يمكن النهاردة من الأيام المميزة الحقيقة لإن النهاردة حنتكلم عن موضوع حرفياً وحقاً وصدقاُ مش محتاج أي مقدمة عشان أشرحلك هو يطلع إيه ده ولا أحط قدامك الصورة كاملة للموضوع عشان تبدأ تستوعب أهميته .. النهاردة حنتكلم عن تيك توك TikTok .. الApp اللي صحيح أنا شخصياً كمواطن مصري اسمي (أحمد فؤاد) مش بستخدمه ومش منزله علي الموبايل بتاعي بس فيه غيري فوق المليار بني أدم علي وجه الأرض بيستخدموه .. شهرياً في أميركا فيه فوق 170 مليون بني أدم بيخشوا عليه ومش معني أني مش بستخدم تيك توك إني مبقاش عارف شعبيته ولا أهميته بالنسبة لشباب اليومين دول .. إحنا عايشين في عصر كله عايز يتشهر فطبيعي إن الشباب يبقي عنده هوس بالتيك توك بس السبب اللي حيخلينا نتكلم عنه النهاردة هو يمكن خبر عدي علي الناس من غير ما حد يهرش في شعره ويسأل هو إزاي ده حيحصل وهو الحقيقة خبر طلع في إبريل 2024 يعني من كام شهر وهو إن طلع قرار بالإجماع من الكونجرس الأميريكي اللي هو مجلس الشعب بتاعهم إن التيك توك حيتمنع استخدامه جوه أميركا لو الشركة المالكة ليه وهي شركة صينية اسمها بايت دانس Byte Dance مباعتوش لحد يوم 19 يناير 2025 .. السبب الأساسي اللي مخلي الأمريكان قالبين علي تيك توك بالشكل ده هو إن هم شايفين إن التيك توك بيمثل تهديد واضح وصريح للأمن القومي الأميريكي .. أقف بقي هنا.
الموضوع له شقين .. شق منه إنت ممكن تكون فاهمه كويس وعارفه وشق تاني ممكن يكون تايه عنك .. الشق الأولاني هو إن تيك توك زيه زي Apps كتير علي موبايلك عايشه جوه حياتك .. هي عارفه إنت فين ورايح فين وبتكلم مين وبتسهر مع مين وبتشتري إيه وبتفكر تشتري إيه .. كل المعلومات دي بتبقي سداح مداح في إيد الشركات اللي بتعمل Apps دي بحيث المعلومات الشخصية بتاعتك بتتباع في سوق عكاظ بتاع الإنترنت عشان الشركات تستفرض بيك وتفضل كل شوية تستغرب هو إزاي جوجل عرف إنك بتفكر تشتري ساعة مع إنك لسه جايب سيرة الموضوع ده في رسالة علي واتس بعتها لمراتك .. تاني ده الجانب المنطقي اللي كتير مننا ممكن يبقي فاهمه وحاسه لإن تيك توك زيه زي أوبر زيه زي أمازون زيه زي Apps كتير بتسترزق بالمعلومات الشخصية دي وجزء جواك بيقولك وإيه يعني خليهم يتسرزقوا ما في الأخر ده بيخليهم يلاقوا الحاجة اللي أنا عايز أشتريها فإنت كمستهلك مش فارق معاك إن البياع يبقي عارف كل صغيرة وكبيرة عنك طالما في الأخر البياع بيجيبلك الحاجة اللي إنت عايز تشتريها .. لكن .. فيه جانب تاني وده اللي عايز أتكلم عنه شوية.
وفق استطلاع رأي عمله مركز استطلاع محترم أوي في أميركا اسمه Pew Research Center فحوالي 39% من الأمريكان بيعرفوا أخبار الدنيا من تيك توك وده المرعب الحقيقة .. بداية تيك توك كانت سنة 2016 تحت مسمي تاني الحقيقة اسمه دويون لما شركة بايت دانس نزلته لأول مرة في السوق المحلي الصيني .. سنة 2017 الشركة نزلت النسخة الدولية من App وسمته تيك توك اللي بدأ ينتشر في كل مكان ولا أكنه محلات الفرايد تشكن في مصر لما كوفيد Covid-19 قعد الناس كلها في بيوتها .. وهي دي الفكرة .. ده App عشان يسلي الناس مش أكتر ولا أقل .. بس بسبب إنه مملوك لشركة صينية ففي أغسطس 2020 الرئيس الأميريكي وقتها كيس الشيتوس الحجم العائلي (دونالد ترامب) طلع قرار رئاسي بحجب تيك توك جوه أميركا إلا إذا شركة أميريكية زي مايكروسوفت اشترته من بايت دانس .. شركة بايت دانس استأنفت القرار في المحاكم عشان يطلع قرار قضائي في ديسمبر 2020 بإلغاء قرار الرئيس حجب تيك توك علي أساس إن مش من صلاحيات الرئيس إنه يطلع قرار زي ده.
من 2020 لحد دلوقتي وشركة بايت دانس بتحاول بكل الطرق إنها تقنع الناس إن والله العظيم إحنا ملناش دعوة بالحكومة الصينية .. فيه خطوات عملوها مكنش ليها أي ستين لازمة زي مثلاً حاجة اسمها مشروع تكساس Project Texas إنهم ببساطة قالوا هو إنتوا مش قلقانين إن الحكومة الصينية ممكن تاخد المعلومات الشخصية بتاعة المواطنين الأمريكان اللي بيستخدموا تيك توك .. طب إيه رايكوا بقي إن المستخدمين الأمريكان للتيك توك كل المعلومات الشخصية بتاعتهم حتتحط علي سيرفرات أمريكاني تحت إشراف شركات أمريكاني مع إن أي حد دارس الف باء برمجة عارف إن بHack Tool متاخدش ربع ساعة شغل أي حد ممكن ياخد المعلومات دي برده .. والحقيقة إن في رأيي كونك بتفكر في ده بيخليني أقول إنك مش مستوعب أوي قد إيه تيك توك بالذات هو سلاح جبار في إيد أي حد عايز يستخدمه والسلاح ده يتلخص في كلمة واحدة .. الخوارزمية Algorithm.
