تعديل إتعمل يوم 27 مارس 2023 .. (يوناي إيميري) ساب الفرقة و حالياً بيدرب أستون فيلا في إنجلترا .. بعد ما (إيميري) مشي في نص الموسم جابوا (فريدي ليونيبنيرج) كمدير فني مؤقت وبعد كده مشوه و حالياً ماسكهم (مايكل أرتيتا) .. (مسعود أوزيل) كمان مشي و أعلن إعتزاله.
أنا أفتكر إن كل الأرسنالوية بلا إستثناء كانوا مزقططين من الفرحة لما عرفوا خبر إن (أرسين فينجر Arsene Wenger) ماشي في مايو 2018 .. الإحساس كان عامل شبه إحساسنا كمصريين يوم تنحي (مبارك) الله يرحمه كده اللي هو يااااااه أخيراً الهم إنزاح و بكره أحلي بينا و بنبني أرسنال بشروطنا و إن خلاص يا جدعان أرسنال راجع تاني و الشعارات دي كلها .. بس للأسف الواقع اللي بيعيشه النادي دلوقتي صعب و مفيش حاجة تعبر عن صعوبة الوضع بتاع دلوقتي أكتر من التصريح اللي قاله (يوناي إيمري Unai Emry) المدير الفني للفرقة إن النادي مفلس لدرجة إن أي صفقات ممكن تتعمل في الفترة الجاية حتبقي إعارات مش شرا حتي .. ده بجد علي فكرة .. و طبعاً لك أن تتخيل كم الغضب اللي كان نفوس الأرسناولية و اللي طفح علي Social Media لما سمعوا الكلام الماسخ ده و الحقيقة إنك لما تهدي كده و تبدأ تفكر كأنك مشجع لأرسنال تلاقي إنك بتسأل سؤال واحد بسيط و تافه .. إزاي في الوقت اللي فيه 3 أندية هم أرسنال و تشيلسي و مانشستر يونايتد بيتعاركوا علي المركز الرابع اللي بيؤهل لبطولة Champions League السنة الجاية اذ نكتشف إن النادي مفلس و معهوش فلوس يصرفها علي تدعيم الفريق؟ .. هي فلوس أرسنال راحت فين؟ .. اللي ححاول أعمله النهاردة إني أساعدك تفهم الإجابة علي السؤال ده .. أين الفلوس أنا لا أراها؟
عشان تبدأ تفهم لازم أرجعك بالزمن شوية لأخر سنة ل(فينجر) كمدير فني لأرسنال و معلش حاول تعصر دماغك و تفتكر أسامي اللاعيبه اللي هو إشتراهم .. هو إشتري (أليكساندر لاكازييت Alexandre Lacazette) من ليون الفرنسي ب47 مليون جنيه إسترليني .. إشتري (بيير إيميريك أوباميانج Pierre-Emerick Aubameyang) من بروسيا دورتموند ب57.3 مليون جنيه إسترليني و معاه (هنريك ماختريان Henrikh Mkhitaryan) من مانشستر يونايتد .. هي المشكلة مش في المبلغ للي إتدفع للأندية بتاعة كل لاعيب من الثلاثة قد ما المشكلة في المرتب الخزعبلي اللي بياخده من النادي .. الواحد منهم بالميت خالص بياخد 250,000 جنيه إسترليني مرتب صافي في إيده في الإسبوع .. بس كل دول ميجوش حاجة جنب الهبد التاريخي اللي حصل في موضوع (مسعود أوزيل) .. في أخر سنة لطيب الذكر (فينجر) في النادي صادف إنها كانت أخر سنة في عقد (أوزيل) و كان الكلام إنه مكنش ناوي يجدد عقده فإدارة النادي خافت إن لو (أوزيل) مشي ببلاش فهم مش حيلاقوا حد بديل عنه فقرروا ياخدوا الRisk .. (فينجر) و الCEO بتاع النادي وقتها (إيفان جازيديس Ivan Gazidis) قبلوا شروط (أوزيل) إنه يجدد عقده بإنه بقي ياخد مرتب 350,000 جنيه إسترليني في الإسبوع و بكده بقي أغلي لاعب في تاريخ النادي .. أحب بس أفكرك إن (أوزيل) مبيلعبش حالياً تحت ايد (إيمري) لإنه بمنتهي البساطة شايفه لاعيب مش راجل .. حتي لو (إيميري) حب يبيعه فمفيش نادي حيرضي ياخده و يديله المرتب اللي هو بياخده مع أرسنال.
