لينك التسجيل الصوتي للمقالة علي Sound Cloud:
https://soundcloud.com/user-112011687-312727988/hyx1kg2fs5jw
الكورة المصرية في الفترة الأخيرة ربنا إبتلاها بشخصية إسمها (تركي أل شيخ) .. في حالة إنك متعرفش ده مين؟ وفي الحالة دي انتي غالباً بنت ملكيش في الكورة فبإختصار شديد ده رجل سعودي معاه فلوس قرر إنه يعمل زي الجوكر في فيلم The Dark Knight كده اللي هو يثبت إن تحت ظروف معينة أي شخصية ينفع تفسدها .. مهما كنت بتتكلم عن أسطورة من أساطير الكورة المصرية .. قصاد إغراءات معينة فإنت تقدر تفسده .. مشروع (تركي أل شيخ) في مصر كان نادي إسمه بيراميدز .. ده نادي معمول أول إمبارح .. ملوش تاريخ ولا له أي حاجة خالص .. بس عشان مصروف عليه كويس ففي أول موسم له قدر ينافس و حالياً بيلعب في بطولة الكونفيدرالية الأفريقية .. انا ليه جبت سيرة بيراميدز و (تركي أل شيخ)؟ عشان القصة دي هي هي بس طبعاً بشوية إختلافات خفيفة حصلت و بتحصل في ألمانيا.
النادي اللي بتكلم عنه في ألمانيا إسمه أر بي لايبزج RB Leibzig مش بيراميدز .. و البني ادم اللي عايز أتكلم عنه إسمه (ديتريش ماتيشيتز Dietrich Mateschitz) مش (تركي أل شيخ) و حنعرف مين البني ادم ده كمان شوية .. بس خلي بالك .. زي أي قصة في الدنيا بيبقي ليها وجهتين نظر علي حسب انت بتكلم مين .. فيه ناس شايفة إن تجربة أر بي لايبزج في ألمانيا هي التجسيد الحقيقي لكلمة إفساد كرة القدم اللي هي حاجة كده شبه اللي بيعمله (تركي أل شيخ) في الكورة المصرية .. وفي نفس الوقت فيه ناس شايفه إن اللي بيعمله أر بي لايبزج هو أحسن حاجة حصلت لكورة القدم الألمانية .. زي ما انت شايف واضح إن المقالة دي مقسومة نصين .. النص الأولاني حنقول فيه إن أر بي لايبزج دي تجربة بنت ستين كلب .. النص الثاني حنقول فيها إن أر بي لايبزج ده زي (الباز افندي) في فيلم إبن حميدو علي رأي (الريس حنفي) انا ذات نفسي أستمناه.
النص الأولاني .. ليه أر بي لايبزج تجربة بنت ستين كلب؟
الحكاية بدأت سنة 2009 بنادي إسمه إس إس في ماركين-شتادت SSV Markranstadt بيلعب في دوري الدرجة الخامسة في ألمانيا .. نادي بيلعب في قعر الكنيف .. في السنة دي النادي ده إشترته شركة ريد بول Red Bull بتاعة مشروبات الطاقة دي اللي انت أكيد عارفها .. ريد بول بيعطيك جوانح علي رأي الإعلان بتاعهم .. المهم إن الشركة دفعت فيه حوالي 100 مليون يورو بس قبل ما تهرش في شعرك و تسأل نفسك هو ياتري إيه اللي يخلي شركة زي دي تشتري نادي؟ فخليك عارف إن البيزنس بتاع ريد بول مش جديد عليه إنهم يشتروا أندية .. هم عندهم نادي في النمسا إسمه ريد بول سالزبورج .. عندهم نادي في مدينة نيويورك الأميريكية إسمه ريد بول نيو يورك ولعبله (تييري هينري Thiery Henry) قبل ما يعتزل .. وكمان ليهم فرقة سباقات فورميلا وان .. ريد بول إشترت كل حاجة في النادي .. إسمه .. شعاره .. التي شيرتات .. حقوق اللاعيبه .. وده خلاهم يغيروا كل حاجه فيه .. إسم النادي إتغير بقي أر بي لايبزج .. شعار النادي إتغير .. طريقة إدارة النادي إتغيرت .. الميزانية السنوية المحطوطة لشراء اللاعيبه بقت 85 مليون جنيه إسترليني ودي تعتبر من أعلي ميزانيات شراء اللاعيبة بين كل أندية ألمانيا .. النتيجة كانت نجاح في وقت قياسي محدش كان قادر يتوقعه.
