لينك التسجيل الصوتي علي ساوند كلاود:
https://on.soundcloud.com/2pwa7ِ
أنا فاكر كويس أوي أحداث ماتش نهائي كأس العالم 2014 بين ألمانيا و الأرجنتين .. كنت علي القهوة مع صحابي في إسكندرية .. واحد صاحبي أرجنتيني متعصب تقريباً كان هو الوحيد في القهوة اللي بيشجع الأرجنتين .. الباقي كله كان بيشجع ألمانيا .. أنا أفتكر إني كنت قاعد بتفرج علي الماتش و أنا لابس تي-شيرت منتخب ألمانيا المخطط أسود و أحمر .. التي- شيرت لسه عندي علي فكرة و بحبه جداً .. لما الماتش خلص و (ماريو جوتزه Mario Gotze) جاب الجون الحاسم و حلم (ليونيل ميسي Lionel Messi) إنه يعمل حاجة مع منتخب بلده إتحطم ناس كتير و أنا شخصياً منهم وقتها محدش فينا سأل نفسه هو يا تري ألمانيا عملت ده إزاي؟ .. مش بتكلم عن طريقها للنهائي و إنها داست علي وش البرازيل سبعة واحد .. مش ده قصدي .. أنا قصدي هو إزاي المنتخب ده إتعمل بالشكل ده؟ .. بدأنا نتكلم أنا و صحابي هي ألمانيا عملت إيه في مشاركاتها في كأس العالم قبل كده؟ .. في كأس العالم 2010 بتاع جنوب أفريقيا ألمانيا وصلت نص النهائي و طلعت منه علي إيد إسبانيا بعد ما خسرت 1-0 .. في كأس العالم 2006 اللي إتعمل علي أرضها طلعت برده من نص النهائي بعد ما خسرت من إيطاليا .. في كأس العالم 2002 بتاع كوريا و اليابان هي خسرت النهائي قصاد البرازيل .. لحد دلوقتي زي الفل .. بس في كأس العالم 1998 بتاع فرنسا طلعت من دور ال8 لما إتداس علي وشها من كرواتيا 3-0.
من فترة قريبة كنت قاعد علي Facebook فجه قدامي فيديو للمحلل الرياضي كابتن (خالد بيومي) و جاب سيرة إزاي تقدر تقول ألمانيا عملت عمرة كاملة لقطاع الناشئين بتاعها عشان يبقي عندها منتخب يقدر ينافس في كأس العالم 2006 اللي حيتعمل علي أرضهم .. في الفيديو كابتن (خالد) إتكلم عن إزاي الإتحاد المصري لكرة القدم محتاج يقلد التجربة دي .. هنا أنا سألت نفسي هل ده له علاقة بإن إزاي ألمانيا إتحولت من بلد خسرت 3-0 في دور ال8 في كأس العالم 1998 لبلد بترفع كأس العالم في 2014؟ .. بشوية تدوير الدنيا بدأت توضح.
معلش أنا أسف أنا لازم أرجعك بالزمن للسبعينات .. في الوقت ده ألمانيا كانت مقسومة نصين اللي هم نص شرقي و كان تحت إيد الإتحاد السوفيتي اللي هي ألمانيا الشرقية و نص غربي تحت إيد أميركا اللي هي ألمانيا الغربية .. في الفترة دي منتخب ألمانيا الغربية كان منتخب عنتيل .. منتخب يقدر يدوس علي وش أي حد .. منتخب خد بطولة كأس العالم سنة 1974 .. بس كانت فيه مشكلة .. منتخبات الناشئين بتاعة ألمانيا كانت مييييح … مفيش .. ولا بيكسبوا أي حاجة ولا بيتأهلوا حتي لأي بطولات .. الحقيقة إن ده مكنش لغز .. ناس كتير كانت عارفه المشكلة فين و المشكلة كانت إن السياسة داخله في الموضوع اللي هي فكرة مش عايزين نزعل حبايبنا .. وقتها الإتحاد الألماني لكرة القدم DFB كان ماشي بمبدأ إن كل ولاية لازم يبقي ليها ممثلين في الإتحاد و ده سمّع في إختيارات منتخبات الناشئين .. منتخبات الناشئين كان ليها كوتة يعني لازم اللاعيبة يبقوا من كل حتة في ألمانيا بحيث كل ولاية يبقي جاي منها عدد محدد من اللاعيبه .. ده يبان فكرة كويسة بس لو فكرت فيها شوية تلاقي إن فيه لاعيبه كتير تستحق تخش المنتخب بس عشان عايشين في ولاية كبيرة فمش بيتم إختيارهم مش لسبب غير إن كل ولاية ليها كوتة محددة و كل مندوب من كل ولاية في الإتحاد عايز يشوف ولايته بتاخد الكوتة بتاعتها حتي لو اللاعيب اللي جاي من ولايته أضعف بكتير من لاعيب تاني متاخدش المنتخب بس مش مشكلة .. المهم إن إبن منطقتي يروح المنتخب.
