خناقه كل بدايه موسم في اسبانيا .. يا تري مين حياخد الدوري؟ البارسا ولا الريال؟ .. متفهمش ليه ناس كتير بتسقط اتليتكو مدريد من حساباتها؟ .. اه معاك ان دي فرقه حلوه جدا بس عندها مشكله ان نفسها مش طويل اوي خصوصا في البطولات اللي اطول من الليله السودا زي الدوري .. عشان تكسب الدوري لازم تكسب كل الماتشات مع الفرق اللي تحت بير السلم و حاول علي قد ما تقدر متخسرش الماتشات الكبيره .. مشكله اتليتيكو مدريد انه كان بيخسر نقط قدام فرق المفروض انه كان يدوس علي وشها .. الوضع الموسم ده مختلف .. لو جيت انا دلوقتي قلتلك ان احتمال كبير اتليتيكو مدريد يبقي بطل الدوري الاسباني ناس كتير حتتريق و الحقيقه ان عندهم حق .. طب برشلونه راح فين؟ .. طب ريال مدريد راح فين؟ .. اللي انا عايز اتكلم عنه مش ايه هي مشاكل برشلونه ولا ايه هي عيوب ريال مدريد .. انا عايز اتكلم عن نقاط قوه اتليتيكو و اللي الموسم ده الفرقه عامله نيو لوك سيكسي اوي.
خط الدفاع بتاعهم لو تسال بتوع برشلونه نفسكوا في ايه حيقولولك يبقي عندنا خط الدفاع بتاع اتليتكو مدريد ده .. عندهم اتنين باكات طيارات مبيبطلوش جري سواء كنت بتتكلم عن الباك اليمين (كيرين تربيير Kieran Trippier) اللي هم اشتروه من توتنهام او الباك الشمال البرازيلي (رينان لودي Renan Lodi) .. الاولاني الناس بتقول عليه كأنه (ديفيد بيكهام David Beckham) بعث من جديد و الثاني بيقولوا عليه كانهم بيتفرجوا علي (مارسيلو Marcelo) وهو صغير .. قلبين الدفاع هم (جوزيه خيمينيز Jose Gimenez) و (ستيفن سافيتش Stephan Savic) .. الاربعه دول هم خط الدفاع الجديد اللي شكله المدير الفني (دييجو سيميوني Diego Simeone) بايده و باختياراته عشان يحل محل الحرس القديم الله يمسيه بالخير بقي اللي كان (جودين Godin) و (خوانفران Juanfran) و (فيليبي لويس Filipe Luis) .. وراهم فيه تقريبا احسن حارس مرمي في اسبانيا (يان اوبلاك Jan Oblak) و اللي الحقيقه فكره ان النادي عارف يخليه يكمل معاهم ضد الاغراءات الكتير اللي بتيجي من انديه تانيه بتخليني انحني احتراما لاداره النادي ده الصراحه.
خط النص بتاعهم الناس اللي بتشجع ريال مديد بيبصوا عليه و بيعيطوا .. عندهم لاعيبه حريفه بتعرف تباصي كوره صح زي (كوكي Koke) و (ساؤول نيجيز Saul Niguez) .. عندهم لاعيبه بتعرف تتخانق كويس زي (توماس بارتي Thomas Partey) و كابتن فرقه بورتو السابق (هيكتور هيريرا Hector Herrera) .. زود عليهم (ماركوس لورينيتي Marcos Llorente) اللي هم اشتروه من ريال مدريد .. حط خط النص ده قصاد عينك حتلاقي فرقه حتعرف تركن الاوتوبيس كويس اوي و تشد فرامل اليد لو احتاجت و حتلاقي فرقه بتعرف تمسك الفرقه اللي قدامها تعصرها من كتر الاستحواذ.
خط الهجوم بتاعهم هو ميكس بين عيال حريفه اوي و عيال صايعه اوي .. عندهم جوهره ابقي حط عينك عليه طول الموسم اسمه (جواو فيليكس Joao Felix) لسه عنده 19 سنه بس رجله تتلف في حرير .. قدام لاعيب عربجي بيتعارك مع دبان وشه اللي هو (دييجو كوستا Diego Costa) بس ابن الايه مش بيضيع .. البديل بتاع (كوستا Costa) و اللي ممكن يلعب جنبه كمان هو (الفارو موراتا Alvaro Morata) .. وده كده ثلاثي هجومي يحلم به اي فريق .. بس فيه نقطه .. معاك ان فيه لاعيبه مشيت .. طبعا الاسم اللي كلنا عارفينه هو (انتوان جريزمان Antoine Griezmann) اللي راح برشلونه بس كان فيه عندهم لاعيب ارتكاز حلو اوي اسمه (رودري Rodri) راح مانشستر سيتي .. لكن .. و حط تحت لكن دي شويه خطوط كتير .. فيه كلام علي ان ميلان عايز يشتري جناح اتليتيكو مدريد (اتخل كوريا Angel Correa) بس هم مش عارفين يوفروا فلوس الصفقه بس لو بقدره قادر ربنا نفخ في صورتهم و جمعوا الفلوس فساعتها اتليتيكو مدريد حيشتروا (رودريجو مورينو Rodrigo Moreno) من فالينسيا .. حتي لو (ردوريجو Rodrigo) مجاش فاعمل حسابك ان لو (كوريا Correa) مشي ففيه مهاجم رابع حيجي اتليتكو مدريد .. فرقه حلوه جدا و حتلعب كوره حلوه جدا نصيحه شخصيه ابقوا اتفرجوا علي ماتشاتها الموسم ده.
المصدر:
مقاله بعنوان All the Talk is About Barcelona and Real Madrid in La Liga this Season, But Diego Simeone’s New Look Atletico are Ready to Shake Things Up after a Busy Summer in the Transfer Market .. نشرت في جريده The Daily Mail و ده لينك المقاله الاصليه:
https://www.dailymail.co.uk/sport/football/article-7364447/Diego-Simeones-new-look-Atletico-Madrid-ready-shake-things-La-Liga.html