مشي (فينجر) و هو ماشي قعد ما إدارة النادي و زي ما أغاني الRap بتقول Bitch Give Me My Money و إضطروا عشان هم اللي ممشيينه قبل ما عقده يخلص إنهم يدوله الشرط الجزائي ال11 مليون جنيه إسترليني .. جه بعد كده (إيمري) اللي لوحده و هو جاي جاب معاه 5 لاعيبه .. (بيرند لينو Bernd Leno) حارس المرمي اللي إشتراه ب22.5 مليون جنيه إسترليني .. جاب ( ماتيو جوندوزي Matteo Guendouzi) أبو شعر منعكش ده اللي قعد (محمد النني) دكة ب7 مليون جنيه إسترليني .. إشتري (لوكاس توريرا Lucas Torreira) ب27 مليون جنيه إسترليني و يمكن هو أحلي صفقة إتعملت في أرسنال من سنين .. و إشتري قلب الدفاع (سكوراتيس باباساثوبولوس Sokratis Papastathopoulos) ب 17.7 مليون جنيه استرليني و فوقيهم جاب (ستيفان ليشتاينر Stefan Lichrsteiner) ببلاش من يوفينتوس .. كل دول بياخدوا مرتبات و زود مرتباتهم علي العك اللي كان بيتعمل قبل كده حتكتشف إن ميزانية أرسنال غالبيتها رايحة بس للمرتبات ولا أجدعها شركة قطاع عام في مصر فيها موظفين كتير مبيعملوش حاجة بس بياخدوا فلوس .. و ياريت الموضوع وقف لحد كده .. لإن إذا كان أرسنال كان بيدفع مرتبات خزعبلية فهو كان عامل أوكازيون لبيع اللاعيبة اللي هو مش عايزهم.
خلال أخر كام سنة قضاها (فينجر) في النادي و قبل ما (إيميري) يجيي فتقدر تقول إن النادي كان ماسك مكنسة و جاروف و بينظف الفرقة من اللاعيبه اللي ملهومش لازمة اللي بيكلفوا النادي فلوس مرتبات علي الفاضي .. النادي خلال الفترة دي خلص من 25 لاعيب و المصحف الشريف ما بهزر .. 25 لاعيب مشيو و حرصهملك دلوقتي: (يوهان دجورو Johan Djourou) و (دينيلسون Denilson) و (أندريا أرشافين Andrea Arshavin) و (أندريه سانتوس Andre Santos) و (مروان الشماخ) و (ساباستيان سكويلاتشي Sebastian Squillaci) و (جيرفينيو Gervinho) و (نيكولاس بيندتر Nicklas Bendtner) و (لوكاس فابيانسكي Lucas Fabianski) و (بكاري ساجنا Bacary Sagna) و (لوكاس بودولسكي Lucas Podolski) و (سيرجي جانابري Serge Gnabry) و (توماس روزيسكي Thomas Rosicky) و (أبو ديابي Abou Diaby) و (كيران جيبز Kieran Gibbs) و (جابرييل باوليستا Gabriel Paulista) و (فوشيتش تشيزني Wojciech Szczesny) و (فرانسيس كوكلين Francis Coquelin) و (أوليفر جيرو Oliver Giroud) و (سانتي كازورلا Santi Cazorla) و (جاك ويلشير Jack Wilshere) و (لوكاس بيريز Lucas Perez) و (جويل كامبيل Joel Campbell) و (ماثيو ديبوشي Mathieu Debuchy) و (جيف راين أديلايد Jeff Reine-Adelaide)
فيه أسامي من ال 25 دول إعتزلوا بس كتير إتباعوا .. يا تري بقي تفتكر إدارة النادي لمت كام مليون ثمن بيع اللاعيبه دي كلها؟ .. 77 مليون جنيه إسترليني فقط لا غير .. ده معناه إن دي إدارة نادي عماله تشتري في لاعيبه بتديها مرتبات أعلي من اللي تستحقه و اللاعيبه اللي بتمشي بتتباع بأسعار أقل من السوق .. زود علي كده إن الفرقة بقالها فترة مكسبتش بطولة كبيرة و بالتالي فحقوق الرعاية اللي بتيجي للنادي مش زي مثلاً حقوق الرعاية اللي بتيجي لنادي زي تشيلسي أو مانشستر سيتي.
أظن السؤال دلوقتي هو طب و الحل؟ أنا كمشجع أرسنالاوي حفضل كده دمي محروق كتير؟ .. الحقيقة اه للأسف .. زمان كان لما أرسنال يتحط في موقف زي ده بيصرفله حبة فلوس حلوين علي صفقات سوبر بس الصفقات دي تجيبله بطولات فبفلوس البطولات دي يعوض الفلوس اللي هو دفعها .. المشكلة في الخازوق اللي قارف عيشة أندية أوروبا كلها اللي هو قواعد اللعب النظيف أو Financial Fair Play اللي هي الFFP إختصاراً .. الFFP دي شوية لوايح كتير عشان تضمن في الأخر إن أي نادي مبيفضلش يصرف و يبعزق فلوسه و يتداين و ميعرفش يسدد و اللوايح دي عامة شوية حاططها الإتحاد الأوروبي لكرة القدم UEFA بحيث إن كل إتحاد كرة قدم محلي ياخد اللوايح العامة دي يفصلها علي مقاسه .. إتحاد الكورة في إنجلترا خد الFFP دي عمل منها حاجة اسمها Short Term Cost Control أو STCC ..البتاعة دي أهم حتة فيه هي فيما يتعلق بالتحكم في التضخم في مرتبات اللاعيبة.