سنة 1978 بدأت الدنيا تتغير لما الإتحاد الألماني لكرة القدم جاب واحد إسمه (ديتريش فايس Dietrich Weise) عشان يمسك مسئولية منتخبات الناشئين .. (ديتريش فايس) مكنش لاعيب كورة كويس بس دماغه كانت توزن بلد .. معلش أنا ححكيلك موقف هو بره الأحداث شوية بس مهم تكون عارفه عشان تستوعب بس قد إيه دماغ الرجل ده شغاله .. فاكر لما قلتلك إن سنة 1974 ألمانيا الغربية خدت كأس العالم؟ .. وقتها (ديتريش فايس) كان مدير فني لفرقة محترمة أوي في الدوري الممتاز الألماني إسمها أينتراخت فرانكفورت و كان بيلعب معاه في الفرقة جناح يمين إسمه (بيرند هولزين-باين Bernd Holzenbein) و كان وقتها بيلعب في المنتخب .. منتخب ألمانيا الغربية وقتها كان ربنا كارمه بإتنين وينجات يمين بسم الله ما شاء الله يتحطوا في المتحف اللي هم (أولي هوينس Uli Hoeness) و (يورجين جراباوسكي Jurgen Grabowski) .. (ديتريش فايس) قبل ماتش النهائي قصاد هولندا رفع سماعة التليفون و كلم (بيرند هولزين-باين) بإن ليه لا في ماتش النهائي تلعب جناح شمال مش يمين؟ .. حاجة كده زي ما (أريين روبين Arjen Robben) بيلعب برجله الشمال بس بيلعب جناح يمين فيضم لجوه الملعب و يشوط واحدة R2 في الشبكة .. وقتها الفكرة دي كانت جديدة لانج و محدش فكر ينفذها .. (بيرند هولزين-باين) عمل كده فعلاً في ماتش النهائي و أكل عيش علي قفا مدافعين هولندا .. معلش طلعتك بره الموضوع بس يلا نرجع تاني .. (ديتريش فايس) أبو دماغ توزن بلد مسكوه مدير فني لمنتخبات الناشئين في ألمانيا.
(ديتريش فايس) خد ألمانيا كلها كعب داير .. لف البلد حتة حتة يتفرج علي ماتشات فرق الناشئين و مش معاه غير ورقة وقلم .. كل لاعيب يعجبه يعمله ملف يكتب فيه عيوبه و مميزاته و محتاج إيه عشان يتحسن .. هو فضل محتفظ بالملفات دي علي فكرة و الإتحاد الألماني لكرة القدم خدها و حطها في المتحف بتاعه في مدينة دورتموند .. في الوقت ده كان عنده مشكلة كبيرة و هي إن ماتشات الناشئين في ألمانيا بتتلعب كلها يوم الأحد الساعة 11 الصبح و لإن وقتها الماتشات دي مكنتش بتتذاع و مكنتش بتتسجل و مكنش فيه لا DVD ولا قناة BeIn Sports فهو كان محتاج ناس تساعده .. هو أقنع الإتحاد الألماني إنه يديله فريق من 4 مدربين فاهمين يعني إيه كرة قدم و يعني إيه لاعيب كرة قدم .. منهم مثلاً (كلاوس ألوفس Klaus Allofs) مهاجم فرقة محترمة أوي وقتها إسمها فورتونا دوسلدورف و كسب مع ألمانيا بطولة أمم أوروبا 1980 .. (ديتريش فايس) مكنش بيقولهم يحطوا عينهم علي لاعيب معين .. هو كان سايبهم يبصوا بعنيهم هم و يبلغوه رأيهم .. (ديتريش فايس) بدأ يشتغل سنة 1978 و خلال 3 سنين بس كان عمل شبكة رصد مواهب طلعتله شوية لاعيبه شباب يتاقلوا بالدهب.
