أنا رأيي في فيروس كورونا اللي طايح فينا كلنا ده هو إنه عامل زي ماتش الأهلي والزمالك كده .. وإنت بتتفرج علي الماتش لمدة 90 دقيقة إنت بتنسي مشاكلك .. بتنسي قرف الشغل .. بتنسي نكد مراتك ومصاريف عيالك .. الحياة كلها بتقف لمدة 90 دقيقة .. أي حاجة تانية بتبقي مش مهمة .. فيروس كورونا له نفس التأثير علينا كلنا بس النهاردة أنا مش عايز أتكلم عن مصر .. أنا عايز إتكلم عن إسرائيل .. أنا حتي مش عايز أتكلم عن إسرائيل كلها أنا عايز أتكلم عن بني أدم واحد بس .. إبن الو^%& (بنيامين نتنياهو) رئيس الوزراء .. (نتنياهو) عنده مصيبة سودا والأول محتاجين نفهم قد إيه موقف الرجل ده صعب .. كان المفروض إن الرجل ده يسيب منصبه الإسبوع اللي فات وبمجرد ما ياخد إستمارة ستة فنيابة الأموال العامة حتحقق معاه بعد ما الحصانة بتاعته إتشالت .. (نتنياهو) كان حيمشي بعد ما إتعملت الإنتخابات الثانية في إسرائيل في أقل من 6 شهور عشان يتحدد مين اللي حيحكم البلد؟ والغريبة إن إستطلاعات الرأي الأولية قالت إن حزب الليكود بتاع (نتنياهو) رايح في سكة نصر تاريخي يا فندم إلا إن بعد ما النتيجة أُعلنت فعلاً لقوا إن حزب أزرق وأبيض بتاع المعارضة هو اللي كسبها.
معني إن (نتنياهو) يمشي فكده هو تاني زي ما قلتلك النيابة بقي من حقها تحقق معاه لإنه متهم بقضايا فساد وإحتمال كبير يترمي في السجن .. صحيح هو خسر الإنتخابات بفارق قليل أوي بس مش مشكلة .. (نتنياهو) لازم يسيب منصبه .. لكن .. وخلي بالك من لكن دي .. (بيني جانتز Benny Gantz) زعيم حزب أبيض وأزرق اللي المفروض يعني إنه كسب الإنتخابات مش معني إنه خد أغلبية إنه كده خلاص بكره الصبح (جانتز) حيبقي رئيس الوزراء .. الموضوع أعقد من كده سيكا .. لازم (جانتز) يقنع أحزاب تانية كتير من اللي كسبت كراسي في الإنتخابات إنها تتحالف معاه بحيث التحالف ده يبقي تحت إيده عدد كراسي في البرلمان تدي ل(جانتز) أغلبية تخليه هو اللي يشكل الحكومة وبكده (نتنياهو) حيترمي في الزبالة .. تفتكر (نتنياهو) يقعد ساكت كده؟ .. يبقي إنت متعرفوش كويس.
(نتنياهو) طلع قال إن الأحزاب العربية اللي بتمثل عرب 48 واللي متحالفين مع بعض في حاجة إسمها القائمة المشتركة Joint List واللي في الإنتخابات اللي فاتت عرفوا ياخدوا 15 كرسي من أصل 120 كرسي في البرلمان الإسرائيلي اللي بيتسمي كينيست دول بره الحسابات .. ليه يا عم الحاج؟ .. أصل دول هم رمانة الميزان .. لو (جانتز) عرف يضمهم للتحالف بتاعه يبقي كده بقي معاه أغلبية لكن لو (نتنياهو) منعه من إنه ياخدهم تحت جناحه فكده حزب الليكود بتاع (نتنياهو) يقدر يقنع الأحزاب اليهودية المتطرفة إنها تنضمله وبكده بقي هو معاه الأغلبية وساعتها هو اللي حيكمل في منصب رئيس الوزراء ومش حيمشي رغم إنه بالورقة والقلم الحزب بتاعه خسر الإنتخابات .. لا تخرج قبل أن تقول سبحان الله .. تفتكر (جانتز) يسكت؟ .. يبقي إنت متعرفوش كويس.
