برشلونة و ميسي .. لعبة الحسابات الغلط.

لينك التسجيل الصوتي للمقالة علي Sound Cloud:
https://soundcloud.com/user-112011687-312727988/3go9fx5bo0pn

و انت بتحاول تفهم أزمة (ليونيل ميسي Lionel Messi) مع نادي برشلونة دلوقتي أكتر حاجة حتساعدك تلم الدنيا إنك تبقي عارف من دلوقتي إن اللي بيحصل ده محصلش قبل كده .. ده تقدر تقول عليه سؤال من بره المنهج فانت متقدرش تقول إن فيه سابقة تاريخية للأزمة دي .. ده موقف جديد لانج بالنسبة لينا كناس بتتفرج علي الخناقة من بعيد و موقف جديد كمان للأطراف اللي جوه الخناقة .. ده معناه إن زي ما حتشوف دلوقتي فيه هبد كتير حصل .. فيه قرارات كتير إتاخدت دلوقتي بنقول عليها مش منطقية بس صدقني لو قلتلك إن اللي خد القرار ده وقتها مكنش متخيل إنه بيهبد .. النقطة دي لازم تبقي واضحة من الأول .. النقطة الثانية اللي مهم برده تبقي واضحة إن بما إن ربنا لوحده اللي عالم بالنوايا فإحنا منقدرش نعرف هو (ميسي) أو غير (ميسي) كانت نيته إيه و بالتالي إحنا بصفتنا ناس كل اللي هي عايزاه إنها تفهم اللي بيحصل فكل اللي نقدر نعمله إننا نحط إحتمالات و ده اللي انا حعمله النهاردة .. انا حبني المقالة دي كلها علي إحتمالين كل إحتمال بنية مختلفة إحتمال (ميسي) يكون كان ناويها في قلبه لما الأزمة دي كلها حصلت .. أنهي إحتمال أو نية فيهم اللي صح؟ .. الله أعلم .. زي ما قلتلك المقالة دي معمولة عشان حاجة واحدة بس و هي محاولة إننا نفهم.

الإحتمال الأولاني .. (ميسي) كان ناوي يمشي من بدري:

ناس كتير متعرفش إن العقد بتاع (ميسي) فيه فقرة بتقول إن في السنة القبل الأخيرة من عقده .. اللي هي السنة دي ..  فهو فعلياً بداية من شهر يونيو اللي فات يقدر يبلغ إدارة النادي إنه عايز يمشي .. عشان تبقي فاهم بس تخيل نفسك شغال في شركة و عايز تمشي فانت العقد اللي انت ماضيه بيقول إنك لازم تبلغ الشركة إنك ماشي قبل شهر من المعاد اللي حتمشي فيه .. جميل .. في الإنترفيو اللي (ميسي) عمله مع موقع Goal.com عشان يشرح وجهة نظره قال نصاً إنه إتكلم مع إدارة النادي من شهر يونيو اللي فات إنه عايز يمشي .. لكن .. خلي بالك بقي من الحتة دي .. هو مطلبش بطريقة رسمية .. عشان أشرحهالك أكتر تخيل إنك رحت لمدير الشركة بتاعتك قلتله إنك ماشي شفهياً كده بالكلام يعني بس مبعتش Email رسمي و محطتش مديرك المباشر في CC .. في الإنترفيو بتاع (ميسي) هو قال إنه قعد مع رئيس النادي (جوزيه ماريا بارتيميو Jose Maria Bartomeu) يوم 10 يونيو 2020 و في الإجتماع ده رئيس النادي قاله إن مفيش مشكلة خالص بس خلينا نأجل الكلام ده لحد أخر السيزون و لازم تمشي من الباب الكبير و انت إبن النادي و عمر ما النادي حيقف في طريق مستقبلك و كل الكلام الحمضان اللي بنسمعه من مديري الشركات ده .. عشان كده دلوقتي (ميسي) بيقول إن إدارة النادي خانته .. عشان كده هو بيقول إن إتقاله انت حتمشي أخر السيزون و الإدارة رجعت في كلامها.