سنة 1981 الفرقة اللي هو و فريقه إختاروها بنفسهم عشان تمثل منتخب ألمانيا الغربية تحت سن 18 سنة خدت بطولة أمم أوروبا و دي كانت أول بطولة دولية لمرحلة الناشئين تاخدها ألمانيا في تاريخها و مش بس كده هم في نص النهائي كسبوا منتخب فرنسا اللي وقتها كان عندهم أحسن منظومة ناشئين في العالم .. تفتكر نجاح (ديتريش فايس) حيقف لحد كده؟ .. في نفس السنة اللي هي 1981 فرقة تحت 20 سنة بتكسب بطولة كأس العالم في أستراليا .. الجيل ده اللي (ديتريش فايس) جمعه بنفسه و دربه و علمه يعني إيه كورة قدم كبروا و خدوا كأس العالم 1990.
إنت ممكن تكون حالياً بتقول لنفسك يا سلام علي الدماغ الألماني .. يا سلام علي الإبداع .. غالباً إنت بتضرب كف علي كف و بتتحسر علي حالنا .. بس إنت محتاج تفهم إن اللي عمله (ديتريش فايس) مسمّع معانا لحد دلوقتي .. اللي عمله (ديتريش فايس) زي ما حتشوف دلوقتي إنه أثبت إن الإستثمار في الناشئين و إنك تسعي و تدور و تتعب عشان تلاقي المواهب و هي لسه صغيرة و ترعاها و تكبرها حيخليك تقف علي رجلك لسنين و سنين .. تسمع عن واحد إسمه (مايكل زورك Michael Zorc)؟ ده يبقي المدير الرياضي لفرقة بروسيا دورتموند دلوقتي و ده كان من اللاعيبة الناشئة اللي (ديتريش فايس) إكتشفها بنفسه .. تسمع عن لاعيب إسمه (لوثر ماتياس Lothar Matthaus)؟ ده كان أخر لاعيب ألماني ياخد جايزة البالون دو أور و ده برده من الناشئين اللي (ديتريش فايس) إكتشفهم .. طب تسمع عن (يورجين كلينسمان Jurgen Klinsmann)؟ ده اللي مسك منتخب ألمانيا في 2006 و وصل بيهم نص النهائي و ده برده كان من إكتشافات (ديتريش فايس) .. لو إنت بقي من مشجعي بايرن ميونيخ فالمدير الفني السابق بتاعكوا (هانسي فليك Hansi Flick) هو كمان من إكتشافات (ديتريش فايس) .. إنت متخيل الجيل اللي الرجل ده طلعه بقي عامل إزاي؟ منهم إتنين مسكوا أكبر ناديين في ألمانيا كلها.
في 3 سنين بس (ديتريش فايس) حقق كل حاجة ممكن يعملها مع منتخبات الناشئين في ألمانيا و رغم كده برده محدش كان معتبر شغله مهم .. الرجل بقي عنده لكل منتخب ناشئين تشكيلتين مسميهم A1 و A2 لإن بقي عنده في كل فئة عمرية عدد لاعيبه ينفع تخش المنتخب أكتر من اللي قايمة المنتخب تقدر تضمه و برده مكنش كفاية بالنسبة للإتحاد الألماني لكرة القدم إن يعتبر شغل (ديتريش فايس) يستحق إنهم ياخدوه بجد .. سنة 1983 هو ساب منصبه في الإتحاد و راح يدرب فرقة كايزر سلاوترن و بعد كده رجع يدرب فرقة إينتراخت فرانكفورت .. سنة 1984 منتخب تحت 16 سنة اللي هو برده كان إشتغل عليه قبل ما يمشي من الإتحاد كسب بطولة أمم اوروبا .. من 1984 لحد سنة 1992 ومنتخبات الناشئين في ألمانيا مش عارفه تكسب ولا بطولة .. 13 سنة و محدش في الإتحاد سأل نفسه هو فيه إيه؟ .. ليه حنفية البطولات اللي كانت مفتوحة في منتخبات الناشئين وقفت؟ .. ده يوريك إن حتي شغل (ديتريش فايس) محدش كان بيبصله .. إيه ده إنت كسبت بطولة كأس العالم تحت 20 سنة؟ طب برافو يا حبيبي .. غير كده مفيش .. أخيراً سنة 1996 الإتحاد الألماني لكرة القدم بدأ يفوق.
