موضوعنا اللي حنتكلم عنه النهاردة هو نادي أتليتكو مدريد الإسباني و حنحكي قصة إزاي ده نادي كان سنة 2011 يعني من 6 سنين بس قرب يعلن إفلاسه لنادي دلوقتي يعتبر من أقوي أندية العالم مش بس إسبانيا .. انا عايز أرجعك بالزمن بس لديسمبر 2011 و ده الشهر اللي إدارة النادي أعلنت تعيين الأرجنتيني (دييجو سيميوني Diego Simeone) كمدير فني للنادي و حابب أفكرك بالمصيبة اللي نادي أتليتكو مدريد كان عايش فيها في الفترة دي:
لما (سيميوني) إستلم الفريق كانوا يدوبك بينهم و بين الهبوط لدوري الدرجة الثانية الإسباني 4 نقاط بس في الوقت اللي جيرانهم ريال مدريد كانوا متصدرين الدوري الإسباني و في سكتهم إنهم يكسبوا اللقب و هم محققين رقم قياسي بإنهم عدوا حاجز ال100 نقطة .. لما (سيميوني) إستلم الفريق كان أتليتكو مدريد مقدرش يفوز علي ريال مدريد من سنة 1999 يعني بقالهم 12 سنة مش عارفين يكسبوهم .. قبل تعيينه بشهر الفريق خسر بشكل مهين من ريال مدريد بنتيجة 4-1 في ماتش إتلعب علي إستاد سانتياجو برنابيو Santiago Bernabeu.
فترة السواد اللي كان نادي أتليتكو مدريد عايش فيها قبل سنة 2011 مش بس كانت مقتصرة علي أداء الفريق في الملعب .. إدارياً كمان النادي كان في وضع زي الزفت .. مبدأياً كده في صيف 2011 شركة العربيات الكورية كيا KIA اللي كانت الراعي الرسمي للفريق إنسحبت من رعايته .. عشان إدارة النادي تسدد جزء من الديون المتلتلة اللي عليهم إضطروا إنهم يبيعوا عدد من نجوم الفريق زي (سيرجيو أوجويرو Sergio Aguero) اللي اتباع لمانشستر سيتي و (ديفيد دي خيا David de Gea) اللي إتباع لمانشستر يونايتد .. لما موسم 2011 خلص كانت خساير النادي خلال ال6 مواسم اللي فاتوا يعني في الفترة من 2005 لحد 2011 وصلت حوالي 229 مليون يورو.
علي الناحية الثانية .. ريال مدريد كانوا عايشين في عز و بيتمرمغوا في الفلوس .. سنة 2000 إدارة النادي باعت حقوق الرعاية لإستاد سانتياجو برنابيو لشركة أديداس Adidas مقابل 500 مليون يورو .. أرباح ريال مدريد خلال موسم 2011-2012 بس وصلت 500 مليون يورو و دي الفلوس الصافية اللي بتخش لجيب النادي في حين إن دخل نادي أتليتيكو مدريد قبل ما يتخصم منهم فلوس الضرائب و المرتبات و المصاريف الإدارية حوالي 107.9 مليون يورو .. يعني أرباح نادي ريال مدريد كانت حوالي 5 أضعاف إجمالي الفلوس اللي بتدخل لأتليكو مدريد قبل حتي ما يشيلوا منها مصاريب المرتبات علي الأقل.
