في الإسبوع الخامس من الدوري الإسباني الموسم ده إتلعب ماتش يبان محسوم من قبل ما يتلعب بين برشلونة و فرقة إسمها جرانادا أو غرناطة بالعربي علي ملعب غرناطة و الإعلام الإسباني جاتله صدمة نفسية لما الماتش خلص 2-0 لصالح غرناطة و كانوا وقتها في المركز الثاني اللي يؤهلهم إنهم يلعبوا الموسم الجاي في بطولة Champions League .. ناس كتير قالت إن دي مجرد بداية موفقة لفرقة محكوم عليها إنها يا تنافس علي البقاء يا إما لو محظوظين أوي يبقوا في مركز وسطاني ضمن فرق الدوري .. أدينا في الإسبوع ال13 من الدوري و فرقة غرناطة في المركز السادس و ده مركز بيؤهلهم إنهم يلعبوا في بطولة Europa League و بينها وبين متصدرالدوري برشلونة نقطتين بس .. من إسبوعين بالضبط غرناطة كانوا متصدرين الدوري و محدش عارف يكلمها .. متصدر بقي .. أنا مش حبالغ لو قلت إن فرقة غرناطة فشخت الدوري الاسباني في أفكاره الموسم ده .. بس في نفس الوقت إنت لازم تبقي عقلاني شوية و تشغل مخك .. هل ممكن غرناطة تكرر معجزة ليستر سيتي و ياخدوا الدوري؟ .. صعبة بس ممكن؟ .. مستحيل؟ .. رأيين عكس بعض بس تعالوا نبص عليهم بسرعة.
عشان تنافس في الزمن الأغبر بتاعنا ده إنت لازم يبقي معاك فلوس و إنتي يا فرقة غرناطة يا ولداه محلتكيش اللضا .. إستادهم إسمه لوس كارمينيس Los Carmenes يدوبك بيشيل 19,000 بني أدم .. دي فرقة لو جيت تحسب مرتبات اللاعيبه كلهم تجمعها علي بعضها مش حيجمعوا مرتب (ليونيل ميسي Lionel Messi) في الشهر .. غرناطة هي ثالث أصغر ميزانية من ضمن فرق الدوري الإسباني و مفيش غير يدوبك فرقتين هم بلد الوليد و ريال مايوركا هم اللي ميزانيتهم أقل منهم .. انا شخصياً و ده رأيي أنا إن الSystem اللي حاطه إتحاد كرة القدم الإسباني بيقتل أي فرصة إن نادي يطلع ينافس ريال مدريد و برشلونة لإن إزاي لايحة الإتحاد تقول إن نادي غرناطة مش مسموحله غير إنه يصرف 35.6 مليون يورو علي المرتبات كل سنة بس برشلونة من حقهم يصرفوا 671 مليون يورو و ريال مدريد بيبعزقوا 641 مليون يورو علي المرتبات بس .. فلو علي الفلوس ففرقة غرناطة مفشوخة و ده بيخلي فرصتها إنها حتي تنافس برشلونة و ريال مدريد لحد أخر الموسم حاجة مستحيل تحصل .. فكك من المرتبات .. حتي التاريخ بيقول إن غرناطة معندهاش فرصة .. في تاريخ الفرقة دي حصل مرة واحدة بس إنهم تصدروا ترتيب الدوري الإسباني .. عارف إمتي؟ .. في الإسبوع الخامس من موسم 1973-1974 .. عارف فضلوا متصدرين قد إيه؟ .. هو يدوبك إسبوع واحد .. بعد 46 سنة ترجع الفرقة تتصدر بعد ما عدي لحد دلوقتي ربع الموسم .. لحد دلوقتي الصورة سودا .. مفيش عاقل يقدر حتي يهبد و يقول إن غرناطة حتكمل لحد أخر الموسم ضمن الأربعة الكبار حتي .. بس إتقل .. أنا حكيت النص الأولاني بس من القصة.