سنة 1996 منتخب ألمانيا كان ماسكه واحد اسمه (بيرتي فوجتس Berti Vogts) و الرجل ده راح يصوت لرئيس الإتحاد الألماني لكرة القدم إنه مش لاقي لاعيبه يختارها للمنتخب .. بااااس أقف هنا بقي .. إنت مستوعب يعني إيه مدير فني منتخب ألمانيا مش لاقي لاعيبه؟ .. ماسورة المواهب المكسورة اللي كانت مغرقه منتخبات ألمانيا وقفت .. البلد مبقاش فيها لاعيبه كورة .. و شوف يا أخي رغم إن المشكلة دي هي هي اللي كانت بتواجههم سنة 1978 بس محدش جرب يرفع سماعة التليفون يسأل (ديتريش فايس) هو إنت حلتها إزاي؟ .. الأول (بيرتي فوجتس) إقترح إن الإتحاد يبعت مدير فني لكل إدارة محلية في الولايات الألمانية .. الفكرة إن المدير الفني ده المبعوت من الإتحاد يقيم مثلاً أداء فرق الكورة في ولاية زي بافاريا و يشوف مين اللاعيبه المميزة في الولاية و يعملهم برنامج تدريبي مستقل ليهم تابع للإتحاد .. الإقتراح ده إترفض من الولايات الألمانية اللي مش عايزه أي تدخل في شغلها من الإتحاد .. وسط حالة من الهبد و الفتي اللي مش بتخلص أخيراً رئيس الإتحاد الألماني لكرة القدم وقتها (إيجيدياس براون Egidius Braun) رفع سماعة التليفون و كلم (ديتريش فايس) .. الفكرة بمنتهي البساطة إن ألمانيا قدمت علي إنها تنول شرف تنظيم كأس العالم 2006 و علي حسب كلام (بيرتي فوجتس) فالمنتخب رايح في ستين داهية و عايزين حل للمصيبة دي بحيث لو فعلاً نلنا شرف تنظيم كأس العالم يبقي عندنا فرقة ينفع تنافس و الناس متاكلش وشنا.
سنة 1997 (ديتريش فايس) بدأ يشتغل و كان معاه المرة دي شاب صغير إسمه (أولف شوت Ulf Schott) كان لاعيب كورة و معاه بكالريوس تربية رياضية .. كلاكيت تاني مرة .. 9 شهور كاملة و الإتنين بيلفوا ألمانيا كلها كعب داير بس المرة دي فيه فرق جوهري .. (ديتريش فايس) مكنش عايز يكرر نفس غلطة المرة اللي فاتت .. هو كان عايز يحط System يفضل مكمل .. مكنة تفضل شغالة حتي لو هو مشي من منصبه فماسورة المواهب متقفش .. 9 شهور و هو بيتكلم مع كل الناس اللي ليها علاقة بقطاع الناشئين في ألمانيا كلها لحد ما في الأخر حط خطته اللي سماها Extended Talent Promotion Program أو البرنامج الشامل لتأهيل المواهب و اللي قدمها لرئيس الإتحاد الإلماني لكرة القدم (إيجيدياس براون) في مارس 1998 .. الخطة دي قايمة علي 3 حاجات بس:
- هو محتاج 115 مركز تدريب للناشئين يتوزعوا علي مستوي ألمانيا .. المراكز دي حتركز شغلها أوي علي اللي أعمارهم بين 13-17 سنة و مع الوقت ممكن تتحط ميزانية إضافية إنهم يهتموا بالناشئين اللي أعمارهم ما بين 11-13 سنة.
- محتاج أسطول من المدربين المؤهلين اللي واخدين شهادات معتمدة من الإتحاد الألماني لكرة القدم اللي حيتزوعوا علي مراكز الناشئين دي.
- كل أندية ألمانيا اللي بتلعب في الدوري الممتاز لازم يبقي ليها أكاديمية ناشئين و النادي اللي مينفذش ده يتشطب من مسابقة الدوري الممتاز.
