أتليتيكو بلباو .. ياما في الدوري الإسباني مظاليم.

تعديل إتعمل يوم 28 ديسمبر 2020 .. (جوزيه أمورورتو Jose Amorrortu) المدير الرياضي لنادي أتليتيكو بلباو قدم استقالته من منصبه في أواخر 2018.

اللي حنتكلم عنه النهاردة هو نادي أتليتكو بلباو Athletic Bilbao .. اللي منكوا بيتفرج كتير علي ماتشات الدوري الإسباني حيكون إما بيشجع ريال مدريد أو برشلونة أو متعاطف مع أتليتيكو مدريد لإن مفيش حد في مصر بيشجع أتلتيكو مدريد .. إنت يا تتعاطف معاهم يا تكرهم لكن مبتشجعهومش .. أيا كان إنت أنهي واحد من اللي فاتوا فإنت غالباً متعرفش حاجة عن أتليتكو بلباو إلا إنهم فرقة رخمة أوي علي ملعبها واللي متعرفش إسمه .. إسمه سان ماميس San Mames بالمناسبة .. لو إنت بقي متعرفش حاجة عن النادي ده فإنت لقطة .. أنا عايزك بقي تركز معايا كويس أوي لإن المقالة دي معموله ليك .. عارف سيناء؟ عارف قد إيه هي مهمشة والحكومة مش مهتمة بيها ومفيش ماتشات كورة في الدوري المصري بتتلعب هناك؟ .. أهو أتليتكو بلباو بقي نادي في حتة شبه سيناء كده بس في إسبانيا.

ده نادي في حتة إسمها إقليم الباسك بينها وبين الحكومة الإسبانية خناقة كبيرة سببها إنهم عايزين يستقلوا .. النادي مقره في مدينة صغيرة أوي إسمها ليزاما Lezama يدوبك عايش فيها 2400 بني أدم يعني ميجوش عدد سكان شبرا .. النادي ده قديم حبتين إتعمل سنة 1897 يعني أقدم شوية من النادي الأهلي وسنة 1911 عشان بس أحطك في الصورة يعني قبل الحرب العالمية الأولي ب3 سنين الفرقة دي كانت بتلعب ماتش في كأس ملك إسبانيا اللي بتتسمي كوبا ديل راي Copa del Ray وفي الماتش ده الناس إتهمت النادي إنه بيلعب فيه لاعيبة أجانب مش متسجلين وإن دي سرقة .. رد فعل إدارة النادي إنها قررت إن مش حيلعب في النادي إلا اللاعيبة اللي إتولدت وإتربت في إقليم الباسك .. هنا إنت محتاج بس تفكر في الكلام ده شوية .. نادي قرر إنه في عصر الإحتراف والفلوس اللي بتتصرف إن من سنة 1911 لحد دلوقتي مش حيلعب فيه إلا اللاعيبة اللي إتربت في النادي .. طبعاً فيه منكوا دلوقتي بيقول إن أكيد النادي ده إتفشخ .. سنة يلعب في الدوري الممتاز وسنين يلعب في دوري المظاليم .. أحب أقولك إن أتليتكو بلباو هو وبرشلونة وريال مدريد هم الأندية الثلاثة الوحيدة في إسبانيا اللي عمرها ما هبطت لدوري الدرجة الثانية.

تخيل للحظة إن نادي الإتحاد السكندري قرر إنه مش حيلعب إلا باللاعيبة الإسكندرانية بس .. إنت عشان تصدق محتاج تبص علي صور أكاديمية أتليتكو بلباو اللي في مدينة ليزاما Lezama .. الأكاديمية دي إتعملت سنة 1971 وبيتمرن فيها فريق كرة القدم الرجالي والنسائي وفرق الشباب والناشئين .. الأكاديمية كلها علي بعضها مفيهاش إلا 8 ملاعب وجيم وأوضة مؤتمرات صحفية ومبني طبي كبير .. الأكاديمية لازقة في الاستاد اللي هو سان ماميس San Mames وبالنسبة للسكان ده مش مجرد استاد ودي مش مجرد أكاديمية كورة .. ده كيان .. لو إنت أهلاوي متعصب أو زملكاوي أصيل فسوري في الكلمة إنتماءك للنادي ميجيش حاجة جنب عشق سكان الباسك لنادي أتليتكو بلباو .. ده النادي بتاعهم هم اللي صارفين عليه وعيالهم بيلعبوا فيه .. هناك العيال الصغيرة مبتحلمش تلعب في برشلونة وريال مدريد .. مش زي عندنا إن مفيش نادي في مصر يتشجع إلا الأهلي والزمالك .. هناك الأطفال مبتحلمش غير إنها تلعب بالتي شيرت المخطط أبيض وأحمر ولو ربنا كرمهم وإتباعوا بيروحوا أندية أوروبا الكبيرة مش ريال مدريد ولا برشلونة.

