تعديل اتعمل في 14 ديسمبر 2020 .. (ايرنيستو فالفيردي) اتشال من منصبه كمدير فني لبرشلونة في 20 يناير 2020 .. ادارة برشلونة اشترت فعلا (فيليبي كوتينيو) في يناير 2018 .. رئيس نادي برشلونة (جوزيب ماريا بورتيميو) اتشال فعلا من منصبه بعد اقتراع لحجب الثقة عملته الجمعية العمومية .. (لويس سواريز) ساب الفرقة فعلا و راح اتليتيكو مدريد.
موضوعنا النهاردة اللي حنتكلم عنه هو (ايرنيستو فالفيردي Ernesto Valverde) اللي انت ممكن متكونش مميز اسمه اوي بس بمجرد ما تشوف وشه حتفتكر ان ده المدير الفني لنادي برشلونه الاسباني .. احنا كنا قبل ما الموسم ما يبدا كتبنا مقالة عنه وده لينكها لو حبيت تقراها .. مشكلة المقالة دي اني وقت ما كتبتها قبل ما الموسم اللي احنا فيه ده ما يبدا زي اي بني ادم طبيعي مكنتش متخيل حجم التغيير اللي حيحصل في برشلونه .. اصل ازاي كنت حقدر اتوقع ان (نايمار Neymar) حيمشي بالشكل المفاجيء اللي صدمنا كلنا من برشلونة و يروح باريس سانجيرمان؟ .. ناس كتير لما ده حصل تنبأت ان دي حتبقي بداية النهاية لبرشلونة والحقيقة ان الناس دي كنت تحس ان عندها حق اوي خصوصا لو شفت اللي حصل للنادي بداية الموسم ده .. انا عارف ان فيه مننا كتير عنده ذاكرة السمكة وبينسي هو اتغدي ايه امبارح فخليني افكرك بشوية نقط كده ايه اللي حصل مع بداية الموسم:
- ان كنت ناسي افكرك ان مع بداية الموسم ده 2017-2018 برشلونة خسر كاس السوبر الاسباني قدام ريال مدريد .. نظام الكاس ده انه بيتلعب علي ماتشين ذهاب و عوده و في الماتشين ريال مدريد جاب 5 اهداف و برشلونه جاب هدف يتيم وحتي الهدف ده كان من ضربة جزاء.
- طبعا (نايمار Neymar) مشي بس الاهم من انه مشي هي الظروف اللي هو مشي فيها .. ان يطلع (جيرارد بيكيه Gerard Pique) يقول علي الInstagram Account بتاعه ان (نايمار Neymar) قاعد و بعدها ب11 يوم بس يمشي .. مش كده وبس .. احنا اتاكدنا انه ماشي بعد 16 يوم من وقت ما نائب رئيس نادي برشلونه قال قدام الناس انه متؤكد بنسبه 200% ان (نايمار Neymar) قاعد .. يعني هو ضحك علي زمايله و علي مجلس الادارة وخد بعضه و مشي.
- لما (نايمار Neymar) مشي جماهير النادي قالت في داهية .. الفلوس اللي جت حنسنتخدمها عشان نعوض الغياب ده ونشتري لاعب سوبر او يمكن اتنين لاعيبه سوبر .. وياسلام علي الShopping List اللي ادارة النادي قالت انها بتفكر فيها .. (كوتينيو Coutinho) ومجاش .. (ماركو فيراتي Marco Verratti) و بتوع باريس سانجيرمان ضحكوا علي ادارة برشلونة وقالولهم هو انتوا مش كنتوا عايزينه يلعب جنب (نايمار Neymar) اهو دلوقتي بيلعب جنب (نايمار Neymar) بس عندنا مش عندكوا .. قالك عايزين (هيكتور بيليرين Hector Bellerin) من ارسنال وبرده مجاش .. يا مؤمن ده حتي (انخل دي ماريا Angel Di Maria) اللي قاعد دكة في باريس سانجيرمان قال مش عايز اجي.
