مع كامل احترامي للناس اللي شايفه (رجب طيب اردوغان) انه احسن حاجه جت في السياسه زيه كده زي ورقه اللحمه من ايد البرنس بتاع امبابه بس خليني اقولك ان رايي بصراحه في اللي بيعمله (اردوغان) في سوريا انه رجل عيوطه .. ايوه زي ما سمعت .. (اردوغان) رجل عيوطه .. حضرتك قررت تتدخل عسكريا في سوريا .. حلو .. انت عارف وانت بتمضي علي القرار ان فيه ناس حتشتمك .. انت عارف انك بترمي عساكرك في التهلكه .. انت مودي جيشك حرب مش موديهم دريم بارك .. اكيد حيموتلك عساكر .. اكيد الدم حيسيل .. انت مش محتاج تبقي ابوالعريف عشان تتوقع ده .. بس انت محتاج تبقي رجل قد كلمتك .. تطلع تقول ايوه انا بعت قواتي و قابل اني اتعرض لخساير و حنستحمل و حنكمل لحد ما نحقق الهدف اللي احنا عايزينه .. بس ان بعد ما يتقتلك 33 عسكري تركي في محافظه ادلب علي ايد قوات تابعه للرئيس السوري (بشار الاسد) تقوم تجري تطلب عقد اجتماع عاجل لدول حلف شمال الاطلنطي NATO بناء علي الفقره الرابعه من معاهده واشنطن اللي حلف NATO اتبني علي اساسها و اللي بتقول ان اي دوله في الحلف من حقها تطلب اجتماع عاجل عشان تطلب مساعده و نصيحه الدول الاعضاء لما تتعرض الدوله دي لمصيبه سودا يبقي انت كده (رجل عيوطه) .. علي فكره دي المره السادسه خلال ال 71 سنه اللي اتعمل فيهم حلف NATO اللي دوله تطلب تفعل الفقره الرابعه .. ورغم اني اعتذرت في بدايه كلامي عن وصفي ل(اردوغان) باللفظ ده بس خليني اثبتلك وجهه نظري و اشرحلك ليه انا قلت عليه كده؟
هو انت يا (اردوغان) كنت مستني ايه من دول الحلف؟ .. اهم اجتمعوا زي ما حضرتك عايز في مقر الحزب في العاصمه البلجيكيه بروكسل وكل اللي عملوه انهم طلعوا بيان يعزوك فيه و يشجبوا اعمال العنف في سوريا و كأن سبحان الله يعني حلف NATO اقوي حلف عسكري في تاريخ البشر قلب علي جامعه الدول العربيه .. انت عارف من الاول ان دول الحلف مكنتش موافقه علي تدخلك في سوريا .. ايا كانت نيتك كانت ايه .. سواء كنت عايز تعمل منطقه عازله بينك و بين سوريا عشان تحمي نفسك من الاكراد او سواء كنت فعلا عايز تحمي محافظه ادلب اخر حته في سوريا مش في ايد (بشار الاسد) او حتي لو كانت نيتك انك توقف حنفيه اللاجئين السوريين اللي عمالين يسيبوا بلدهم و يروحوا عندك .. سواء كنت من جواك ملاك او شيطان .. انت عارف ان دول حلف NATO واقفه ضدك فليه تطلب الاجتماع ده اصلا؟
نصيحتي ليك وانا عارف ان فيه ناس حتقول وانت مين انت يا فسل عشان تنصح (اردوغان) ان حضرتك تبطل تبقي عيوطه و تبقي بجح .. قول اه انا داخل سوريا بلطجه و اللي عنده خراره يشرب منها .. انت عارف ان تدخلك في سوريا حيزعل الروس منك بحجه ان استخدامك للمدفعيه و الطيارات بدون طيار يعتبر خرق لاتفاقيه وقف اطلاق النار اللي اتوقعت سنه 2016 قال يعني قوات (بشار الاسد) بتبيع سبح بس انت محتاج تبص للروس و تقولهم طز .. مينفعش انك تلاقي دول NATO معبرتكش تقوم فاتح حدودك مع اليونان و تقول للاجئين السوريين عدوا و كانهم طفل لقيط بترميه علي باب جامع .. عيب .. حضرتك قررت تبقي بلطجي فكمل دور البلطجه للاخر .. مش مع اول نقطه دم تنزل تصرخ و تعيط زي (عادل امام) في فيلم الواد محروس بتاع الوزير .. صباعي .. دم.
المصدر:
مقاله بعنوان Erdogan is sorely testing the patience of the NATO alliance نشرت في جريده The Telegraph وده لينك المقاله الاصليه:
http://h.co.uk/news/2020/02/28/erdogan-sorely-testing-patience-nato-alliance/