أول سؤال إتسأله (ديتريش فايس) إنت محتاج ميزانية قد إيه؟ .. بمجرد ما قالهم 2.5 مليون مارك ألماني كان شوية و (إيجيدياس براون) حيرمي الخطة في وشه .. 2.5 مليون إيه اللي إنت جاي تقول عليه؟ .. نجيبلك منين الفلوس دي كلها؟ .. بعدين المنتخب لسه حيلعب كأس العالم في فرنسا كمان كام شهر إستني نشوف حيهببوا إيه و بعد كده نتكلم .. شوية و ألمانيا خرجت من دور ال8 بفضيحة علي إيد كرواتيا .. بعدها بأقل من شهر كان (بيرتي فوجتس) إتشال من منصبه كمدير فني للمنتخب و إتحط تحت إيد (ديتريش فايس) 5.2 مليون مارك ألماني كميزانية عشان يبني 121 مركز تدريب للناشئين علي مستوي ألمانيا .. التارجيت كان إن كل أسبوع فيه 4,000 ناشيء أعمارهم ما بين 13-17 سنة حيتمرنوا ساعتين علي إزاي يبقوا لاعيبه كرة قدم .. و فوق ده كله بوسه و إحنا أسفين يا (صلاح) و يطلع نائب رئيس الإتحاد و أسطورة الكرة الألمانية (فرانز بيكنباور Franz Beckenbauer) يقول إحنا كلنا في ظهرك يا (ديتريش فايس) .. بداية من موسم 2001-2002 الإتحاد الألماني لكرة القدم أجبر ال18 نادي اللي بيلعبوا في الدوري الممتاز يعملوا أكاديمية ناشئين بناء علي خطة (ديتريش فايس) و علي فكرة الكلام ده كان قبل كام شهر من بطولة أمم أوروبا 2000.
لحد دلوقتي ناس كتير جوه الإتحاد و اللي شغالين في مجال كرة القدم كانوا بيعتبروا أفكار (ديتريش فايس) دي هراء و فيه ناس بتعتبرها هبد .. و فيه ناس شايفاها أفكار كويسة بس مكلفة زيادة عن اللزوم .. ليه نادي زي فيردربريمن مثلاً يبقي مطالب إن جزء من فلوسه تروح في بناء أكاديمية ناشئين؟ و يطلع مين (ديتريش فايس) ده عشان يمشي كلمته علينا؟ .. الناس دي فضل صوتها يعلي و يعلي لحد ما جت بطولة أمم أوروبا 2000 خلتهم يحطوا جزمة قديمة في بقهم .. ألمانيا اللي دخلت البطولة كمصنف أول و خرجت من دور المجموعات .. مش بس كده .. هي خرجت كأخير و حصالة المجموعة .. مش بس كده .. هي خرجت بخسارتين و تعادل .. مش بس كده .. دخل فيها خمس جوان و مجابتش إلا جون يتيم .. مش بس كده .. كان معاها في المجموعة إنجلترا و البرتغال و رومانيا و اللي إتاهلوا كانوا البرتغال و رومانيا .. الناس كانت بتغلي خصوصاً إن في يوليو 2000 أُعلن إن ألمانيا نالت شرف تنظيم كأس العالم 2006 .. الألمان كانوا عايزين تغيير جذري لإن ده مش منظر فرقة حتنظم كأس عالم كمان 6 سنين بس يمكن عشان محدش بيهتم أوي باللي بيحصل في مرحلة الناشئين فمحدش في ألمانيا كلها كان عارف إن الشغل بدأ من بدري .. الشغل بدأ من 1998.
الأرقام لوحدها كانت مرعبة .. خلال أول سنتين بس من قرار إجبار أندية الدوري الممتاز الألماني لكرة القدم و دوري الدرجة الثانية كمان إنهم يعملوا أكاديميات ناشئين فإنت بتتكلم عن 36 نادي ألماني إستثمروا 114 مليون يورو في أكاديميات الناشئين بتاعتهم .. عدد مراكز الناشئين اللي إتعملت في كل حتة في ألمانيا زاد من 121 بقي 366 .. ميزانية المشروع نفسه نطت من 5.2 مليون مارك ألماني (حوالي مليون يورو) بقت 14 مليون يورو .. بتتكلم عن 600,000 لاعيب ناشيء علي مستوي ألمانيا بياخدوا تدريب محترف علي إيد 1,300 مدرب معاهم شهادات معتمدة من الإتحاد الألماني لكرة القدم .. و مش بس الأرقام .. كم المواهب اللي البرنامج إكتشفها مش طبيعي .. يعني هل تعلم إن لحد ما البرنامج ده بدأ يشتغل كان لسه محدش إكتشف (ميروسلاف كلوسه Miroslav Klose)؟ .. هو كان عنده 21 سنة و بيلعب في دوري الدرجة الخامسة عشان محدش من أندية ألمانيا الكبيرة فكر إنه يبعت كشافين مواهب للقري الصغيرة اللي علي الحدود بين ألمانيا و بولندا .. شعار البرنامج كان إن لو إنت موهبة القرن فإحنا حنلاقيك إياكش حتي تبقي مستخبي ورا الجاموسة.
