موضوعنا النهاردة هو البطولة اللي فيه ناس كتير و أنا منهم الحقيقة بيعتبروها أنظف و أحسن و أمتع و أهم بطولة كرة قدم في العالم و في رأي الناس دي و أنا منهم برده بعتبرها أهم عندي من كأس العالم .. مفيش حد بيقول علي نفسه بيحب كرة قدم مش بيعشق بطولة دوري أبطال أوروبا UEFA Champions League و المشكلة اللي أي حد بيواجهها لما بيحب يتكلم عن البطولة دي إنه بيكتشف إنها عامله زي موضوع إزاي تفهم طريقة تفكير البنات كده مينفعش تتلم أو تتشرح أو تتناقش في مقالة واحدة و خلاص بس اللي إحنا حنحاول نجاوب عنه النهاردة هو سؤال يبدوا أهبل لكنه مهم الحقيقة و خصوصاً بالنسبة للناس اللي بتتابع الدوري الإنجليزي Premier League و السؤال بيقول علل يعني بالله عليك يا شيخ لا تقولي هو إيه سبب إن الأندية الإنجليزية أداءها بيبقي زي الزفت في البطولة دي خصوصاً في السنين الأخيرة؟
أظن السؤال ده مفيش قعدة بلاي ستيشن إلا و إتقال و حصلت عليه خناقة ما بين ناس شايفة إن الدوري الإنجليزي هو أحسن دوري في العالم و بين ناس شايفه إنه أكتر دوري مبالغ فيه في العالم بسبب إن مفيش أندية إنجليزية كتير بتعرف تاخد البطولة .. خلينا كالعادة في المقالات بتاعتنا نمسك العصاية من النص و نتكلم عن الموضوع من وجهة نظر مختلفة شوية.
دلوقتي أخر نادي إنجليزي كسب بطوله Champions League كان تشيلسي موسم 2020-2021 لما كسب فرقة مانشستر سيتي الإنجليزية برده في الفاينال .. المرة اللي قبلها كان نادي ليفربول موسم 2018-2019 اللي يا سبحان الله كسب يومها فرقة توتنهام الإنجليزية برده .. المرة اللي قبلها اللي فرقة إنجليزي تكسب البطولة كانت تشيلسي في موسم 2011-2012 أيام ما كان بيدربهم اللي الله يمسيه بالخير (روبيرتو دي ماتيو Roberto di Matteo) اللي أنا معرفش هو في أنهي داهية دلوقتي و بغض النظر إن الرجل ده كسب البطولة بحظ عوالم و إنه كان مش بس بيركن الأوتوبيس ده كان بيجيب موقف الأوتوبيسات كله يركنه قدام الجون .. بس مش دي القضية .. القضية إنك لو جيت بصيت مين أكتر نادي إنجليزي إتاهل لبطولة Champions League من بعدها حتلاقي نفسك قدام مانشستر سيتي .. أيوه زي ما سمعت كده .. بداية من 2011 لحد دلوقتي يعني بتتكلم في 13سنة أهو نادي مانشستر سيتي مثل إنجلترا 12مرة من أصل 13 .. أحب أفكرك إن مانشستر سيتي قبل ال13 سنة دول محدش كان عارف هو مين .. طب نسأل نفسنا مين تاني فريق مثل إنجلترا في ال13 سنين اللي فاتو؟ توتنهام .. أيوه فريق الفراخ اللي لو وصل لدور ال16 بيعملوا فرح .. أندية عريقة زي مانشستر يونايتد و ليفربول و تشيلسي مش حتلاقيهم بيمثلوا إنجلترا في البطولة كل سنة .. أندية زي ليستر سيتي شاركت في البطولة مرة واحدة و نادي زي أرسنال من 2017 و هو مش بيلعب في البطولة .. إنت خدت بالك أنا قلت كام اسم؟ .. 7 أندية إنجليز بيتخانقوا علي 4 مراكز مؤهلة لChampions League و ده ملوش اسم غير إنه معجنة.
