انا عارف كويس إني إتكلمت عن الطيارة F-35 هنا أكتر ما (عمرو دياب) قال كلمة جامدة في أغنية جامدة بس لكن عشان خاطري إستحملوني المرة دي كمان .. اللي انا عايز أتكلم عنه النهارده بخصوص الطيارة دي هو مشكلة خاصة بالمدفع الرشاش بتاع النسخة F-35A .. فيه ناس مش عارفه إيه F-35A دي انا عارف فخلوني بسرعة أقولكوا ملخص الحكاية .. مشروع الطيارة F-35 دي الأمريكان بيحبوا يسموه Joint Strike Fighter أو JSF إختصاراً و سبب إنه إتسمي كده إن فعلياً F-35 مش طيارة واحدة .. هي 3 طيارات ب3 نماذج مختلفة.
النموذج الأولاني إسمه F-35A وده اللي حتستلمه القوات الجوية وده اللي بيطير من مطارات عادية زيه زي أي طيارة مقاتلة بتخدم في أي سلاح جو في الدنيا ودي النسخة اللي حتتصدر من F-35 .. النموذج الثاني إسمه F-35B وده اللي حيستلمه سلاح مشاة البحرية أو US Marine Corps ولإن دول الناس بتوع العمليات البرمائية فالنموذج ده له القدرة علي الإقلاع و الهبوط بشكل عمودي زيه زي أي طيارة هليكوبتر .. النموذج الثالث هو F-35C وده اللي حيروح للقوات البحرية و حيشتغل من علي حاملات الطائرات .. بما إنك فهمت الفرق بين النماذج الثلاثة فخلينا نرجع تاني للكلام عن F-35A .. عشان الطيارة دي أو أي سلاح الحقيقة يبدأ يخش الخدمة في القوات المسلحة الأميريكية فلازم الأول ياخد ختم النسر من مدام عفاف في الدور الرابع .. مدام عفاف دي في وزارة الدفاع الأميريكية بيسموها Director Operational Test & Evaluation وإختصاراً بتتسمي DOT&E .. عارف إن إسم مدام عفاف أسهل .. دي إدارة قدام الناس هي تبع وزارة الدفاع بس هي كيان مستقل بذاته .. الإدارة دي هي اللي بتراجع علي التصميمات .. هي اللي بتشوف هل Specs بتاعة السلاح مطابقة لRequirementsولا لا؟ .. هم اللي بيختبروا السلاح .. من غير إمضتهم السلاح ده مش حيخش الخدمة .. من غير إمضتهم مفيش فلوس .. الناس دي لما جم يراجعوا علي مشروع JSF أو الطيارة F-35 طلعوا 873 كومنت والحقيقة انا النهارده مش حتكلم غير عن واحد بس .. المدفع الرشاش.
لسبب ما التصميم بتاع النموذج F-35A مخلي المدفع الرشاش بتاعها محطوط جوه جسم الطيارة .. مؤخراً أطقم الصيانة بتاعة الطيارات لقت إن الطيارات الجديدة اللي لسه طالعه من خط الإنتاج واللي لسه سلاح الجو الأمريكاني مستلمها لما ضربت المدفع الرشاش بتاعها فالطلاء أو Coating اللي علي جسم الطيارة جنب فتحة ضرب النار بتاعة المدفع الرشاش بسبب السخونية إتشرخ .. ومش بس دي مشكلة المدفع الرشاش بتاع F-35A .. أساساً المدفع نشانه بايظ بسبب مشكلة في Alignment بتاع ماسورة إطلاق الطلقات .. المشكلة دي عشان تتحل لازم تتحل كHardware إن كل الطيارات اللي لسه طالعه من خط الإنتاج يتعملها Alignment تاني اللي هو حاجة شبه ظبط زوايا العجل بتاع العربيات و كمان تتحل كSoftware إن الكود بتاع نظام ضرب النار من المدفع يبدأ يصلح نفسه بنفسه كل ما يلاقي فرق بين النشان علي شاشة الطيار و بين إتجاه الطلقات اللي بتطلع من المدفع .. لحد ما المشكلة دي تتحل طلع قرار من DOT&E بإن الطيارين اللي بيطيروا بطيارات F-35A في أي مناورة جوية أو مهمة قتالية ميستخدموش المدفع الرشاش .. و شوف يا أخي المشكلة دي مش موجودة في النسختين F-35B و F-35C .. تدري ليش؟ .. عشان المدفع الرشاش فيهم متركب في كابينة خارجية بره جسم الطيارة.
فيه ناس طبيعي إنها تسأل هو معلش يعني المدفع الرشاش ده إيه لازمته في الحياة؟ هو مش الإشتباكات الجوية أو Dogfighting دلوقتي بقت كلها معتمدة علي الصواريخ جو- جو؟ .. الحقيقة اه و لا في نفس الوقت .. لما الأمريكان نزلوا الطيارات F-4 Phantom في الستينات و السبعينات كانوا متخيلين إن تكنولوجيا صواريخ جو- جو دي حتدوس علي وش أي طيارة تانية لحد ما الأمريكان لبسوا في الحيط في فيتنام و الإسرائيليين لبسوا في الحيط في حرب أكتوبر و خصوصا في معركة المنصورة الجوية .. الإشتباكات الجوية كانت بين F-4 Phantom و بين الطيارات السوفيتية زي MiG-21 كانت سريعه جداً و بتتعمل فيها مناورات جوية خلت الطيارين الأمريكان أحياناً كتير مش عارفين إزاي ينشنوا صواريخهم علي طيارات العدو .. بسبب ده فكل الطيارات اللي عملتها أميركا بعد كده كان فيها مدفع رشاش .. حتي لو انت من الناس اللي شايفه إن F-35 دي طيارة محصلتش ولا حيحصل زيها فلازم تبقي عارف إن أكيد حيحصل إشتباك جوي بينها و بين طيارة روسي تكون ليها قدرة مش طبيعية علي المناورة زي سوخوي-35 أو سوخوي-57 و ساعتها لازم F-35 يبقي فيها مدفع رشاش.
المصدر:
مقالة بعنوان The F-35 can’t fire its cannons without committing suicide نشرت في مجلة The National Interest وده لينك المقالة الأصلية:
http://nationalinterest.org/blog/buzz/f-35-can%E2%80%99t-fire-its-cannon-without-committing-suicide-122541
