بيعجبني أوي صاحب الشغل اللي بيفضل يدور لحد ما يلاقي حد يخلصله الشغل و يكون معلم و برنس في نفسه .. فكرة إنك تلاقي موظف كويس دي و تحط عينك عليه و تجيبه يشتغل عندك مش سهلة بس نادي زي أرسنال عنده جوهرة شغالة عنده إسمه (راؤول سنيلهي Raul Sanllehi) و ده اللي تقدر تقول كده ماسك نشاط الكورة في النادي .. الرجل ده أول ما مسك شغله إتقاله إن يمكن أحرف لاعيب في الفرقة (أرون رامزي Aaron Ramsey) ماشي ببلاش رايح يوفينتوس .. لسه حيقول بسيطة تتعوض إن شاء الله إتقاله إن عشان الفرقه متاهلتش لبطولة Champions League السنة دي فهم معندهمش غير 45 مليون جنيه إسترليني يصرفوهم علي اللاعيبه الجديدة .. إسأل أي حد من اللي بيشجع أرسنال و كنت حتحس كمية طاقة سلبية تجيب إكتئاب لأي حد بس بص شوف الرجل ده عمل إيه .. جاب (نيكولاس بيبي Nicolas Pepe) و (وليام صليبة William Saliba) و فوقهم جاب خط نص ريال مدريد (داني سيبالوس Danny Ceballos) إعارة .. لسه الناس اللي بتحب أرسنال حتقول هيييييييييييييه قام قايلهم أستنوا أستنوا خدوا دي كمان .. في الDeadline Day يعني أخر يوم في الميركاتو جاب إتنين مدافعين اللي هم (كيرين تيريني Kieren Tierney) من سيلتك الأسكتلندي و (ديفيد لويز David Luiz) من تشيلسي .. لسه الناس حتقول تسلم إيدك يا أستاذ (راؤول ) قام قايلهم أستنوا أستنوا ده انا خلص من اللورد (اليكس ايوبي Alex Iwobi) ب 35 مليون جنيه إسترليني .. مستر (راؤول سنيلهي) انت برنس .. (إيد وودوارد Ed Woodward) انت فاشل .. يا فاشل يا فاشل .. يا فاااااااااااااشل.
لو انت بتشجع مانشستر يونايتد فقلبي معاك يا أخويا والله .. أنتوا ربنا إبتلاكوا بمصيبة إسمها (إيد وودوارد) .. مشكلتي معاه إنه عامل زي رجل إتقاله عشان تصالح مراتك نظفلها الشقة و هي مش موجودة فحتيجي تشوف الشقة نظيفة تنبهر بيك .. البيه و هو بيغسل المواعين خربش الحلل التيفال و قطع المخدات الفايبر و هو بيحطلها الغطيان بتاعتها و قطع سلك المكنسة الكهرباء و هو بيكنس الصالة .. لما جت الهانم عايزها تبقي برده مبسوطة أصل الشقة إتنظفت بغض النظر عن المصايب اللي هو عملها .. الحقيقة إن كم المصايب اللي (إيد وودوارد) عملها في الكام أسبوع اللي فاتوا بصراحة يخلوا لجنة الإنتقالات في النادي الأهلي يبانوا بيفهموا .. خليك معايا واحدة واحدة أفهمك انا قصدي إيه عشان انا مرارتي مفقوعة منه.
لما فرقة مانشستر يونايتد كانت لسه في فترة الإعداد و علي عكس العادة يعني (إيد وودوارد) مراحش معاهم .. الناس لما عرفت كده قالت لنفسها بااااااس الرجل بيحضر لكام صفقة سوبر حيخلوا أوروبا كلها تنام من المغرب .. اللي إحنا مكناش نعرفه إن (روميلو لوكاكو Romelu Lukaku) اللي يعتبر المهاجم الأساسي للفرقة كان عايز يمشي من النادي لدرجة إن وكيل أعماله (فيديريكو باستوريللو Federico Pastorello) كان كل يوم يستني (إيد وودوارد) عشان يقابله عشان يتفاوض معاه علي إزاي اللاعيب يمشي و أنهي نادي ياخده و بكام و البيه مكنش راضي يقابله .. (لوكاكو) كان بيحس إن الوقت بيجري و محدش في مانشستر عايز يسمعه لدرجة إنه دخل في إضراب عن التدريب و بطل يحضر إجتماعات الفرقة .. يا راجل ده سرب نتيجة إختبار الإسبرينتات بتاعة اللاعيبة و كأنوا بيقول لإدارة النادي أطردوني يا جدعان انا مخرب و متمرد و إبن ستين تيييت .. مشوني انا عايزكوا تمشوني .. و رغم كل ده (إيد وودوار) سابه متعلق لحد أخر يوم في الميركاتو .. طب بلاش (لوكاكو) .. ده لاعيب مش ملتزم و مش محترم كمان و (إيد وودو) حب يعلمه درس .. خدامك انا و العربية .. طب (كريستيان أريكسون Christian Erikson)؟ .. ده لاعيب فرقة مانشستر يونايتد محتاجاه جداً .. لاعيب طلع قال إنه مستعد يضغط علي النادي بتاعه عشان يوافقوا يبيعوه .. لاعيب موافق يروح مانشستر يونايتد .. و رغم كل ده لا حس ولا خبر .. ولا حد رفع سماعة التليفون إتصل بإدارة توتنهام يقولهم بكام لدرجة إن (أريكسون) ذات نفسه صرف نظر و حس وفق كلامه اللي هو قاله بعظمة لسانه إن إدارة مانشستر يونايتد معندهاش طموح و مش جد في إنها تشتريه.