- حتي اللاعبين الشباب الصغيرين في السن اللي مش حيكلفوك حاجه عشان تشتريهم معرفتش تجيبهم .. عندك (ايناجيو مارتينيز Inigo Martinez) قلب دفاع منتخب اسبانيا تحت سن 21 سنة واللي كان المفروض يتصعد للفريق الاول في برشلونة بس رفض يمضي العقد ودلوقتي بيلعب اساسي في ريال سويسداد .. صفقة شراء (جين ميشيل ساري Jean Michael Seri) من نادي نيس الفرنسي واللي كانت المفروض تبقي صفقة سلسة جدا لشراء جناح عنده 21 سنة باظت ومكملتش رغم ان اللاعب كان عايز يروح برشلونة ومتفهمش صفقة سهلة زي دي باظت ازاي؟ .. جزء من المشكلة ان لجنة الانتقالات اللي كانت بتاخد قرار مين ييجي ومين يمشي من النادي كانت مكونة زمان من 8 افراد واهم اتنين فيها مشوا وقدموا استقالاتهم .. الستة اللي فاضلين ياعيني لقوا نفسهم مسئولين عن صرف 222 مليون يورو اللي جم من بيع (نايمار) و ولا واحد فيهم عايز يبقي هو اللي اسمه مكتوب علي الورقة بتاعة شراء بديل (نايمار) لا يفشل وميقدرش يملا الفراغ اللي سابه (نايمار) و ساعتها عضو اللجنة دي حيتعلق من باب النادي .. المسلسل ده كان سخيف لدرجة ان (ايرنستو فالفيردي) اتريق مرة وقال ان احسن حاجه في فترة الانتقالات الصيفية انها خلصت.
- صحيح انهم اشتروا (عثمان ديمبيلي Ousmane Dembele) بفلوس (نايمار Neymar) وخلوه اغلي لاعب يشتروه في تاريخ النادي و ياعيني في اول ماتش له مع برشلونة اتصاب بعد 52 دقيقة وان شاء الله حيرجع في الكريسماس .. اللي يعصب فعلا انه اتصاب وهو بيحاول يلعب كره بالكعب بطريقة سخيفة اوي لدرجة ان (ايرنستو فالفيردي) طلع في المؤتمر الصحفي بعد الماتش قال انه لو كان لاعب عنده خبرة شوية مكنش لعب الكعب بالطريقة دي.
- حتي مجلس الادارة حالته تصعب علي الكافر .. (ساندرو روسيل Sandro Rosell) الرئيس السابق للنادي مسجون دلوقتي والرئيس الحالي (جوزيبي بروتمو Josep Bartomeu) اللاعيبه بتتريق عليه قدام الناس عادي .. (نايمار) وصف مجلس ادارة النادي بانهم شوية عيال صغيرة و هدد انه يرفع عليهم قضية وعلي فكرة ادارة النادي هي كمان مش بتطيقه فالشعور متبادل الحقيقة.
- لو حتتكلم عن الفلوس فصفقة الرعاية اللي كانت بين نادي برشلونة وبين مؤسسة قطر Qatar Foundation باظت .. اه نسيت اقولك ان اقليم كاتالونيا اللي برشلونة تبقي عاصمته حاليا محدش عارف هو تبع اسبانيا ولا استقل و لا ايه حكايته بالضبط؟
- شفت كنت حنسي .. نادي برشلونة مرفوع عليه 7 قضايا في المحاكم منهم واحدة بتهمة التهرب الضريبي و قضية تانية رافعها واحد من المطبلاتية بتوع الحكومة الاسبانية بيتهم ادارة نادي برشلونة بالتخابر لحساب دول اجنبية .. شفتوا بقي ان (احمد موسي) ده حالة عالمية مش بس في مصر .. الجمعية العمومية للنادي مش طايقة رئيس النادي وحاولت قبل كده انها تعمل تصويت لسحب الثقة ويا عيني الرجل نجي بمعجزة.
- لو انت فاكر ان مشاكل برشلونة خلصت علي كده فلسه .. (لويس سواريز Luis Suarez) كان عنده جفاف قدام الجون وقعد اكثر من 460 دقيقة مش عارف يجيب جون لحد ما اخيرا ربنا كرمه وجاب جونين مرة واحدة في مرمي ديبورتيفو ليجانيس ودي فرقة لسه صاعدة للدوري الاسباني الممتاز السنة دي .. (ليونيل ميسي Lionel Messi) قدامه بالضبط 42 يوم ويبقي له الحق انه يتفاوض مع اي نادي يعجبه في العالم عشان ينتقلهم مجانا بس الحمد لله يعني اقنعوه انه يجدد عقده بشرط جزائي 700 مليون دولار .. (اندريس انيستا Andres Inesta) كابتن الفريق عنده 33 سنة وخلاص بيخلص .. قلب الدفاع بتاعهم (جيرارد بيكيه Gerard Pique) محدش في مدريد طايقه حتي الناس اللي بتشجع اتليتكو مدريد .. لحد دلوقتي برشلونة لعب في الدوري الاسباني 12 ماتش منهم 82 دقيقة بس لعبهم (باكو الكاسير Paco Alcacer) اللي هو المهاجم البديل ل(لويس سواريز Luis Suarez) يعني لو اتصاب (سواريز Suarez) فهجوم برشلونة حيبقي عنده مشكلة حقيقية .. اه بالمره .. ثاني اغلي لاعب يشتروه الموسم ده اللي هو (باولينيو Paulinho) عنده 29 سنة و شاريينه من الصين و دافعين فيه 40 مليون يورو اللي هو ليه يعني انتوا لاقيين الفلوس دي علي الشجر؟
رغم كل المشاكل دي كلها اللي لو نفترض ان النادي الاهلي مثلا عنده نصها لكان (حسام البدري) طلع قال انه فدائي ومحدش يطلب منه حاجه الا انك تلاقي برشلونة متصدر الدوري الاسباني .. لعبوا 17 ماتش كسبوا منهم 14 ماتش و اتعادلوا 3 ماتشات منهم ماتش اتليتيكو مدريد وماتش فالينسيا .. في بطولة Champions League لعبوا 6 ماتشات برده كسبوا 4 ماتشات من ضمنهم ماتشهم مع يوفينتوس و اتعادلوا ماتشين .. في الدوري الاسباني هم جايبين 38 هدف زيهم زي فالنسيا ومدخلش فيهم الا 7 اهداف بس.