أظن السؤال اللي المفروض كلنا نكون بنسأله لنفسنا هو إزاي ده حصل؟ و إيه اللي خلي إدارة أتليتكو مدريد وصلت للوضع اللي زي الزفت ده؟
القصة دي بدأت فعلياً سنة 2000 .. في السنة دي نادي أتليتيكو مدريد هبط لدوري الدرجة الثانية الإسباني و قعدوا فيه سنتين مش عارفين يصعدوا للدوري الممتاز .. المشكلة إنهم في السنتين دول إدارة النادي مدفعتش ولا مليم من الضرائب المستحقة عليهم اللي وصلت فاتورتها 46 مليون يورو .. سنة 2002 ربنا وفقهم و صعدوا دوري ممتاز .. بدل ما يهدوا و يبدأوا يتصرفوا بشوية حكمة عشان يسددوا فلوس الضرائب اللي عليهم تلاقي إن إدارة النادي إتهورت و صرفت ملايين في سباق صرف فلوس ملوش أي معني مع ناديي برشلونة و ريال مدريد .. أحب أفكرك بس إن في الفترة دي كان رئيس ريال مدريد هو (فلورنتينو بيريز Florentino Perez) اللي هو الرئيس الحالي بس دي كانت فترة رئاسته الأولي و كان بيبني فريق نجوم أو اللي الإسبان بيسموهم جالاكتيكوس Galacticos زي (زين الدين زيدان) و (ديفيد بيكهام David Beckham) و (رونالدو Ronaldo) .. إدارة أتليتيكو مدريد فضلت تصرف ملايين علي الفاضي من سنة 2002 لحد موسم 2007-2008 و ده الموسم اللي فعلاً ميزانية النادي إنهارت لإن إدارة النادي لقت نفسها بتصرف علي شراء لاعبين مبلغ أكبر من إجمالي الفلوس اللي بتدخلهم.
القشة اللي قسمت ظهر البعير زي ما بيقولوا كانت الأزمة المالية العالمية اللي حصلت سنة 2008 و اللي كان فعلاً سببت مصيبة للإقتصاد الإسباني .. اللي حصل إن الإقتصاد الإسباني فعلياً وصل لمرحلة الكساد و معدل البطالة وصل 25% .. ده خلي الأندية تُجبر إنها تبدأ تخفض أسعار بيع التذاكر و بالتالي أرباح الأندية الإسبانية قلت .. الأهم إن البنوك الإسبانية مبقاش عندها القدرة إنها تسلف الأندية فلوس .. هنا إدارة أتليتيكو مدريد مكنش قدامها غير إنها تحاول تبيع حق الرعاية لإستاد النادي التاريخي فيسنتي كالديرون Vicente Calderon و اللي هم السنة دي سابوه و راحوا لإستاد جديد بس حتلاقي صورة عندك للإستاد الخرافي ده و اللي فعلاً يعتبر تحفة هندسية و حتلاحظ إنه مبني علي نهر و النهر ده إسمه المانزاناريس اللي بيشق العاصمة الإسبانية مدريد .. بس زي ما قلتلك ولا شركة كان عندها سيولة إنها تدفع 400 مليون يورو عشان يشتروا حق الرعاية للإستاد .. يا عيني إدارة النادي مكنش قدامها عشان تسدد الديون اللي عماله تتراكم عليهم غير إنهم يفضلوا يبيعوا في نجوم الفريق زي (فيرناندو توريس Fernando Torres) اللي باعوه لنادي ليفربول الإنجليزي و (دييجو فورلان Diego Forlan) اللي باعوه لنادي إنترميلان الإيطالي و طبعاً (أوجويرو) و معاهم (رادميل فالكاو Radamel Falcao) لنادي موناكو الفرنسي سنة 2013 مقابل 43 مليون يورو.
اللي زود من المشكلة أوي حاجة ملهاش علاقة بإدارة أتليتيكو مدريد إنما هي مشكلة سياسية .. دلوقتي في عز الأزمة المالية العالمية الحكومة الإسبانية طلبت إن الإتحاد الأوروبي يسلفها مش ملايين إنما مليارات الدولارات عشان ينقذوا الإقتصاد الإسباني من الإفلاس .. المشكلة إن دول الإتحاد الأوروبي مكنش عاجبها إن إزاي الحكومة الإسبانية جايه تستلف ملايين من الإتحاد الأوروبي و هم أساساً ليهم ملايين عند الأندية الإسبانية في شكل ضرائب متدفعتش و الحكومه مش عايزه تجبر الأندية إنها تدفع الضرائب المتأخرة عليها .. عشان بس كلامنا يبقي بالأرقام و ميبقاش عشوائي في يوم واحد يناير 2012 يعني بعد إسبوع واحد بس من تعيين (سيميوني) كمدير فني جديد للنادي تلاقي إن مجلس الرياضة الإسباني و دي حاجة بتعادل وزارة الشباب و الرياضة عندهم طلعوا تقرير قالوا إن أندية الدوري الممتاز الإسبانية مديونة للحكومة بحوالي 673 مليون يورو عبارة عن ضرائب متأخرة .. من ال673 مليون يورو دول تلاقي إن أتليتكو مدريد لوحده مطلوب منه يسدد 120 مليون يورو للحكومة.
