شايف الطيارة اللي قدامك في الصور دي .. لو إنت حاسسها طيارة صغيرة فهي فعلاً صغيرة إنت مش غلطان .. طولها 2.7 متر وعرضها من الجناح للجناح 4.2 متر .. خفيفة كمان هي وزنها ميعديش 500 كيلوجرام يعني أخف من عربيتك .. إسمها بالكامل X-37B Orbital Test Vehicle بس إحنا بينا وبين بعضينا حنسميها X-37B بس .. هي من تصنيع شركة بوينج Boeing الأميريكية وتحسها واخده نفس شكل وتصميم مكوك الفضاء .. اه نسيت أقولك هي طيارة بدون طيار يعني Drone .. لحد دلوقتي أنا مقلتش معلومة تخليك تستغرب .. اللي حيخليك تستغرب إن يوم 30 أكتوبر 2019 الطيارة دي هبطت في مركز كينيدي للفضاء التابع لوكالة NASA بعد ما فضلت تلف حول الكرة الأرضية 780 يوم ..أيوه الطيارة دي فضلت تلف حول الأرض سنتين وخمسين يوم .. مش بس كده .. يوم 7 مايو 2017 الطيارة دي هبطت بعد ما قعدت تلف حول الكرة الأرضية 718 يوم .. الطيارة دي طلعت لفت حول الأرض 5 مرات لو جمعت الأيام اللي هي فضلت فيها في الجو حتلاقيهم 2,865 يوم .. وطبعاً السؤال اللي إنت أكيد بتسأله هو ليه؟ .. ليه وجع القلب؟ .. لما قيادة القوات الجوية الأميريكية إتسألت عن هي الطيارة دي بتهبب إيه في الفضاء الفترة دي كلها كان ردهم إنها بتعمل سلسلة تجارب علمية سرية ليها علاقة بتطوير مشروع الفضاء زي الإقلاع والهبوط وأنظمة التوجيه والملاحة .. الحاجات بتاعة الدحيحة اللي بتجيب صداع لأي حد مش بيحب الرياضة والفيزياء.
مستقبل الرحلات الفضائية هو الحاجة اللي شركة SpaceX سعت وراها لحد ما إتمكنت منها واللي هي Reusable Spacecraft .. زمان إنت كان عندك مكوك فضاء بتطلعه علي صواريخ وبمجرد ما مكوك الفضاء يهرب من مجال الجاذبية فإنت بترمي الصواريخ دي عشان المكوك يكمل رحلته للفضاء ويهبط كأنه طيارة عادية .. الصواريخ فيه منها NASA بترجعها تاني وتصلحها عشان تعيد استخدامها وفيه منها خلاص بيستخدم مرة واحدة ويترمي .. SpaceX بدأت تمشي في سكة إن يبقي عندك صاروخ واحد يطلع ويرجع يهبط تاني زيه زي الطيارة الهليكوبتر وحالياً هم عندهم صاروخين شغالين بالمبدأ ده اللي هم Falcon 9 و Falcon Heavy .. الطيارة X-37B بتتركب علي صاروخ Falcon 9 وبيطلع بيها لحد الغلاف الجوي وبيسيبها وهو بيرجع يهبط زي الطيارة الهليكوبتر والطيارة بتكمل رحلتها حول الكرة الأرضية وبترجع تهبط تاني زي أي طيارة.
وهي في الجو الطيارة دي مش بتبقي زي القمر الصناعي .. القمر الصناعي وهو بيلف حول الأرض بيدور بسرعة ثابتة عشان يفضل يلف في مدار ثابت .. الطيارة X-37B فيها صواريخ دفع صغيرة أو Thrusters عشان تزود سرعتها أو تقللها بحيث وهي بتطير تغير من إرتفاعها عن سطح الأرض وبالتالي تغير من مدارها .. لنفترض مثلاً إنك إحتجت فجأة إنك تخليها تصور حتة معينة فهي تقدر تزود من سرعتها وتقلل من إرتفاعها عشان تقرب من الحتة اللي إنت عايز تشوفها وتصورهالك بصور الجودة بتاعتها فشيخة .. من أول ما الطيارة إتقال إسمها وإتعرف إنها بتطير بالسنين حول الكرة الأرضية والإعلام بره مش سايبها في حالها والناس المهتمة بالفضاء بقت بتتخانق علي مين يقدر يصورها .. حصل قبل كده وعالم فلك هولندي إسمه (رالف فانديبيرج Ralf Vandebergh) صورها بالتليسكوب بتاعه مرتين .. مرة يوم 29 يونيو 2019 والمرة الثانية كانت يوم 2 يوليو 2019 فتعقب الطيارة دي في الجو مش صعب ومش محتاج إمكانيات كبيرة .. بس الطيارة دي بتعمل إيه وليه بتطير الوقت ده كله في الفضاء؟ فعلياً محدش عارف ولإني مش عارف فمش عايز أهبد.
المصدر:
- مقالة بعنوان The strange science of the Air Force’s top-secret space plane نشرت في مجلة Wired وده لينك المقالة الأصلية:
tps://www.wired.co.uk/article/boeing-x-37b-space-plane
