اللي عايز أتكلم عنه النهاردة هو أسرع قرار ترقية ممكن يحصل لأي موظف في الدنيا .. اللي حصل إن من إسبوع بس إدارة نادي يوفينتوس قالت إن (أندريا بيرلو Andrea Pirlo) حيتعين مدير فني لفرقة تحت 23 سنة .. هوبا من كام يوم يطلع قرار ترقيته عشان يبقي المدير الفني للفريق الأول مكان (ماوريسيو ساري Maurizio Sarri) .. مش بقر ولا بحسد بس إنت محتاج تبص لقرار تعيين (بيرلو) كمدير فني ليوفينتوس من 3 وجهات نظر إلي حد كبير عكس بعض .. وجهة النظر الأولانية هي ليه إدارة يوفينتوس جابته أساساً؟ .. وجهة النظر الثانية ليه (بيرلو) مينفعش؟ .. وجهة النظر الثالثة هي إيه الصح اللي كان المفروض يتعمل؟
خلينا نبدأ بوجهة النظر الأولانية .. إشمعني (بيرلو)؟ .. الإجابة كلمة واحدة .. الفلوس .. لو صدقت كلام (فابيو باراتيتشي Fabio Paratici) مدير نشاط الكرة في يوفينتوس فإدارة النادي بقالها فترة بتفكر في بديل (ساري) .. علي فكرة ده في حد ذاته ضد الكلام اللي كان بيطلع من رئيس النادي (أندريا أنييلي Andrea Agnelli) بإن إدارة النادي كانت مستنية الموسم حيخلص علي إيه عشان تقرر مصير (ساري) بس ده مش موضوعنا دلوقتي .. موضوعنا هو ليه (بيرلو)؟ أو بمعني أخر ليه لا (ماوريسيو بوتشتينو Mauricio Pochtetino)؟ الإجابة هي الفلوس .. (بوتشتينو) كان حيجي يقولك أنا عايز لستة لاعيبة بملايين و فوق ده كله حيحتاج وقت عشان يخلي يوفينتوس فرقة واقفة علي رجليها .. ليه لا (سيميوني إنزاجي Simone Inzaghi)؟ .. هو مرتبط بعقد مع لاتسيو و عشان نجيبه فإحنا لازم ندفع الشرط الجزائي.
زود علي كده الوضع اللي عليه الفرقة نفسها .. عندنا (كريستيانو رونالدو Cristiano Ronaldo) دافعين فيه ملايين .. عندنا فرقة بسم الله ما شاء الله أغلبها عواجيز .. ده معناه إننا عايزين مدير فني يشتغل باللي تحت إيده و ميطلبش لاعيبه بفلوس .. إحنا عايزين حد يرضي بقليله .. مدير فني مش حندفعله كتير و مش حيطلب نصرف فلوس كتير .. عشان كده (بيرلو) هو المرشح المثالي لينا .. تيجي تسألهم بجد؟ .. بجد أنتوا بانيين رأيكوا علي الأساس ده؟ .. يقولك اه يا عم .. بص علي أسامي المديرين الفنيين اللي (بيرلو) إشتغل معاهم من أول (كارلو أنشيلوتي Carlo Ancelotti) ل(مارسيلو ليبي Marcello Lippi) ل(أنتونيو كونتي Antonio Conte) ل(ماكس أليجيري Max Allegri) .. الجمهور وراه عشان هو أسطورة من أساطير النادي .. و عشان كده إحنا إخترناه .. و خد التقيلة بقي .. طب إفرض (بيرلو) فشل .. هل تعلم عزيزي القاريء إن (زين الدين زيدان) عقده حينتهي مع ريال مدريد السنة الجاية؟ .. شفت بقي.
