لو إنت بتشجع إيه سي ميلان فقلبي عندك و الله .. إنتوا فعلياً صعبانين عليا .. في حالة إنك مش فاهم أنا بتكلم عن إيه فميلان جابوا مدير فني جديد إسمه (ستيفانو بيولي Stefano Pioli) يمسك الفرقة .. لحد دلوقتي الخبر بالنسبة ليك كواحد بتتفرج علي كورة بس مش بتابع ميلان أوي هو خبر عادي .. بس بالنسبة للميلانيستا هم قالبينها مناحة بقالهم فترة و دي نقطة إنت محتاج تفهمها من وجهة نظرهم .. مبدأياً كده و بسم الله الرحمن الرحيم ده المدير الفني التاسع اللي ميلان يجيبه في أخر 5 سنين .. فعلياً ميلان قلب علي الزمالك بس الفرق إن إذا كان الزمالك ماسكه شخصية كرتونية فميلان ماسكه بنك أمريكاني .. شوف .. عارف لو كان بنك أوروبي كنت قلت ماشي أكيد في مجلس الإدارة حتلاقي ناس بتتفرج علي كورة و عارفين الفرق بين الأوفسايد و بين ضربة الجزاء .. بس بنك أمريكاني .. دول حتي بيسموا كورة القدم سوكر .. و مش بس دي المشكلة .. زود علي كده إن (ستيفانو بيولي) كان ماسك قبل كده إنتر ميلان و ده عشان أقربهالك تخيل إن الزمالك يجيب (مانويل جوزيه) يمسك الفرقة.
طب يا سيدي حنبقي ناس كبيرة و عاقلة و نشيل المعلومة دي من دماغنا و إحنا بنتكلم عن الرجل خصوصاً إن إيطاليا بالذات بلد مش بتهتم أوي بالحكاية دي .. (كارلو أنشيلوتي Carlo Ancelotti) بني إمبراطورية في ميلان و كان قبلها بيدرب يوفينتوس و رجع دلوقتي بيدرب نابولي عادي جداً .. (أنتونيو كونتي Antonio Conte) خلي إيطاليا كلها تنام من المغرب مع يوفينتوس و دلوقتي بيدرب إنترميلان عادي برده .. إنت بتبدأ تحس بحرقة الدم اللي عايش فيها أي حد بيحب ميلان لما تبدأ تضرب غطس أعمق في دماغ (ستيفانو بيولي).
ده رجل مش بيعرف يكسب .. لما كان في إنترميلان كانت نسبة فوزه بالماتشات يدوبك 50% .. ده رجل خلال الCareer بتاعته كمدير فني درب 13 فرقة ولا واحدة فيهم كمل فيها موسمين علي بعض .. هو موسم و بيمشي في نص الثاني .. تحسه رجل بيهتم بلبسه أكتر ما بيهتم بلاعيبته .. هو شيك جداً بس أوفر أوي الصراحة يعني إنت مدير فني لفرقة كورة مش موديل .. لما كان بيدرب فرقة فيورنتينا و لإن الفرقة بتلبس تي- شيرتات موف فكان بيحضر الماتشات لابس بلوفر برقبة لونه موف فوقه بليزر إسود عليه البادج بتاع النادي .. و لإن (ستيفانو بيولي) مبيقعدش في نادي فترة تخلينا نفهم دماغه ففعلياً مفيش حد فيكي يا إيطاليا يقدر يقول و هو متؤكد ميلان حيلعب إزاي تحت إيده.
ميلان دلوقتي فرقة فيها مشاكل كتير بس يمكن أهم و أكبر مشكلة فيهم إن اللاعيبه مش رجاله .. فيه لفظ تاني بيعبر عنهم أحسن بس انا بحاول أبقي مؤدب اليومين دول .. ميلان لعبوا 7 ماتشات في الدوري لحد دلوقتي و في 4 ماتشات إتطردلهم لاعيبه و سبحان الله متوزعين علي كل المراكز .. حارس المرمي (بيبي رينا Pepe Reina) إتطرد .. قلب الدفاع (ماتيو موساشيو Mateo Muscaccio) إتطرد .. الباك اليمين (ديفيد كالابيرا David Calabira) إتطرد مرتين .. ميلان عندهم إتنين مهاجمين كويسين بس لسبب ما محدش عارف يخليهم يعرفوا يلعبوا مع بعض .. الصيف ده ميلان دفعوا 26 مليون جنيه إسترليني عشان يشتروا مهاجم برتغالي عنده 20 سنة بس إسمه (رافايل لياو Rafael Leao) و الحقيقة إن الواد ده فعلاً حريف .. خش إتفرج علي الجون اللي جابه في فيورنتينا و يعتبر أول جون له مع ميلان و متع عنيك .. المشكلة إن اللي كان ماسك ميلان قبل (ستيفانو بيولي) كان واحد غلبان أوي إسمه (ماركو جيامباولو Marco Giampaolo) كان في دماغه إن ليه لا ميلان يلعب بإتنين مهاجمين اللي هم (رافايل لياو) و جنبه (كريستوف بياتيك Krzysztof Piatek) و الحقيقة إن الفكرة في حد ذاتها كويسة .. الأولاني حريف و مهاري و الثاني حيطه جوه منطقة الجزاء بس سبحان الله كل ماتش الإتنين يبدأوا يلعبوا مع بعض ميلان يخسر .. المنطق بيقول إن إتنين مهاجمين يبقي تلعب 4-4-2 بس ده محصلش .. ميلان جربوا كل الطرق اللي في الدنيا إلا 4-4-2 .. لعبوا 4-3-2-1 و بعد كده قلبوها 4-3-3 .. و دي نقطة (ستيفانو بيولي) محتاج يلاقي ليها حل .. لو الإتنين فهموا بعض ففيه ماسورة جوان حتتكسر في الفرق التانية و بشوية شغل في الدفاع ميلان حيبدأ يكسب تاني .. بس مهم تفهم إنك كميلانيستا محتاج يبقي عندك شوية صبر .. صحيح ميلان في المركز ال13 في الدوري بس الفرق بينهم و بين نابولي الرابع و ده مركز مؤهل لبطولة Champions League يدوبك 4 نقط بس.
المصدر:
مقالة بعنوان Ultras want new boss Stefano Pioli sacked days after taking charge نشرت في جريدة The Daily Mail و ده لينك المقالة الأصلية:
/www.dailymail.co.uk/sport/football/article-7560097/AC-Milan-news-Stefano-Pioli-avoid-sack-new-club.html
