تعالي نتخيل إن حضرتك رجل متجوز و في الوييك إيند خدت المدام و رحت تعمل الشوبينج بتاع الإسبوع في كارفور أو هايبرماركت أو فتح الله ماركت أو أي كلمة أخرها ماركت .. نقول مثلاً إن خلال الإسبوع اللي أنتوا بتعملوله الشوبينج حتجيبكوا كام كيس مكرونة و كام كيس رز و كيس سكر و كام كيلو لحمة و كام كيلو فراخ بانية و كام علبة صلصلة و شوية خضار .. يعني إنت بتتكلم عن بالميت خالص 20 كيس بلاستيك و 15 طبق بلاستيك كلهم حيترموا في الزبالة .. عشان للأسف إحنا مفيش عندنا في مصر كيان يديلنا إحصائيات عن الموضوع ده فخليني أقولك الإحصائيات بتاعة أوروبا كنوع من التقريب .. دلوقتي المواطن الأوروبي العادي بيرمي في السنة 30 كيلوجرام زبالة بلاستيك و المشكلة إن تلتين الكمية دي هي زبالة البلاستيك اللي بيتعبي فيها الأكل اللي حضرتك بتروح تشتريه في كل زيارة مجيدة للسوبرماركت زي ما تكون رحلة الشتاء و الصيف بتاعة قبيلة قريش زمان .. ده معناه إن لو فيه طريقة إنك تروح السوبر ماركت معاك برطمان السكر اللي عندك في البيت و برطمان الرز اللي عندك في البيت و ترولي الخضار اللي عندك في البيت تاخدهم كلهم معاك السوبر ماركت تعبي فيهم أكلك و تروح بيتك يبقي إنت كده وفرت 20 كيلوجرام زبالة في السنة .. السيناريو ده مش خيال .. ده حصل فعلاً.
خليني أعرفك علي شركة هولندي إسمها بيتر بوت Pieter Pot و دي شركة إخترعت مفهوم جديد في الشوبينج إسمه Circular Supermarket أو السوبرماركت الدائري و هنا الإسم مش سببه إن المحل بتاعهم شكله دائري .. لا خالص .. إسم السوبرماركت الدائري دي معناها إن عندك سوبرماركت مفيهوش كاشير و مفيهوش حد بيعبي الحاجات اللي إنت إشتريتها في كياس بلاستيك و إنت خارج ..الشركة دي أسسمها إتنين واحدة إسمها (جوري شوماخر Jouri Schoemaker) عندها 30 سنة و واحد إسمه (مارتن بيمولت Martin Bijmolt) عنده 28 سنة و علي فكرة الشركة دي إتأسست سنة 2019 واللي عشان تفهم هي بتشتغل إزاي خليني أشرحلك ده بخطوات مشاركتك معاهم:
- خطوة رقم واحد: أولاً لازم تسجل معاهم عشان تتحط علي Waiting List أو قائمة إنتظار و مهم تفهم المنطق ورا وجود Waiting List .. دلوقتي سوبرماركت Pieter Pot بدأ يشتغل رسمي في مايو 2020 و لحد ديسمبر 2020 كان زباينهم وصلوا 3,000 بني أدم زود عليهم 30,000 بني أدم علي Waiting List فهي الفكرة مش إن الناس دي معندهاش زباين لإن الزباين كتير و الحمد لله .. هي الفكرة إنك عشان رميت كياس الزبالة من شغلك و مبقتش تشتغل بيها فبقيت إنت محتاج وقت عشان البضاعة تجيلك و تعبيها و تبعتها للزبون زي ما حتشوف دلوقتي.
- خطوة رقم إتنين .. لما ربنا يكرمك و يجي دورك كل اللي بتعمله إنك تخش علي Website بتاعهم تكتب طلبات البيت و ليكن مثلاً يعني كيلو سكر و كيلو رز و كيلو مكرونة و بتختار معاد وصول البضاعة لحد بيتك .. حضرتك بيجيلك مندوب توصيل و معاه 3 برطمانات إزاز كبار زي البرطمانات اللي بتحط فيها الحاجة في مطبخك و كل برطمان فيه حاجة من اللي إنت طلبتها و البرطمانات دي مصنوعة مخصوص من شركة هولندي إسمها PotNL.
- خطوة رقم ثلاثة .. بمجرد ما البضاعة بتفضي حضرتك بتخش علي Website تطلب حد يجيلك ياخد منك البرطمانات بالشنطة اللي هم جولك بيها و أهم حاجة إياك ثم إياك ثم إياك تغسل إنت البرطمانات .. إنت تديلهم البرطمانات وسخة زي ما هي و مع تسليم البرطمانات تكون محضر طلباتك عشان تستلم برطمانات جديدة بالبضاعة الجديدة اللي إنت عايزها.
- خطوة رقم أربعة .. البرطمانات الفاضية و الوسخة بتوصل لمقر شركة Pieter Pot و بتتنظف في Dishwasher ضخمة حبتين .. بالنسبة للبضاعة نفسها فهم بيتكلموا مثلاً مع شركة الضحي عشان توردلهم مش كياس سكر و دقيق و رز إنما شكاير و الموظفين بتوع شركة Pieter Pot بيحطوا هم السكر و الدقيق و الرز و غيرهم في البرطمانات بحيث لغينا خالص فكرة الكياس اللي بتترمي في الزبالة.
حاول تفكر في حاجة و هي إن الطريقة دي خلت سوبرماركت Pieter Pot يوفر 180,000 كيس بلاستيك كانوا حيترموا في الزبالة خلال سنة 2020 و دي أول سنة هم إشتغلوا فيها .. هم بيوفرولك 250 منتج مختلف من الرز للبقوليات للبسكوتات للكاتشاب للشيكولاتات و زيت الزيتون و الشوفان .. صحيح 250 منتج ميجوش حاجة قصاد 30,000 منتج اللي في المتوسط حتلاقيهم في أي سوبرماركت عادي بس أصبر عليهم شوية و حتلاقي الفكرة المطرقعة دي كبرت و يمكن في يوم من الأيام تبقي هي طريقة شغل السوبرماركتات في العالم.
المصدر:
مقالة بعنوان How this Dutch startup plans to disrupt the supermarket landscape نشرت في مجلة Forbes و ده لينك المقالة الأصلية:
https://www.forbes.com/sites/jeroenkraaijenbrink/2021/01/20/how-this-dutch-startup-is-going-to-disrupt-the-supermarket-landscape/?sh=6aeb2185469d