الحقيقة إن الإتحاد الأوروبي كان عنده حق في نقطة .. إيه المبرر اللي يخلي الحكومة الإسبانية تدعم الأندية زي أتليتكو مدريد اللي هم أساساً مبيدفعوش الضرائب اللي عليهم و بعد كده الحكومة تيجي للإتحاد الأوروبي يقولولهم و النبي سلفونا 40 مليار دولار عشان ننقذ إقتصادنا .. لا و اللي يعصب إن الحكومة الإسبانية اللي كان بيرأسها في الوقت ده (ماريانو راخوي Mariano Rajoy) عشان يسدوا شوية من عجز الموازنة راحوا مخفضين من الفلوس اللي بتروح كتأمين صحي للمهاجرين و وجمد معاشات المواطنين الإسبان قال يعني جزء من خطة التقشف .. فين المنطق في اللي بتعمله الحكومة الإسبانية؟ .. هل إنك تساعد نادي زي أتليتكو مدريد أهم عندك من إنك توفر فلوس المعاشات للمواطنين العاديين؟ ما تولع كرة القدم باللي عايز يتفرج عليها و دي كانت وجهة نظر الإتحاد الأوروبي و اللي فيه ناس حتقول و الله الناس دي عندها حق.
مبرر الحكومة الإسبانية كان من وجهة نظر الناس اللي ملهاش في كرة القدم مبرر سخيف جداً و ملوش أي معني .. الحكومة الإسبانية كانت شايفه إن نادي أتليتكو مدريد مينفعش يفلس لإن ده ثالث أكبر نادي في إسبانيا بعد ريال مدريد و برشلونة .. نقطة تانية برده لازم تكون مشروحه كويس ليك لإنك ممكن عشان مش عايش في إسبانيا تستغربها أوي .. علاقة السياسة بكرة القدم في إسبانيا غير أي دولة ثانية في العالم .. عشان تفهم العلاقة دي عامله إزاي خليني أحكيلك موقف حصل سنة 1999 .. في السنة دي ناديي سلتا فيجو و إشبيلية هبطوا دوري الدرجة الثانية بسبب إن الإدارتين زوروا في الميزانية و دي جريمة عقوبتها حسب القانون الإسباني إن الناديين يهبطوا .. طبعاً جماهير الناديين نزلوا الشوارع و عملوا مظاهرات و بدل ما إتحاد الكرة الإسباني يتمسك بقراره و يحترم القانون إذا بالحكومة الإسبانية بتتراجع عن قرارها بإن الناديين يهبطوا دوري الدرجة الثانية .. و علي فكرة الموسم اللي وراه الدوري الإسباني إتلعب ب20 فرقة لإن إشبيلية و سلتافيجو كملوا في الدوري الممتاز و فيه 3 فرق صعدت من دوري الدرجة الثانية .. تساهل الحكومة الإسبانية مع الأندية عموماً مش بس نادي أتليتكو مدريد خلي الحكومة تطنش أو خلينا نقول تأجل طلبها بإن النادي يدفع الضرائب المتأخرة عليه و اللي وصلت لرقم يعتبر 6 أضعاف المبلغ اللي كان نادي جلاسكو راينجرز الأسكتلندي اللي يعتبر واحد من قطبي كرة القدم الأسكتلندية مديون به للحكومة الأسكتلندية و اللي بسبب تأخر النادي عن الدفع هبط دوري الدرجة الثانية في فبراير 2012 .. يعني الجريمة اللي نادي أتليتكو مدريد ثالث أندية إسبانيا متهم بيها فيه نادي تاني في أسكتلندا يعتبر ثاني أكبر نادي عندهم عمل جريمة زيها بس مش بنفس الفُجر بتاع أتليتكو مدريد بس تلاقي إن النادي الإسباني طلع براءة و النادي الأسكتلندي إتخسف به الأرض .. ده خلي ناس كتير تسأل هو فين العدل؟