لحد هنا إحنا محتاجين نسأل السؤال اللي كان المفروض يتسأل من بدري .. ليه إحنا منعملش زي الألمان؟ ليه ميبقاش عندنا برنامج زي اللي عمله (ديتريش فايس) و ساعتها نرجع تاني يبقي عندنا منتخب قوي زي منتخب الساجدين بتاع أمم أفريقيا 2006 و 2008 و 2010؟ .. الحقيقة إن الإجابة علي السؤال ده هي إن أندية كرة القدم في أي حتة في العالم عندها نفس المشكلة و هي إن كلها ماشية بمبدأ ما يولع المنتخب بجاز .. خد فرقة زي الأهلي أو الزمالك مثلاً .. هل تفتكر لو إنت مشجع زملكاوي أو أهلاوي لو فرقتك في الموسم ده كسبت الدوري و الكأس و بطولة أفريقيا حيفرق معاك كتير ال11 لاعيب اللي في الملعب الفرقة إشترتهم من بره ولا هم من أبناء النادي؟ .. فعلياً مش حيفرق معاك .. المهم الفرقة تكسب بطولات.
فكرة إن نادي عنده أكاديمية ناشئين قوية دي حلوة في بوستات السوشيال ميديا و حلوة في إنها لو إتعملت صح ممكن توفر علي النادي فلوس لإن بدل ما تشتري لاعيب جاهز و تدفع فيه دم قلبك فإنت ممكن يبقي عندك لاعيب ناشيء بنفس إمكانياته و بيلعب عندك في أكاديمية النادي و مش حيكلفك حاجة .. بس هي المشكلة دايماً في كلمة واحدة .. الصبر .. إنك تبقي نادي معتمد علي أكاديمية الناشئين فإنت محتاج تصبر علي اللاعيبه دي لحد ما عظمها ينشف .. الأندية الكبيرة زي الأهلي و الزمالك معندوهمش فكرة الصبر دي عكس نادي زي الإسماعيلي مثلاً .. فتاني .. إن نادي كبير يصرف علي شراء لاعيبه من بره هي صحيح مكلفة بس أسهل و أسرع من إني أصبر علي ولاد النادي اللي بربيهم .. علي رأي المثل الشعبي اللي بيقول شرا العبد ولا ربايته .. و ده يحطك قدام الإجابة بتاعة سؤال ليه مصر متعملش زي ألمانيا؟ .. لإن إستحالة الأندية المصرية تعمل زي الأندية الألمانية و مستحيل برده إتحاد الكرة في مصر يعمل زي إتحاد الكرة في ألمانيا .. مستحيل .. مش حيحصل .. أقسملك بالله حتي جماهير الأهلي و الزمالك مش حتوافق .. ليه؟ .. عشان ده معناه إن يحصل حاجتين:
أول حاجة .. لازم تتعمل رابطة الأندية المحترفة:
بسم الله الرحمن الرحيم إنت لازم تفرمط النظام بتاع إتحاد الكرة في مصر .. إتحاد الكرة مش حيبقي وراه غير 3 حاجات بس يعملهم .. يدير المنتخبات الوطنية .. يدير بطولة كأس مصر .. يختار الحكام اللي حتحكم ماتشات الدوري و الكأس .. طبعاً حتسألني طب و الإيجيبشن بريميير لييج؟ .. ده حضرتك حيبقي من إختصاص رابطة أندية كرة القدم اللي في ألمانيا بيسموها DFL .. ده معناه إن الإتحاد المصري لكرة القدم حيشيل إيده خالص من الدوري .. جدول الدوري حتحطه الرابطة اللي هم أندية الدوري الممتاز منهم فيهم .. أندية الدوري بيختاروا فريق مستقل و الفريق ده كلمته بتمشي علي الكل .. علي فكرة النظام ده متبع في ألمانيا .. النظام ده متبع في إنجلترا .. هل هو ينفع يشتغل في مصر؟ إبقي قابلني.
