يحكي أن فيه مستشفي إسمها شارع إرموند الكبير للأطفال Great Ormond Street Hospital for Children في إنجلترا رئيس قسم الجراحة فيها كان عنده مشكلة إن بتحصل كوارث لما طفل يعمل عملية جراحية و تخلص و ينقلوه للعناية المركزة .. إنت بيبقي عندك دكاترة جراحة و دكاترة عناية و دكاترة تخدير المفروض إنهم يقولوا لبعض معلومات عن حالة الطفل و كل ده و هم بينقلوه من مكان لمكان .. أحياناً كتير وسط السرعة و الإستعجال دكتور التخدير بينسي يبلغ دكتور العناية بمعلومات معينة ممكن لو دكتور العناية مخدش باله منها تحصل بلاوي .. تيجي تقول لدكتور التخدير إنت مقلتش المعلومات دي لدكتور العناية فتلاقية بيحلف بأيمانات المسيحيين و المسلمين و اليهود بإنه قاله .. دكتور العناية يحلف علي النعمة الشريفة إنه متقالوش حاجة .. في مرة رئيس قسم الجراحة كان بيتفرج علي سباق عربيات فورميلا وان Formula 1 و شاف بعنيه إزاي عربية سباق بتخش يشتغل عليها عشرين بني أدم عشان يغيروا الأربع عجلات و أحياناً يغيروا تيل الفرامل و السوست و المساعدين بتوع العربية في أقل من ثانيتين .. إنت متخيل؟ .. صيانة زي دي في عربيتك في أجدعها ورشة مش بتاخد أقل من ساعة .. الدكتور قال لنفسه أكيد المهندسين دول عندهم حل للمشكلة اللي أنا بعيشها في المستشفي بتاعتي .. الرجل كلم فريق فيراري Ferrari و اللي بعتوله طقم مهندسين من فريق سباقات فورميلا وان بتاعهم و إتفرجوا بعنيهم علي اللي بيحصل و بدأوا يحطوا مقترحات لبرنامج تبادل معلومات بمجرد ما العملية الجراحية تخلص .. لما البرنامج ده إشتغل نسبة الأخطاء في مرحلة نقل المعلومات من الجراحة للعناية المركزة قل من 30% بقي 10%.
يحكي أن لما فيروس كورونا طاح في العالم كله زي التور الهايج الحكومة البريطانية لقت عندها مشكلة كبيرة إن معندهاش أجهزة تنفس صناعي كفاية لأوض العناية المركزة .. بريطانيا كانت محتاجة بقدرة قادر إنها تصنع 14,000 جهاز تنفس صناعي أو Ventilators و عشان كده الحكومة عملت نداء إستغاثة لأكتر من 5,000 شركة قطاع خاص عشان يعملوا اللي يقدروا عليه .. من ضمن الشركات اللي داست جامد في الموضوع كانت شركة ماكلارين McLaren اللي بتعمل عربيات Formula-1 و ليها فريق محترم جداً .. الشركة دي المهندسين بتوعها شغلوا خط الإنتاج بتاع قطع الغيار لعربياتهم عشان ينتجوا 100,000 قطعة غيار لأجهزة التنفس الصناعي في أقل من 10 أسابيع .. ده لوحده خلي شركات تصنيع أجهزة التنفس الصناعي بعد ما كانت بتصنع 50 جهاز بس في الإسبوع بقت بتقدر تنتج 200 جهاز في الإسبوع .. نظام التأمين الصحي في بريطانيا فعلياً وقف علي رجله في أزمة كورونا بسبب خط إنتاج مصنع قطع غيار عربيات فورميلا وان.
يحكي أن كان فيه سلسلة سوبرماركت كبيرة أوي في إنجلترا إسمها سانسبري Sainsbury لقت إنها بتدفع كتير أوي كهرباء عشان التلاجات المفتوحة اللي موجودة عندهم .. الثلاجات دي إنت بتشوفها هنا في مصر في فروع كارفور و فتح الله .. فيه حد دلهم علي إن شركة Williams F-1 Group اللي برده شغالة في سباقات Formula-1 و ليها فريق محترم أوي إشترت تكنولوجيا جديدة عبارة عن شكل إيروفويل Aerofoil بيتركب قدام علي إكصدام العربية عشان يحرك الهواء حول جسم العربية فبيحسن من Aerodynamic Performance بتاعها .. المهم إن Aerofoil ده لو إتركب في أرفف الثلاجة فهو بيقدر يعيد توجيه الهواء البارد تاني جوه الأرفف و بالتالي بيوفروا هدر في طاقة التبريد .. سلسلة سوبرماركت Sainsbury إشترت 400,000 من Aerofoils دول بداية من 2017 و ده لوحده كان كفيل إنهم يوفروا 15% من إستهلاك الكهرباء في السنة .. ده إترجم بإنهم بيوفروا 9,000 طن كربون في السنة .. شوف فيه كام مليون دولار إتوفروا ليهم في السنة بسبب فكرة بتطبقها عربيات فورميلا وان.
المصدر:
مقالة بعنوان 5 Surprising ways Formula 1 is changing the world نشرت علي موقع المنتدي الإقتصادي العالمي World Economic Forum و ده لينك المقالة الأصلية:
https://www.weforum.org/agenda/2020/11/formula-one-f1-innovation-ventilators-fridges/
