بعيد عن خناقات كرة القدم بين الأهلاوية و الزملكاوية و بوستات الشتيمة و التريقة كرة القدم بتدينا أحياناً حاجات تخلينا مستكنيصين إن إحنا إخترنا نتابع و نتفرج علي ماتشات الرياضة دي بالذات و من ضمن الحاجات دي حتة شيكولاتة بتدوب في بقك و انت بتتفرج عليها إسمها (أنسو فاتي Ansu Fati) .. قصة حياة الحليوة الأسمراني ده انا حلخصهالك في جملة واحدة .. و هو عنده 9 سنين كان فيه 3 أندية بتتخانق عليه و دلوقتي عنده 16 سنة و ماضي عقد مع برشلونة لحد 2022 و الشرط الجزائي في العقد ده 100 مليون يورو .. لو الجملة دي مخلتكش بتضرب كف علي كف من حكمة و تدابير ربنا يبقي انا معرفش انت فيك إيه غلط .. قصة حياة حتة الجاتوه ده بدأت في 2001 يعني قبل ما هو يتولد أساساً و خليني أحكيهالك بسرعة أوي عشان مطولش عليك.
سنة 2001 أبوه (بوري Bori) وصل إسبانيا كمهاجر من جمهوية غينيا بيساو و متشغلش بالك هي البلد دي مكانها فين في أفريقيا و لما وصل إسبانيا راح عاش في قرية صغيرة إسمها هيريرا يدوبك ساعة بالعربية من مدينة إشبيلية .. لما (أنسو) بقي عنده 7 سنين سافر هو و أخوه الأكبر منه بسنة و إسمه (برايما Braima) لأبوهم عشان يعيشوا معاه في إسبانيا .. طبعاً الأب كان طالع عينه في شغله يطلع من صباحية ربنا و ميرجعش إلا أخر اليوم .. (أنسو) كل ما يشوفه يقوله يا بابا انا عايز أروح ألعب كورة .. من كتر زنه أبوه قاله خلاص حوديك الصبح الملاعب الحكومية اللي الحكومة عاملاها و مامتك تبقي تيجي تاخدك .. كام يوم يعدوا و أبوه راجع من شغله لقي ناس كتير مستنياه عند باب البيت .. فيه إيه يا جدعان .. هو انت مشتفتش إبنك و هو بيلعب كورة قبل كده .. قالهم لا .. قالوله لا بقي ده انت فايتك كتير انت تيجي بكره تتفرج عليه.
تاني يوم أبوه راح يتفرج عليه لقاه بيلعب لوحده ضد فرقة كاملة عمال يرقص فيهم .. معداش كتير و كان (بابلو بلانكو Pablo Blanco) اللي ماسك نشاط أكاديمية الناشئين في نادي أشبيلية بيخبط علي الباب عشان عايز ياخد (أنسو) و أخوه (برايما) لأكاديمية النادي .. في ديسمبر 2009 كان (أنسو ) بيلعب في فرقة صغيرة إسمها إيسكويلا بيلوتيروس دي هيريرا و فكك من إسمها بس اللي حيهمك إنه كسب معاهم بطولة دوري إسبانيا تحت سن 8 سنين .. كل Weekend بيروح نادي إشبيلية يتمرن هناك علي أساس إن النادي خلاص بيحضره إنه يبقي معاهم بمجرد ما سنه يكبر شوية عشان يخش أكاديمية إشبيلية.
إشبيلية نادي بيحاول إنه لما يلاقي لاعيب جوهرة مدفونة إنه يحوط عليها و يخبيها عن عيون برشلونة و ريال مدريد بس في حالة (أنسو) الموضوع كان مستحيل .. الناديين شموا خبر و بعتوا ناس تتكلم مع أبوه و هو قعد يسمع .. (باكو دي جراسيا Paco de Gracia) اللي ماسك أكاديمية ريال مدريد عرض علي أبوه إنهم يدوله بيت في مدريد و مرتب شهري عشان يوافق إن إبنه يروح أكاديمية النادي .. بس كانت فيه حاجة شاغله دماغ أبو (أنسو) و إدارة الريال معرفتش تحققهاله .. هو الواد الصغير حيروح مدرسته إزاي؟ و مين حيوديه و يجيبه؟ .. الحل الوحيد إن أكاديمية النادي يبقي فيها مبيت للاعبين الصغيرين في السن يباتوا فيه بحيث الصبح في المدرسة يخلصوها و يروحوا علي أكاديمية النادي يتمرنوا و يطلعوا يناموا .. لحد ما ريال مدريد كان بيتفاوض مع أبو (أنسو) مكانوش لسه عملوا مبيت في أكاديمية الناشئين .. دي الحاجة اللي (ألبيرت بويج Albert Puig) اللي ماسك أكاديمية لا ماسيا بتاعة نادي برشلونة قدر يعرضها علي أبو (أنسو) .. لإن أخو (أنسو) كان بقي عنده 10 سنين فهو راح لا ماسيا بس (أنسو) فضل مستني سنة كاملة و خلال السنة دي نادي إشبيلية رفض إنه يخليه يلعب معاهم ولا يتعلم عندهم بعد ما عرفوا إن أبوه مضي عقد مع برشلونة.
بعدها بسنة كان (أنسو) و أخوه (برايما) و أمهم بقوا عايشين في برشلونة .. جوه لاماسيا بقي (أنسو) كان عامل للناس صداع من كتر العظمة .. كان بيلعب هو و لاعيب تاني جاي من اليابان إسمه (تاكي كوبو Take Kubo) مع بعض و كانوا ثنائي محدش عارف يقف قصادهم .. في موسم واحد بس (أنسو) جاب 56 جون و (تاكي كوبو) جاب 73 جون .. أحب بس أقولك إن (تاكي كوبو) ساب برشلونة و راح ريال مدريد و من هناك راح إعارة لمايوركا .. خد التقيلة بقي .. عارف مين وكيل أعمال (أنسو) دلوقتي؟ .. (رودريجو Rodrigo) أخو (ليونيل ميسي Lionel Messi).
لسه الواد بيقول هييييييه لقي نفسه في خناقة كبيرة أوي بين الإتحاد الإسباني لكرة القدم و بين نادي برشلونة .. دلوقتي هو مقدم علي طلب إنه ياخد باسبور إسباني و متوقع إن طلبه يتوافق عليه و الإتحاد الإسباني عايز ياخده مع بعثة منتخب تحت سن 17 اللي حتلعب في كأس العالم في البرازيل و اللي حيتلعب يوم 26 أكتوبر الجاي لحد 17 نوفمبر اللي جاي .. حلو .. المشكلة إن يوم 27 أكتوبر حيتلعب ماتش الكلاسيكو و المدير الفني لبرشلونة (إيرنستو فالفيردي Ernesto Valverde) عايزه يبقي معاه بس غالباً كلمة برشلونة حتمشي علي كلمة الإتحاد الإسباني.
المصدر:
مقالة بعنوان The $100m 16 Year-Old History Maker: Ansu Fati Had Three Clubs Fighting For Him Aged 9 and Real Madrid Offered to Buy Him a House .. نشرت في جريدة The Daily Mail و ده لينك المقالة الأصلية:
https://www.dailymail.co.uk/sport/football/article-7469253/The-16-year-old-break-Lionel-Messis-records-Ansu-Fati-Barcelonas-newest-superstar.html
