيخليه سلاح مهم أوي للترسانة بتاعة برنامج التجسس الإماراتي.
المفروض إن عشان شركة NSO Group تبيع أي برنامج هي بتعمله سواء بقي Pegasus أو غيره لأي دولة تانية فهي لازم تاخد موافقة الحكومة الإسرائيلية .. في حالة تعاون الشركة مع دول الخليج فالحكومة الإسرائيلية كانت هي السمسار بتاع الصفقة .. هي اللي جابت مسئولي الشركة و الناس اللي ماسكة أجهزة المخابرات الخليجية قعدوهم مع بعض في إجتماعات فيه منها إتعمل في العاصمة الإسرائيلية تل أبيب عشان يتفقوا علي تفاصيل الصفقة .. في الإجتماعات دي بيتعمل Presentation لطيفة كده إن مسئولي NSO بيقولوا عشوائي كده لأي حد من اللي حاضرين من الجانب العربي اللي جاي يشتري هات تليفونك .. و قدام الناس كلها ممثلي NSO بيخترقوا الموبايل عشان بس يوروا الزبون هو Pegasus ده بيعمل إيه .. يقال إن فيه عقد إتمضي بين NSO و بين دولة عربية قيمته وصلت 250 مليون دولار.
فيه صحفيين كتير لما جم ينخربوا أكتر ورا الصفقات دي لقوا إن قسم العقود بتاع شركة NSO Group لما بيجي يعمل عقد بيع برنامج Pegasus لأي دولة مش بيحط إسم الدولة في العقد .. كل دولة ليها إسم كودي بحيث الحرف الأول من إسم الدولة هو هو الحرف الأول من الإسم الكودي اللي لسبب ما يعني بيكونوا أسامي عربيات .. يعني مثلاً .. المملكة العربية السعودية عشان إسمها بالإنجليزي Saudi Arabia فإسمها الكودي عند شركة NSO Group هو سوبارو Subaru اللي هي شركة العربيات اليابانية .. البحرين اللي هي Bahrain بالإنجليزي إسمها الكودي BMW اللي شركة العربيات الألمانية .. الأردن اللي هي Jordan بالإنجليزي إسمها الكودي جاجوار Jaguar اللي هي شركة العربيات البريطانية .. بشوية نخربة كمان من الصحفيين عرفنا إن NSO Group باعت برامج تجسس لحكومات البحرين و السعودية و إماراتي أبوظبي و رأس الخيمة بس الشركة ممنوع تبيع أي حاجة لقطر عشان الحكومة الإسرائيلية مش راضية.
من ضمن الأوبشنز اللطيفة في برنامج Pegasus إن لنفترض إن أنا ناشط سياسي إماراتي و المخابرات الإماراتية شايفاني لسبب ما لا يعلمه إلا الله تهديد للأمن القومي فقالوا يخترقوا موبايلي ببرنامج Pegasus عشان يعرفوا أنا بهبب إيه في عيشتي .. لو حصل إني سافرت 5 دول اللي هم إسرائيل و إيران و روسيا و الصين و أميركا فالبرنامج بشكل أوتوماتيكي بيعرف إني ركبت طيارة و نزلت في واحدة من الدول دي و بيعمل حاجة إسمها Suicide Mode إن البرنامج يمسح نفسه من علي موبايلي .. الحقيقة إن كل دولة من الخمسة وضعها مختلف .. يعني رغم إن NSO Group شركة إسرائيلي و باعت برنامج Pegasus للإمارات بموافقة الحكومة الإسرائيلية إلا أن قانوناً يعني دي جريمة و ممكن لو النيابة مسكت الموبايل و فيه البرنامج ترفع قضية علي الشركة و علي الحكومة .. سواء بقي أميركا أو الصين أو روسيا فالدول الثلاثة مش بتهزر في حكاية التجسس علي المواطنين علي أرضها و عشان كده إسرائيل مش عايزه مشاكل معاهم .. تبقي إيران اللي بيخافوا إن لو المخابرات الإيرانية حطت إيدها علي موبايلي و فيه البرنامج يفهموا منه سر الصنعة و تبقي مصيبة.
المصدر:
مقالة بعنوان With Israel’s Encouragement, NSO Sold Spyware to the UAE and Other Gulf States نشرت في جريدة هاارتز Haaretz الإسرائيلية و ده لينك المقالة الأصلية:
https://www.haaretz.com/middle-east-news/.premium-with-israel-s-encouragement-nso-sold-spyware-to-uae-and-other-gulf-states-1.9093465
