فيه مصطلح في علم الفلك إسمه إيكزو- بلانيت Exoplanet وده لو عدي قدامك فمعناه إنك بتتكلم عن كوكب بره المجموعة الشمسية بتاعتنا .. عدد Exoplanets اللي ربنا خلقها وإحنا عرفنا نعدها وصلوا حوالي 4,000 يعني بره المجموعة الشمسية بتاعتنا فيه 4,000 كوكب ومن ال4,000 كوكب دول فيه منهم حوالي 48 كوكب هم اللي بيتصنفوا علي إنهم Potentially Habitable يعني فيه إحتمالية إنه ينفع يتعاش فيهم .. فرمل بقي هنا عشان تفهم الكلمتين دول .. مش معني إني قلتلك إن كوكب فيه إحتمالية إنه يتعاش عليه إننا بكره الصبح ممكن نعزل هناك ونسيب كوكب الأرض ونروح نعيش في كوكب تاني زي ما (مدحت صالح) الله يمسيه بالخير كان بيغني .. الحقيقة إن مصطلح Potentially Habitable دي معناه إن الكوكب اللي إنت بتتكلم عنه ربنا خلقه علي مسافة حلوة أوي من النجم اللي الكوكب ده بيدور حوله يعني لا هو قريب أوي من النجم فيتحرق ولا هو بعيد أوي فيتجمد .. حاجة كده بين البينيين .. عشان بس أوريك قد إيه المصطلح ده ممكن يخدعك فكواكب المجموعة الشمسية اللي ينفع يتقال عليها Potentially Habitable هم الزُهرة والأرض والمريخ والمُشتري وزُحل .. أربع كواكب في مجموعة شمسية نظرياً ينفع يتعاش عليهم بس فعلياً مفيش إلا كوكب الأرض بس اللي ينفع البشر يعيشوا فيه .. المشكلة إنك لو بتتكلم عن Exoplanet ما ولقيت إن المسافة بينه وبين النجم اللي بيدور حوله كويسة وده خلاك تصنفه علي إنه Potentially Habitable فإنت لازم تسأل نفسك سؤالين:
السؤال الأول .. هو بالصلاة علي النبي إيه نوعية النجم اللي الكوكب بتاعك بيدور حوله؟ .. لنفترض إنه نجم صغنن محندق كده ودي النجوم اللي بتتسمي الأقزام الحمراء Red Dwarfs .. معني إن النجم نفسه صغنن يبقي المسافة بين النجم والكوكب مش كبيرة أوي وده معناه إن كل شوية الرياح الشمسية بتاعة النجم ده بتروح تصبح وتمسي علي الكوكب يعني تقريباً الكوكب ده ملوش غلاف جوي ودي أهم نقطة .. الغلاف الجوي .. من غير غلاف جوي يبقي مفيش هواء ومفيش هواء يعني مفيش أكسجين ومفيش أكسجين يبقي مفيش مياه علي سطح الكوكب .. لو لقيت بقي إن النجم اللي الكوكب بيدور حوله من فئة G-Type زي الشمس بتاعتنا يبقي إنت كده تقدر تقول إنها بدأت تندع.
السؤال الثاني .. هو الكوكب بتاعك ده حجمه قد إيه؟ .. مينفعش يبقي كوكب حجمه كبير أوفر زي مثلاً كوكب المشتري لإنه ساعتها حيبقي كوكب غازي ملوش سطح صلب ينفع يتعاش عليه .. وفي نفس الوقت مينفعش يبقي كوكب صغير أوفر لإنه لو كوكب صغير أوفر فالجاذبية بتاعته حتبقي أضعف من إنه يبقي عنده غلاف جوي .. تاني .. مفيش غلاف جوي يبقي مفيش هواء ولو مفيش هواء يبقي مفيش أكسجين ويبقي مفيش مياه علي سطح الكوكب .. إنت فعلياً مش محتاج كوكب بحجم الأرض .. إنت محتاج كوكب أصغر شوية من الأرض .. الكوكب الصغير الغلاف الجوي بتاعه مش حيبقي تقيل وبالتالي مش حيحبس أشعة النجم اللي الكوكب بيدور حوله ويمكن كوكب الزُهرة هو مثال حلو أوي لده .. ده كوكب حجمه أكبر بحاجة بسيطة أوي من الأرض بس ده مخلي الغلاف الجوي بتاعه تقيل وفيه نسبة ثاني أكسيد كبون عالية وبالتالي هو فعلياً عامل زي لما تسيب عربيتك مركونة في الشمس كتير لما بتيجي تركبها تلاقي إنها سخنة أوي عشان أشعة الشمس إتحبست جوه العربية بسبب إن الإزاز بيمنع إن أشعة الشمس تطلع تاني بعد ما دخلت .. اللي بيحكم الليلة كلها إن حضرتك تحسب كتلة الكوكب اللي إنت لقيته ولو لقيت كتلته أعلي بنسبة 2.7% من كتلة الأرض يبقي إنت كده بتتكلم عن كوكب حتلاقي عليه مياه وحتلاقي عليه غلاف جوي وده السبب إن القمر مثلاً اللي يعتبر علي بُعد مثالي من الشمس بس مينفعش يبقي عليه حياة لإن كتلته 1.2% من الأرض وبالتالي الجاذبية بتاعته أضعف من إن يبقي فيه غلاف جوي حول القمر.
المصدر:
- مقالة بعنوان How small is too small for a habitable world? نشرت في مجلة Forbes وده لينك المقالة الأصلية:
https://www.forbes.com/sites/briankoberlein/2019/10/16/how-small-is-too-small-for-a-habitable-world/#4f8096c870cd