حفهمك (ميسي) حسبها إزاي .. دلوقتي الرجل ده مرتبه في السنة صافي 50 مليون يورو .. يعني الرجل ده بضرائبه بسلطاته بباغنوجه واقف علي ميزانية برشلونة كل سنة بحوالي 100 مليون يورو .. لو (ميسي) إتباع فمش بس إدارة النادي حتشيل من علي دماغها حمل ال100 مليون دول لا دول كمان حياخدوا زيهم و يمكن أكتر كثمن لبيعه .. من وجهة نظر (ميسي) فأكيد إدارة النادي حتسمع الكلام ده و تقول يا بلاش .. 200 مليون يورو في لاعيب عدي 32 سنة خصوصاً إن أخر حسابات النادي بتقول إن النادي عنده عجز 150 مليون يورو بسبب الخساير اللي إتعرضلها من فيروس كورونا فيبقي مين الأهبل اللي ممكن يرفض فرصة زي دي؟

اللي الباشمهندس معملش حسابه هو إن السنة دي معاد تجديد عقد الرعاية بين برشلونة و شركتي Rakuten و Beko أهم شركتين بيدفعوا فلوس للنادي بعد شركة Nike .. تقريباً الكلام اللي إتقال إن لو (ميسي) مشي من النادي فالشركتين هم كمان حيمشوا و مش حيجددوا عقد الرعاية .. ده السبب اللي خلي (بارتيميو) يرجع في كلامه .. مش لإن (ميسي) لاعيب فشيخ .. مش لإنه لعب للنادي 763 ماتش جاب فيهم 645 جون و كسب 10 ألقاب دوري اسباني و 4 بطولات Champions League .. لا .. عشان البيه بيجيب فلوس للنادي .. بسببه النادي بيخشله 60 مليون دولار إعلانات .. بسببه تي شيرتات النادي بتتباع .. بسببه فيه شركات عايزه تمضي عقود رعاية .. (ميسي) لو حتبصلها من وجهة نظر الفلوس هو الكينج اللي من غيره المولد ده كله حيتفض.

فيه ناس ممكن لما تبص لكلامي ده و تسأل السؤال المنطقي .. ليه؟ .. مش ليه (ميسي) يمشي .. لا مش هو ده السؤال .. السؤال ليه (ميسي) ميمشيهاش رسمي و يبعت Email و يبلغ الناس كلها إنه ماشي من يونيو اللي فات؟ .. إجابة السؤال ده فعلياً هي عشان ربنا ستر .. تخيل للحظة إن (ميسي) عمل كده فعلاً و بلغ الناس كلها إنه ماشي من شهر يونيو اللي فات و هوبا برشلونة إتداس علي وشهم بالثمانية من بايرن ميونيخ .. تفتكر ساعتها الإعلام حيقول إيه؟ .. أكيد حيسلخوه و هو حي .. أكيد حيتقال إن (ميسي) هو اللي بوظ الفريق .. ساعتها مش حيتقال إن النادي معملش الصفقات الصح أو إن الفرقة مفيهاش بديل علي الدكة يقدر ينزل و يغير الملعب .. مش ده اللي حيتقال علي فكرة .. اللي حيتقال إن (ميسي) هو المسئول عن كل حاجة غلط .. علي الناحية الثانية غالباً (ميسي) حسبها في دماغه إن من مصلحة الإدارة إنها تسيبه يمشي أهو يسترزقوا بالقرشين اللي حيجوا من بيعه.