بداية من 2016 مفيش نادي في إنجلترا مسموح له إن ميزانية المرتبات تزيد بمعدل أعلي من 7 مليون جنيه إسترليني في السنة .. صحيح مانشستر سيتي عرف يلف علي القاعدة دي و إتكلمنا في ده قبل كده بس لو أرسنال حب يشتري لاعيبه جداد فهو لازم يمشي لاعيبه من اللي عنده عشان معدل الزيادة في المرتبات ميعلاش عن سقف ال7 مليون جنيه إسترليني .. أزيدك من الشعر بيت .. دلوقتي أرسنال بقاله سنتين مبيلعبش في Champions League و اللعب في البطولة لوحده بفلوس و لو السنة دي مخدوش مركز رابع و متأهلوش للبطولة فحيبقي عندهم مشكلة كبيرة فعلاً في تظبيط حساباتهم و إن كان أنا عندي ليك خبرين كمشجع أرسنالي واحد حلو و التاني وحش .. خليني أبدأ بالخبر الحلو إن جزء من المشكلة دي حيتحل بداية من السنة الجاية لإن فيه 3 لاعيبه بياخدوا مرتبات عالية حتبقي أخر سنة ليهم في النادي السنة دي اللي هم (بيتر تشيك Peter Cech) اللي حيعتزل و (داني ويلبيك Danny Welbeck) اللي حيروح في أي داهية تاخده و معاهم (أرون رامزي Aaron Ramsey) بحيث إن التلاتة مرتباتهم في السنة بتعدي ال14.5 مليون جنيه إسترليني .. الخبر الوحش إن (رامزي) اللي يعتبر من أهم لاعيبه الفرقة ماشي ببلاش السنة الجاية و حيروح يوفينتوس.
اللي عايز أختم به بإني فعلاً شايف إن الله يكون في عون (إيميري) لإني مؤمن إنه عايز يبني الفرقة من أول و جديد بس للأسف هو محتاج يبقي صبور شوية خصوصاً في حتة الفلوس لحد ما مشكلة المرتبات دي تتحل .. كمان لإن طريقة إدارة النادي هي كمان فيها مشكلة لإن اللي بياخد القرار جوه النادي ناس محاسبين مبيفهموش حاجة تقريباً في كرة القدم و يمكن ده السبب إن (سفين ميزلينتات Sven Mislintat) اللي ماسك لجنة الإنتقالات في النادي قدم إستقالته بعد ما أرسنال جابه من بروسيا دورتموند الألماني في ديسمبر 2017 .. (إيميري) بيحاول يوصل بالفرقة إنه ياخد مركز رابع و يتأهل لChampions League مع إنه فعلياً زيه زينا الضبط مش فاهم البني أدم أبو شنب اللي في الصورة ده عايز إيه؟
ده إسمه (ستان كرونيكي Stan Kroenke) و ده ماسك شركه اسمها Kroenke Sports & Entertainment كانت شريكة في ملكية النادي لحد ما في أغسطس 2018 بقي هو و شركته الملاك الوحيدين للنادي و ده حطنا كناس بتتابع أخبار كرة القدم قدام معلومتين: المعلومة الأولانية إن نادي أرسنال هو سادس أغني نادي في العالم وفق تصنيف وكالة Deloitte Football Money League فده المفروض معناه إن النادي معاه فلوس .. المعلومة الثانية إننا مش عارفين بالضبط (ستان كرونيكي) ناوي يصرف قد إيه علي الفرقة؟ .. إحنا عارفين إن النادي مضي عقد رعاية مع شركة Adidas ب20 مليون جنيه إسترليني في السنة بس في نفس الوقت عارفين إن لو الفرقة مخدتش مركز رابع السنة دي فحتبقي سنة هباب علي النادي .. الكلام اللي بنسمعه إن إن شاء الله الصيف الجاي الإدارة معاها لستتين أسامي للاعيبه يشتروهم بحيث اللستة الأولانية لو الفرقه إتاهلت لChampions League اللستة التانية لو الفرقه متأهلتش .. وفي نفس الوقت بنسمع إن الفرقة حترجع تاني تعتمد علي قطاع الناشئين بتاعها .. تسألني إيه اللي حيحصل؟ أقولك والله معرفش بس أدينا بنتفرج وبيتحرق دمنا.
المصدر:
مقالة بعنوان Why Have Arsenal Got No Money, and What’s Their Plan? .. ليه أرسنال معهوش فلوس وإيه هي خطتهم؟ .. نشرت في موقع Bleacher Report و ده لينك المقالة الأصلية:
tps://bleacherreport.com/articles/2815740-why-have-arsenal-got-no-money-and-whats-their-plan
