تعديل إتعمل يوم 2 فبراير 2021 .. المصور السينمائي (روجر ديكنز) خد فعلاً جايزة أوسكار أحسن تصوير عن شغله في فيلم 1917.. ومش بس الأوسكار .. هو خد جايزة أحسن تصوير سينمائي في جوايز بافتا BAFTA ودي النسخة البريطاني من الأوسكار.
لما المصور السينمائي (روجر ديكنز Roger Deakins) وده الرجل اللي شغلته إنه يشيل الكاميرا عشان يصور الفيلم زي ما المخرج عايز قرأ السيناريو بتاع فيلم 1917 ياعيني إتصدم لما عرف إن المخرج (سام مينديز Sam Mendes) عايز يصور فيلم ساعتين كأنه One-Shot .. كلمة One-Shot معناها إنك بتبدأ الفيلم مع الشخصية وبتفضل معاها كأنك ماشي جنبه .. مفيش مشاهد تانية مفيهاش الشخصية الأساسية .. تخيل إني حعمل فيلم عنك وإنت نازل تجيب حاجة من البقال اللي تحت .. الفيلم بيبدأ من ساعة ما بتفتح باب الشقة وبتنزل علي السلم بتروح للبقال تشتري الحاجة وتطلع وأنا شايل الكاميرا وراك .. حتي لو حصور إنك بتطلع من الشقة في فيديو وإنت بتنزل علي السلم في فيديو تاني وإنت بتشتري الحاجة في فيديو تالت وبعد كده حجمع الفيديوهات الثلاثة في فيلم واحد فالمفروض إن وإنت بتتفرج علي الفيلم متحسش إن دي 3 فيديوهات مختلفين ملحومين في بعض .. إنك تعمل فيلم حربي ساعتين عن الحرب العالمية الأولي وتصوره كله علي إنه One-Shot فدي حاجه تخض وممكن تخلي أي مصور سينمائي يقول لنفسه هو أنا إيه اللي يدخلني في السكة اللي كلها مشاكل دي؟
الحقيقة إن (روجر ديكنز) عنده حق .. صحيح إنه يعرف (سام مينديز) كويس وإشتغلوا مع بعض قبل كده في 3 أفلام اللي هم Skyfall و Revolutionary Road و Jarhead بس برده مش معني إننا صحاب إني أعكنن علي نفسي عشان خاطرك .. (سام مينديز) جاتله الفكرة لما شاف عياله بيلعبوا Video Game إسمها Red Dead Redemption لدرجة إنه فضل قاعد جنبهم يتفرج عليهم وهم بيلعبوا ومبهور بالطريقة اللي اللعبة متصوره بيها وقال لنفسه أنا لازم أعمل فيلم متصور بنفس الفكرة دي.
مشكلة إنك تصور فيلم كأنه معمول One-Shot هي إن بيطلع عين أهلك في المونتاج .. الفكرة زي ما قلتلك إنت بتعمل كذا فيديو تلزقهم في بعض بحيث وإنت بتتفرج تحس إنهم زي ما يكونوا فيديو واحد متصل مش كذا فيديو ملحومين في بعض .. طب المشكلة فين؟ .. المشكلة إن ممكن مشهد وليكن مثلاً مدته 10 دقايق ومعمول صح جداً ومتمثل من غير ولا غلطة بس عشان حد من الممثلين بيجري فشوية طينة طاروا علي الكاميرا أو إن بسبب إنفجار شوية دم طرطشوا علي الكاميرا فإنت ممكن تعيد المشهد كله تاني لمجرد إن لما المشهد يتلحم في المشهد اللي وراه شوية الدم أو شوية الطينة اللي علي الكاميرا ممكن تفصلك وإنت بتتفرج وتسأل نفسك هي الطينة دي جت منين أو الدم جه منين؟ ولو ده حصل فالConcept بتاع One-Shot باظ .. إنك تصور فيلم One-Shot مش بتبقي حلوة أوي في كتير من الأفلام بس لو جيت تبص لفكرة فيلم 1917 والسيناريو بتاعه حتكتشف إن زي ما يكون الفيلم مينفعش يتصور إلا كده.
الفيلم فكرته إن إتنين عساكر بريطانيين إسمهم (سكوفيلد Schofield) و(بلايك Blake) بيروحوا مهمة خلف خطوط العدو عشان يحذروا قيادة الجيش إنهم رايحين علي فخ عامله ليهم الألمان .. الفيلم كله بيحكي قصة يوم واحد .. في اليوم ده إنت كإنك عسكري تالت مع البطلين ماشي وراهم وهم بيدخلوافي أنفاق مفخخة .. ماشي وراهم وهم ماشيين بين حطام مدن إتدمرت بالقصف المدفعي .. بتجري وراهم بين الزرع عشان تهرب من نيران القناصة .. بتبص للسما معاهم تتفرج علي المعارك الجوية .. وإنت بتتفرج إنت حتحس إنك معاهم .. بتجري معاهم وبتنهج معاهم وبتخاف معاهم.
بسبب إن الفيلم إتصور زي ما يكون One Shot فده خلي كتير أوي من النقاد يرشحوه إنه يبقي منافس قوي علي الأوسكار السنة دي لدرجة إن فيه نقاد سينمائيين قالوا عليه إنه أحسن فيلم حربي يتعمل من ساعة فيلم Saving Private Ryan مع إن كل التوقعات كانت بتقول إن الفيلم ده صعب ينجح .. مبدأياً كده الفيلم ده كتبله السيناريو بتاعه واحدة ست إسمها (كريستي ويلسون كارينز Krysty Wilson-Cairns) ودي أول مرة تكتب سيناريوهات في حياتها .. أبطال الفيلم إتنين شباب صغيرين تقريباً أول مرة يبقوا أبطال فيلم اللي هم (جورج ماكاي George Mackay) و(ديين تشارلز تشابمان Dean-Charles Chapman) … رغم كل ده .. رغم إنه فيلم كتبله السيناريو بتاعه واحدة ست أول مرة تكتب سيناريوهات .. أبطاله إتنين أول مرة يبقوا أبطال فيلم .. فيلم إتصور كإنه One-Shot والله أعلم حتعدي علي خير ولا لا .. رغم كل ده شركتي الإنتاج Universal Studios و Amblin Partners حطوا 100 مليون دولار كميزانية لمجرد إنهم واثقين في (سام مينديز).
تخيل حجم المسئولية اللي كانت علي كتاف المخرج .. علي فكرة لما (سام مينديز) إتسأل ليه جبت إتنين ممثلين أول مرة يمثلوا كان رده عشان وإنت بتتفرج متبقاش عارف هم حيعيشوا ولا حيموتوا .. أصل لو كان مثلاً إختار (مات دايمون Matt Damon) ولا (ليوناردو دي كابريو Leonardo DiCaprio) حتبقي وإنت بتتفرج عندك إحساس داخلي إن المخرج أكيد يعني مش حيموت البطل في نص الفيلم .. (سام مينديز) راهن بحاجات كتير أوي علي الفيلم ده ومشيت معاه وده في رأيي بيخليه واحد من أحسن مخرجين السينما في وقتنا .. ده جنب معلومة إنه كان متجوز (كيت وينسليت Kate Winslet).
المصدر:
- مقالة بعنوان How Sam Mendes and Roger Deakins pulled off the one-shot war epic 1917 نشرت في مجلة Variety وده لينك المقالة الأصلية:
https://variety.com/2019/film/news/sam-mendes-roger-deakins-1917-1203425116/
