تخيل نفسك للحظة شاب شايف نفسك بتعرف تكتب سيناريوهات أفلام ونفسك تبقي (وحيد حامد) الجديد الله يرحمه .. إتقالك إن عشان إسمك يكبر لازم الأول تكتب قصة فيلم أهبل من بطولة (علي ربيع) ومعاه الناس اللي كانت شغالة في مسرح مصر .. رحت الإجتماع بتاع الإنتاج ولقيت المنتج اللي غالباً ميعرفش الألف من كوز الدرة بيسأل الفريق اللي حيكتب السيناريو عن أفكارهم للفيلم الجديد اللي المفروض إنه حيتعرض في العيد الكبير وحيكسر الدنيا .. خليك فاكر إن إنت إتربيت علي أفلام (وحيد حامد) خلي بالك .. لقيت شاب تاني جه وقف وبدأ يتكلم عن فكرته .. الفكرة إن فيه مسئول رفيع المستوي في الدولة محدش عارف إسمه بس هو عطي لنفسه إسم مستعار Q أو كيو اللي هو الحرف الإنجليزي والمسئول ده بدأ ينشر علي الإنترنت بوستات بتقول إن ورا الكواليس وفي السر الرئيس في حالة حرب شرسة ضد تحالف من الفنانين ورجال الأعمال والسياسيين اللي إحنا بنسميهم الدولة العميقة Deep State .. لقيت نفسك بتهرش في شعرك وبتقول فكرة مش بطالة والله .. بس إستني لسه التقيل جاي.
الأخ اللي اسمه Q ده بيحذر الناس إن حيجي يوم هو بيسميه الصحوة الكبري أو The Great Awakening وهي إن الرئيس يؤمر بالقبض علي أعضاء التنظيم السري اللي عشان يجيبوا فلوس يمولوا بيها حربهم ضد الرئيس عاملين شبكة دعارة للأطفال .. بدأت تتخض أنا عارف .. طب إيه رأيك بقي إن أعضاء التنظيم السري دول دايسين كمان في استحضار الجن وإنهم بينقوا شوية من الأطفال اللي هم بيخطفوهم عشان يقتلوهم وبيشربوا دمهم عشان الجن يزود من عمر أعضاء التنظيم .. فيه حد في القعدة رفع إيده سأل الشاب صاحب فكرة السيناريو معلش يعني هو الرئيس عرف إن التنظيم ده موجود إزاي؟ .. قالك إن فيه ضباط في المخابرات الحربية والقوات المسلحة شموا خبر عن التنظيم وهم اللي جندوا الرئيس إنه يقف ضد التنظيم ده عشان ينقذ البلد .. هنا الناس اللي في الإجتماع كلهم سقفوا .. برافو .. فكرة بمليون جنيه .. صح؟ .. دي مش فكرة فيلم حضرتك .. فيه ناس في أميركا مقتنعين بده ومسميين نفسهم QAnon.
عارف إنك مش مصدق بس ده حقيقي .. Q اللي في إسمهم QAnon دي كناية عن أو رمز المسئول السري اللي محدش عارفه .. (دونالد ترامب) هو الرئيس المنتظر اللي حيحمي أميركا والعالم و هو اللي حينفذ The Great Awakening .. التنظيم السري اللي هم بيتكلموا عنه فيه ناس زي (باراك أوباما) زي (هيلاري كلينتون) وزي (إيمينيم) زي (أوبرا وينفري) وزي (توم هانكس) .. الناس دي مقتنعة إن كل الأخطاء الإملائية اللي (دونالد ترامب) بيعملها في كل مرة بينزل توييت علي تويتر وبتوع برامج التوك شو بيهزقوه بسسببها هم مقتنعين إن دي مش أخطاء إملائية إنما دي شفرات سرية بينه وبين المسئول السري Q وضباط المخابرات والقوات المسلحة اللي مجندينه .. أي حاجة إنت شايفها غلط عملها (ترامب) هي مش غلط ولا حاجة .. دي جزء من الحرب المقدسة بتاعته ضد التنظيم السري.
