سنة 2006 فيه منكوا يفتكر كويس إن دي السنة اللي حصلت فيها الحرب المشهورة أوي بين إسرائيل و حزب الله أيام ما كان حزب الله حاجة كويسة .. في الحرب دي حزب الله ضرب إسرائيل بكم صواريخ كاتيوشا ولا كإنه أوفر العيد الكبير من كارفور و عشان كده الإسرائيليين قالوا لنفسهم طب ما بما إن كل شوية صفارات الإنذار في البلد تضرب و الناس تجري علي المخابيء اللي تحت الأرض ما نعمل إحنا مخبأ تحت الأرض للحكومة .. المخبأ ده أو مركز الإدارة الوطني National Management Center اللي هو NMC إختصاراً يبقي هو اللي عندك في الصور .. مبدأياً NMC ده مش مكان سري .. حتي أنا مينفعش أتريق عليه و أقول ده السر اللي عارفه ال9 مليون إسرائيلي .. المبني مكانه قصاد مبني البرلمان اللي بيسموه الكنيسيت .. لازق فيه مقر وزارة الخارجية و مكتب رئيس الوزراء و المحكمة الدستورية العليا .. و علي فكرة الليلة دي كلها مش في تل أبيب .. الليلة دي كلها في حتة في القدس بيسموها قرية حليوم و بالإنجليزي بيسموها الربع الوطني National Quarter .. المبني زي ما إنت شايف تصميمه غريب و يحسسك إنك بتتفرج علي متحف مش مقر عمليات حكومة في وقت الأزمات.
المبني ده الإسرائيليين بدأوا يشتغلوا فيه بعد سنة 2006 و أول مرة يتجرب كان سنة 2011 لما مجلس الأمن القومي و ده عبارة عن أهم الناس في مؤسسات الحكم من وزارتي الدفاع و الصحة و أجهزة المخابرات و الداخلية إجتمعوا فيه عشان يجربوه وكأنهم في سيناريو إن إسرائيل إتضربت بقنبلة نووية .. مؤخراً بسبب حاجات كتير الحقيقة منها إن رئيس الوزراء (بنيامين نتنياهو) النيابة وجهتله رسمي تهم فساد و جهات كتير عايزه تظبطه متلبس في أي تهم جديدة فهو بقي بيعمل أغلب إجتماعات مجلس الأمن القومي اللي هم تقريباً 3 إجتماعات في الإسبوع مش في مكتبه الرسمي إنما في NMC .. قدام الناس المبرر للخطوة دي هو والله ده ضروري لحماية أسرار الحكومة الإسرائيلية من التجسس بس فعلياً هو سببها الخوف المرضي اللي بقي بيسيطر علي دماغ (نتنياهو) إن حد يتجسس عليه في مكتبه و ينشر ده في الجرايد.
المفروض إن المبني عميق بس محدش عارف هو كام دور تحت الأرض .. وفق كلام ناس دخلت المكان ده ف95% منه مبني تحت الأرض و عشان تنزل مفيش طريقة غير الأسانسيرات .. الحكومة الإسرائيلية بتقول إنه يقدر يستوعب مئات البني أدمين في حالة تعرض إسرائيل لضربة نووية أو كيميائية أو بيولوجية .. المركز ده إتفعل تاني و بدأ يشتغل مع أزمة فيروس كورونا اللي بسببها عدد حالات الإصابة في إسرائيل عمال يزيد وعلي فكرة مش بس إسرائيل اللي عملت كده .. أميركا عندها مركز إدارة أزمات للطواريء برده بس حاجة عملاقة إسمه مجمع جبل تشايني Cheyenne Mountain Complex وده يبقي قاعدة عسكرية و مقر للحكومة إتعمل جوه جبل.
المصدر:
مقالة بعنوان This is Israel’s Doomsday Bunker for Top Officials that Has Been Activated for Covid-19 نشرت علي موقع The Drive وده لينك المقالة الأصلية:
https://www.thedrive.com/the-war-zone/32814/this-is-israels-doomsday-bunker-for-top-officials-that-has-been-activated-for-covid-19