لو انت بتشجع برشلونة انت من حقك تبص علي الموسم بتاعهم لحد دلوقتي و تنحني احتراما للرجل المحترم (ايرنستو فالفيردي) .. بعد 12 اسبوع من الدوري هم اول علي بعد 5 نقاط من فالنسيا في المركز الثاني و علي بعد 6 نقاط من اتليتيكو مدريد في المركز الثالث وعلي بعد 8 نقط من ريال مدريد في المركز الرابع .. معاك والله ان لسه بدري اوي علي الكلام بتاع ان برشلونة حسم الدوري .. فكر فيها .. اخر مدير فني لبرشلونة بدأ الموسم بداية زي الفل زي دي بعد 12 اسبوع كان طيب الذكر (تاتا مارتينو Tata Martino) .. فاكرينه يا بتوع برشلونة؟ .. الرجل ده قعد لحد شهر ديسمبر محدش عارف يكسبه وفي الاخر طلع من المولد بلا حمص .. بس في نفس الوقت عمر ما ريال مدريد في تاريخه عرف يعوض تاخره ب10 نقاط كاملة في الدوري الاسباني .. محصلتش قبل كده بس مش معني كده انها مش ممكن تحصل .. الموسم اللي فات محصلش قبل كده ان نادي يكسب بطولة Champions League موسمين ورا بعض.
الفكرة انك لما كنت بتبص علي بداية الموسم خالص كنت مستحيل تتخيل ان الحال حيبقي كده بعد 12 اسبوع .. و الاهم ان في مراحل كتير في ال12 اسبوع اللي فاتوا كنت بتبص علي اللي بيحصل وتلاقي نفسك بتشد في شعرك و انت بتصوت هو ازاي ده بيحصل؟ .. فيه عندك كذا تفسير الحقيقة لدا:
- ناس ممكن تقول اصل جدول المباريات كان حنين شوية علي برشلونة لحد دلوقتي لان 6 ماتشات من ال12 اللي لعبوها كانوا ضد فرق اللي متذيلة الترتيب .. بس يقول قائل ان الكلام ده هجص لان ريال مدريد من ال12 ماتش الاولانيين لعب 9 ماتشات ضد فرق متذيلة الترتيب برده فالقرعة كانت حنينة مع ريال مدريد اكثر من برشلونة.
- ناس ممكن تقول ان برشلونة فيه مباريات كتير كسبها ببركة دعاء الوالدين .. انا قلتلك ان برشلونه دخل فيهم 7 اهداف بس .. لما تبص علي الاهداف دول دخلوا ازاي حتلاقي نفسك قدام واقع مختلف .. فيه هدفين من السبعة دخلوا في ماتش واحد اللي هو ماتش جيرونا ودي فرقة لسه صاعدة للدوري الممتاز الاسباني السنة دي و برشلونة كسبهم بطلوع الروح 3-2 .. منهم هدف جابه ريال بيتيس علي استاد الكامب نو .. الهدف الرابع جه في ماتش خيتافي اللي قعد متقدم 1-0 طول الماتش وبرشلونة كسب في الاخر .. ماتش تاني لما برشلونة كسبوا اتليتكو بلباو علي ملعبهم سان ماميس San Mames طلع (سيرجيو بوسكيتس Sergio Busquets) قال ان لولا حارس المرمي (مارك اندري تيرشتيجن Marc Andre Ter Stegen) لكان زمان برشلونة طلعوا من الماتش ده خسرانين .. ده حقيقي .. اداء برشلونة الموسم ده مش هو اداء برشلونة اللي انت متعود عليه و احيانا كتير بيكسبوا فعلا مش عايز اقول بالحظ بس خلينا نكون صرحاء مع بعض فيه ماتشات كتير الموسم ده كسبوها بالحظ.
