لو إنتي بلد ناوية تشتغلي عشان تعملي حاملة طائرات فنصيحة من أخوكي الصغير إفتكري إني قلتلك بلاش .. حاملة الطائرات دي تصنيعها عامل زي ما تكون رجل متجوز فتقرر تتجوز علي مراتك وفجأة بقي عندك بيتين مفتوحين وإنت مُطالب تصرف عليهم وهم الإتنين زي ما تقول كده ماسورة مصاريف مفتوحة ومش عايزه تتسد .. كان المفروض نفهم ده من سنة 1918 ودي السنة اللي الإنجليز صنعوا فيها أول حاملة طائرات يصنعها البشر وكان إسمها HMS Hermes أو إتش إم إس هيرميز .. الإنجليز فعلياً إتفشخوا مصاريف .. سنة 1918 هم خلصوا تصنيع الحاملة .. دخلوها الخدمة سنة 1926 ودي كانت حاجة أول مرة الناس تشوفها إن سفينة تقعد 8 سنين كاملة عمالين نحل في مشاكلها قبل ما ندخلها الخدمة خصوصاً في العشرينات .. جري الشريط أكتر من مية سنة وتلاقي نفسك قصاد واقع إن دول تتعد علي الصوابع اللي تحت إيدها حاملات طائرات زي أميركا وبريطانيا والهند وإيطاليا والصين وفرنسا .. حالياً فيه دولتين اللي هم روسيا وكوريا الجنوبية بيفكروا إنهم يبنوا حاملات طائرات جديدة .. اليابان بقي من ناحيتها حبت تبقي ناصحة شوية وتجيب حاملة طائرات هليكوبتر تعدل شوية في تصميمها بحيث إنها تخليها تشيل مقاتلات F-35B ودي النسخة من طيارات F-35 اللي تنفع تطير عمودي زيها زي أي طيارة هليكوبتر.
عشان سفينة يتقال عليها حاملة طائرات لازم يتوفر فيها شرطين أساسيين:
- إن يبقي فيها طيارات ينفع تقلع وتهبط من علي سطحها زيها زي أي طيارة بتطلع من أي مطار وعشان ده يحصل إنت بتلاقي نفسك محتاج تبني سفينة طويلة أوفر الصراحة فإنت عشان توفر فلوس وتقلل من طول السفينة بتعمل حاجة من إتنين .. يا بتلجأ للحل الأمريكاني إنك تركب حاجة إسمها منجنيق Catapults وده بالضبط زي إنك تجيب ناس صحابك يزقوا عربيتك لما تعطل عشان تديها زقة فبيبقي عندك ميكانيزم يدي للطيارة الزقة دي وهي طالعة .. أو إنك تلجأ للحل البلدي اللي الناس التانية اللي عندها حاملات طائرات إستخدمته اللي هو Ski Jump إنك بتعمل رامب زي الرامب بتاع الجراجات في أي مول عشان الطيارة وهي طالعة تطلع علي الرامب ده.
- الشرط التاني إن يبقي عندك طريقة تفرمل بيها الطيارة وهي بتهبط وبتتسمي Arresting Gear إن الطيارة وهي بتهبط بيبقي فيه خُطاف زي الخُطاف بتاع سنارة الصيد كده بيمسك في الطيارة ويجبرها تقف مع فرملة الطيار وهو بيهبط فبيخلي الطيارة مش محتاجة مسافة طويلة عشان تقف خالص.