لما الحكومة الإسبانية رضخت لطلبات الإتحاد الأوروبي و إتفقت مع الأندية الإسبانية و مع نادي أتليتيكو مدريد إنهم يجدولوا دفع الضرائب المتأخرة عليهم و بص بقي السداد بالتقسيط المريح بيبقي عامل إزاي .. قلنا إن نادي أتليتيكو مدريد عليه ضرائب متأخرة قيمتها حوالي 120 مليون يورو حيتسددوا علي سنة 2020 بحيث إن الفائدة علي الفلوس دي حتتحسب ب4.5% اللي هو أقل معدل فائدة متاح أقره البنك المركزي الإسباني .. كده نادي أتليتيكو مدريد عرف يحل مشكلة الضرائب المتأخرة .. المشكلة اللي قدامهم كانت إزاي يقدروا ينافسوا ريال مدريد و برشلونة مالياً؟ .. بمعني أخر .. إزاي (سيميوني) وصل بنادي أتليتكو مدريد من نادي بينافس علي البقاء لواحد من المرشحين الأساسيين إما عشان يكسبوا لقب الدوري أو لقب الChampions League؟ لإنك مينفعش توصل للنجاح ده من غير ما يبقي معاك فلوس و فلوس كتير أوي كمان.
إدارة نادي أتليتكو مدريد كان عندها مشكلة كبيرة .. دلوقتي هم لو حبوا يشتروا لاعب بمبلغ عالي فإحتمالية إنهم يروحوا لواحد من البنوك الإسبانية الكبيرة زي Banco Santander أو BBVA بقي مستحيل لإن البنوك دي أصلاً مش عارفه تسند نفسها بسبب الأزمة المالية العالمية و إن فيه ناس خدت قروض عشان تشتري بيوت و لقت نفسها مش عارفة تسدد الأقساط .. فطبعاً البنك من دول أخر حاجة يفكر فيها إنه يسلف نادي فلوس عشان يشتري لاعب .. حتي لو حبوا إنهم يستلفوا فلوس من الأعضاء اللي معاهم فلوس زي ما النادي الأهلي بيعمل أحياناً فالمشكلة إن أعضاء نادي أتليتكو مدريد يعتبروا غلابة إسبانيا لدرجة إن رئيس مجلس إدارة النادي (ميجيل أنخل جيل Miguel Angel Gil) و اللي يعتبر أكثر مالك لأسهم النادي يعني بإختصار ده (نجيب ساويرس) بتاع النادي أساساً راهن بيته عشان كان هو شخصياً واخد قرض من بنك و مش عارف يسدده اللي هو جيتلك يا عبدالمعين تعيني لقيتك محتاج اللي يعينك .. بدأت تفهم حجم المشكلة اللي هم فيها؟
نادي أتليتكو مدريد ميقدروش يعملوا السحر و الشعوذة اللي بيعملهم (فلورنتينو بيريز) رئيس نادي ريال مدريد إنه يشتري لاعبين بمبالغ خرافية يقوم معوض الفلوس دي من فلوس بيع التذاكر و التي-شيرتات و الإعلانات و بالطريقة دي خلي أرباح النادي تتضاعف 4 مرات علي الأقل .. خلينا نكون صرحاء مع بعض .. أتليتكو مدريد مش حيقدروا يعملوا كده .. ريال مدريد يقدروا يدفعوا ال93 مليون يورو اللي دفعوها لنادي مانشستر يونايتد عشان يشتروه (كريستيانو رونالدو Cristiano Ronaldo) مقدم و كاش و علي الطرابيزة و الكلام ده كان سنة 2009 يعني في الوقت اللي العالم كله بيفوق