واحدة من أكتر الحاجات اللي بتعجبني في اليهود و الشيعة هي إنهم بيتعلموا كويس أوي من أخطاءهم ويمكن أكبر دليل علي كده هو الديربي المسلي أوي بين حزب الله و إسرائيل و خليني عشان مقعدش اتكلم كتير في حاجات ملهاش لازمة اخش في الموضوع علي طول .. سنة 2006 لو تفتكر قامت حرب صغيرة كده اتسمت حرب لبنان الثانية بين حزب الله و إسرائيل .. الحرب دي استمرت 34 يوم وكانت أهم حاجة فيها هي إن كل يوم حزب الله يضرب إسرائيل بصواريخ جراد و كاتيوشا ودي صواريخ أرض – أرض بس علي قد حالها شوية و إسرائيل ترد بغارات جوية علي المدن اللبنانية .. في 34 يوم حزب الله ضرب علي إسرائيل 4,000 صاروخ يعني بمعدل 125 صاروخ بيتضرب علي إسرائيل في اليوم في الأخر خلص سببوا وفاة 50 إسرائيلي.
يوم 21 يونيو 2020 حزب الله نشروا علي الإنترنت فيديو ترويجي أو سميه إعلان زي إعلان بيبسي مع (عمرو دياب) كده و في الفيديو ده هم قالوا إنهم زمان كانوا بيفرحوا أوي لو صواريخهم قدرت توصل للعاصمة الإسرائيلية تل أبيب .. دلوقتي الوضع اختلف يا (لينا) .. دلوقتي يقدروا يضربوا أهداف محددة بالإحداثيات بتاعتها جوه تل أبيب .. كل ده و صوت الأمين العام للحزب (حسن نصر الله) الله يرحمه بيتكلم في الخلفية وكان ناقص والفيديو يخلص بيخلص يضحك ضحكة الجوكر بس اللي فيلم The Dark Knight مش في فيلم Joker .. بس اللي أنا عايز أركز عليه هو إن فيه كلمة معينة اتكررت كتير في الفيديو و الكلمة دي هي Precision-Guided Missiles ودي تبقي الصواريخ الموجهة.
زمان صواريخ جراد و صواريخ كاتيوشا اللي كانت تحت إيد حزب الله كانت زي تحديف الطوب كده اللي هو اضرب بس و سمي الله كده و إن شاء الله حنفرقع حاجة .. من كام سنة إيران و حزب الله بدأوا مع بعض مشروع جديد اسمه مشروع الدقة Project Precision فكرته إن إيران تبني في سوريا و لبنان مصانع تحت بير السلم لإنتاج قنابل و صواريخ موجهة .. ده السبب إنك كل شوية تسمع في الأخبار إن الإسرائيليين نفذوا غارة ضد منشأة صناعية في سوريا .. المشكلة .. أو دي مشكلة من وجهة نظر الإسرائيليين .. إن حزب الله دلوقتي بيعمل مصانع زي دي في لبنان .. المصانع اللي في سوريا سهل تتضرب بالطيران .. أساساً محدش حيهتم ولا حيسأل فيه كام مدني مات في أي غارة تعملها إسرائيل علي سوريا .. لكن لو إسرائيل فكرت تضرب مصنع من دول في لبنان حتبقي مصيبة خصوصاً لو مات مدنيين .. المشكلة الأكبر إن حتي لو حزب الله اكتفي بالمصانع اللي في سوريا ففي الأخر برده الصواريخ دي حتتنقل تروح جنوب لبنان و بتتوزع علي القري اللي بطول الحدود بين إسرائيل و لبنان .. الصواريخ دي بيخبوها في بيوت مواطنين لبنانيين و طبيعي إن حيبقي صعب أوي إن إسرائيل تضرب البيوت دي.
حتي لو إسرائيل قالت بسيطة احنا حنخلي سلاح الجو بتاعنا يضرب البيوت اللي حزب الله مخبي فيها صواريخه .. ده علي فرض إن الإسرائيليين كانت عندهم معلومات استخباراتية متخرش المياة بس خلينا نفترض ده يعني .. المهم إن ده معناه إن عشان إسرائيل يبقي شكلها حلو قصاد العالم فهم حيستهدفوا البيوت دي بقنابل ذكية موجهة بالليزر مثلاً بحيث يقللوا الأعداد المتوقعة للضحايا المدنيين .. جميل .. قالك إن فيه مشكلة إن احتياطي القنابل دي اللي تحت إيد سلاح الجو الإسرائيلي مش كبير .. مش بس كده .. من بعد حرب أكتوبر 1973 و الأمريكان شايلين علي جنب كده لوقت زنقة شوية قنابل ذكية تحت مسمي War Reserve Stockpile Ammunition – Israel واختصاراً بيسموه (WRSA-I) .. الأمريكان سنة 2006 سلفوا الإسرائيليين شوية قنابل من اللي محطوطين عي جنب دول و فيه كلام علي إن حتي القنابل اللي فاضله اللي الأمريكان شايلينهم لو جمعتهم علي القنابل اللي تحت إيد الإسرائيليين مش حيكفوا .. تدري ليش؟ .. أقل التقديرات بتقول إن حزب الله تحت إيده 100,000 صاروخ أرض- أرض موجه متنشنين علي إسرائيل.
المصادر:
- مقالة بعنوان In a third Lebanon war, Israel will have to contend with increasingly lethal Hezbollah missiles نشرت في مجلة Forbes وده لينك المقالة الأصلية:
https://www.forbes.com/sites/pauliddon/2020/06/27/in-a-third-lebanon-war-israel-will-have-to-contend-with-increasingly-lethal-hezbollah-missiles/?sh=8b1a6024b5e4