لو حبينا نتكلم كمهندسين فحاملة الطائرات عشان تتصنع وتشتغل فيها مشكلة واحدة بس .. أه والله هي مشكلة واحدة والمشكلة دي إنها سفينة عادية جداً زيها زي أي سفينة بتشوفها وإنت قاعد علي البحر بس هي سفينة كبيرة حبتين .. لا حبتين إيه .. دي كبيرة فشخ .. أي حاملة طائرات في الدنيا طولها مينفعش يقل عن 180 متر وده علي فكرة تقريباً نفس طول برج القاهرة .. عندك مثلاً أحدث طراز حاملات طائرات تصنعها أميركا اللي هي Ford-Class طولها بيوصل 327 متر .. سفينة بالطول ده فهي لازم تبقي تقيلة أوي .. عارف إنت لما تملي البانيو بتاع بيتكوا وتقوم نازل فيه .. مش بتلاقي سطح المياه زاد لفوق عشان وزنك لما نزلت في البانيو .. أهي حاملة الطائرات بتبقي تقيلة لدرجة إنها لما بتنزل في المياه بتخلي أكتر من 100,000 طن مياه يحصلهم إزاحة لفوق زي الإزاحة اللي بتحصل لمياه البانيو بالضبط .. طب يا سيدي إحنا معانا فلوس وربنا موسع علينا من كرمه ونقدر نبني سفينة بالأبعاد دي .. ممكن تقولي حنمشيها إزاي؟ .. حتقولي إحنا نركب موتور إحتراق داخلي زي مثلاً Steam Engine حقولك أمين طب هو مش الموتور ده عشان يشتغل محتاج بنزين؟ ده معناه إنك مش بس محتاج مكان عشان تحط الموتور ده إنت محتاج توفر تانك للبنزين .. أو حتيجي تقولي إحنا نركب مفاعل نووي وهو اللي يمشي السفينة .. حلو .. طب هو إنت عايش في بلد عندها أصلاً تكنولوجيا نووية؟
بلاش حنمشيها إزاي .. يا سيدي إحنا مش بس معانا فلوس إننا نصنع جسم السفينة إنما كمان معانا التكنولوجيا النووية اللي تخلينا نقدر نركب مفاعل نووي فيها عشان نمشيها .. هي مش إسمها حاملة طائرات؟ .. يعني إحنا حاطين عليها سرب طيارات مقاتلة؟ .. طب هو مش سرب الطيارات المقاتلة ده عشان يشتغل محتاج بنزين طيارات ومحتاج ذخيرة وقطع غيار وورش عشان نصلح الموتور بتاع الطيارات وورش تانية عشان نختبر الموتور بتاع الطيارة بعد ما نصلحه ومحتاجين مكان عشان نعمل صيانة للطيارات دي؟ وليلة كبيرة أوي سعادتك .. طب إفرض محتاجين نصلح حاجة في Catapult أو في Arresting Gear .. طب إيه رأيك إحنا معانا فلوس نبني السفينة ومعانا تكنولوجيا نووية تمشيها وحنوفر أماكن لصيانة الطيارات فيه حاجة تانية محتاجينها؟ .. اه فيه .. أي حاملة طائرات عايش فيها بني أدمين .. بالميت خالص حاملة الطائرات الصغيرة الطاقم بتاعها بيبقي 6000 بني أدم والناس دي كلها عايزه مش بس أماكن يشتغلوا فيها إنما كمان عايزين أماكن يناموا فيها وياكلوا فيها ويلعبوا فيها كمان .. عايزين ميس ياكلوا فيه وعايزين مستشفي وعيادة أسنان وحمامات بالصرف الصحي بتاعها وجيم يتمرنوا فيه .. كل دي تفاصيل بتخليني أقول لأي حد بيسألني هي ليه مصر ميبقاش عندها حاملة طائرات هي اللي تبنيها من الصفر مش زي الميسترال اللي إحنا شاريينها من فرنسا أقوله زي ما (سلطان) في مسرحية العيال كبرت كان بيقول .. روحي ربي عيالك يا حاجة روحي ربي عيالك.
المصدر:
- مقالة بعنوان China’s troubled aircraft carrier proves why it’s so hard to build them نشرت في مجلة Popular Mechanics وده لينك المقالة الأصلية:
ttps://www.popularmechanics.com/military/navy-ships/a28691324/chinese-aircraft-carrier/
