و الأن مع فقرة أحدث خناقات (ترامب) و اللي مع شلة البنات اللي قدامك في الصورة دول .. الأمريكان بيسموهم شلة البنات أو The Squad و دول يبقوا 4 بنات أعضاء في الكونجرس عن الحزب الديموقراطي و تقدر تقول إنهم مبيسيبوش فرصة عشان ينكدوا علي (ترامب) تعدي كده من غير ما يمسكوا فيها بإيديهم و سنانهم .. تحس إنهم صحاب مراته و عارفين إنه بيضربها فقرروا يقرفوه في عيشته .. الأربع بنات دول هم (رشيدة طالب) أول ست من أصل فلسطيني تخش الكونجرس .. (إلهان عمر) أول ست محجبة تخش الكونجرس .. (أليكساندريا أوكازيو كورتيز Alexandria Ocasio Cortez) بنت منطقتي عشان إسمها إسكندرية و دي تبقي من أصغر أعضاء الكونجرس سناً .. و أخيراً (إيانا بريزلي Ayanna Preseley) بنوتة سمرا برده في الكونجرس .. المهم .. من كام يوم (ترامب) تقريباً أعصابه فلتت و طلع كتب تويته قال يا ريت الأربع بنات دول يريحونا و يرجعوا للأماكن اللي هم جم منها اللي مليانه جريمة و لما ربنا يفتحها في وشهم يبقوا ييجوا يقولونا هم عملوا إيه .. لحد دلوقتي التويتة خلصت .. نيجي بقي للأستوديو التحليلي للتويتة.
إنت بتتكلم عن 4 بنات .. منهم 3 بنات إتولدوا في أميركا و الرابعة اللي هي (إلهان عمر) إتولدت في الصومال بس جت كمهاجرة و هي صغيرة و معاها الجنسية الأميريكية .. إنت جيت علي 4 بنات كلهم يا إما من أصول عربية أو أفريقية أو لاتينية و قلتلهم إرجعوا للمكان اللي أنتوا جيتوا منه لإن خلينا نكون صادقين مع بعض (ترامب) مبيشوفش أي حد مش أبيض علي إنه أمريكاني حتي لو معاه الجنسية .. تاني يوم عمل مؤتمر صحفي و إتسأل في المؤتمر ده هو إنت مش قلقان إن ناس كتير قالت عليك عنصري إنك قلت كده لأربع بنات مش بيض فكان رده المستفز الحقيقة إنه مش قلقان لإن فيه ناس كتير شايفه اللي هو شايفه .. لسه الناس حتقول يا دي النيلة علي العنصرية اللي هو فيها قام مكمل كلامه و قال إنه مكنش قصده إن البنات يمشوا علي طول إنما ممكن يرجعوا وقت مع يحبوا .. تحس إنه بيتكلم عن مراته اللي إتخانق معاها و قالها لو عايزه تروحي لبيت أمك روحي و إرجعي وقت ما تحبي .. بعدها بكام يوم كان في مؤتمر شعبي و إتكلم عن التويتة اللي خلت الناس كلها تشتم فيه و في نص كلامه الجمهور اللي قدامه بدأ يهتف Send Her Back .. خلي بالك بقي .. التويتة كان بيتكلم فيها عن 4 بنات .. بس الناس كانت بتهتف إنهم عايزين بنت واحدة بس اللي ترجع بلدها .. يا تري هم قصدهم علي مين؟ .. برافو إنت كسبت معانا .. هم بيتكلموا عن (إلهان عمر) لإنها الوحيدة من الأربعة اللي متولدتش في أميركا .. (ترامب) فضل شوية علي المسرح ساكت يسمع الناس بتهتف Send Her Back و علي وشه إبتسامة عريضة و كإنه بيقول للناس زيدوني عنصرية زيدوني.
بعدها بكام يوم الإعلام سأله هو إنت ليه بالصلاة علي النبي مقلتش للناس اللي بتهتف Send Her Back إيه الكلام الماسخ اللي انتوا بتقولوه ده .. طلع قال لا يا جماعة أنا مكنتش موافق علي اللي بيتقال و حاولت أمنعهم بإني إتكلمت بسرعة أول ما بدأوا يهتفوا .. بصوا .. البني أدم العنصري اللزج النصاب ده بيعصبني و يارب أشوفه بيغور في ستين داهية بره البيت الأبيض قادر يا كريم.
