فرانك لامبارد .. لا تخاف لكن إحذر.

الشخصيات الزبالة حتلاقيها كتير في الشغل .. دي يمكن أهم حقيقة أنا إتعلمتها من ساعة ما بدأت أشتغل .. إذا كان في الكلية أرخم موقف ممكن يعدي عليك هو إن زميلك ميرضاش يخليك تصور المحاضرات أو دكتور المادة ميدخلكش المحاضرة عشان جاي متأخر فده ميجيش حاجة جنب الخوازيق اللي إنت ممكن تشوفها من الناس اللي معاك في الشغل .. و يكفيك ربنا شر المديرين اللي خايفين علي كراسيهم .. المدير اللي خايف علي كرسيه ده ممكن يسيب الدنيا تولع .. ممكن يظلم و يفتري و يكذب و يلبس .. كل ده هو ممكن يعمله عشان ميبانش قدام صاحب الشركة إنه غلطان .. لو عايز تشوف ده بنفسك إتفرج علي اللي حصل في (ديفيد مويس David Moyes).

ده رجل عمل Career حلوة أوي من السنين اللي قضاها في تدريب فرقة إيفرتون و لما جم إختاروه يمسك مانشستر يونايتد كان السر اللي عارفه الناس كلها إن (مويس) مش ساحر عشان يقلب الفرقة 180 درجة .. هو محتاج وقت .. لما عرفنا إن العقد اللي هو مضاه مع النادي كان لمدة 6 سنين قلنا لنفسنا يا سلام علي الإدارة اللي بتفهم .. ناس دارسة بره و جوه .. الرجل كان في ظهره السير (أليكس فيرجسون Alex Ferguson) شخصياً .. ده كده زي لما تروح تتقدم للكراش بتاعتك و تاخد في إيدك و إنت رايح تكلم أبوها مديره في الشغل .. عارف (مويس) إستمر في منصبه قد إيه؟ .. تسع شهور .. عارف ليه؟ .. عشان مفيش مدير عايز يبان قدام صاحب الشركة إنه غلطان .. الفرقة اللي (مويس) ورثها كانت حطام فرقة و كان محتاج اللي ماسكين الصفقات في النادي يجيبوله اللاعيبه اللي هو محتاجها بس ده محصلش .. فجأة (مويس) لقي نفسه مطالب إنه يدرب و يعلم و يعالج في أخطاء و ينقي لاعيبه يشتريها و يروح يتكلم معاها و يقنعها تيجي .. زي ما إنت كده تلاقي مديرك مش عايز يشوف شغله و بيرمي حمل الشغل كله عليك .. و لما تقع و التسليمات تتأخر مديرك يروح لرئيس الشركة يقوله ما إنت اللي غلطان يا ريس عشان إنت اللي مختار ناس مش علي قد المسئولية.

إن (مويس) يكمل بعد أول موسم له و هو خارج صفر بطولات فده معناه إن البهاوات اللي ماسكين إدارة النادي بيعترفوا ضمنياً إن كان فيه حاجة غلط و إن شاء الله حنعدلها بس هم محبوش يطلعوا غلطانين .. يعملوا إيه بقي؟ .. مشي (مويس) و هات مكانه (لويس فان خال Louis van Gaal) قال يعني المشكلة مش إن النادي موفرش اللاعيبه الصح و مصبرش علي المدير الفني إنما المشكلة إن (مويس) نفسه مكنش كفء بما يكفي إنه يشيل الليلة و إحنا محتاجين مدير فني عالمي عشان يمشي الدنيا .. دي العقلية اللي حتلاقيها في أي مكان شغل .. ناس كبار بقالهم سنين في الشركة مستعدين يلبسوا أي حد أجدعها خازوق عشان يفضلوا هم في كراسيهم و ده اللي حيخليني أتكلم عن (فرانك لامبارد Frank Lampard).

هو مسك الفرقة في وقت النادي متوقع عليه عقوبة إنه ميقدرش يشتري أي لاعيب .. أحسن لاعيب في الفرقة مشي .. لقي نفسه مجبر إنه يعتمد علي اللاعيبه الناشئين .. ده غير إن الفرقة اللي تحت إيده مش مؤهلة أصلاً إنها تاخد دوري أبطال أفريقيا حتي مش أوروبا .. علاقة (لامبارد) برئيس النادي (رومان إبراموفيتش Roman Abramovich)  دي زي ما إنت تكون نسوانجي و كل يوم مع بنت و تقرر فجأة بعد زن أبوك و أمك إنك تخطب و تتجوز فتختار واحدة بنت ناس مؤدبة و متدينة اللي هي شخصية إنت أول مرة تتعامل معاها ولا عمرك إتعرفت علي واحدة زيها قبل كده.

(إبراموفيتش) عمره ما عين حد معندوش خبرة زي (لامبارد) .. عمره ما عين مدير فني إنجليزي أصلاً .. المنطق بيقول إنه لازم يصبر عليه بس لنفترض جدلاً و ده وارد جداً إن الدنيا متمشيش زي ما (لامبارد) عايز .. إحتمال كبير يلاقي نفسه بره الأربعة الكبار و مياخدش بطولة و حتي ميتأهلش لدوري أبطال أوروبا ولا حتي للدوري الأوروبي .. إن رغم كل ده (لامبارد) يكمل فده إعتراف ضمني من إدارة تشيلسي إنهم (سوري في الكلمة) فشخوا النادي .. أصل معلش (لامبارد) مش هو اللي وافق إن (إيدن هازارد Eden Hazard) يروح ريال مدريد .. ولا لاعيب في الفرقة اللي بتلعب تحت إيده دلوقتي هو اللي إشتراها .. مش هو السبب إن النادي مش عارف يشتري أي لاعيب في الميركاتو .. مش هو السبب إن إدارة النادي معرفتش تخلي (ديفيد لويز David Luez) يكمل و ده عمله كارثة في الدفاع .. طول عمر تشيلسي بيعتبر اللاعيبه الناشئين دول مجرد بيزنس عشان يبيعهم و يكسب فيهم قرشين بس دلوقتي (لامبارد) مطالب .. لا مطالب إيه .. ده معندوش أي بديل غير إنه يعتمد علي الناشئين .. مش عايز أبان متشائم بس أنا معنديش أي إقتناع إن (إبراموفيتش) حيصبر علي (لامبارد Lampard) مش لسبب غير إن تشيلسي زيه زي مانشستر يونايتد زيه زي الأهلي زيه زي الزمالك زيه زي أي مكان شغل مليان شخصيات بنت و#$% مستعدة تخزوق أي حد عشان تكمل في كراسيها.

المصدر:
مقالة بعنوان If Chelsea Do Crash, It will Be Frank Lampard That Gets Burned at Stamford Bridge .. نشرت في جريدة The Daily Mail و ده لينك المقالة الأصلية:
https://www.dailymail.co.uk/sport/football/article-7372515/MARTIN-SAMUEL-COLUMN-Chelsea-crash-Frank-Lampard-gets-burned.html