سنة 2015 إتقال الخبر اللي لما سمعناه في مصر كلنا قلنا في صوت واحد .. جالك الموت يا تي اي داتا .. وقتها كان إسمها TE-Data بس إنت دلوقتي عارفها بإسم We .. الخبر كان إن الملياردير (إيلون ماسك Elon Musk) شركته SpaceX شغالة علي مشروع حيقلب حياة البني ادمين 180 درجة .. المشروع كان إسمه ستارلينك Starlink و فكرته بمنتهي البساطة هي ليه لا ميبقاش ليك Internet Access من أي حتة علي مستوي العالم؟ .. ليه لازم تقف في حتة فيها شبكة عشان تلقط إنترنت؟ .. ليه متقدرش تشغل أنغامي وإنت في قلب الصحراء؟ .. ده اللي مشروع ستارلينك بيحققه بس قبل ما تفرح أوي إنت محتاج تفهم إجابة سؤالين .. إزاي؟ .. و بكام؟ .. إزاي الفكرة دي حتتطبق؟ .. و حدفع كام عشان أخد الخدمة دي؟
الفكرة تافهة جداً .. إحنا حننشر الالاف من الأقمار الصناعية اللي نسبياً صغيرة و نخليها تلف حول الكرة الأرضية و هي اللي توفر خدمة الإنترنت .. القمر الصناعي الواحد إنت بتتكلم عن علبة وزنها 260 كيلوجرام بتقدر ترص 60 علبة منهم جوه صاروخ من طراز Falcon-9 من اللي بتصنعهم شركة SpaceX .. بمجرد ما القمر الصناعي يتحط في مداره علي إرتفاع 560 كيلومتر من سطح الأرض فهو بيحتاج حاجتين .. أول حاجة إنه بيحتاج يفرش الخلية الشمسية بتاعته اللي حتوفر الكهرباء للأربع أرايل اللي هي جمع إريال يعني Antenna ودي اللي حتوصل الإنترنت لحضرتك .. كمان الخلايا الشمسية دي هي اللي حتوفر الكهرباء لشعاع الليزر اللي حيربط كل 4 أقمار صناعية ببعض .. تاني حاجة القمر الصناعي بيحتاجها بمجرد ما يتحط في مداره إنه يشغل الصواريخ بتاعته .. هي بتبقي صواريخ دفع يعني Thrusters بس بتستخدم غاز كريبتون مضغوط عشان تزق القمر الصناعي في مداره بحيث مينجذبش للأرض.
سنة 2018 طلع أول قمر صناعي في مشروع ستارلينك للمدار بتاعه .. سنة 2019 شركة SpaceX أطلقت 60 قمر صناعي دفعة واحدة .. سنة 2020 عدد الأقمار الصناعية اللي حاليا في مدارها حول الكرة الأرضية وصلوا 1000 .. علي اخر 2021 الكلام اللي إتقال إن حتتعمل 3 طلعات بصاروخ Falcon-9 كل صاروخ بيقدر يشيل 60 قمر صناعي زي ما قلنا فإنت بتتكلم عن 180 قمر صناعي .. في حالة إنك بتسأل طب هم محتاجين كام قمر صناعي؟ فالإجابة إن لحد دلوقتي SpaceX واخدة موافقة وزارة الإتصالات الأميريكية إنها تبعت 12,000 قمر صناعي بحيث إن لو المشروع نجح فالشركة حتحاول تقنع الحكومة الأميريكية إنهم يزودوا عدد الأقمار الصناعية ل42,000.
نيجي بقي للسؤال الثاني .. حدفع كام؟ .. بس الأول تفهم إنت حتاخد إيه؟ .. عشان الأقمار الصناعية بتدور حول الارض في مدار نسبياً قريب جداً لإن 560 كيلومتر إرتفاع من علي سطح الأرض ده مش رقم علي فكرة فحتلاقي Latency أو البطء في وصول إشارة الإنترنت يدوبك ما بين 25-35 ملي ثانية .. ده معناه إن سرعة الإنترت مثالية جداً إنك تعمل كل اللي إنت عايزه .. تلعب PUBG .. تتفرج علي فيلم من علي EgyBest .. حتي سرعة الداونلود عليها كلام .. فيه تقارير علي موقع Reddit قالت إن سرعة Download حتكون ما بين 4.5-17.7 ميجابايت في الثانية .. تقرير عملته وكالة أنباء CNN الأميريكية قال إن سرعة Download حتكون ما بين 50-150 ميجابايت في الثانية .. زي ما إنت شايف مفيش رقم موحد أو حتي Range أرقام قريب .. كمان مفيش رقم رسمي لسرعة الرفع Upload .. فاللي يقولك إن سرعة الإنترنت بتاع ستارلينك طلقة فقوله بس إستهدي بالله كده و وحد الله في قلبك مفيش أي أرقام رسمية تؤكد أو تنفي الكلام ده .. حط ده قصاد إن علي حسب كلام CNN فإنت عشان تشترك في خدمة ستارلينك حتدفع 499 دولار قيمة إشتراك أول مرة و كل شهر حتدفع 99 دولار .. لحد فبراير 2021 فيه 10,000 بني ادم إشتركوا فعليا في الخدمة اللي حتتفعل رسمي خلال سنة 2021 .. علي فكرة .. وزارة الإتصالات الأميريكية دفعت من جيبها 856 مليون دولار لشركة SpaceX عشان خدمة ستارلينك تتوفر بأسعار مدعمة للمواطنين الأمريكان اللي عايشين في المناطق النائية .. لإن الحكومة الأميريكية لما جت حسبتها لقت إن أوفرلها تدفع المبلغ ده لشركة SpaceX من إنها بنفسها تعمل البنية التحتية لشبكة إتصالات و إنترنت منزلي للمناطق البعيدة في أميركا.
المصدر:
مقالة بعنوان What is Starlink? Elon Musk’s satellite internet service explained نشرت ف موقع Android Authority وده لينك المقالة الأصلية:
https://www.androidauthority.com/what-is-starlink-1134426/
