فيه واحدة ست الله يرحمها كان إسمها (زها حديد) .. الست دي مفيش مهندس معماري في الدنيا ميعرفهاش .. هي كانت مهندسة معمارية عراقية بالمناسبة فاتحه مكتب إسمه Zaha Hadid Architects أو ZHA بس اللي بيخلي الست دي في حتة تانية خالص هي إنها كانت بتموت في حاجة إسمها كيرفات .. تقريبا أي مهندس بيخش يعمل Interview بيسألوه سؤال واحد: لو عايز أرسم خط من نقطة A لنقطة B حيكون عامل إزاي؟ .. لو إجابته كانت خط مستقيم مش بيتعين .. شعار المكتب ده كان ولازال إديني في الكيرفات و أنا احبك و أظن مفيش مبني يوريك الحكاية دي أكتر من اللي قدامك في الصور ده .. ده فندق إسمه أوباس Opus إتبني في الحتة اللي حول برج خليفة في دبي و (زها حديد) بنفسها هي اللي صممت المبني قبل وفاتها .. تخيل نفسك مكان (زها حديد) للحظة .. إنت جالك كلاينت قالك أنا عايز أفتح فندق في دبي .. قعدت تفكر شوية كده قمت قايله و أنا عندي ليك فكرة إنما إيه حتعجبك أوي .. أنا حعمل مبني من علي شكل مكعب زجاج بإرتفاع 93 متر و في نص المبني بالضبط حخرمه خرم زي ما يكون سوبرمان عدي منه في فيلم Man of Steel بإرتفاع 8 أدوار .. إيه رأيك في الفكرة؟
للناس اللي شغاله في حتة Architectural Design فالمبني بتاع فندق Opus ده يعتبر هو هو مبني فندق تاني إسمه مورفيوس Morpheus في مدينة ماكاو الصينية و اللي صممه كان مكتب (زها حديد) برده .. الفكرة إنك تعمل مبني علي شكل برجين و البرجين دول زي ما تقول كده سيحناهم و هم بيسيحوا لزقوا في بعض و كونوا شكل تاني خالص .. في حالة فندق Opus فإنت عايز يبقي عندك برجين زي ما يكونوا معمولين من الشمع و سيحناهم عشان و هم بيسيحوا يلزقوا في بعض و يعملوا شكل مكعب .. تعالي إنت في النص و أخرم المكعب ده .. البرجين متوصلين ببعض عن طريق حاجتين .. أول حاجة في الدور الأرضي عندك Atrium أو صالة كبيرة إرتفاعها 4 أدوار والله أعلم عملولها تصميم مكافحة الحريق إزاي؟ .. ثاني حاجة إن فيه كوبري واخد 3 أدوار عرضه 38 متر و إرتفاعه من الأرض 71 متر.
زيه زي تصميم برج خليفة و عشان المبني في الصيف الناس اللي جوه متموتش من الحر فالزجاج الخارجي هو في الحقيقة 4,300 لوح زجاج من طبقتين اسمه Low-E Glass عشان يعزل الحرارة .. و زي ما إنت شايف فالشكل الخارجي للمبني مش عدل .. ده كله كيرفات .. عشان كده ال4,300 لوح زجاج دول متعملوش في مصنع .. دول إتعملوا بمكنة 3D-Printing إتعملت مخصوص عشان خاطر المشروع .. ده مش معناه إن المبني ده LEED Certified لا سمح الله .. لو دخلت قريت شوية عن الديكور بتاعه فحتلاقي إن العفش Furniture كله من Recycled Material .. حتلاقي فيه Sensors متوزعه في كذا حتة في المبني عشان تعد فيه كام بني أدم و بالتالي بتعدل درجة حرارة التكييف و الإضاءة بشكل أوتوماتيك .. مش بس كده .. في الفندق ده مفيش حاجة إسمها زجاجات مياه بلاستيك .. زجاجات المياه كلها معمولة من ستانليس ستيل و مش بتترمي في الزبالة بعد ما تخلصها.
المصادر:
- مقالة بعنوان Zaha Hadid’s holey hotel turns heads in Dubai نشرت في موقع News Atlas و ده لينك المقالة الأصلية:
https://newatlas.com/architecture/opus-hotel-zaha-hadid-dubai/ - مقالة بعنوان Striking Zaha Hadid-designed building puts a void in a cuboid نشرت في موقع News Atlas و ده لينك المقالة الأصلية:
https://newatlas.com/opus-zaha-hadid-architects/61051/?itm_source=newatlas&itm_medium=article-body - مقالة بعنوان Zaha Hadid wraps hotel in striking exoskeleton نشرت في موقع News Atlas و ده لينك المقالة الأصلية:
https://newatlas.com/zaha-hadid-architects-morpheus-hotel/55042/?itm_source=newatlas&itm_medium=article-body - مقالة بعنوان Zaha Hadid’s signature curves come to the bathroom نشرت في موقع News Atlas و ده لينك المقالة الأصلية:
https://newatlas.com/zaha-hadid-design-vitae-collection/44620/?itm_source=newatlas&itm_medium=article-body