ده يخليك لو انت بتشجع برشلونة انك تحمد ربنا و تبوس ايدك ان اللي ماسك برشلونة دلوقتي هو (ايرنستو فالفيردي) .. الرجل ده هادي بشكل لا تتخيله .. كل الناس بتحبه .. وبني ادم طبيعي بشكل مش طبيعي .. لما تقعد تتكلم معاه حتلاقيه بيفهم كويس اوي في التصوير الفوتوغرافي و في التصوير السينمائي وتاليف الموسيقي لانه درسهم في الجامعة .. ده من المدربين اللي بيعرفوا يعملوا من الفسيخ شربات .. مش عارف تفتكر او لا بس الرجل ده لما رجع يدرب اتليتيكو بلباو قبل ما يمسك برشلونة شبه عودته لبلباو بانها شبه فيلم The Godfather II واثبت ده بانه خلاهم يلعبوا في Europa League اربع مواسم ورا بعض ولما سابهم هم دلوقتي في المركز ال15 .. اهم ميزة فيه انه بيعرف يعزل لاعيبته عن الدوشا اللي بره.
بلاش تضحك علي نفسك وتقول ان جماهير برشلونة وقعت في غرام (ايرنستو فالفيردي) .. خلينا نكون صرحاء مع بعض ان اداء برشلونة السنة دي مش هو الاداء اللي انت متعود عليه منهم .. هم شغالين بس مش بنفس اداء زمان .. تقدر تقول ان اداءهم بيؤدي الغرض بس مش بيبهرك .. بفكرك ان بداية الرجل ده مع برشلونة مثالية .. لا (بيب جوارديولا Pep Guardiola) ولا حتي (لويس انريكي Luis Enrique) بداوا كده .. بس يمكن الرجل ده بيبني حاجة بس براحة و حتاخد منه وقت لانك لو بتتفرج علي برشلونة حتحس من جواك ان فيه حاجه مختلفة بس ايه هي انت مش عارف تحددها؟
صحيح (ميسي Messi) هو لسه مركز الثقل للفرقة بس تحس احيانا ان الفرقة معتمدة عليك بشكل مبالغ فيه .. هو زي زمان بيعلب من نص الملعب كلاعب حر اللي هو تقدر تسميه لاعب خط نص و لاعب خط هجوم في نفس الوقت .. فيه ناس حتبص لاداء (ميسي Messi) من وجهة نظر هو جاب كام جون وعمل كام تمريرة حاسمة ودي طريقة بتريح ناس كتير خصوصا من اللي بتحب تقارن بينه وبين (كريستيانو رونالدو Cristiano Ronaldo) بس انا عايزك تلاحظ حاجة تانية .. بص علي الاهداف و الفرص اللي بتيجي لبرشلونة الموسم ده ولاحظ هي بتبدا ازاي و بتنتهي ازاي؟ .. حتلاقي ان فيه كتير منها (ميسي Messi) هو اللي بيبدا الهجمة و بيشرف عليها واحيانا كتير هو اللي بيخلصها .. حصل مره في ماتشهم ضد جيرونا ان مدافع جيرونا (بابلو مافيو Pablo Maffeo) بيراقب (ميسي Messi) مان تو مان ف(ميسي Messi) راح يكلم المدير الفني بتاعه يساله هو يعمل ايه عشان يخلق فرص لزمايله و يتحرك فين و امتي؟ لانه عارف ان اللي عمله المدير الفني لجيرونا انه حاصر المخ اللي فرقة برشلونة بتفكر بيه.
جزء مهم من نجاح برشلونة الموسم ده سببه رحيل (نايمار Neymar) .. ده حقيقي علي فكرة .. (ايرنستو فالفيردي) في الاول خالص كان ناوي يستخدم الثلاثي الهجومي اللي هو (ميسي Messi) و (سواريز Suarez) و (نايمار Neymar) زي ما كان (لويس انريكي Luis Enrique) بيعمل .. لما (نايمار Neymar) مش فهو اضطر يغير من استراتيجيته خالص فقرر يشتري (باولينيو Paulinho) عشان يقوي شوية خط الوسط .. بدل ما كان (ايرنستو فالفيردي) ناوي يعتمد علي هجومه انه يخلص الماتشات بدا يعتمد علي خط الوسط انه يقوم بالمهمة دي .. دلوقتي (سيرجيو بوسكيتس Sergio Busquets) مبقاش يلعب لوحده كلاعب ارتكاز انما بقي فيه حد معاه يساعده .. ده عطي الفرصه ل(ايفان راكيتيتش Ivan Rakitic) انه يفوق شوية و يرجع لمستواه و يحرر شوية (اندريس انيستا Andres Inesta).
المصدر:
مقالة بعنوان From crises to topping La Liga: how Ernesto Valverde stabilized Barcelona نشرت في جريدة The Guardian البريطانية وده لينك المقالة الاصلية:
https://www.theguardian.com/football/blog/2017/nov/06/from-crisis-to-topping-la-liga-how-ernesto-valverde-stabilised-barcelona
