أسهل حاجة في الدنيا إني أحفل علي يوفينتوس في وضعهم الحالي .. مفيش أسهل إني أجيب الصورة الكوميدية لحيطة الصد بتاعة (كريستيانو رونالدو Cristiano Ronald) و (ألفارو موراتا Alvaro Morata) و (أدريان رابيو Adrian Rabiot) في الفاول اللي شاطه (سيرجيو أولفييرا Sergio Oliveira) في ماتش العودة ضد بورتو و اللي بسببه خرجوا من دور ال16 للمرة الثالثة علي التوالي .. يااااه مجرد صورة لمنظر (رونالدو) و هو خارج من الماتش و أكتب عليها المنتهي أهو أهو و حتجيب لايكات و شير كتير من حبايب (ليونيل ميسي Lionel Messi) بس الحقيقة أبقي برتكب جريمة في حق كرة القدم لو عملت كده .. أزمة يوفينتوس دولقتي دي كنز من الدروس المستفادة لأي نادي كبير في أي بلد .. بعد ما الماتش خلص في المؤتمر الصحفي قال (ماتياس دي ليخت Matthijs De Ligt) قلب دفاع يوفينتوس إن الفرقة تستاهل تطلع من دور ال16 لإنهم فاقوا متأخر أوي .. ليه؟ .. عشان زي ما يكون لاعيبة يوفينتوس إفتكروا الكرة بتتلعب إزاي بعد طرد المهاجم الإيراني (مهدي طارمي) .. هنا السؤال اللي لازم يتسأل طب طالما لاعيبة يوفينتوس لما بيفوقوا بيلعبوا حلو ليه بقي مش بنشوفهم فايقين كتير؟ .. الحتة دي هي اللي محتاجة شوية شرح.
أسوأ حاجة في الدنيا لما البني أدم يعيش كذبة و يصدقها .. بيبقي صعب علي الناس اللي حالاتي اللي هوايتها إنها تشرح الحقيقة إنه يفهمه إن فيه حاجة غلط .. إزاي تقنع حد بإن فيه مشكلة و هو شايف إن الدنيا وردي؟ .. الناس اللي بتشجع يوفينتوس بتلاقيهم دايماً بيكرروا كذا إسطوانة مشروخة .. ده طبيعي مع مشجعين الكورة .. الأهلاوية عندهم إن الأهلي فوق الجميع .. الزملكاوية عندهم كلمة من سبع حروف بتهز كياني .. الإخوة اللي بيشجعوا يوفينتوس عمليين أكتر .. هم مقتنعين بإن مفيش حاجة إسمها فترة إنتقالية في يوفينتوس و مقتنعيين بمقولة إن المكسب مش أهم حاجة لإن مفيش حاجة غير المكسب .. خليني أبقي صريح معاك إن الكلام ده مكانه المدرجات تغنيه و إنت بتشجع أو كومنتات السوشيال ميديا .. علي أرض الواقع الكلام تبله و تشرب ميته .. يوفينتوس في مرحلة إنتقالية و لو إنت مش مصدق الكلام ده و أنا عارف إن فيه ناس مش حتصدقه فخليني أحاول أقنعك.
المشكلة عشان تبدأ تفهمها لازم تروح للراس الكبيرة .. (أندريا أنييلي Andrea Agnelli) رئيس النادي و عيلة الرجل ده هي اللي ماسكة شركة فيات بتاعة العربيات .. المهم إن الرجل ده بدأ يلاحظ حاجة و هي إن مفيش فرقة بتكسب بطولة Champions League و دي البطولة اللي هو حيموت و يكسبها بإنها تفضل تدافع و تلعب علي الهجمة المرتدة .. بايرن ميونيخ خدوا البطولة و هم بيلعبوا كرة هجومية .. ليفربول كسبوها و هم بيلعبوا سيكسي فوتبول .. ريال مدريد كسبوها 3 سنين ورا بعض و مكانوش سيكسي بس علي الأقل مكانوش أجلي .. و قبيلهم برشلونة بفرقة MSN اللي داست علي وش كل فرق أوروبا .. أخر مرة فرقة كسبت البطولة بركن الأوتوبيس كانت تشيلسي سنة 2012 يعني من 9 سنين .. علي فكرة (أندريا أنييلي) مكنش هو أبوالعريف في يوفينتوس اللي جاب التايهة و لقي إن الفرقة محتاجة تغير طريقة لعبها .. الموضوع بدأ بملك الأجلي (ماكس أليجيري Max Allegri).
(أليجيري) وصل لنهائيين Champions League و هو بيلعب أجلي .. إركن الأوتوبيس و إلعب علي المرتدات .. هي كانت طريقة ناجحة جداً وفق الإمكانيات و اللاعيبة اللي كانت متاحة تحت إيده بس حتي (أليجيري) نفسه كان عارف إن عشان يوفينتوس يكسب البطولة اللي هم نفسهم فيها لازم ينتقلوا من مرحلة الأجلي للسيكسي .. الحق يتقال (أليجيري) حاول بنفسه يحل المشكلة دي بس معرفش .. فاكر نهائي 2016-2017 اللي خسروه قصاد ريال مدريد؟ .. خط هجوم يوفينتوس كان (ماريو ماندزوكيتش Mario Mandzukic) و (جونزالو هيجوايين Gonzalo Higuain) .. علي يمينهم (خوان كواردادو Juan Cuardado) و علي شمالهم (باولو ديبالا Paulo Dybala) و تحتيهم (ميراليم بيجانيتش Miralem Pjanic) .. خط هجوم محترم جدأ بس حتي (أليجيري) معرفش يلعب السيكسي فوتبول اللي (أندريا أنييلي) نفسه يشوفها في يوفينتوس.