ده الوضع جوه إنجلترا .. فيه دول تانية فيها أندية راكبه علي الدوري و مدلدله رجليها .. عندك نادي زي بايرن ميونيخ بسم الله ما شاء الله بقاله 16 سنة ورا بعض بيتأهل للبطولة .. نادي زي برشلونة نمسك الخشب إتأهل 17 مرة متتالية ولا ريال مدريد اللي إتأهل للبطولة دي 24 مرة .. لو رحت لإيطاليا حتلاقي إن يوفينتوس بيبلطج علي أندية إيطاليا كلها بقاله 10سنين و محدش عارف يوقفه عند حده من ساعة ما فاق من فضيحة الكالتشوبولي بتاعة التلاعب في نتايج الماتشات .. و طبعاً عندك في فرنسا باريس سانجيرمان واخد الدوري الفرنسي و كأس فرنسا وضع يد محدش عارف ياخد منه لا حق ولا باطل .. لما تحط ده جنب بعضه تلاقي نفسك قدام حقيقة غريبة أوي و هي إنك لو نادي بتلعب في الPremier League و كنت نادي غني جداً و تقدر تشتري أي حد و عندك لاعيبة بتتصنف إنها من أحسن لاعبي العالم فكل ده مش معناه إنك حتضمن مكانك ضمن الأربعة الكبار اللي بيتأهلوا لبطولة Champions League بشكل مباشر.
دي فعلاً حاجة غريبة لو فكرت فيها شوية .. خد عندك نادي زي مانشستر سيتي مثلاً .. مع كل اللي هم حققوه السنة دي فتأهلهم لChampions League الموسم الجاي مش مضمون .. أنا مش عارف أوصهالك إزاي بس فرقة كسبت بطولتين محليتين اللي هم الدوري و الكأس و بتلعب أحلي كرة قدم ممكن تتفرج عليها في العالم بس الموسم الجاي إحتمال كبير تشيلسي يرجع ينافس تاني علي اللقب و حيبقي عندك كده تشيلسي و مانشستر يونايتد و أرسنال (ربنا يقومه بالسلامة يعني) و توتنهام و مانشستر سيتي و ليفربول و ربنا يستر و مينضملهمش حد تاني غير متوقع زي ما ليستر سيتي عمل كده من سنتين .. الكلام ده مبيحصلش في دول تانية .. مفيش فرقة في إسبانيا تقدر تنافس ريال مدريد أو برشلونة علي الأقل في القوة المالية .. اه أنا بحترم أتليتكو مدريد جداً بس خلينا نكون صرحا مع نفسنا إن صعب أوي الفرقه دي تكسب الدوري الإسباني تاني علي الأقل خلال السنين الجاية .. في ألمانيا أنا ممكن أقولك إن النازيين إحتمال يرجعوا يحكموا ألمانيا تاني بس مستحيل أتخيل إن ممكن فرقة غير بايرن ميونيخ تكسب البونديزليجا.
ده يوريك قد إيه أندية إنجلترا بتحارب عشان تتأهل لChampions League بس ولا واحد فيهم عنده النفس إنه يكسب البطولة لإن في وقت من الأوقات حيجيله ماتش في الدوري ممكن يحسم مكانه ضمن الأربعة الكبار في توقيت ماشي مع ماتش في دور الثمانية أو حتي دور نص النهائي و حتلاقي إن إدارة النادي بالنسبة لها تطلع من نص النهائي Champions League دلوقتي أحسن من إنهم يخسروا ماتش في الدوري و ميتأهلوش للبطولة السنة الجاية .. أنا فاهم و مقدر إن ده منطق إنت مش قادر تستوعبه بس خليني أحاول أبسطهولك بحالة حقيقية حصلت قدامك.
طبعا إنت عارف نادي الفراخ .. قصدي نادي توتنهام .. النادي ده قرر من خمس سنين إنه يهد إستاده القديم و يبني مكانه استاد جديد أكبر و دلوقتي بيلعبوا في الإستاد اللي صرفوا عليه دم قلبهم .. موسم 2017-2018 توتنهام طلع من نادي يوفينتوس في دور ال16 في بطولة Champions League لو تفتكر بس محدش في إدارة النادي إهتم .. إنت متعادل مع يوفينتوس علي أرضه 2-2 و ضيعت من إيدك فرصة إنك تبقي في دور الثمانية و خسرت علي أرضك 2-1 بس ولا كأن حاجة حصلت .. بس بعدها بأسبوع كان عندهم ماتش مع تشيلسي في الدوري كان حيحسملهم مكانهم ضمن الأربعة الكبار الموسم الجاي و فجأة تلاقي إدارة النادي بقت بتتعامل مع ماتش تشيلسي علي إنه أهم ماتش ليهم في الموسم .. ليه؟ .. عشان لو هم إتأهلوا الموسم الجاي لChampions League حيلعبوا ماتشاتهم علي أرضهم في إستادهم الجديد الكبير و ده حيدخل للنادي فلوس كتير تقدر بعشرات الملايين فبالنسبة ليهم ماتش تشيلسي يكسبوه (و هم كسبوه فعلاً 3-1) أهم بكتير من إنهم يوصلوا حتي لنص النهائي Champions League.