اللي انا عايز أفهمولك النهاردة هو إني أخدك من إيدك أوريك إزاي الواسطة ممكن تخرب بيت أي حد حتي نادي كبير زي مانشستر يونايتد .. إزاي الواسطة ممكن تحط 850 مليون جنيه إسترليني في إيد رجل عنده 47 سنة بعزقهم كلهم في 5 سنين علي صفقات ملهاش أي معني لبست النادي في الحيط .. فشارك و إزازة البيبسي بتاعتك و إتسلي معايا:
(إيد وودوارد) ده إتولد و في بقه معلقة دهب .. هو من عيلة غنية صرفت كتير علي تعليمه .. دخل مدرسة خاصة داخلي إسمها مدرسه برينتوود Brentwood School في حتة إسمها ايسيكس Essex .. معاه بكاليريوس في الفيزياء من جامعة بريستول .. و مع إن معاه شهادة بكالريوس في الفيزياء إلا إن عشان دادي و مامي ناس مهمين فهو إتعين في شركة إسمها Pricewaterhouse Coopers لقوانين الضرايب .. إيه اللي جاب الفيزياء للضرايب متفهمش .. شغله خلاه يعمل علاقات كتير و من ضمن العلاقات دي إتعرف علي عيلة غنية أوي في أميركا إسمها (جلايزر Glazer) و هو كان السمسار اللي إشتغل علي صفقة شراءهم لنادي مانشستر يونايتد مع بنك JP Morgan الأميريكي.
الحقيقة إن الرجل شاطر في الفلوس و ده اللي خلي عيلة (جلايزر) تقرر تعينه الكل في الكل في النادي .. في الأول كانت شغلته إنه إزاي يجيب فلوس للنادي .. شوية و لقوا إن شغلانة يجيب فلوس للنادي دي لازم تبقي مربوطة بصلاحيات بيع و شراء اللاعيبه و عشان كده قرروا إنهم يمشوا (ديفيد جيل David Gill) المحاسب اللي كان ممشي حسابات النادي زي السكينة في الجاتوه و حطوا مكانه (إيد وودوارد) .. الكلام كام إننا جايبين شاب من جيل Social Media حيقلب الطرابيزة علي الكل .. أصل الشاب الفانكي ده خلانا نشتري أكبر نادي في العالم مع إننا مكنش معانا فلوس تكفي فأكيد يعني حيخلينا نعرف نشتري أحسن لاعيبه في العالم بنص الثمن .. و ده يوريك إزاي انت ممكن تبقي معاك فلوس بس حمار .
اللي (إيد وودوارد) مكنش عامل حسابه إن بيع و شراء اللاعيبه ده بيزنس له ناس بتفهم فيه .. ده مش صفقة شراء شركه بيحكمها ورق بجداول و أرقام و حسابات .. انت بتتعامل مع بني أدمين .. بتتعامل مع وكلاء لاعيبين .. بتتعامل مع شركات رعاية .. تفاوض و مناهدة ممكن يستمروا بالأسابيع .. لاعيب يصحي الصبح يقولك انا بيس جاي .. بعد الظهر يتخانق هو و مراته و هوبا يغير رأيه و يقولك لا مش جاي .. لاعيب يتفق معاك علي سعر المرتب و فجأة يجيله Offer تاني بمرتب أعلي فيفكسلك خالص .. بيزنس تاني مختلف خالص فحد زي (إيد وودوارد) ولا المساعد بتاعه (مات جادج Matt Judge) يعرفوا عنه حاجة و هم أساساً دي مش طريقة شغلهم اللي إتعلموها في شغل البنوك.