خلال سبع مواسم اللي هو من أول موسم 2009-2010 لحد موسم 2017-2018 النادي نط من دوري الدرجه الخامسة للدوري الممتاز .. في أول موسم ليهم في الدوري الممتاز خدوا المركز الثاني و إتأهلوا للعب في بطولة دوري أبطال أوروبا .. الموسم اللي وراه حققوا نفس الإنجاز و دلوقتي هم في دور الثمانية من البطولة بعد ما طلعوا نادي توتنهام من دور ال16 ..بس إذا كان النادي نجاحه بيكبر ففي نفس الوقت كراهية الألمان ليه هي كمان عماله تكبر يوم عن يوم .. يحكي أن سنة 2016 إتلعب ماتش في كأس ألمانيا بينهم و بين فرقة إسمها دينامو دريزدن علي ملعب دينامو دريزدن وفي الماتش جمهور دينامو دريزن رموا في الإستاد راس تور مدبوح كنوع من أنواع الإعتراض مش بس علي سياسة نادي أر بي لايبزج دول أساساً بيعترضوا علي وجود النادي ده .. في نظرهم أر بي لايبزج عامل زي السرطان اللي لازم تدخل جراحي عشان يتشال من جسم الكورة الألمانية .. ومش بس جمهور دينامو دريزدن اللي ده رأيه .. يحكي أن برده أول ماتش تلعبه فرقة أر بي لايبزج علي أرضهم كفرقة بتلعب في الدوري الممتاز الألماني كان ضد فرقة بروسيا دورتموند بس جمهور بروسيا دورتموند رفض يسافر يحضر الماتش.
أظن السؤال دلوقتي هو ليه كل ده؟ .. ليه جماهير الكورة في ألمانيا مش طايقه أر بي لايبزج؟ .. الحقيقة هي المشكلة إن جماهير الكورة الألمانية مختلفين شوية عن جماهير الكورة في أي حتة في العالم .. في إنجلترا مثلاً لو انا رجل أعمال معايا فلوس و قررت أروح أشتري نادي و أضخ فيه فلوس عشان النادي يصرف و يشتري لاعيبه و ينافس فانا مش بس حتشال علي كتاف جماهير النادي اللي انا اشتريته إنما جماهير الكورة الإنجليزية كلها مش حيبصولي بصة وحشة .. الألمان مش كده .. الألمان الكورة بتاعتهم مبنية علي التقاليد و السمعة والأهم من كل ده القدرة علي إن الجماهير تمشي أنديتها علي مزاجها ودي النقطة اللي محتاجة شوية شرح.