أي فرقة كورة لازم تتبني علي عمود فقري و غرناطة فرقة عمودها الفقري في رأيي أنا الشخصي حتي أقوي من فرقة الأهلي اللي تعتبر أقوي فرقة في أفريقيا .. غرناطة الموسم اللي فات كانت فرقة بتلعب في دوري الدرجة الثانية أو دوري المظاليم بتاع إسبانيا .. هم إتاهلوا للدوري الممتاز بعد ما خلصوا الموسم في المركز الثاني و الموسم ده الفرقة ميكس بين لاعيبه كملت من الموسم اللي فات و بين لاعيبه لسه صغيرة ليهم مستقبل و فيه لاعيبه عايزة تقول للناس كلها إن لسه الدهن في العتاقي زي (روبيرتو سولدادو Roberto Soldado) المهاجم اللي عدي علي أندية بعدد شعر راسك من ضمنها توتنهام .. حارس المرمي بتاعهم يبقي البرتغالي (روي سيلفا Rui Silva) و الموسم ده هو عامل تاني أكبر عدد كلين شيت في الدوري بعد (يان أوبلاك Jan Oblack) بتاع أتليتيكو مدريد .. قلب الدفاع اللي قدامه يبقي الشاب البرتغالي برده (دومينجوز ديوراتي Domingos Durate) و رغم إنه لسه عنده 24 سنة بس تحسه سابق سنه و إسمعها مني كلمة إن الواد ده حيبقي قلب الدفاع الأساسي في منتخب البرتغال .. خط النص بتاعهم غالباً بيتكون من 3 بس بلا منازع أهم واحد و أحرف واحد هو (يانجيل هيريرا Yangel Herrera) و ده كان ناشيء في مانشستر سيتي و راح إعارة لغرناطة .. الهجوم بيقوده العجوز أبو 34 سنه (سولدادو) و جنبه جناحين واحد مش بيضيع إسمه (داروين ماتشيز Darwin Machis) و واحد بيجري ولا الطيارة المحروقة إسمه (أنتونيو بويرتاس Antonio Puertas) .. ماسكهم مدير فني بيفهم إسمه (دييجو مارتينيز Diego Martinez) و ده إكتشفه بني أدم فشيخ إسمه (مونشي Monchi) شغال مدير نشاط الكورة في نادي إشبيلية عشان يجيبه يبقي مساعد (يوناي إيميري Unai Emery) أيام ما كان ماسك إشبيلية.
يمكن في رأيي الحاجه اللي من غيرها غرناطة عمرها ما كانت حققت كل ده هو إن مالك النادي ماشي بمبدأ إدي العيش لخبازه .. غرناطة نادي مملوك لرجل أعمال صيني إسمه (جيانج ليز- هانج Jiang Lizhang) و ده رجل عارف إنه لا بيفهم لا في الطور ولا في الطحين فيما يتعلق بكورة القدم و عشان كده هو سايب مدير النادي (أنتونيو فيرنانديز Antonio Fernandez) يمشي النادي زي ما هو شايفه صح و علي فكرة هو اللي حط عينه علي المدير الفني للفرقة (دييجو مارتينيز) و جابه عشان يمسكها .. فعلياً مش كتير متوقعين إن غرناطة تفضل مستحمله كمان 28 ماتش بس لو حصل و الفرقة دي عملتها فده في رأيي يخلينا نقول إنهم حيعملوا معجزة يمكن أكبر من معجزة ليستر سيتي مع مديرهم الفني وقتها (كلاوديو رانييري Claudio Ranieri) .. أنا بس حابب أختم بشوية أرقام مخلياني متفائل جداً بتجربة جرانادا .. الموسم قبل اللي فات اللي هو موسم 2016-2017 الفرقة دي هبطت دوري المظاليم زي ما قلت و في الموسم الإسود ده جابوا 17 جون بس طول الموسم .. الموسم ده هم يدوبك لعبوا 12 ماتشات بس و جابوا 19 جون.
المصدر:
مقالة بعنوان Their entire wage bill would not pay Lionel Messi but Granada are sitting pretty on top of La Liga ahead of superclubs Real Madrid and Barcelona .. نشرت في جريدة The Daily Mail و ده لينك المقالة الأصلية:
https://www.dailymail.co.uk/sport/football/article-7622047/Granada-sitting-pretty-La-Liga-minnows-pull-miracle.html
مقالاتك حكاية اية الحلاوة دى