عشان أفهمك بس حجم الإختلاف تعالي ناخدك جوه تفاصيل صفقة زي بتاعة (هاري ماجواير Harry Maguire) .. ده لاعيب بيلعب في ليستر سيتي .. حلو .. مساعد المدير الفني بتاعك اللي هو (مايك فيلان Mike Phelan) يعرفه كويس أوي .. حلو أوي .. كان ممكن تخلي (مايك فيلان) يتكلم مع (هاري ماجواير) و يقوله إحنا عايزينك بس ليستر سيتي طالب فيك مبلغ عالي أوي فلو ينفع تتكلم مع إدارة النادي بتاعك تخليهم يزحزحوا المبلغ ده شوية .. (هاري ماجواير) حيتكلم مع إدارة ليستر سيتي اللي ممكن في أول مرة ميوافقوش بس بعد تاني أو تالت مرة يوافقوا بس ينزلوا السعر حبة صغيرين .. ساعتها إدارة مانشستر يونايتد تتكلم معاهم .. مفاوضات و مناهدة و تروح و تيجي و إجتماعات .. هو بيزنس شراء اللاعيبه كده .. (إيد وودوارد) بقي عمل إيه؟ .. إتصل بإدارة ليستر سيتي عايزين كام في (هاري ماجواير)؟ قالوله 80 مليون جنيه إسترليني .. قالهم تمام الفلوس حتتحولكوا علي حسابكوا في البنك .. بني أدم جميل الصراحة مبيحبش الفصال.
لما صفقة بتعصلج أوي مع (إيد وودوارد) مش بيرفع سماعة التليفون و يفضل يتفاوض و يتناهد و يتحايل .. لا هو مش بتاع فصال .. هو بيكلم أكتر إتنين بيفاصلوا بالنيابة عنه .. (جورجي مينديز Jorge Mendes) و (مينو رايولا Mino Raiola) .. أيوه زي ما سمعت .. هو بيرفع سماعة التليفون يقول لوكيل أعمال لاعيب إتفاوضلي انت بالنيابة عني عشان مبحبش الفصال .. الأسلوب ده بيخلي مثلاً صفقة كان المفروض تمشي زي السكينة في الحلاوة زي إنتقال المدافع (شون لونجستاف Sean Longstaff) من نيوكاسل يونايتد اللي كان (إيد وودوارد) حيدفع فيه 20 مليون بس إلا إن تدخل وكلاء اللاعبين خلي الصفقة تفشل و الموسم الجاي (إيد وودوارد) حيضطر يدفع فيه 70 مليون لو حب يشتريه .. مشكلة (إيد وودوارد) إنه بني أدم مبيعرفش يتعامل مع بني أدمين زيه .. هو مبيعرفش يتكلم مع المدير الفني للفرقة (أولي جونار سولشاير Ole Gunnar Solskjaer) و يتناقش معاه في مشاكل الفرقة .. مبيعرفش يتكلم مع لاعيب عاطفي زي (بول بوجبا Paul Pogba) اللي من نوعية البني أدمين اللي ممكن كلمة توديه و تجيبه .. بسبب إنه مبيعرفش يتكلم مع الناس فمنظومة الصفقات في مانشستر يونايتد خربانة و رايحة في ستين داهية .. اللينك بين الإدارة متمثلة في (إيد وودوارد) و بين المدير الفني للفرقة (سولشاير) و أكاديمية الناشئين تقريباً مقطوعة و ده خالق مشاكل لا حصر لها.
إتقال كلام جوه النادي إن لازم مانشستر يونايتد يرجع تاني للأساسات اللي حطها السير (أليكس فيرجسون Alex Ferguson) و إن التسيب اللي بيحصل في النادي ده مينفعش .. طبعاً الناس قصدها إن العك و الهبد اللي بيعمله (إيد وودوار) ده مودي النادي في داهية .. بس طبعاً عشان الغباء عامل زي الموت كده اللي هو الناس كلها شايفه الميت و بتصوت عليه و بتعيط بس هو مش معانا و مش حاسس بكل اللي بيحصل .. الغبي برده كده .. الناس كلها بتفضل تقول عليه يا غبي قدامه و هو بيبقي سامع شتيمته بودانه بس بيتخيل إنها شتيمه حد تاني .. (إيد وودوار) راح قال قصاد الناس كلها إنه بيتفاوض مع (دارين فليتشر Darren Fletcher) واحد من اللاعيبه الأساسية أيام ما كان (فيرجسون) بيدرب مانشستر عشان يمسك منصب إداري جوه النادي .. طبعاً هو لا حيعينه ولا حاجة .. هو تخيل إنه لما يطلع يقول كده الناس حتهدي .. تعدي الشهور و محدش في النادي رفع سماعة التليفون يكلم (دارين فليتشر) يديله Offer .. بس اللي البهيم مكنش يعرفه إن الإعلان بتاعه ده خلق حرب أهلية جوه أكاديمية النادي .. وقت ما إتقال إن (إيد وودوار) قعد مع (دارين فليتشر) كانت إدارة النادي جابت واحد إسمه (نيك كوكس Nick Cox) عشان يمسك أكاديمية الناشئين بدل (نيكي بات Nicky Butt) اللي عينوه مسئول عن تطوير الفريق الأول .. الإتنين بصوا لبعض و قالوا لنفسهم إن أكيد حد فينا حيطير عشان يجي (دارين فليتشر) يمسك مكانه .. و مع إن الإتنين صحاب بس المشاكل و الخناق بينهم زاد أوي و دي أخر حاجة انت عايزها تحصل جوه النادي إن إتنين ماسكين مناصب كبيرة يسيبوا شغلهم و يمسكوا في خناق بعض و يخزوقوا بعض.