كلمة Algorithm جايه من الخوارزمي اللي هو (محمد بن موسي الخوارزمي) عالم الرياضيات العظيم وده عبارة عن برنامج كومبيوتر دوره إنه يبدأ يفهم إنت مين وده بيبدا بفيديو .. هو بيتفرج عليك وإنت فاتح تيك توك .. بيبدأ يفهمك من الفيديوهات اللي إنت بتتفرج عليها .. من الفيديوهات اللي إنت مش بتتفرج عليها .. الفيديوهات اللي بتعملها لايك والفيديوهات اللي إنت بتعملها شير .. شوية ويبدأ يكون فكرة عن شخصيتك ويبدأ يعرضلك الفيديوهات اللي هو متوقع إنك حتحبها وحتبقي عايز تتفرج عليها .. تيك توك مليان بفيديوهات عن ناس متسغربين إزاي Algorithm بتاع تيك توك فاهمهم أكتر ما هم فاهمين نفسهم وسبحان الله يا أخي كتير منهم بيحكي عن إزاي التيك توك خلاهم يغيروا من ميولهم الجنسية بالذات دونا عن أي حاجة تانية .. يعني التيك توك يشوفك بتحب الأكل يقولك كمل أكل يا روحي عايز كرشك يبقي قدامك مترين .. يشوفك مضيعة فلوسك علي المكياج يقولك بعزقي كمان يا عنيا عايزين الناس تبصلك في الرايحة والجاية .. يشوفك بتدوري علي ابن الحلال يقوم يقولك بلا رجالة بلا نيلة خليكي في البنات أحسن .. هو مش بيحاول يخليك شخص أفضل .. هو بيحاول يخليك شخص شاذ.
كون إن الفيديوهات علي تيك توك قصيرة وكون إنك كمستخدم بتتفرج علي كم كبير من الفيديوهات ورا بعض فده بيخلي Algorithm بتاع تيك توك يفهمك أسرع ولا أجدعها دكتور نفسي بيحلل شخصيتك .. تخيل إنك تقعد مع محلل شخصيات محترف زي (هانيبال ليكتر) عشان يفهم شخصيتك ويبقي عارف إنت رحت فين وجاي منين وبتتفرج عليه وبيتفرج علي رسايلك كلها حتي الشخصية وقليلة الأدب .. باختصار هو برنامج كومبيوتر عايش جوه دماغك وهي دي الفكرة إن الخوف هو إن البرنامج ده يبدأ يلعب في دماغك ويوجهك زي ما هو عايز .. إزاي ده بيحصل؟ .. ده بقي السؤال اللي عنده الموضوع بيحلو .. تيك توك منتج صيني ولإنه منتج صيني فهو بيتعمل بنفس الدماغ الصينية وهي إن زعيم الأمة (جي جينبينج) ده رجل صح الصح وأي حاجة تطلع من بقه ومن بق الحزب الشيوعي الحاكم هي صح الصح .. النسخة الصيني من تيك توك معمولة كده والنسخة الأولانية من تيك توك لما اتعرضت للعالم كانت كده .. أي بوست أو فيديو يتكلم عن موضوع حساس بالنسبة للصينيين زي التيبت أو الإيجور أو مذبحة ميدان تيانانمين كان بيتم حجبها وسبحان الله المواضيع دي كلها غطيناها هنا .. الخوف إن تيك توك يبدأ يلعب في دماغك بحيث يقنعك ب3 حاجات: الصين حلوة .. أميركا وحشة .. إنت شاذ.
علي الناحية الثانية صدقني لو قلتلك إن حتي بعد ما (ترامب) بقي رئيس تاني وغالباً حيمسك في خناق تيك توك ومش حيهداله بال غير لما يطردهم بره أميركا فهو مش بيعمل كده عشان يحمي المجتمع الأميريكي من الفساد الأخلاقي أو يحمي المعلومات الشخصية بتاعة المواطنين الأمريكان .. هو بيعمل كده عشان الفلوس .. تيك توك كل حبة حلوين من Market Share أو نصيب شركات السوشيال ميديا الأميريكية من التورتة وخصوصا YouTube و ميتا META اللي كانت زمان فيسبوك .. في أغسطس 2020 مؤسس فيسبوك (مارك زاكربيرج) قعد في إجتماع مغلق مع (ترامب) في البيت الأبيض عشان يقنعه بإن تيك توك بيمثل تهديد واضح وصريح للأمن القومي الأميريكي مع إن نفس الإنتهاكات الخاصة بسرقة المعلومات الشخصية بالناس اللي بتعملها بايت دانس هي هي اللي بتعملها فيسبوك بس عشان فيسبوك شركة أمريكاني فده حلال بس بايت دانس شركة صيني فده حرام حرام حرام.
المصادر:
- فيديو بعنوان TikTok Ban: Last Week Tonight with John Oliver (HBO) نشر علي YouTube وده لينك المقالة الأًصلية:
https://www.youtube.com/watch?v=5CZNlaeZAtw