لحد سنة 1998 الأندية الألمانية كانت بتتعامل كأنها منظمات خيرية كده اللي هو الجمهور بتاع كل نادي بيدفع من جيبه إشتراك شهري و الفلوس دي كلها بتتحط عشان تصرف علي النادي .. الجمهور هو اللي بيصرف علي النادي .. الجمهور هو اللي بيعمل إنتخابات عشان يختاروا الناس اللي حتمسك النادي .. ده معناه إن لسنين و سنين الأندية الألمانية كانت ملهاش مالك .. هم معندهومش (تركي أل شيخ) .. سنة 1998 إتحطت قاعدة 50+1 اللي إتكلمنا عنها قبل كده ودي قالت إن بقي مسموح لشركة زي فولكس فاجن أو BMW مثلاً إنها تعتبر نفسها من ضمن جماهير نادي معين و تحط من جيبها فلوس عشان تتصرف علي النادي .. لكن .. لازم عشان النادي ينافس في الدوري الممتاز إن جماهيره يبقي ليهم الأغلبية .. مينفعش شركة تمتلك أكتر من 50% من أسهم نادي وعشان كده القاعدة إتسمت 50+1 .. الإستثناء الوحيد كان لو نادي معين كانت بترعاه شركة واحدة لمدة عشرين سنة ورا بعض .. يعني مثلاً .. فيه نادي إسمه باير ليفركوزن .. النادي ده نادي شركة أسسته شركة باير Bayer بتاعة الأدوية .. نفس الكلام علي نادي وولفسبورج اللي هو كمان نادي شركة أسسته شركة فولكس فاجن بتاعة العربيات .. بس برده إيه علاقة كل ده بالسبب اللي بيخلي الجماهير الألمانية تكره أر بي لايبزج؟
هي الفكرة إن الطريقة اللي إدارة أر بي لايبزج ماشيه بيها عكس كل حاجة قايمة عليها الكورة الألمانية .. لو انا مشجع لبايرن ميونيخ وعايز أبقي عضو في الجمعية العمومية للنادي فكل اللي انا محتاج أعمله إني أدفع إشتراك سنوي ما بين 30-60 يورو .. ده بيخليني من حقي أنتخب و أقرر مين اللي يمسك النادي؟ .. في حالة أر بي لايبزج فانا عشان أبقي عضو في الجمعية العمومية لازم أدفع سنوياً 1000 يورو وحتي ده مبيدينيش الحق إني أنتخب .. إذا كانت الجمعية العمومية لنادي زي بروسيا دورتموند مثلاً فيها 139,000 مشجع ففي حالة أر بي لايبزج فالجمعية العمومية فيها 17 اللي هم أعضاء في مجلس إدارة شركة ريد بول .. مش بس كده .. لوايح الإتحاد الألماني لكرة القدم بتقول إن مينفعش نادي يتسمي بإسم شركة .. يعني في الدوري الألماني مثلاً مينفعش فرقة تتسمي بتروجيت ولا المقاولين العرب .. فعشان شركة ريد بول تسمي النادي علي إسمها بس من تحت لتحت خدت الحروف الأولي من إسم ريد بول اللي هم R و B و سمت النادي أر بي لايبزج وده في حد ذاته حاجه بتعصب جماهير الكورة الألمانية جداً لإن لما شركة ريد بول إتقالها إنتي بتتحايلي علي القواعد قالت طب عليا الطلاق أر بي دي مش إختصار ريد بول دي إختصار كلمة ألماني إسمها Rasenballsport Leibzig اللي هي ترجمتها حاجة شبه الكورة الكفر اللي كنا بنلعب بيها زمان في الشارع اللي هو تخليك تبصلهم بصة (روبي) في الكوميك بتاع يا ولاه عليا انا برده الكلام ده.
انت مش متخيل قد إيه المشجعين الألمان دماغهم جزمة قديمة لإن فعلياً انت كمشجع كورة مصري الموضوع فعلياً غريب عليك .. يحكي أن فيه نادي في ألمانيا إسمه هوفينهايم .. هو نادي مش كبير أوي يعني حاجة كده زي النادي المصري البورسعيدي .. المهم إن النادي ده و لمدة أكتر من عشرين سنة كان مدعوم من رجل أعمال إسمه (ديتمار هوب Dietmar Hopp) والرجل ده لو انت مهندس مدني لازم تبوس إيده وش و ظهر لإن الرجل ده هو صاحب شركة SAP اللي من غيرها انت كان زمانك بتحتاس عشان تحسب أحمال العمدان وبسبب دعمه للنادي إتعين رئيس شرفي ليه .. المهم إن في اخر ماتش لفرقة هوفينهايم ضد فرقة بايرن ميونيخ علي ملعب هوفينهايم جماهير بايرن ميونيخ شتمت (ديتمار هوب) بأمه .. هنا انت محتاج بس تحاول تستوعب إيه اللي كان بيدور في دماغ مشجع بايرن ميونيخ وهو بيعمل كده؟ .. هوفينهايم عمره ما كان منافس لبايرن ميونيخ .. ده نادي ماشي جنب الحيط .. مفيش مثلاً منافسة أصلاً بين شركة SAP و شركة أليانز Allianz الراعي الرسمي لبايرن ميونيخ .. مفيش أي مبرر إن الموضوع يبقي شخصي أوي كده .. ده كان السبب إن الماتش إتوقف و بعد ما الحكم رجع الماتش تاني لمدة عشر دقايق لاعيبه هوفينهايم و بايرن ميونيخ بقوا بيباصوا الكورة لبعض .. كده انت فهمت النص الأولاني وجه الوقت إننا نتكلم عن الجزء الثاني.