من صدمة الأزمة المالية العالمية .. أتليتكو مدريد أساساً مكنش معاهم فلوس يدفعوا مرتبات اللاعبين و ده اللي حصل مع لاعب خط الوسط (دييجو Diego) اللي النادي خدو علي سبيل الإعارة من نادي ولفسبورج الألماني خلال موسم 2011-2012 اللي هو أول موسم ل(سيميوني) و اللاعب رفع قضية علي النادي إنه مخدتش مرتبه .. الحل اللي النادي وصله كان حاجة إسمها Private Lenders .. تطلع إيه البتاع ده؟
شايف الرجل الأصلع اللي عندك في الصور؟ .. ده يبقي إسمه (بيتر كينيون Peter Kenyon) و ده كان المدير التنفيذي لناديي تشيلسي و مانشستر يونايتد و الرجل ده كانت وظيفته إنه يدير الBusiness بتاع الناديين .. بمعني أخر ده الرجل اللي بيجيب فلوس للناديين .. الأخ ده بعد سنين من الشغل عند الناس قرر يعمل شركته الخاصة و سماها Creative Art Agency أو CAA و مقرها مدينة بيفرلي هيلز في ولاية كاليفورنيا الأميريكية .. الرجل ده بعد ما كان بيدير الBusiness بتاع كبار أندية أوروبا بقي بيدير الBusiness لكبار ممثلي هوليوود زي (جورج كلوني George Clooney) .. زباينه كانوا كمان ناس تقيلة في مجال كرة القدم زي (كريستيانو رونالدو) و (جوزيه مورينيو Jose Mourinho).
الأخ (بيتر كينيون) شركته كبرت و بقي ليها صندوق تمويل خاص بيها بس عشان ميدفعش ضرائب كتير فهو سجل شركته بإن مقرها الرئيسي في أيرلندا و في مدينة نيوجيرسي الأميريكية .. ركز بقي معايا .. دلوقتي شركة CAA ليها أسهم في البورصة .. حوالي 50% من الأسهم دي مملوكة لشركة إسمها Gestifute و دي شركة متخصصة في إدارة المؤسسات الرياضية و اللي أسسها يبقي وكيل اللاعبين الشهير جداً (جورجي مينديز Jorge Mendez) .. طبعاً انت بتسأل نفسك هو إيه دخل نادي أتليتكو مدريد بالقصة الطويلة العريضة دي كلها؟ .. الموضوع بسيط بس محتاج يتشرحلك.
لنفترض إنك معاك فلوس و عايز تستثمرها فشركة CAA بتيجي تقولك إن فيه لاعب موهوب أوي و لسه صغير إسمه (محمد أبوتريكه) بيلعب في نادي الترسانه و اللاعب ده مستقبله مضمون و أكيد الأهلي أو الزمالك حيشتروه في يوم من الأيام .. تقوم انت كواحد معاك فلوس شاري جزء من المبلغ اللي النادي الأهلي حيدفعه لما يجي يشتري (أبوتريكه) .. يعني انت مثلاً مش عارف الأهلي حيتشري (أبوتريكه) بكام فانت بتقول إنك حتدفع مبلغ معين بحيث إن لما إن شاء الله الأهلي يتشري (أبوتريكه) فانت ليك مثلاً 15% من قيمة الصفقة و الفلوس اللي انت بتدفعها أغلبها بيروح لجيب نادي الترسانة .. النظام ده نظام مشهور أوي في أميركا الجنوبية و بدأت أوروبا تفاجيء به بعد المشكلة اللي عملها إنتقال اللاعبين (خافيير ماسكيرانو Javier Mascherano) و (كارلوس تيفيز Carlos Tevez) لنادي ويستهام و الكلام ده كان سنة 2006.
