الناس اللي متابعة شوية الأخبار العالمية سامعة إن فيه قلق بيحصل في روسيا اليومين دول .. اللي حصل إن فيه معارض سياسي روسي إسمه (أليكسي نافالني Alexei Navalny) كان هربان بره روسيا وفجأة كده قرر يرجع بلده يوم 19 يناير 2021 .. عشان تبقي برده مستوعب القصة من أولها .. السنة اللي فاتت يُقال إن عناصر من المخابرات الروسية حاولت تغتاله بغاز أعصاب من عيلة إسمها نوفي توشكس Novichoks والرجل حالته كانت صعبة جداً والألمان إتوسطوا إنهم يبعتوا فريق طبي ياخده من روسيا لحد عندهم يتعالج .. سنة كاملة والأخ ده في ألمانيا وطبعاً بمجرد ما نزل المطار إتقبض عليه .. في حالة إنك بتسأل بدافع من الفضول يعني هو إتقبض عليه بتهمة إيه فأحب أقولك إنه رغم إنه كان بني أدم طبيعي لحد السنة اللي فاتت عايش في بيته فالسلطات الروسية قالت فجأة كده قالت إن كان فيه حكم حبس صدر ضده سنة 2014 اللي هو إنت عايز تقولهم طب ما هو كان عندكوا محبستهوش ليه؟ .. وفيه حالة برده إن السبب ده مش مقنع بالنسبة ليك ففيه واحد من اللي لسه عايشين وشاركوا في الحرب العالمية الثانية رافع عليه قضية سب وقذف .. يعني زي ما قلتلك في حالة إن السبب الأولاني مش مقنع بالنسبة ليك .. بس شوف كل ده مش مهم .. الفكرة إن في نفس اليوم اللي هو رجع فيه روسيا وإتقبض عليه فيه كانت فيه منظمة حقوقية روسية إسمها Anti-Corruption Foundation يعني مؤسسة مكافحة الفساد بس هي معروفة أكتر بالإختصار للإسم الروسي بتاعها اللي هو FBK وعلي فكرة (أليكسي نافالني) هو اللي أسسها نشرت تحقيق خلي روسيا كلها تتكلم عنه والتحقيق ده بيدور حول القصر اللي عندك في الصور ده.
خلينا نبدأ بالأساسيات .. الإسم الرسمي للقصر ده هو كايب إيدوكوباس Cape Idokopas بس عشان الإسم زي ما إنت شايف مش سيكسي فالإسم اللي مشهور بيه أكتر هو قصر بوتين أو Putin’s Palace .. وأيوه هو متسمي علي إسم الرئيس الروسي (فلاديمير بوتين Vladimir Putin) .. القصر إتبني علي ساحل البحر الأسود علي مساحة 168 فدان وزي ما إنت شايف القصر كبير .. كبير خالص .. قصر إتبني علي مساحة 17,691 متر مربع .. ده قصر فيه سينما .. فيه صوبة زراعية Greenhouse عشان يزرعوا فيه الخضار اللي حيتاكل .. فيه حمام سباحة أوليمبي .. فيه كازينو .. الليلة دي كلها بتكلفة إجمالية فيه ناس بتقدرها بإنها وصلت 1.4 مليار دولار والمشروع ده بدأوا يشتغلوا عليه من سنة 2000 .. علي الناحية الثانية المتحدث الرسمي بإسم مؤسسة الرئاسة الروسية (ديميتري بيسكوف Dmitry Peskov) طلع وحلف مية يمين إن الرئيس الروسي (بوتين) ملوش أي علاقة بالقصر ده .. بس لو حنفترض جدلاً إن الرجل صادق فده بيخلينا نسأل كذا سؤال الحقيقة:
ليه كل ما أي صحفي يحاول يقرب من القصر سواء من البحر أو البر يلاقي إن القصر بتحميه فرق من Federal Protective Service وإختصاراً بتتسمي FSO ومن Federal Security Services اللي إختصاراً بتتسمي FSB .. اللي هم المخابرات العامة والأمن الوطني؟ .. بلاش دي .. ليه المجال الجوي فوق القصر اللي واخد رقم URP116 ممنوع منعاً باتاً إن أي طيارة سواء مدنية أو عسكرية تطير فوقه ما بين 40 متر لحد 4000 متر فوق سطح الأرض؟ .. ليه الأرض المحيطة بالمبني اللي مساحتها 17,300 فدان كانت مملوكة لجهاز المخابرات العامة FSB وفي سبتمبر 2020 الأرض دي إدوها حق إنتفاع للشركة اللي بتملك القصر لحد سنة 2068؟ .. أسئلة ممكن ميكونش ليها إجابة وممكن تكون إجابتها زي ما قالها (عادل إمام) في مسرحية الزعيم .. ربنا يخلي الزعيم ويديله زي ما هو عايز.
المصدر:
- مقالة بعنوان Putin has created the ultimate Bond villain’s lair نشرت في موقع The Drive وده لينك المقالة الأصلية:
https://www.thedrive.com/the-war-zone/38876/putin-has-created-the-ultimate-bond-villain-lair - التقرير اللي نشرته منظمة FBK حول القصر بتاع (فلاديمير بوتين) وده لينك التقرير:
https://palace.navalny.com/