الإحتمال الثاني .. (ميسي) مكنش ناوي يمشي أصلاً و كل اللي كان عايزه إنه يلوي دراع الإدارة:

الرأي ده معتمد علي شرخ ممكن ناس كتير متكونش خدت بالها منه في التبرير اللي ذكره (ميسي) عن هو ليه عايز يمشي .. كلنا عارفين (ميسي) عايز يمشي ليه؟ .. هو عايز يمشي عشان يكسب بطولة Champions League مرة كمان قبل ما يبطل كورة و فرقة برشلونة بوضعها الحالي مش مؤهلة غير إنها تاخد علي قفاها بس من الفرق الكبيرة في أوروبا في مرحلة خروج المغلوب .. ده معناه إن (ميسي) لازم يدور علي الفرق اللي هو شايفها مؤهلة إنها تكسب البطولة لما يروحلها .. حلو أوي الكلام ده .. مين أكتر فرقة إتقال إن (ميسي) حيروحلها؟ .. مانشستر سيتي .. طب هل تعلم سيدي القاريء إن لحد يوم 10 يونيو الموعود ده مكنش لسه مانشستر سيتي عارفين هم حيلعبوا في بطولة Champions League السنة الجاية أو لا لإنهم كانوا مستنيين قرار محكمة الإستئناف بتاع حرمانهم من اللعب في البطولة لمده موسمين؟ .. طب إفرض كان (ميسي) قال لإدارة برشلونة عايز أروح مانشستر سيتي و قالوله و ماله يا روح قلبي روح و هوبا طلع قرار محكمة الإستئناف بتثبيت العقوبة علي مانشستر سيتي؟ .. ساعتها (ميسي) حيكون لبس أحلي خازوق في حياته .. و لإن (ميسي) و الناس اللي حوليه أكيد هم أذكي من كده يبقي هو من الأول خالص مكنش ناوي يمشي .. هو كان عايز (بارتيميو) هو اللي يمشي.

في المواقف اللي زي دي انت بتحتاج إنك تسأل نفسك سؤالين: هو إزاي كل المصايب دي كلها حصلت؟ .. و ياتري المستقبل مخبي إيه؟ .. السؤال الأولاني دايماً بيروح غصب عننا لسكة إننا نشاور علي حد و نقوله انت اللي أكلت الجبنة .. هي دي طبيعتنا كبشر لازم نعلق مشاكلنا علي شماعة حد عشان نحس من جوانا إننا معملناش حاجة غلط .. عشان كده في محاولتي إني أجاوب علي السؤال الأولاني مش عايز أبقي متحامل علي حد قد ما أشرحلك الظروف مشيت إزاي .. السؤال الثاني بيخلينا برده نخش مرحلة الهبد لإن محدش عارف بكره حيحصل فيه إيه فبرده في محاولتي إني أهبد ححاول أحط إحتمالات أكتر ما إني أشم علي ظهر إيدي.

إزاي كل ده حصل في الست سنين بتوع فترة رئاسة (بارتيميو)؟

هنا انت محتاج فعلياً تهدي و تحاول تبقي فاهم هي إيه بالضبط مشكلة (بارتيميو)؟ .. هل الرجل ده فعلاً وحش ولا إحنا اللي ظالمينه؟ .. مش ده الرجل اللي في عهده برشلونة خدوا الثلاثية برده أيام (لويس إنريكي Luise Enrique) الله يمسيه بالخير؟ .. ماله بقي الرجل ده متضايقين منه ليه؟ .. الحقيقة إن الإجابة عن السؤال ده هي 3 حاجات ..(نايمار Neymar) .. (إيرنيستو فالفيردي Erbnisto Valverde) .. شركة 13 Ventures .. خلينا ناخدهم واحدة واحدة عشان تبقي فاهم برده هي المشكلة فين.

