وانت بتتعامل مع بني ادم زي (محمد بن سلمان) بالذات متحاولش تشغل مخك و تفهم هو بيفكر ازاي لان خلينا نكون صرحاء مع بعض ان الرجل ده معاه فلوس كتير فشخ لدرجه ان فعليا ولا واحد فينا يقدر يحط نفسه مكانه .. في الوقت اللي انت كمواطن كحيان بتكح تراب مش عارف تغير زيت عربيتك ف(محمد) اشتري يخت طوله 134 متر من ملياردير روسي اسمه (يوري شيفلر Yuri Shefler) و سماه (سيرين) و دفع فيه 440 مليون جنيه استرليني كاش .. علي اليخت ده هو معلق لوحه اسمها (سلفاتور موندي Salvator Mundi) رسمها الله يمسيه بالخير (ليوناردو دافنشي Leonardo da Vinci) و (محمد) اشتراها سنه 2017 بعد ما دفع فيها 350 مليون جنيه استرليني .. (محمد) بني ادم غني فشخ يقدر يشتري اللي هو عايزه وقت ما يحب .. حب يشتري نادي فراح سال بتوع مانشستر يونايتد فقالوله والله النادي بيجيبلنا فلوس زي الفل ومش عايزين نبيعه .. قعد يشمشم علي نادي تاني يشتريه ولقي نادي اسمه نيوكاسل يونايتد .. هو مش في مكانه ولا سمعه مانشستر بس علي الاقل اسمه فيه يونايتد .. رئيس النادي (مايك اشلي Mike Ashley) كان قبل كده قال انه عايز يبيع النادي بس اللي يجي يقعد ياريت يقدم عرض حلو .. بسيطه اهي .. قعده عشاء علي اضواء الشموع علي اليخت بتاع (محمد) و العقد يتمضي و روح (دافنشي) بتهفهف في المكان .. المفروض ان الحكايه سهله .. ليه بقي (محمد) قرر يعكنن علي نفسه و يجيب (اماندا ستافيلي Amanda Staveley) عشان تبقي الوسيط اللي يخلصله الصفقه؟ .. مش بس كده .. ليه اساسا تسرب للاعلام انك عايز تشتري نادي .. ليه؟ ها ليه؟
اه معلش غلطتي اني نسيت اقولك مين هي (اماندا) دي .. فاكر لما قلتلك ان من فتره (مايك) اللي هو رئيس نادي نيوكاسل طلع قال انه عايز يبيع النادي بس ياريت اللي يجي يعني يكون محضر عرض كويس .. اهي الست (اماندا) دي لمت شويه رجال اعمال انجليز معاهم فلوس و تقدر تقول كده عملت جمعيه خدتها هي اول واحده و خدت الفلوس رمتها قدام (مايك) .. الرجل اتخانق معاها و رماها بره مكتبه .. (مايك) ده من الرجاله اللي تقدر تقول عليهم اعصابهم بتفلت بسرعه .. ده رجل عشان تتعامل معاه لازم تطبطب عليه و فعليا الله يكون في عون مراته من عصبيته الاوفر دي.
انا فاهم كويس ليه ممكن السعوديين يكونوا بيقولوا يستحسن يعني اللي يبان قدام الناس حيشتري النادي يكون حد انجليزي مش سعودي .. ممكن يكونوا قالوا ان الراي العام الغربي لسه شايل في قلبه من السعوديين بعد اللي عملوه في (جمال خاشقجي) الله يرحمه واللي اتكلمت عنه قبل كده .. ده يبقي يوم المني كمان لو الحد الانجليزي اللي حيبقي قدام الناس هو اللي بيشتري النادي يكون واحده ست علي اساس يعني يقولوا للغرب شايفين اهو احنا كسعوديين اهو اتغيرنا و مبقيناش زي زمان .. بس برده اشمعني الست دي؟ .. هل بسبب انها اتخانقت مع (مايك)؟ .. طب ممكن حد يفسرلي ليه السعوديين عرضوا علي (اماندا) 10% من اسهم النادي لو قدرت تقنع (مايك) يبيع؟ .. ليه اصلا يتقال ان السعوديين مستعدين يدخلوا في شراكه مع اتنين اخوات رجال اعمال انجليز اساميهم (ديفيد روبن David Reuben) و (سايمون روبين Simon Reuben) ودول ثروتهم علي بعض بتتقدر بحوالي 16 مليار دولار؟ .. هل السعوديين الفلوس معجزه معاهم لا سمح الله يعني؟
تاني ارجع ل(محمد) .. مشكلتي معاه اني شايفه بني ادم مش فاهم ابعاد هدفه .. انت دلوقتي قلت انا شبطان في نادي عايز اشتريه .. حلو .. طب انت فاهم يعني ايه تمسك نادي؟ .. هل عشان انت رجل سعودي حبيت تشتري نادي انجليزي يبقي لازم يبقي ليك شركاء انجليز؟ لا طبعا تبقي عبيط لو فكرت كده .. ما انت عندك (ستان كرونيكي Stan Kroenke) مالك نادي ارسنال ما هو كان شاريه شراكه مع رجل اعمال روسي اسمه (اليشير اوسمانوف Alisher Usmanov) بس عشان (ستان) كان عنده 51% من اسهم النادي فكان فعليا حارم (اليشير) انه يخش النادي وفضل وراه لحد ما اشتري حصته كلها .. هل تفتكر (ستان) ده بيفهم في الكوره؟ غالبا قبل ما يشتري ارسنال ولا كان يعرف بتتلعب ازاي اساسا .. (رومان ابراموفيتش Roman Abramovich) بتاع تشيلسي هل عمرك شفتله شركاء؟ .. ما هو رجل اعمال روسي اهو قرر يشتري نادي في انجلترا فهل تفتكر كان له شركاء انجليز .. انت رايح تشتري نادي عشان كلمتك تمشي علي اطخن طخين و اللي مش عاجبه يشرب من اي خراره .. تاني .. (محمد بن سلمان) رجل مش فاهم هو عايز ايه .. هو سرب للاعلام انه عايز يشتري نادي عشان الصحافه تفضل تتكلم عنه و تجيب سيرته .. اللي عايز يشتري مانشستر يونايتد راح ..اللي عايز يشتري مانشستر يونايتد جه .. لما (مايك اشلي) اللي بفكرك انه مالك نادي نيوكاسل اتسال عن ان السعوديين عايزين يشتروا منه النادي كان رده ان اللي عايز يشتري بيجي من سكات يدفع الفلوس و يمضي العقد و بعد كده يبلغ الناس زي ما حصل مع مانشستر سيتي كده .. اول ما تلاقي حد جاي و الصحفيين وراه اعرف علي طول ان الصفقه دي مش حتتم .. يمكن عشان كده المثل بتاع داري علي شمعتك تقيد اتقال؟
المصدر:
مقاله بعنوان So, why does billionaire Mohammed bin Salman need fixer Amanda Staveley to buy Newcastle نشرت في جريده The Daily Mail وده لينك المقاله الاصليه:
https://www.dailymail.co.uk/sport/football/article-7935917/SAMUEL-does-billionaire-Mohammed-Bin-Salman-need-fixer-buy-Newcastle.html