كده إحنا فهمنا هي إدارة يوفينتوس كانت بتفكر في إيه لما إختارت (بيرلو) .. دلوقتي جه الوقت إننا نشرح ليه الكلام ده هراء؟ .. لو حضرتك عايز مدير فني حافظ النادي و عارف اللاعيبه و بيعرف يعمل من الفسيخ شربات طب ما ترجع (أليجيري) .. إياكش حتي تروح تشتريله بوكيه ورد و تشغله أغنية (تامر حسني) ناسيني ليه بتتعب قلبي وياك .. تعيينك (بيرلو) في حد ذاته تفكير بره الصندوق و إنت بعظمة لسانك قايل أنا عايز مدير فني عايش جوه الصندوق .. لو إنت دلوقتي جيت قلتلي إن (بيرلو) حيقدر يطلع أحسن ما في فرقة يوفينتوس دلوقتي فسامحني لو قلتلك إن فيه إحتمال 50-50% إنك تبقي غلطان و ده سببه لإن مع كامل إحترامي ل(بيرلو) كلاعيب بس هو عمره ما مسك ولا فرقة في حياته كمدير فني إلا إذا كان بيعلب FIFA Football Manager.
هنا يجي دور وجهة النظر الثالثة .. إيه الصح يا أستاذ (غسان مطر)؟ .. خلينا نبدأ بالأساسيات .. (ساري) بوظ الدنيا بإنه ملعبش علي نقاط قوة الفريق اللي تحت إيده .. فرقة يوفينتوس باللاعيبه اللي فيها حالياً مينفعش يلعبوا طريقة اللعب بتاعة Sarri-Ball و هي دي المشكلة .. الفرقة .. الفرقه كلها محتاج تتنفض .. انا فعلياً بشفق علي (بيرلو) .. لو هو فاكر إن فوزه بالدوري كفاية فأحب أقوله لا و حتي إسأل (ساري) ما هو خد الدوري و مشوه برده .. الصح إن يتقال من دلوقتي إيه التارجيت بتاع (بيرلو) .. اللي انا متوقعه إن التارجت بتاعه إنه يقطع مشوار كبير في أوروبا .. مينفعش نادي بحجم يوفينتوس يطلع من دور ال16 في بطولة دوري أبطال أوروبا من فرقة زي ليون اللي مع كامل إحترامي ليها في المركز السابع في الدوري الفرنسي و الفرقة ملعبتش ماتش في الدوري بقالها 5 شهور .. دي عيبة في حق يوفينتوس.
الصح برده إن إدارة يوفينتوس تشيل نصيبها من المسئولية .. الثلاثي (أنييلي) و (باراتيتشي) و معاهم (بافل نيدفيد Pavel Nedved) لازم يعترفوا بإنهم بوظوا الفرقة .. خد خط النص .. انت في 3 سنين بعد ما كان عندك خط نص فيه (بيرلو) و (بول بوجبا Paul Pogba) و (أرتورو فيدال Arturo Vidal) دلوقتي بقي عندهم (سامي خضيرة) و (أرون رامزي Aaron Ramsey) .. فيه عك كتير حصل في بيزنس شراء و بيع اللاعيبه .. فكرة إننا نشتري لاعيبه ببلاش و ندفعلها مرتبات خزعبيلة و نبوظ مسطرة المرتبات في النادي دي لازم تترمي في الزبالة .. الفرقة محتاجة عمرة خصوصاً خط النص و كونك إشتريت (أرتور Arthur) لوحده مش حيصلح حاجة .. في الهجوم عندهم (رونالدو) و إشتروح جناح نادي بارما (ديجان كولوسيفيسكي Dejan Kulusevski) و تحت منهم (بابلو ديبالا Pablo Dybala) .. في الدفاع عندهم (ميريح ديميرال Merih Demiral) و جنبه (ماتياس دي ليجت Mathias Di Legt) و الإحتياطي بتاعهم حيبقي (ليوناردو بونوتشي Leonardo Bonocci) .. فانت زي ما قلت خط النص عندك ضايع و محتاج باكين يمين و شمال و جناحين يمين و شمال .. من غير العمرة دي ولا الجن الأزرق حيعرف يعمل حاجة بفرقة يوفينتوس.
المصدر:
فيديو بعنوان Andrea Pirlo can do nothing better than Maurizio Sarri with this Juventus squad نشر علي YouTube و ده لينك الفيديو:
https://www.youtube.com/watch?v=IdAmja_7EGU
