شي-إن .. تولع حقوق الإنسان قصاد متعة الشوبينج.

لو انت خاطب أو متجوز أو مرتبط أو ليك أخت اللي هو بمعني أخر ليك تواصل يومي مع البنات فانت غالباً عدي عليك الاسم ده … شي-إن Shein .. لو انت مرة تسمع الاسم ده فانت صدقني ربنا نجدك .. لمن لا يعلم يعني المفروض إن Shein ده هو Website للبيع أونلاين اللي هو حاجة زي سوق أو نون بس متخصصين في الهدوم بس .. دول محل هدوم حريمي أونلاين و مقرهم الصين و مصانعهم في الصين و حاجتهم رخيصة و فعلياً فيه بنات كتير بتخلص مرتبها علي الشوبينج من علي الموقع ده .. مهم تبقي فاهم Shein بتبيع إيه؟ .. دي ناس بتبيع هدوم بس مش أي هدوم .. الموضة أو Fashion بحرها واسع و أنا عارف إن ده كلام كبير  و يصعب فهمه علي الولاد خصوصاً اللي منطقهم في شراء الهدوم إني أجيب نفس التي-شيرت بخمس ألوان مختلفة لخمس أيام الشغل في الأسبوع .. اللي بتشتغل فيه Shein هي حاجة اسمها Fast Fashion و دي كنا اتكلمنا عنها قبل كده لما جبنا سيرة زارا Zara .. شغل Shein اغلبه أونلاين يعني عايزك تعرف إن أغلب زباين Shein اللي بفكرك إنها شركة صيني هم الأمريكان و أدينا أهو في 2022 و Shein ملهاش غير يدوبك خمس محلات بس في أميركا.

بناء علي كلام شركة متخصصة في تحليل البيزنس اسمها Sensor Tower فالApplication بتاع Shein بقي أكتر App بيتعمله Download في أميركا و يمكن أكتر حتي من Amazon و ده لوحده مذهل لإن Amazon بتبيع كل حاجة بس Shein بتبيع هدوم بس .. بناء علي كلام شركة تانية اسمها Coresight Research فأرباح Shein سنة 2020 عدت العشرة مليار دولار و دي مش غلطة مطبعية .. لو جيت تحسب قيمة الشركة في السوق فمش حبقي ببالغ لو قلتلك إن سعر شي-إن في السوق دلوقتي هو أعلي من مجموع زارا و H&M علي بعض .. بس بما إننا قررنا نجيب سيرتهم هنا فأكيد يعني الناس دي عملت مصيبة.

من فترة مش بعيدة فيه قناة إخبارية إنجليزي اسمها القناة الرابعة Channel 4 عملت ريبورتاج أو تقرير صحفي عن ازاي البتاع اللي اسمه Shein ده بيشتغل عن طريق إنهم زرعوا ناس تشتغل في مصنعين من المصانع بتوعها و المصنعين في ولاية اسمها جوانجو Guangzhou في الصين .. ملخص الريبورتاج ححطهولك في شوية النقط دي:

• لو انت عامل رحت تشتغل في مصنع من بتوع Shein فانت بيتقالك يا ريس إنك حتاخد في ايدك 4,000 يوان في الشهر .. دول حوالي 556  دولار يعني بتتكلم في 14,000 جنيه في الشهر (اللي هم 24 الف جنيه تقريباً بسعر الصرف في 2025) .. أكيد انت دلوقتي بتقول لنفسك ياريتني كنت معاهم.
• التارجيت بتاع حضرتك إنك تطلعلنا 500 حتة في اليوم .. يعني إيه حتة؟ .. شراب .. بنطلون .. تي-شيرت .. المهم يطلع من تحت ايدك 500 حتة هدوم في اليوم .. اضرب 500 حتة في 30 يوم يطلعلك 15,000 حتة في الشهر .. يعني تقريباً انت في الشهر بتاخد جنيه علي كل حتة هدوم انت تعملها .. لسه بتقول يا ريتني كنت معاهم؟
• أول مرتب ليك مش حتاخده .. ده تأمين بيتقالك حتاخده لما تيجي تمشي من الشغل .. ده إذا أخدته.
• الشيفت 18 ساعة في اليوم .. ليك يوم واحد أجازة في الشهر .. طبعاً واضح من مواعيد الشغل إنك بيتداس علي وشك .. منطقي مع التعب و الإرهاق إنك تغلط .. بتحصل .. لو حصل و غلطت و بوظت حتة هدوم من بتوع التارجيت بتاعك بيتخصم منك 75% من يوميتك.

جدير بالذكر عشان الأمانة برده يعني إن اللي بتعمله Shein ده غير إنه حرام و افتراء و ظلم و قلة أدب بس هو أساساً يعني مخالف لقانون العمل في الصين .. بس شوف لو حنتكلم بيزنس يعني فظروف الشغل الغير أدمية دي مش هي مشكلة Shein .. أنا عارف إن كلامي ده ممكن يكون صعب بس صدقني لو قلتلك إن حفظ حقوق العاملين مش هو الحاجة اللي بتخلي شركة منظرها وحش قدام الناس .. مشكلة Shein وفق المعايير اللي عايزة ضرب الشبشب بتاعة الزمن اللي إحنا عايشين فيه ده هو حاجتين:

• حقوق الملكية الفكرية بتاعة التصميمات اللي هم بيعملوها.
• حماية المعلومات الخاصة بالزباين بتاعتهم.

السر في حاجة قلناها في الأول و هي إن Shein بتشتغل في Fast Fashion .. زمان أي دار أزياء عالمية زي جوتشي Gucci مثلاً بيبقي ليها موسمين اللي هم الصيف و الشتاء .. عشان جوتشي تنزل موديلاتها الجديدة فالمفروض إن فريق مصممين الأزياء بتوعها بيقضوا شهور من عمرهم بيصمموا و بيجربوا و بيهبدوا لحد ما في الأخر بيقدموا كوليكشن الصيف .. الشركات اللي زي شي-إن أو سوبريم مبتعملش كده .. هم بياخدوا التصميمات بتاعة جوتشي أو دولتشي و بيقلدوها و مش بس بيقلدوها .. دول بيعملوها بسرعة .. بسرعة فشخ .. بسرعة إن العامل الواحد في المصانع بتاعتهم مطلوب منه يطلع 500 قطعة هدوم في اليوم .. الطريقة السريعة فشخ في تصنيع الهدوم بتخلي إن منطقي مع الاستعجال تحصل مصايب يعني مثلاً سنة 2021 فيه قناة اسمها CBC Marketplace طلعت قالت إنها لما جت حللت عينات من الهدوم اللي بتتباع علي موقع شي-إن لقوا فيها نسبة رصاص عالية .. و شوف رغم كل ده حتلاقي بنات كتير بتدافع عن شي-إن باستماتة .. ده حقيقي علي فكرة .. بنات كتير من اللي عاملين لنفسهم كاريير كInfluencers بالنسبة ليهم شي-إن دي حاجة مينفعش نهاجمها أو نقولها تلت التلاتة كام  و فيه منهم بياخدوا هدايا من شي-إن نفسها.

المصادر:

• مقالة بعنوان Shein is even worse than you thought نشرت في موقع The Cut و ده لينك المقالة الأصلية:
  https://www.thecut.com/2022/10/shein-is-treating-workers-even-worse-than-you-thought.html

• مقالة بعنوان The people’s republic of Shein نشرت في جريدة The New York Times و ده لينك المقالة الأصلية:
  https://www.nytimes.com/2022/09/01/style/shein-clothing.html