و عسي أن تكرههوا شيئاً و هو خير لكم .. الأية الكريمة دي من أكتر الأيات اللي بيعتمد رد فعلك عليها علي إنت شايف الدنيا إزاي؟ .. خليني بلاش أخد الموضوع بشكل فلسفي و خلينا نطبقه بشكل عملي علي الوضع اللي إحنا عايشينه كلنا .. لو إنت مات ليك حد بسبب فيروس كورونا فإنت ممكن يبقي صعب عليك شوية إنك تستوعب دلوقتي حالاً هو يعني الخير اللي ربنا شايله ليا من موت حد من أهلي فين؟ .. نفس الكلام لو انت عامل شغال باليومية و فعلياً بيتك إتخرب بسبب حظر التجوال .. انا حبقي متفهم جداً رد فعلك انك مش قادر تشوف ومش قادر تستوعب هو الخير فين؟ .. بس لو بصيت علي الموضوع من بره حتلاقي إن الأية الكريمة دي بتوريك حاجة غريبة أوي .. كل شيء ربنا بيعمله بيكون بحساب .. الصور اللي عندك دي كلها إتاخدت من القمر الصناعي Sentinel-5P وده قمر صناعي تابع لوكالة الفضاء الأوروبية ESA ودي إختصار European Space Agency .. القمر الصناعي ده خلال ال6 أسابيع اللي فاتوا بقي بيقيس كم إنبعاثات غاز اسمه أكسيد النيتروجين NO2 اللي إحنا كمهندسين ميكانيكا بنسميه إختصاراً نوكس NOx في الغلاف الجوي للكرة الأرضية خصوصاً فوق دول معروف إنها دول صناعية كبيرة شوية زي الصين و كوريا الجنوبية و إيطاليا و بريطانيا .. الملخص إن القرايات اللي القمر الصناعي خدها قالت إن نسبة الغاز ده في الغلاف الجوي بتقل وده معناه إن نسبة التلوث في الدول دي قلت جداً .. ده الملخص بس الحكاية محتاجه شوية شرح صغيرين.
أكسيد النيتروجين مش من الغازات اللي بيتقال عليها Greenhouse Gas .. هو مش زي ثاني أكسيد الكربون بس هو غاز بيطلع من عوادم السيارات و من دخان المصانع .. مشكلة الغاز ده في ضرره علي صحة البني أدمين لإنه من أكتر الغازات اللي بيسبب الربو Asthma .. الغريب إن إذا كان فيروس كورونا بيصطاد الناس اللي عندها أمراض مزمنة واللي جهازهم المناعي ضعيف ومن أمثلتهم الناس اللي عندها ربوا إلا إن في نفس الوقت عشان فجأة المصانع في المناطق دي قفلت و عشان الناس بطلت تركب عربياتها خلي الهواء اللي بنتنفسه أنقي بكتير .. ده لوحده سبب إن حالات الإصابة بالربو قلت و حتفضل تقل خلال الفترة الجاية .. بناء علي كلام منظمة الصحة العالمية فغاز أكسيد النيتروجين يعتبر سام لو تركيزه في الهواء زاد عن 200 مايكروجرام لكل متر مكعب .. عشان أغلب مواتير الديزل دلوقتي بقت موجوده في الترلات فعايزك تعرف مثلاً إن كل كيلومتر الترلة بتمشيهم بتطلع للجو 52 مليجرام أكسيد نيتروجين.
انا عايزك تبص علي التأثير البيئي لفيروس كورونا علي إنه زي ما تقول كده خلي البشر كلهم يحطوا نفسهم في تجربة علمية عمرهم ما فكروا يطبقوها قبل كده و التجربة دي هي هو يجري حاجة لو العالم كله بقي زي ألمانيا؟ .. يجري حاجة لو بطلنا نعتمد علي الوقود الحفري و بقينا نعتمد بشكل كلي علي الطاقة المتجددة Renewable Energy .. بناء علي الأرقام بتاعة وكالة NASA فمدينة ووهان Wuhan اللي تعتبر مركز إنتشار فيروس كورونا هي كمان مدينة إقتصادية مهمة جداً للصين .. المدينة دي عايش فيها 11 مليون بني أدم و فيها أكبر تكتل لمصانع قطع غيار العربيات مش بس في الصين إنما في العالم كله .. و طبعا عشان قطع الغيار دي تطلع من المصانع فانت بتحتاج أساطيل من عربيات النقل و الترلات .. فعلياً مدينة ووهان كانت من أكتر مدن العالم اللي نسبة أكسيد النيتروجين فيها ضاربه في السما .. في ال6 أسابيع اللي فاتوا النسبة دي قلت ما بين 10-30%.
إيطاليا اللي فعلياً لازم تقف قصادها شوية .. شمال إيطاليا هو اللي تقدر تقول عليه قلب الصناعة الإيطالية .. مشكلة شمال إيطاليا إن كل أدخنة المصانع بتتحاصر بقمم جبال الألب اللي قافله السكة فانت مع الوقت بتكتشف إن شمال إيطاليا هو من أكتر المناطق في أوروبا كلها اللي نسبة التلوث فيها بتبقي فوق المستوي الطبيعي بمراحل .. من ساعة ما حكومة إيطاليا أعلنت حظر التجوال الإجباري يوم 9 مارس و نسبة إنبعاثات أكاسيد النيتروجين في شمال إيطاليا قلت بنسبة 40% .. نفس الكلام علي بريطانيا .. رغم إن فعلياً يعني بريطانيا حالها أحسن من إيطاليا و رغم إن حظر التجول إتفرض في بريطانيا بعد إيطاليا بأسبوع إلا إن عشان 80% من نسبة غاز أكسيد النيتروجين في الجو هناك جايه من عوادم السيارات فنسبة الغاز في سماء إنجلترا قلت جداً خصوصاً في العاصمة لندن.
المصدر:
مقالة بعنوان Coronavirus pandemic leading to huge drop in air pollution نشرت في جريدة The Guardian وده لينك المقالة الأصلية:
https://www.theguardian.com/environment/2020/mar/23/coronavirus-pandemic-leading-to-huge-drop-in-air-pollution
