تابعونا

سناكس ما بين المقالات

مبني مقر شركة أتلاسيان .. إرميلي يا ابني الخرسانة دي مش عايزها و هات خشب.

لو أنا جيت قلتلك إني حشيل الأسمنت و الرملة و الزلط و المياة و حجيب مكانهم خشب .. أيوه خشب .. أنا حبنيلك مبني كامل بشوية صلب و خشب.

8 ديسمبر، 2020 1.3 ألف

الهندسة كل كام سنة تطلعلك بموضة جديدة كده تخليك كمهندس تهرش في شعرك .. مش لإن الفكرة الجديدة دي صعبة أو معقدة زيادة عن اللزوم .. لا خالص .. إنت بتهرش في شعرك لإنك محتار في إجابة السؤال بتاع هو إحنا إزاي مجاتلناش الفكرة دي من زمان؟ .. الموضة الجديدة في الهندسة اللي أنا عايز أتكلم عنها هي إن جري العرف يعني إنك عشان تبني أي مبني في الدنيا فإنت محتاج حديد تسليح و محتاج شوية أسمنت و زلط و رملة و مياة .. دي المقادير بتاعة أي عمارة في الدنيا .. لو أنا جيت قلتلك إني حشيل الأسمنت و الرملة و الزلط و المياة و حجيب مكانهم خشب .. أيوه خشب .. أنا حبنيلك مبني كامل بشوية صلب و خشب .. و برده أنا هنا مش بتكلم عن عمارة من أربع أدوار .. لا خالص .. أنا بتكلم عن ناطحة سحاب بسم الله ما شاء الله 40 دور بإرتفاع معدي 180 متر بيقدر يستوعب ال4,000 موظف بتوع الشركة.

ده الفكر الجديد في الهندسة و اللي الإخوة بتوع عمارة و إنشاءات بيسموه Hybrid Timber و فيه ناس تانية بتسميه Mass Timber Construction و المثال اللي أنا عايز أتكلم عنه في المقالة دي هو المقر الجديد لشركة أتلاسيان Atlassian الأسترالية في مدينة سيدني و اللي حيقوم بتصميمه فريق مشترك من شركتين .. الأولي هي شركة إستشارات هندسية أميريكية إسمها SHoP مقرها في مدينة نيويورك و الثانية هي شركة أسترالية إسمها BVN .. المشروع حيبدأوا شغل عليه بداية من سنة 2021 و المتوقع إنه يتسلم في 2025.

الConcept بتاع Interior Design للمبني و اللي زي ما إنت شايف هو قائم أولاً و أخيراً علي الميكس بين الصلب و الخشب.

 المبني غير إنه حيكون مبني من الخشب و الصلب إلا إنه كمان حيتبني بناء علي معايير LEED و دي إختصار جملة Leadership in Engineering and Environmental Design و فكرتها إنك تحاول قدر الإمكان تصمم مبني مش مُضر للبيئة و مش بيستهلك طاقة كتير .. ده معناه إن المبني بيجيب كهربته من خلايا شمسية بتتركب علي السطوح .. المياه السخنة بتاعته بتيجي من سخانات شمسية برده بتتحط علي السطوح مش سخانات كهرباء .. لمض المبني كلها بتبقي LED عشان توفر في إستهلاك الطاقة .. تصميم المبني بيخلي الإزاز الخارجي بتاعه عليه حاجة شبه التندة بتاعة بلكونة بيتكوا عشان يقلل من إستهلاك التكييفات.

الConcept Design بتاع المبني اللي حيكون مقر شركة أتلاسيان Atlassian الأسترالية من تصميم شركتي ShoP الأميريكية و BVN الأسترالية.

طبيعي إنك تسأل نفسك هو إيه الجديد اللي حستفاده؟ .. المقاولات في مصر ماشية بمبدأ هذا ما وجدنا عليه أباؤنا و أجدادنا .. صعب أوي تلاقي مقاول مستعد يصرف فلوس كتير فشخ في إنه يبني مبني بيطبق معايير Green Building أو LEED فإنت محتاج تقنعه بإيه اللي هو حيستفاده لو عمل كده؟ … ميزة المباني اللي بتتعمل بطريقة Hybrid Timber إن الخشب نفسه بيمص غاز ثاني أكسيد الكربون من الجو .. النسب لوحدها تخض .. مجرد إن 10% من مباني محافظة زي الإسكندرية مثلاً لو إتبنت من الخشب بطريقة Hybrid Timber فده كفيل إن الخشب اللي في المباني دي يمتص في السنة الواحدة 10 مليون طن ثاني أكسيد كربون .. الميزة التانية إن الخشب المضغوط اللي بيستخدم في بناء المباني دي أساساً مش بيولع و مش قابل للإشتعال .. تخيل للحظة إنت كمقاول أنا بقولك إني كمهندس إشتشاري حصمملك مبني من أوله لأخرة Fire Rated .. إنت متخيل؟

المصادر:

مهندس ميكانيكا بحب الصحافه و الكتابه .. مؤمن بان من حق كل بني ادم انه يعرف الحقيقه ورا الخبر .. رسالتي انك تفهم حقيقه اللي بيحصل عشان لما تقرر رايك تكون فاهم انت بتقرر علي اي اساس

اترك تعليق

بريدك الالكتروني لن ينشر. يجب ملئ الخانات بعلامة *

من فضلك ادخل التعليق!

من فضلك ادخل الأسم!

من فضلك ادخل البريد الالكتروني!من فضلك ادخل بريد الكتروني صحيح!