زي ما صوابع رجلك مش زي بعضها فبرده أندية كرة القدم مش زي بعض .. فيه أندية كبيرة زي الأهلي والزمالك وفيه أندية تحت بير السلم زي طنطا وحرس الحدود .. في إنجلترا كمان تشيلسي ومانشستر يونايتد مينفعش تبصلهم ولا تتعامل معاهم زي فولهام ولا بيرنلي .. بس في نفس الوقت بيبقي صعب أوي إن ربنا يبتلي نادي كبير بكوليكشن مشاكل زي ما يكون المشاكل دي عملوا جروب واتس مع بعض وإتفقوا إنهم يتجمعوا كلهم في وقت واحد لإن ده اللي بيحصل مع تشيلسي دلوقتي .. ده نادي كبير .. نادي معاه فلوس .. بس حالياً في وضع ما يعلم بيه إلا ربنا .. فيه مشكلتين لو إتجمعوا في أي فرقة كورة فإنت تقدر تقول عليها يا رحمن يا رحيم .. مدير فني مش فاهم هو عايز إيه والإصابات .. المشكلتين دول مش بيتحلوا بالفلوس .. مش حتفرق إذا كانت إدارة تشيلسي بعزقت 240 مليون جنيه إسترليني .. إن المشكلتين دول يحصلوا مع بعض هو السبب إن تشيلسي ملوش لا طعم ولا لون ولا ريحة رغم كل الفلوس اللي إتدفعت .. هو السبب إن الفرقة من 3 ماتشات مكسبوش إلا ماتش واحد وطلعوا من كأس كاراباو Carabao Cup من توتنهام ودي لوحدها كافية إن يتحفل علي تشيلسي لحد الأسبوع الجاي.
أنا من الناس اللي شايفه إن (مانويل جوزيه) مش مدير فني كويس .. لا هو من المديرين الفنيين اللي بتغيير واحد يقدر يقلب نتيجة ماتش .. ولا هو من المدربين اللي يقدر ياخد لاعيب لسه طالع طازة من أكاديمية الفرقة ويخليه لاعيب درجة أولي .. النجاح اللي وصله الرجل ده مع الأهلي سببه حاجة واحدة بس وهي إنه بشكل كبير كان مثبت تشكيلته .. إنت كنت ممكن تمشي في الشارع تسأل الخضري ولا الفرارجي تشكيلة الأهلي اللي حتلعب الماتش الجاي إيه وحتلاقيه عارفها .. (فرانك لامبارد Frank Lampard) لحد دلوقتي هو مش عارف هو عايز إيه.
خد خط الدفاع مثلاً .. (لامبارد) عايز يلعب ب4 في خط الظهر مش 3 .. جميل أوي .. أهي حاجة إتقررت من دلوقتي .. نيجي نشوف مين اللي حيلعب تلاقي إن في كل ماتش لاعيبه خط الدفاع بيتنفضوا كلهم وخليني أركز علي قلبي الدفاع لإن دول في رأيي مشكلة تشيلسي الحقيقية دلوقتي .. ماتش برايتون اللي هو أول ماتش ليهم في الدوري في القلبين لعب ب(أندرياس كريستينسين Andreas Christensen) وجنبه (كورت زوما Kurt Zouma) .. الماتش خلص 3-1 لتشيلسي والناس طلعت مبسوطة .. الماتش اللي وراه كان ماتش ليفربول واللي خسروه بعد ما (كريستينسين) إتطرد .. تمام مش مشكلة مش حشيلك المسئولية يا عم (فرانك) عشان بحبك وكنت بشتري كل تي شيرتاتك لما كنت بتلعب .. الماتش الثالث قصاد ويست بروميتش جه في قلبي الدفاع بدل ما يلعب ب(كريستنسين) وجنبه (زوما) ويثبت التشكيلة قام شايل (زوما) وحط (تياجو سيلفا Thiago Silva) .. يادي النيلة .. في الماتش ده دخل فيه 3 جوان في الشوط الأول من فرقة أمة سيدنا (محمد) عليه الصلاة والسلام كلها بتتوقع إنها تنافس علي الهبوط الموسم ده .. في ماتش الكأس قصاد توتنهام مش بس لعب في الدفاع .. لا .. ده كمان لعب بحارس مرمي جديد لانج اللي هو (إيدوارد ميندي Eduard Mendy) وغير خط الدفاع كله عن ماتش ويست بروميتش .. طب ماشي يا عم غير الباكين اليمين والشمال معنديش مشكلة إنما كمان تغير قلبي الدفاع؟ .. وياريت إنك تلعب ب(زوما) و(فيكايو توموري Fikayo Tomori) جاب نتيجة إنما دخل فيك جون وخرجت بضربات الترجيح برده.