في مارس 2011 مكنة الفلوس بدأت تجيب قماش .. قدر (بيتر كينيون) إنه يخلي شركته CAA تدخل لخزينة نادي أتليتكو مدريد 1.5 مليون يورو و دول ثمن 40% من أي صفقة بيع ممكن تحصل في المستقبل اللاعب الناشيء (ساول نيجيز Saul Niguez) و اللي وقتها كان عنده 16 سنة و دلوقتي يعتبر حالياً لاعب أساسي مش بس في تشكيلة أتليتكو مدريد إنما في تشكيلة منتخب إسبانيا و أحب أقولك إن اللاعب ده مستحيل إدارة أتليتكو مدريد تبيعه يعني هم خدوا 1.5 مليون يورو من واحد غبي قالوله إن إن شاء الله في يوم من الأيام النادي حيبيع (ساول نيجيز) بمبلغ حلو أوي و حيبقي ليك يا معلم 40% من ثمن الصفقة اللي إحتمال كبير متحصلش أصلاً .. بعدها النادي دخله 3 مليون يورو ثمن 30% من أي صفقة بيع مستقبليه للاعب (كوكي Koke) اللي برده بقي أساسي في تشكيلة أتليتكو مدريد و منتخب إسبانيا و اللي زيه زي (ساول نيجيز) من الصعب أوي إن إدارة أتليتكو مدريد أو خلينا نقول من الصعب أوي إن (سيميوني) يقبل ببيع الإتنين لاعيبه دول.
الفلوس اللي بجد بدأت تدخل لنادي أتليتكو مدريد من صفقتي بيع (فالكاو) و (دييجو كوستا Diego Costa) .. في حالة (فالكاو) فالنادي كان بايع نسبة 33% من ثمن صفقة بيعه لما إنشاء الله نادي يحب يشتريه و ده اللي حصل فعلاً لما نادي موناكو إشتراه و النادي باع النسبة دي لشركة تمويل إستثماري إسمها Doyen Sports بحيث إن خلال سنتين بس النادي دخله 12 مليون يورو غير ثمن الصفقة أصلاً .. أما بالنسبة ل(دييجو كوستا) فأتليتكو مدريد باعوه في يوليو 2014 بعد ما فازوا بلقب الدوري الإسباني و قدر إنه يجيب في الموسم ده 27 هدف و باعوه لتشيلسي مقابل 40 مليون يورو .. رئيس مجلس إدارة النادي (ميجيل أنخل جيل) لوحده كان شاري 50% من ثمن الصفقة مقابل 1.5 مليون يورو .. يعني حتي رئيس النادي إسترزق و طلعله قرشين حلوين من الصفقات دي.
الطريقة دي خلت نادي أتليتكو مدريد يحافظ علي مكانته كواحد من الأندية الثلاثة الكبار في إسبانيا .. قدر إنه يقف الند بالند قصاد ريال مدريد و برشلونة .. لما النادي نجح مادياً و بدأ يجيب فلوس فده إترجم علي أرضية الملعب .. في مايو 2013 و ده كان يوم تاريخي لأتليتكو مدريد لما كسبوا ريال مدريد في نهائي كأس إسبانيا و ده كان الفوز الأول ليهم علي ريال مدريد من 26 ماتش .. في سنة 2014 لو تفتكر كانت أول مرة أتليتكو مدريد يتأهل لبطولة Champions League من 17 سنة و من ساعتها و هم وصلوا للنهائي مرتين .. مرة في 2014 و الثانية في 2016 و المرتين خسروا النهائي من ريال مدريد .. الموسم اللي فات اللي هو موسم 2015-2016 النادي دخله 82 مليون يورو بس خدوهم من الإتحاد الأوروبي لكرة القدم عشان إتأهلوا لنهائي Champions League .. حالياً الضرائب المتأخرة عليهم قلت من 120 مليون يورو و بقوا 40 مليون يورو بس.
لازم تقف قدام تجربة أتليتكو مدريد و تنحني إحتراماً ليها .. تخيل كده إن نادي الإسماعيلي في مصر عمل زيهم و إنه بدأ يجيب فلوس و مبقاش مجبر يا عيني إنه يبيع نجومه كل سنة عشان يقدر يدفع المرتبات .. الإدارة مش إختراع و مش فيزياء .. مجرد فكر بره الصندوق عشان تجيب فلوس و متصرفش فلوس علي الأرض.
المصدر:
مقالة بعنوان How Atletico Madrid Turned to Private Lenders to Keep Pace with Real Madrid نشرت في Website اسمه Bleacher Report و ده لينك المقالة الأصلية:
http://bleacherreport.com/articles/2707118-how-atletico-madrid-turned-to-private-lenders-to-keep-pace-with-real-madrid