أهم بني أدم في النادي هو (جوزيه أمورورتو Jose Amorrortu) المدير الرياضي .. شوية أرقام كفيلة إنها توريك حجم الإنجاز .. لا إنجاز إيه قول معجزة بتتعمل في النادي ده .. في الخمس سنين اللي فاتو فيه علي الأقل إتنين لاعيبه أساسيين في الفرقة الأولي كانوا خريجين أكاديمية النادي .. أكتر من 85% من إجمالي اللاعيبة اللي بتلعب في الفرقة الأولي إتربوا في أكاديميه النادي .. شغلة (جوزيه أمورورتو) إنه أستاذ (ونيس) بتاع النادي .. ده رجل عامل System كامل عشان ياخد الطفل أو الشاب المراهق اللي ينفع يبقي مشروع لاعيب كورة محترم وبيطلع من تحت إيده رجل عارف يعني إيه صح ويعني غلط ويعني إيه مسئولية وفوق ده كله بيبقي لاعيب كورة محترم .. (جوزيه أمورورتو) رجل فاهم هو بيعمل إيه .. هو لعب كورة في النادي وكان أساسي في تشكيلة الفرقة اللي لعبت قصاد يوفينتوس في نهائي بطولة كأس الكؤوس الأوروبية سنة 1977 ولما إعتزل درب فرقة الناشئين والفرقة الأولي .. لما تبدأ تبص لملامح الSystem اللي هو عمله تحس إن لو نادي زي الإسماعيلي عمل زيه فبمنتهي السهولة يقدر يفضل ياخد بطولة الدوري لسنين وسنين قدام ولا الأهلي ولا الزمالك ولا اللي يتشددلهم يعرف ياخد منهم لا حق ولا باطل.

إقيلم الباسك كله اللي حاول تشبهه مثلاً بمدن القناة اللي هم الإسماعيلية وبورسعيد والسويس بيغطيها 20 كشاف مواهب أو Scout وظيفتهم عينهم تلقط العيال اللي ممكن يتقال عليهم لاعيبة كويسة .. كمان النادي له إتفاقات شراكة مع 150 نادي صغير في الإقليم عشان لو أتليكو بلباو شاف لاعب ناشيء كويس في نادي تاني صغير فبسهولة أوي يقدروا ياخدوه .. لو إختاروك فإنت مش حينفع تخش الأكاديمية إلا وإنت عندك 10 سنين مش قبل كده .. سنة 2017 إتقدم للاكاديمية 1500 طفل .. بمجرد ما بتدخل إنت بتتعلم إزاي تبقي رجل قبل ما بتتعلم إزاي تبقي لاعيب كورة .. بتتعلم إزاي تفكر وإزاي تاخد قرار وإزاي تتصرف بره الملعب وإن إزاي إنت واجهة لناديك وبلدك ومينفعش تبقي قليل الأدب .. بتتعلم تمسح جزمتك وتنضف مكانك وتلم الكور بعد ما تتمرن .. (جوزيه أمورورتو) إشتغل شوية في أتليتكو مدريد وهو عارف إن مفيش نادي في العالم بيعمل كده .. مفيش نادي بيعتبر نفسه مدرسة مش نادي .. هناك الطفل بيتعلم إن الكورة عمرها قصير .. إنت بتبطل كورة وإنت في الثلاثينات ده لو مجتلكش إصابة تخلتك تعتزل بدري .. عايزك تعرف إن فرقة الناشئين اللي معدل أعمارهم ما بين 18 و 19 سنة في النادي منهم 21 بيدرسوا في كليات .. مش لإن النادي بيجبرهم علي ده إنما لإنهم عيال محترمة ورجاله والأهم مؤدبين.

أكاديمية ليزاما Lezama متفرقش كتير عن أكاديمية لا ماسيا La Masia بتاعة برشلونة .. زي بالضبط لما تبقي مدرسة حكومة بس ماسكها ناس بتفهم بتتنافس مع مدرسة لغات ماسكها ناس معاهم فلوس .. لو إنت لاعب ناشيء ودخلت الأكاديمية فهم بينصفروك وبيخلوك بني أدم .. مبدأياً هم بيعلموك إزاي تلعب كورة؟ .. التكنيك عندهم أهم حاجة .. سنين بيقعدوا يعلموك 3 حاجات ملهمش رابع:

• إزاي تقف وإنت بتسلم وتستلم: ظهرك مفرود وركبتك متنية.
• عنيك متبقاش علي الكورة إنت مش أعمي .. عينك كاشفة الملعب بتشوف زمايلك فين وبيجروا فين؟
• مفيش حاجة إسمها تلعب برتم واحد .. إمتي تسرع رتم وإمتي تبطأه وإمتي تغير إتجاه اللعب أصلاً؟

التمرين قاسي أوي .. لو غلطت مبتتعاقبش بس بتطلع بره اللعب وتتفرج وإنت واقف علي خط التماس .. مفيش شتيمة ومفيش زعيق .. لو إنت فاكر نفسك (أبوتريكة) عصرك فإنت بتتعلم إنك لو إتدلعت حتقعد دكة حتي لو إنت نجم فرقتك وفيه كتير مستنيين الفرصة إنهم يلعبوا مكانك .. بتتعلم إن الفلوس مش كل حاجة وإن الأدب والأخلاق والإلتزام أهم من أي حاجة تانية .. أنا شخصياً معجب جداً باللي بتعمله إدارة نادي أتليتكو بلباو وبتمنالهم النجاح والأهم إن نفسي إن أندية مصر تبصلهم وتقول لنفسها طب ما نجرب نبقي زيهم.

المصدر:

• مقالة بعنوان How does Athletic Bilbao’s academy manage to produce 85% of their team? .. إزاي أكاديمية أتليتكو بلباو بتعرف تخلي 85% من لاعيبة الفرقة يبقوا من أبناء الأكاديمية .. نشرت في جريدة The Guardian البريطانية وده لينك المقالة الأصلية:
  https://www.theguardian.com/football/2018/oct/30/athletic-bilbao-players-la-liga