من أول خط النص وإنت طالع لقدام ومرحلة الهبد بتبدأ .. بسم الله ما شاء الله كمدير فني (فرانك) لعب بتشيلسي 41 ماتش في الدوري الإنجليزي .. في 41 ماتش دول لعب ب20 تشكيلة مختلفة .. أرجع تاني لنقطة (مانويل جوزيه) .. يا سيدي مش لازم تثبتلي 11 لاعيب في الملعب تلعب بيهم الموسم كله بس علي الأقل يبقي عندك عمود فقري مش بيتغير .. حارس مرمي ثابت .. قلبين دفاع فاهمين بعض ومش بيتغيروا .. لاعيب إرتكاز عربجي .. صانع ألعاب بيعرف يدي ثروهات .. مهاجم صريح بيجيب جوان أكتر ما بيضيع .. باقي الفرقة غير فيهم براحتك .. ده مبيحصلش .. (لامبارد) من الناس اللي مقتنعة بإنه مينفعش يلعب بلاعيب إرتكاز واحد إنما لازم يبقوا إتنين .. مش عيب .. ناس كتير بتحب الطريقة دي .. في ماتش برايتون لعب ب(إنجولو كانتي N’Golo Kante) وجنبه (جورجينو Jorghino) .. في ماتش ليفربول قالك عشان خط نص ليفربول عبرجي فأنا حلعب ب3 إرتكاز اللي هم (كانتي) و(جورجينو) وزود عليهم (ماتيو كوفاسيتش Mateo Kovacic) .. في ماتش ويست بروميتش رجع لعب ب2 إرتكاز تاني وإختار (كانتي) و (كوفاسيتش) .. في ماتش الكأس غير الإتنين إرتكاز تاني وإختار (جورجينو) و(كوفاسيتش).
علي فكرة أنا مش بقولك إن (لامبارد) تايه مش فاهم راسه من رجليه .. بالعكس .. هو شايف إن (كانتي) بيجري كتير فحرام ألعبه إرتكاز يبقي زي كلب الحراسة قصاد رباعي الدفاع مع إن هو ده أحسن مركز ليه وده المركز اللي جاب بيه الدوري مع ليستر سيتي ومع تشيلسي وجاب كأس العالم مع فرنسا .. (لامبارد) عارف إن (جورجينيو) بطيء وبيترقص علي الواقف .. هو ودي (روس باركلي Ross Barkley) إعارة لأستون فيلا وغالباً حيبيع (جورجينيو) وحيموت ويشتري (ديكلان رايس Declan Rice) من ويستهام ومش بس لاعيبه الإرتكاز في خط النص اللي (لامبارد) محتار فيهم .. إنت جايب (كاي هافيرتز Kai Havertz) ب89 مليون جنيه إسترليني عشان تلعبه صانع ألعاب تحت رأس الحربة ولحد دلوقتي ملعبتوش في المركز ده إلا في ماتش في الكأس جاب فيه هاتريك .. ما تلعبه في ميتين أم مركزه مش لازم تهبد يا عم (فرانك) .. المشكلة التانية هي الإصابات ودي مش في إيد (لامبارد) .. تشيلسي ليهم علي الدكة 3 لاعيبة يوقفوا أي فرقة علي حيلها اللي هم (بيلي جيلمور Billy Gilmour) و(حكيم زياش) و(كريستيان بوليسيك Christian Pulisic).
المصدر:
- مقالة بعنوان It’s all going wrong for Lampard at Chelsea: No settled starting XI, fringe players failing and a defense performing woefully under bar نشرت في جريدة The Daily Mail و ده لينك المقالة الأصلية:
https://www.dailymail.co.uk/sport/football/article-8788813/Where-going-wrong-Frank-Lampard-big-spending-Chelsea.html