النص الثاني .. ليه تجربة أر بي لايبزج انا ذات نفسي أستمناها؟
بعد ما شرحنالك ليه الأندية الألمانية بتسب و تلعن في أر بي لايبزج فجه الوقت إننا نوريك ليه التجربة دي تستحق إنك تقف قدامها و تهرش في شعرك و تقول طب ما الناس دي بتعمل شغل حلو أهو .. المنطق بيقول إن لو انا شركة معايا فلوس إشتريت نادي وحطيت لنفسي هدف إني عايز أنافس فطبيعي إن أول حاجة أعملها إني أروح أشتري لاعيبه جاهزة عشان أجيب بطولات .. اللي هو حاجة شبه اللي عملها بيراميدز .. بس أر بي لايبزج مبيعملوش كده .. بسم الله الرحمن الرحيم هم مبيشتروش أي لاعيب سنه فوق 24 سنة .. عارف مين المدير الفني للفرقة؟ .. (جوليان نيجليزمان Julian Nagelsmann) .. مش عارف تنطق إسمه انا عارف مش مشكلة .. عارف عنده كام سنة؟ .. 31 سنة .. هداف الفرقة (تيمو فيرنر Timo Werner) اللي فيه كلام كتير إن ليفربول حيشتريه لسه شاب صغير عنده 24 سنة و النادي إشتراه من 3 سنين لما كان لسه ناشيء و دفعوا فيه 10 مليون يورو .. متوسط أعمار الفرقة كلها 24 سنة .. مفيش لاعيب في الفرقة سنه فوق 30 سنة .. من الأخر فرقة لايبزج فرقة شباب صغير و إتبنت عشان تبقي فرقة شباب صغير و حتفضل تكمل علي كتاف الشباب الصغير.
زي ما انت شايف ده نادي قايم علي الشباب .. هو نادي يبان من بره إنه بيراميدز بس لما تبصله و تركز تلاقيه حاجة شبه الإسماعيلي .. مش بس قايم علي اللاعيبه الشباب إنما كمان مدربينه صغيرين في السن و بيساعدهم ناس خبرتها حلوة زحليقة .. أهم شخصيتين في أر بي لايبزج حالياً هم المدير الفني (جوليان نيجليزمان) و معاه المدير الرياضي (رالف رانجنيك Ralf Rangnick) .. (رالف) ده عنده 61 سنة بس قبل ما يبقي مدير رياضي كان مدير فني لفرق كتير في ألمانيا زي شتوتجارت و هانوفر و شالكة و هوفينهايم قبل ما في سنة 2012 يبطل تدريب و يشتغل كمدير نشاط كورة في ناديي أر بي لايبزج في ألمانيا و ريد بول سالزبورج في النمسا و الإتنين مملوكين لشركة ريد بول زي ما قلتلط .. في موسم 2015-2016 اللي هو الموسم اللي النادي لعبوا فيه في دوري المظاليم في ألمانيا (رالف) مسكهم كمدير فني و صعد بيهم للدوري الممتاز بس قرر إنه ميكملش في تدريبهم .. هو قال إن الأحسن إنه يرجع لمنصبه كمدير كورة و جاب واحد اسمه (رالف هاسينهوتل Ralph Hasenhuttl) عشان يمسك الفرقة في أول موسم ليهم في الدوري الممتاز الألماني و معلش انا عارف إن أسامي الألمان مستفزة وإن كان (راف هاسينهوتل) نمساوي و حالياً بيدرب فرقة ساوثهامبتون في إنجلترا .. النقلة الكبيرة اللي بيعيشها النادي دلوقتي سببها المدير الفني الشاب بتاعهم و اللي الحقيقة لازم نتكلم عنه شوية لإن (جوليان نيجلزمان) ده بني ادم تشوف صورته تقول عليه تافه .. تشوف شغله تقول عليه السير (أليكس فيرجسون) بعث من جديد.