علي الناحية التانية بص لفرقه زي تشيلسي .. تخيل إن دي فرقة كسبوا الدوري لما جابوا (مورينيو Mourinho) تاني مرة في أول موسم 2017-2018 .. الموسم اللي وراه الدنيا باظت و بقوا عاشر الدوري و مشوا (مورينيو) وجابوا (أنتونيو كونتي Antonio Conte) .. الموسم اللي وراه رجعوا تاني كسبوا الPremier League .. الموسم اللي وراه لعبوا في بطولة Europa League .. حاول تحط نفسك مكان الناس اللي بتعمل ميزانية تشيلسي .. ده نادي المفروض إنه نادي غني معاه فلوس و من أكبر أندية إنجلترا بس عامل زي الرجل المتجوز و عنده عيال بس شغال باليومية مش عارف هو بكره شغال ولا لا و حيعرف يأكل عياله ولا لا .. دي ناس مش عارفة هم الموسم الجاي حيبقي معاهم كام يصرفوه و كل مليم بيجيلهم بيتصرف بحساب فإزاي الناس دي حتتعامل مع مدير فني زي (كونتي) عليه هسهس اسمه أنا عايز لاعيبه إشترولي لاعيبه؟ .. تتخيل إن ده نادي عايش في إستقرار يخليه كل موسم ينافس علي Champions League؟ .. طبيعي لا .. خلي كده ريال مدريد يلعب في الPremier League لموسم واحد بكل تقلباته دي و يوريني حينافسوا إزاي علي Champions League؟
مش بس تشيلسي اللي عايش في مشكلة .. نادي زي مانشستر يونايتد هو كمان عنده مشكلة .. الناس دي عشان تتأهل لChampions League موسم 2018-2019 إضطروا إنهم يكسبوا الEuropa League الموسم اللي فات لإنهم السنة اللي قبلها مكانوش أصلاً ضمن الأربعة الأوائل .. لو إنت في إنجلترا فإحتمالية إنك حتي توصل لنص النهائي Champions League صعبة أوي .. مش لإن الأندية الإنجليزية وحشة .. لا خالص .. المشكلة إن الدوري الإنجليزي قاسي و المنافسة فيه صعبة و إنك تضمن مكانك ضمن الأربعة الأوائل مش مضمونة لدرجة إن الأندية اللي بتتأهل فعلاً لChampions League بتعتبرها بطولة بتيجي في المرتبة الثانية في أولوياتهم مهما كانت الفلوس اللي بتتصرف و مهما كان النادي غني.
(رومان أبراموفيتش Roman Abramovich) ماسك تشيلسي من سنين و صرف مليارات علي شراء لاعيبه بس خلال السنين دي كلها تشيلسي مكسبش الChampions League إلا مرتين .. الشيخ (منصور) بقاله سنين شاري مانشستر سيتي و صارف قد اللي صرفه (أبراموفيتش) و يمكن أكتر و رغم كده سيتي موصلش غير للفاينال .. من ساعة ما السير (أليكس فيرجسون Alex Ferguson) تقاعد و يونايتد مبقاش عارف يوصل لChampions League فمابالك إنه يكسبها .. علي الناحية الثانية في الدوري المدعكة مبتهداش .. مفيش فريق ضامن يبقي ضمن الأربعة الأوائل عشان تقول إن فيه فريق ضامن إنه يكسب الPremier League .. أرسنال بقاله سنين مش عارف يكسبه .. ليفربول بكل تاريخه مش عارف يكسبه بقاله 20 سنة لحد ما ربنا نفخ في صورتهم و كسبوه .. ليستر سيتي خدها .. الكلام ده مش موجود في أي دوري تاني في العالم .. بص علي الفرق اللي بتوصل لدور الثمانية عادة في Champions League .. يوفينتوس و بايرن ميونيخ و ريال مدريد و برشلونة و باريس سانجيرمان .. خمس فرق من أصل 8 تقريباً ضامنين كل موسم مكانهم في Champions League و 3 منهم ضامنين بنسبة كبيرة إنهم الموسم الجاي حياخدوا الدوري المحلي في بلدهم .. ده بيحطك قدام حقيقة واضحة إن الدوري الإنجليزي هو الدوري الأكتر تنافسية علي مستوي العالم و عشان كده مش حتلاقي الأندية الإنجليزية منيمة أوروبا من المغرب.
المصدر:
مقالة بعنوان Why the thrills of top flight terrify our biggest clubs, qualifying for the Champions League is more important than ever before نشرت في جريدة The Daily Mail و ده لينك المقالة الأصلية:
http://www.dailymail.co.uk/sport/football/article-5560093/Why-thrills-flight-terrify-biggest-clubs.html