اللي انا حابب أختم به و أؤكد عليه كمان مرة حاجتين:
- إن (إيد وودوارد) مبيعرفش يتكلم مع بني أدمين .. هو اللي بيعرف يعمله كويس إنه يدخل فلوس للنادي و ده مخليه محبوب أوي وسط المحاسبين و الناس بتوع الMarketing بس الناس اللي شغلتها كورة القدم في النادي مش طايقينه .. مشاكل تافهة كانت ممكن تتحل بكلمتين حلوين بتقلب مصايب .. أوتوبيس الفرقة اللاعيبه مش عاجبها عشان شايفينه مش سيكسي زي أوتوبيسات الفرق الكبيرة في إنجلترا .. عادي غيره .. كم الإعلانات اللي اللاعيبه مضطرين يعملوها عشان يدخلوا فلوس للنادي بقي كتير بشكل مستفز لدرجة إن اللاعيبه نفسها إعترضت و الموضوع متحلش إلا لما إتعمل إجتماع بين (إيد وودوارد) مع كابتن الفرقة (أشلي يونج Ashley Young).
- إن (إيد وودوارد) بني أدم غبي و مش مقتنع إنه غبي .. انت قلت إنك جاي عشان تعمل فريق أساطير و صرفت دم قلبك علي لاعيبه ليها أساميها زي (أنخل دي ماريا Angel di Maria) و (راداميل فالكاو Radamel Falcao) و (باستيان شفاينشتايجر Bastian Schweinsteiger) و بعد ما خطتك فرقعت في وشك قررت تدوس فيها تاني و دفعت 89.3 مليون جنيه إسترليني عشان تجيب (بول بوجبا Paul Pogba) .. اللي غايظني إنه بعد ما إشتري (دي ماريا) قال في إجتماع مع المستثمرين اللي حاطين فلوسهم في النادي إن عدد السيرش علي Google لإسم (دي ماريا) زاد 12 ضعف و ده معناه إن القيمة السوقية للنادي زادت .. انت متخيل دماغ الرجل ده رايحة فين؟ .. هو مش هامه اللاعيب حيضيف إيه للفرقة في الملعب .. هو هامه اللاعيب ده حيدخل فلوس قد إيه للنادي.
انت صحيح جبت جناح موهوب زي (دانييل جيمس Daniel James) و مدافعين ليهم أساميهم زي (أرون وان-بيساكا Aaron Wan-Bissaka) و (هاري ماجواير) .. بس انت دافع 80 مليون جنيه إسترليني ملهاش أي معني في (هاري ماجواي) و سبت (روميلو لوكاكو) و (أندير هيريرا Ander Herrera) يمشوا و مجبتش بدالهم أي حد .. يعني انت دافع 180 مليون جنيه إسترليني و برده بقي عندك فرقة أضعف من الفرقة اللي كانت عندك الموسم اللي فات .. قد أكون كنت قاسي شوية علي (إيد وودوارد) بس يمكن مع أخر الموسم ده نشوف هل انا عندي حق أو لا؟
المصدر:
مقالة بعنوان United’s Behind the Scenes Disarray: Maguire Heard Nothing from Ed Woodward for Weeks before Signing, Erikson Felt the Club Lacked Ambition, Nicky Butt is Annoyed by Reshuffle and Players are Unhappy with the New Bus .. نشرت في جريدة The Daily Mail و ده لينك المقالة الأصلية:
https://www.dailymail.co.uk/sport/football/article-7335043/Its-transfer-window-chaos-free-spending-Man-United-Ed-Woodward-remains-bulletproof.html