البداية كانت في 2016 لما (دونالد ترامب) بقي رئيس .. طبيعي وبتحصل كتير إن لما يجي رئيس لسانه زفر زي (ترامب) في جو أصلاً متوتر يطلع أنصاره علي الإنترنت بنظريات مؤامرة فشيخة .. إحنا هنا في مصر شفنا ده بعنينا سواء مع الإخوان أو مع العسكر .. الجديد كان فيروس كورونا .. اللي حصل بعد كده هو ميكس بين الفراغ والوساخة .. فترة الحظر الأولانية خالص بتاعة فيروس كورونا لعبت في مخ الناس .. محدش كان متخيل أربع شهور من القعدة في بيت بين أربع حيطان ممكن تعمل إيه في نفسية البني أدمين .. في مصر الستات كلها عملت بيتزا وكيكة .. في أميركا معدل الإنضمام لFacebook Pages اللي ماسكها ناس مقتنعة بأفكار QAnon نطت بنسبة 700% بس فيه نقطة .. في البداية خالص الAlgorithm أو Software بتاع Facebook مكنش فاهم أوي هو QAnon دول بتوع إيه بس العباقرة بتوع Facebook شافوا كلمات زي ضد التطعيمات Anti-Vax ودي من الأفكار اللي QAnon مقتنعين بيها إن التطعيمات زي اللي ضد شلل الأطفال دي مؤامرة عالمية ضد الأطفال وقالك بااااس الناس بتوع QAnon دول حاجة شبه Health Keepers كده .. البهايم بتوع Facebook بقوا بيحطوا جروبات QAnon قصاد الناس بتاعة الدايت والنظام الغذائي البعيد عن الكيماويات وإن الأدوية الكيميائية غلط ولازم نرجع تاني نتداوي بالأعشاب .. واحدة واحدة QAnon كبرت علي Facebook وعلي الإنترنت لحد ما حتي الإنترنت مبقاش قادر يحتويها ونزلت الشارع .. وهنا الدنيا خرجت عن سيطرة أي حد.
لما مكتب التحقيقات الفيدرالي FBI اللي هو حاجة شبه الأمن الوطني عندنا في مصر يطلع يقول علي QAnon إنها تهديد إرهابي داخلي يبقي إنت قدام مصيبة سودا .. إنت بتتفرج علي مشاهد إقتحام الناس المؤيدين ل(ترامب) للبرلمان وإنت مصدوم بس ده لإنك مشفش الفيلم من أوله .. الفيلم من أوله إن فيه أحداث كتير كانت مقدمات بس إحنا عشان عايشين في مصر مخدناش بالنا منها .. حصل إن مواطن أمريكاني عايش في ولاية نورث كالورينا اللي هي حاجة شبه المنيا كده في الصعيد عندنا خد بندقيته الألي ودخل محل بيتزا في العاصمة واشنطن وضرب نار عشان كان متخيل إن صاحب محل البيتزا ده جزء من التنظيم السري لإغتصاب الأطفال اللي (ترامب) بيحاربه .. في يونيو 2020 رجل خد بندقيته الألية ومسدسه وراح لسد هوفر وده حاجة زي السد العالي في مصر وحاول يسيطر علي السد ولما إتسأل إنت بتعمل إيه يا حبيبي قالهم دي مهمة Q بعتهالي علي الإنترنت .. حرائق الغابات في ولاية كاليفورنيا كان السبب فيها ناس منضمين لحركة QAnon .. في ولاية أريزونا حصلت كذا حادثة ضرب نار متبادل بين الشرطة ومسحلين منتمين لحركة QAnon مقتنعين إنهم بينفذوا مهمات قالهم عليها Q عشان يساعدوا (ترامب) يهزم التنظيم السري .. في يوليو 2020 شاب أميركاني عمل فيها The Punisher وببندقية ألية دخل فيلا زعيم عصابة خلص عليه هو ورجالته ولما إتقبض عليه كان دفاعة عن نفسه إن Q قاله يعمل كده .. ده كان السواد .. اللي جاي أسود بقي .. في الإنتخابات الداخلية للحزب الجمهوري بتاع (ترامب) فيه 50 بني أدم رشحوا نفسهم لمناصب جوه الحزب وهم ناس منتمين لحركة QAnon وفيه واحدة منهم كسبت فعلاً الإنتخابات البرلمانية وحتبقي عضوة في الكونجرس اسمها (مارجري تايلور جريين Marjorie Taylor Greene) .. اللي إنت بتشوفه في أميركا دلوقتي ده مجرد البداية .. الناس بتاعة QAnon شايفه (ترامب) هو المنقذ بتاعها وعشان كده إحنا داخلين علي أيام سودا.
المصادر:
- حلقة من برنامج The Daily Show with Trevor Noah وده لينك الفيديو علي YouTube:
https://www.youtube.com/watch?v=tTeRofqTdlg - مقالة بعنوان QAnon is taking over the republican party نشرت علي موقع Vice وده لينك المقالة الأصلية:
https://www.vice.com/en/article/m7ap74/qanon-has-taken-over-the-republican-party