ثاني حاجة .. إتحاد الكرة يجبر الأندية تعمل أكاديميات ناشئين:
لحد سنة 2001 قطاع الناشئين في الأندية الألمانية كان بيحصل فيه العجب .. خد نادي زي بروسيا دورتموند مثلاً .. ناس كتير متعرفش إن النادي ده كان بيبعزق فلوسه علي صفقات شراء اللاعيبه ولا أجدعها نادي مملوك من شيوخ الخليج رغم إن النادي كان عنده أكاديمية ناشئين رائعة .. خلال الفترة من 1994-1998 يعني بتتكلم عن 4 سنين متتالية و فرقة بروسيا دورتموند تحت 19 سن بتاخد دوري الناشئين .. 4 سنين متتالية و ولا لاعيب من الفرقة دي بيتصعد للفرقة الأولي لحد ما جت سنة 2001 و القناة اللي ليها حق بث ماتشات الدوري الألماني أعلنت إفلاسها .. بداية من السنة دي و كل أندية ألمانيا تقريباً بإستثناء بايرن ميونيخ دخلت في أزمة مالية ما يعلم بيها إلا ربنا .. الأزمة دي خلت الأندية الألمانية ميبقاش قدامها حل غير إنها تعتمد علي الناشئين بتوعها لإن مفيش فلوس يشتروا لاعيبه من بره .. لما جت سنة 2002 و بناء علي البرنامج بتاع (ديتريش فايس) إن أي نادي بيلعب في الدوري الممتاز لازم يبقي له أكاديمية ناشئين فالأندية الألمانية مكنش عندها مشكلة أوي إنها تطبق القواعد دي .. هل الأندية المصرية كلها ينفع تطلب منها بكره الصبح إن عشان يلعبوا في الدوري الممتاز لازم يبقي عندهم أكاديمية ناشئين و تقولهم إن لازم يبقي فيه نسبة من اللاعيبه بتاعة الفرقة الأولي يكونوا متصعدين من الناشئين؟ .. برده إبقي قابلني.
سنة 2001 (ديتريش فايس) إعتزل بعد ما بقي عنده 67 سنة بس شغله كمل من بعده لحد ما ألمانيا خدت كأس العالم في 2014 .. فكرة إن رجل واحد ممكن يغير الواقع من الأفكار الرومانسية اللي خدناها من الأفلام بتاعة هوليوود .. إزاي رجل واحد ممكن يتحدي ناس أقوي منه و أكتر نفوذاً منه عشان يوصل للي هو عايزه .. تقدر تسميها فكرة الخير دايماً بينتصر .. في واقعنا دلوقتي الفكرة دي بقي يتضحك عليها .. ضغوط الحياة و الإحساس اللي وصلنا من سيطرة السوشيال ميديا علي حياتنا إن أهم قاعدة لازم تبقي في دماغنا إن السواد عدي و اللي جاي أسود .. الوضع الحالي مش حيتغير فمتحاولش تعافر عشان متتعبش علي الفاضي .. قصة النهاردة عن رجل رومانسي شوية صدّق اللي أفلام هوليوود بتقوله .. رجل صدّق إن ممكن نجاح أمة بالكامل يتبني علي كتاف شغل شوية بني أدمين يتعدوا علي الصوابع .. التغيير سواء في مصر أو ألمانيا أو المريخ صعب و حيتواجه بخناقة فهل إنت مؤمن بإن التغيير ضروري و مستعد تضحي بكل حاجة عشانه؟ علي فكرة مع الوقت الناس اللي كانت بتشتم فيك هي هي اللي حتقفلك في الشارع تسلم عليك و تقولك الله ينور.
المصادر:
- مقالة بعنوان How Germany Football Rose from the Ashes of 1998 to Become the Best in the World نشرت في جريدة The Guardian وده لينك المقالة الأصلية:
https://www.theguardian.com/football/2015/sep/05/germany-football-team-youth-development-to-world-cup-win-2014 - مقالة بعنوان How Germany’s Awful Euro 2000 Forced a Mass Restructure-and Why it Wouldn’t Work for England نشرت في موقع Four Four Two وده لينك المقالة الأصلية:
https://www.fourfourtwo.com/features/how-germanys-awful-euro-2000-forced-a-mass-restructure-and-why-it-wouldnt-work-england