لما (جوليان) كان عنده 28 سنة بقي أصغر مدير فني في تاريخ الدوري الألماني من أول ما إتعمل .. هو مسك فرقة هوفينهايم في 2016 وهم فرقة مهددة بالهبوط لدوري المظاليم و سابهم في مايو 2019 وهم فرقة بتلعب في بطولة دوري أبطال أوروبا .. مع أر بي لايبزج هو مستلمش فرقة كلها لاعيبه سوبرستارز و بميزانية مفتوحة اللي هو روح إشتري اللي إنت عايزه .. فعلياً هو بيتعامل مع لاعيبة أكبر واحد فيها عنده 30 سنة .. فيه لاعيبة بتلعب في النادي من أيام ما كان لسه في دوري الدرجة الثانية .. حتي هم مش بيبعزقوا فلوسهم أوي يعني .. الموسم ده أغلي صفقة عملوها كانت المهاجم الإنجليزي الشاب (أديمولا لوكمان Ademola Lookman) اللي اشتروه من إيفرتون ب18 مليون يورو .. أغلي لاعيب إشتروه في تاريخهم كان (نابي كايتا Naby Keita) اللي دفعوا فيه 30 مليون يورو وبعد ما قضي معاهم موسمين باعوه ليفربول ب65 مليون يورو.
الدوري الألماني مليان فرق من اللي إتعودت ترقص علي السلالم .. أخرهم يتأهلوا لبطولة دوري أبطال أوروبا و ممكن يوصلوا لدور الثمانية مثلاً .. الدوري شبه محسوم لبايرن ميونيخ .. الكاس ممكن أي حد ياخده بس بنسبة كبيرة بايرن حياخده برده .. أكتر نادي ألماني له فرصة ينافس في أوروبا هو طبعاً بايرن ميونيخ و وراه بروسيا دورتموند .. بس دلوقتي أر بي لايبزج بدأ يخش في الليلة و أهم حاجة في الفرقة دي هو الثبات علي المستوي .. في نفس الوقت الدوري الألماني من بعد ظهور لايبزج وهو فيه شيء من المنافسة .ويمكن قريب نشوف الموسم اللي لأول مرة من 8 سنين مياخدش الدوري فيه بايرن ميونيخ و اللي ياخده يبقي أكتر نادي مكروه في ألمانيا.
المصادر:
مقالة بعنوان Protests, boycotts and a severed bull’s head: How RB Leibzig became the most hated club in Germany نشرت في جريدة The Telegraph وده لينك المقالة الأصلية:
https://www.telegraph.co.uk/football/2020/02/19/rb-leipzig-protests-boycotts-severed-bulls-head-rb-leipzig-became/
مقالة بعنوان How RB Leibzig became the most hated club in German football نشرت في جريدة The Guardian وده لينك المقالة الأصلية:
https://www.theguardian.com/football/2016/sep/08/why-rb-leipzig-has-become-the-most-hated-club-in-german-football
مقالة بعنوان In defense of RB Leibzig نشرت في جريدة The Guardian وده لينك المقالة الأصلية:
https://www.theguardian.com/football/englische-woche/2019/nov/08/rb-leipzig-defence-club-bundesliga-bayern-munich
مقالة بعنوان RB Leibzig can win the Bundesliga and Germany had better get used to it نشرت في جريدة The Daily Mail وده لينك المقالة الأصلية:
https://www.dailymail.co.uk/sport/football/article-7965897/RB-Leipzig-win-Bundesliga-Germany-better-used-it.html