ده السبب اللي هم جابوا (رونالدو) علشانه و ده السبب اللي خلاهم بطيب خاطر يدفعوله 375 مليون يورو مرتبات و حوافز علي مدي سنين عقده و خلاهم يقرروا يبنوا الفرقة حوليه و هي دي المشكلة .. هم معرفوش يبنوا الفرقة حوليه .. موسم 2017-2018 رجعوا (ليوناردو بونوتشي Leonardo Bonucci) من ميلان و جابوا (دوجلاس كوستا Douglas Costa) و (جواو كانسيلو Joao Cancelo) و دفعوا في كل واحد من الثلاثة 40 مليون يورو و معاهم (إيمري تشان Emre Can) بصفقة إنتقال حر و بمرتب خيالي و دي كانت أول غلطة .. واضح إن كان فيه مشروع بدأ مع (أليجيري) و واضح إن إنتقالات اللاعيبة بدأ شكلها يتغير بس في نفس الوقت اللاعيبة اللي جت مش كفاية إن يوفينتوس بقدرة قادر يلعب سيكسي فوتبول .. أول مصيبة عملتها الإدارة إنها في موسم 2019-2020 مشت (أليجري) و جابت (ماوريسيو ساري Mauricio Sarri) علي أمل إنه يقدم مع يوفينتوس السيكسي فوتبول اللي كان بيلعبها مع نابولي.
فاكر (جواو كانسيلو) و (إيمري تشان) اللي جابوهم قبليها بسنة كجزء من خطة إعادة الهيكلة؟ .. أهم مشيوا و يوفينتوس دفع 200 مليون يورو عشان يجيبوا (دي ليخت) من أياكس أمستردام .. (كانسيلو) المبدع دلوقتي مع مانشستر سيتي سبته يمشي و جبت مكانه المقتول (دانيلو Danilo) .. و زي ما يكون لازم الفرقة يبقي فيها لاعيبه جايه ببلاش فبعد ما مشيت (إيمري تشان) رحت جبت (رابيوت) و (أرون رامزي Aaron Ramsey) و دفعتلهم مرتب خيالي برده .. و إشتريت لاعيب محدش عارف عنه حاجة إسمه (ديجان كولوسيفيسكي Dejan Kulusevski) من أطالانطا بعد ما دفعت فيه 35 مليون يورو .. واضح إن فيه مشكلة في الإنتقالات .. إنت بتقول عايز تلعب كرة هجومية و جايب مدير فني بيلعب كورة هجومية بس جايبله لاعيبه مبتعملش حاجة غير إنها تجلط الجمهور .. دي مش فرقة متصممة عشان تلعب سيكسي و ده السبب اللي خلي يوفينتوس تحت إيد (ساري) الفرقة رجعت تاني تركن الأوتوبيس علي أمل إنهم يدوا الكورة ل(رونالدو) أو أي حد تاني يعمل بيها حاجة مفيدة.
ده السبب اللي خلي (أندريا أنييلي) يجيب (أندريا بيرلو Andrea Pirlo) يدرب الفرقة و كنا إتكلمنا عن ده قبل كده .. (بيرلو) اللي مدربش فرقة في حياته ولا حتي مسك مساعد مدرب .. (بيرلو) اللي إتحطتله خطة بإن النادي حيبدأ يشتري لاعيبة صغيرة في السن و ليها مستقبل .. محدش قال إن (فيديريكو كييزا Federico Chiesa) و (ديجان كولوسيفيسكي) و (ويستون ماكيني Weston McKennie) لاعيبة سوبرستارز .. دي مشاريع لاعيبة كويسة .. لما فرقة في حجم و تاريخ و مكانة يوفينتوس تجيب مدرب عمره ما درب قبل كده و يتجابله لاعيبه صغيرة في السن مش مصروف عليها كتير و لسه مينفعش تقول عليها لاعيبة تقدر تشيل فرقة يبقي ده إسمه إيه؟ .. شطور .. إسمه مرحلة إنتقالية.
(بيرلو) محتاج أولا و أخيراً إن الجمهور يفضل واقف في ظهره .. لو إنت بتشجع يوفينتوس لازم تبقي عارف إن فيه إحتمالية إن لسنتين تلاتة قدام متشوفش الفرقة بتكسب الدوري و تلاقي إنترميلان هم اللي رافعين الكاس .. عارف إن ده منظر لوحدة يجيبلك إكتئاب حاد بس معلش هي سُنة الحياة كده .. خط نص الفرقة محتاج يتفرمط بس النادي بقاله 3 سنين بيخسر فلوس و السنة اللي فاتت خسايرهم وصلت 100 مليون دولار .. أنا عارف إن اللي حطلبه ده حيبقي صعب تحقيقة بس فعلاً مشجعي يوفينتوس محتاجين يتعلموا الصبر.
المصدر:
مقالة بعنوان Juventus’ Champions League nightmare doesn’t change the fact that the club is on the right track نشرت في موقع ESPN و ده لينك المقالة الأصلية:
https://www.espn.com/soccer/blog-marcottis-musings/story/4334353/juventus-champions-league-nightmare-doesnt-change-the-fact-that-the-club-is-on-the-right-track