إذا كان زمان هو كان بيفكر يتحالف مع القائمة المشتركة فهو دلوقتي أعلن إنهم معاه خلاص وبما إنه معاه الأغلبية فرئيس الجمهورية (رويفين ريفلين Reuven Rivlin) كلفه بإنه فعلاً يبدأ يشكل التحالف اللي لو قدر يجمعه ف(جانتز) حيكون هو رئيس وزراء إسرائيل الجاي .. تفتكر (جانتز) يسكت علي كده؟ .. يبقي إنت برده متعرفش هو غلاوي قد إيه؟ .. وهو لسه بيشكل التحالف طلع (جانتز) قال إن أول حاجتين حيعملهم بمجرد ما يمسك رئاسة الوزراء إنه يعمل قانونين .. القانون الأول إن أي حد أُتهم رسمي بأي جريمة قضائية مينفعش بأي حال من الأحوال إنه يمسك منصب رئيس الوزراء .. القانون الثاني إنه حيحط سقف لفترات الحكم لأي رئيس وزراء يمسك إسرائيل بعد كده .. طبعاً الكلام ليكي يا جاره .. (نتنياهو) فضل يسأل نفسه تعمل إيه يا واد يا (نتن)؟ تعمل إيه يا واد يا (نتن)؟ لحد ما ربنا بعتله هديه من السما .. فيروس كورونا.
المواطن الإسرائيلي صحي الصبح علي خبرين أغرب من بعض .. الخبر الأولاني إن وزير العدل (عمير أوهانا Amir Ohana) وده يبقي من تلاميذ (نتنياهو) قال للوزارة كلها أقعدي في البيت عشان خاطر الفيروس .. كل محاكم إسرائيل ونياباتها قعدت في البيت .. ده معناه إن التحقيق اللي بتعمله النيابة ضد (نتنياهو) هو كمان حيقف لحد الله أعلم إمتي؟ .. الخبر الثاني إن (نتنياهو) عطي لمباحث أمن الدولة اللي هم بيسموها شين بيت Shin Bet صلاحيات إنها تراقب تحركات المواطنين الإسرائيليين عن طريق Location بتاع الموبايلات بتاعتهم .. المشكلة إن قرار زي ده لازم يعدي الأول علي لجنة الدفاع والأمن القومي في الكنيست توافق عليه .. لكن .. وبرده خلي بالك من اللي جاي بعد لكن .. بعد الإنتخابات ما خلصت الشهر اللي فات كان المفروض إن رئيس البرلمان (يولي إيلدستين Yuli Eldestein) يشتغل علي تشكيل لجان البرلمان بس عشان هو عضو في الليكود وعارف إن البرلمان بصورته الحالية أغلبيته معارضة فهو فضل يأجل خطوة تشكيل اللجان لحد ما (نتنياهو) إستغل صلاحياته كرئيس وزراء إنه يطلع القرار ده للشين بيت .. مش بقولكوا بني أدم إبن و#$& .. (نتنياهو) إستغل أزمة فيروس كورونا إنه يشل إيد (جانتز) ومع كل يوم بيعدي الإعلام الإسرائيلي بقي بيضغط علي (جانتز) إنه يا يسيب (نتنياهو) يكمل في منصبه أو علي الأقل ياخده معاه في حكومته .. في الحالتين (نتنياهو) حيبقي خد اللي هو عايزه .. هو مش عايز الحصانة تتشال من عليه أيا كان الثمن.
المصدر:
- مقالة بعنوان With a pandemic as cover, Netanyahu is carrying out a coup in Israel نشرت في جريدة The Washington Post وده لينك المقالة الأصلية:
https://www.washingtonpost.com/opinions/2020/03/19/with-pandemic-cover-netanyahu-is-carrying-out-coup-israel/
