سنة 2019 قيادة القوات الخاصة الأميريكية SOCOM ودي إختصار Special Operations Command ودي تبقي واحدة من الأفرع الرئيسية للقوات المسلحة الأميريكية طلبت ترمي في الزبالة كل بنادق القناصة اللي العساكر بتوعها بيستخدموها وتحل محلهم ببندقية جديدة لانج إسمها Barrett MRAD وغيروا إسمها بقي Mark 22 ودفعوا في الصفقة دي 50 مليون دولار .. سنة 2020 قيادة القوات البرية US Army وقيادة مشاة البحرية US Marine Corps قرروا هم كمان إنهم يرموا في الزبالة بنادق القناصة اللي العساكر بتوعهم بيستخدموها ويحلوا محلها نفس البندقية وطلبوا 768 بندقية بقيمه 14 مليون دولار يعني بتتكلم إن البندقية الواحدة واقفه عليهم ب16,000 دولار .. لو كانت SOCOM بس اللي كانت قررت ده فكان ممكن أقول معلش إنت عارف الأخوة بتوع القوات الخاصة بيحبوا يبقوا مختلفين شوية عن بقية خلق الله .. حاجة كده زي خالف تعرف .. بس لما القوات البرية ومشاة البحرية يطلبوا نفس الطلب هنا إحنا محتاجين نستهدي بالله كده ونشوف إيه البتاعة دي؟ وبتعمل إيه بالضبط مختلف عشان يشبطوا فيها كده زي العيل الصغير اللي شبطان في لعبة؟
تعالوا نبدأ بالإسم .. باريت Barrett دي تبقي إسم الشركة اللي صنعت البندقية .. MRAD دي إختصار Multi Role Adaptive Design يعني التصميم اللي بيقدر يتكيف مع أي ظرف وبيقدر ينفذ كذا وظيفة وده اللي إحنا محتاجين نقف قصاده شوية .. MRAD هي بندقية الشاسيه بتاعها هو هو زي أي بندقية من جيل 7000-Series عادية خالص .. هي بتشتغل بطريقة Bolt-Action يعني بعد ما بتضرب الطلقة بتشد الأجزاء عشان تطلع المظروف بتاع الطلقة بره والطلقة الجديدة تحل محلها .. بيتركب فيها خزنة ذخيرة بتشيل 10 طلقات .. بس يمكن أهم ميزة واللي عشانها إتسمت بإسمها هي إن القناص لأول مرة بقي تحت إيده بندقية قناصة بتستخدم أكتر من ماسورة إطلاق وبالتالي بتستخدم أكثر من عيار.
عارف إن إنت لو دخلت الجيش أو ليك خلفية عن بنادق القناصة فإنت بتسحب نفس عميق عشان تبدأ تشتمني بس إهدي وحفهمك .. الشاسيه الأساسي اللي في بندقية MRAD بيخليها تستخدم طلقات عيار 7.8232 مليتمر اللي بره معروفه بإسم 0.308 Winchester و 0.300 Winchester Magnum ودي طلقات Standard بتصنعها شركة وينشيستر Winchester اللي الطلقات متسميه علي إسمها .. كونها طلقات Standard فده معناه إن دي طلقات مش متصممة عشان تستخدمها إنك تصطاد أهداف بعيدة .. هي متصممة عشان تستخدمها في معارك المدن .. لو طلبت معاك تجيب هدف بعيد فإنت ساعتها بتحتاج طلقات عيار 8.585 مليتمر المعروفة بره باسم 0.338 Lapua Magnum وساعتها إنت كقناص محتاج يبقي معاك بندقية بتستخدم العيار ده من الطلقات .. اللي MRAD بتقدمهولك إن بيبقي معاك مفك بتفك به الماسورة الأساسية وبتركب مكانها ماسورة تانية بتستخدم طلقات عيار 8.585 مليمتر.
اللي منكوا شاف فيلم American Sniper اللي بيحكي قصة القناص (كريس كايل Chris Kyle) فالرجل ده إتشهر سنة 2008 بسبب عملية قنص نفذها في معارك في مدينة الصدر العراقية قتل فيها مواطن عراقي بطلقة ضربها من علي مسافه 2,100 متر بطلقة عيار 8.585 مليمتر .. بلاش دي .. في مقالةأطول عملية قنص في العالم واللي نشرناها هنا ففيه إتنين قناصة كنديين قتلوا فرد من طالبان في أفغانستان من مسافة 3,540 متر بطلقة عيار 12.7 مليمتر اللي هي 0.5 Caliber .. إذن الأهداف البعيدة محتاجة طلقة كبيرة مش الطلقة الStandard العادية.
البندقية MRAD لو تشوفها من بره هي بسيطة بشكل مستفز .. وزنها ما بين 5.85-6.5 كيلوجرام بس ده الوزن الصافي من غير المثبت الثنائي Bi-pod ومن غير الإكسسوارات والعدسات .. الكعب بتاعها بيتني بحيث ان لو إنت قاعد في طيارة هليكوبتر أو جوه مدرعة أو حتي جوه عربية فالبندقية سهل جداً إنك تشيلها .. المقبض اللي القناص بيلف صوابعه عليه بقي ينفع تتحكم في بعده عن البندقية وكمان الحتة اللي القناص بيسند خده عليها كمان ينفع تتحكم في مكانها عشان علي حسب هل القناص لابس لبس تقيل في الشتاء أو لبس خفيف في الحر .. الخرم بتاع الزناد كمان وسع عشان لو القناص لابس جوانتي في الشتاء .. فوق البندقية فيه مجري بتتسمي سكة حديد بيكاتيني Picatinny Rail وده إختراع عملته شركة إسمها بيكاتيني Picatinny عشان يتركب عليها الإكسسوارات بتاعة البندقية زي السكوب والرؤية الليلية وده إختراع بدأ تطبيقه في بنادق M4 Carbine ومن ساعتها وكل البنادق الألية اللي بتنزل بيبقي فيها ومن ضمنها النسخ الجديدة من بنادق كلاشينكوف AK-15 و AK-12 .
المصدر:
- مقالة بعنوان The US military really wants this new sniper rifle نشرت في مجلة Popular Mechanics وده لينك المقالة الأصلية:
ttps://www.popularmechanics.com/military/weapons/a31138109/military-sniper-rifle-barrett-mrad/