أول مشكلة هي (نايمار) .. (بارتيميو) مسك رئاسة برشلونة بسبب (نايمار) و الناس كرهته بسبب (نايمار) و غالباً حيمشي و الناس حتكسر وراه قلة في برشلونة بسبب (نايمار) برده و دي حاجة محتاجه تتشرحلك .. سنة 2014 (بارتيميو) مسك رئاسة نادي برشلونة لما كان هو وقتها نائب رئيس النادي (ساندرو روسيل Sandro Rosell) .. مش عارف تفتكر ولا لا بس (ساندرو روسيل) هو اللي جاب (نايمار) لبرشلونة من نادي سانتوس البرازيلي بس بعد ما جابه إتفتح تحقيق قضائي حول هي الفلوس اللي إتدفعت دي جت منين؟ و بسبب التحقيق ده (ساندرو روسيل) إتقبض عليه و إتسجن .. عشان كده انا قلتلك إن (بارتيميو) مسك رئاسة النادي بسبب (نايمار) .. تلف الأيام و تدور الأيام و في 2017 جماهير برشلونة بقت بتسب و تلعن في سلسفين (بارتيميو) عشان ساب (نايمار) يمشي لباريس سانجيرمان .. السنة اللي فاتت (بارتيميو) إتخزوق تاني بسبب (نايمار) لما السوشيال ميديا إتملت بأخبار إنه راجع برشلونة بس نكتشف إن ده محصلش و الأغرب إن فيه ناس قالت إن أساساً (نايمار) مكنش عايز يرجع برشلونة .. انا عارف إن غريبة إني ألوم مشاكل برشلونة بالشكل ده علي (نايمار) بس ده حقيقي للأسف .. بالنسبة ل(بارتيميو) ف(نايمار) كان الإيكس اللي مش عارف ينساها .. هو حاول يعوضه بإنه صرف 328 مليون يورو علي 3 لاعيبه اللي هم (فيليبي كوتينيو Phillipe Coutinho) و (عثمان ديمبيلي) و (أنتوان جريزمان Antoine Griezmann) و الثلاثة معرفوش يملوا الفراغ اللي سابه الإيكس و الثلاثة فشخوا ميزانية النادي.

ثاني مشكلة هي (فالفيردي) .. محدش قال إن الحاج فلفل الفرارجي ده مدير فني فشيخ .. انا مش جاي أدافع عنه أصلاً .. ده رجل طلع من Champions League بفضيحتين .. الأولانية هي فضيحة الثالث سجله (مانولاوس) و الثانية هي فضيحة الرابع سجله (أوريجي) .. كل فضيحة منهم بفيضان كوميكسات علي السوشيال ميديا .. ده رجل كان مقتنع إن أكاديمية النادي لاماسيا دي حاجة ملهاش لازمة و بتطلع لاعيبه لا تستحق إنها تلعب في الفرقة الأولي .. أو يمكن الحاج فلفل كان عملي أوي لدرجة إنه قال لنفسه هو انا لسه حمسك لاعيبه ناشئين أعلمهم و أربي فيهم .. انا أساساً رجل بحب التصوير و دي هوايتي و يادوبك ما بصدق أروح عشان أقعد في الأستوديو بتاعي .. و شوف يا أخي رغم كل ده قرار إقالة (فالفيريدي) في نص الموسم كان أسوأ قرار خده (بارتيميو) .. تاني .. مش عشان (فالفيريدي) كويس .. لا .. عشان مكنش فيه بديل .. قرار إقالة (فالفيردي) طلع يوم 9 يناير بعد هزيمة برشلونة قصاد أتليتيكو مدريد في كأس سوبر إسبانيا .. في الماتش ده برشلونة مارسوا هوايتهم المفضلة إن دخل فيهم جونين في أخر تلت ساعة .. قعدنا كام يوم بعد إقالة (فالفيردي) و إحنا مش عارفين مين اللي حيمسك الفرقة .. إتقال إسم (رونالد كومان Ronaled Koeman) بس الرجل كان مرتبط وقتها بعقد مع منتخب هولندا و قالك مش فاضي .. إتقال إسم (تشافي Xavi) بس هو إعتذر عشان كان عارف إن دي مهمة إنتحارية إنه يمسك فرقة مضروبه بالنار بالشكل ده في نص الموسم .. فجأة إتقال إن إدارة النادي جابت (كيكي سيتيان Quique Setien) .. (بارتيميو) مش أهبل .. هو كان عارف إن حيتقال إنه ملقاش حد يمسك الفرقة غير (سيتيان) عشان كده هو طلع قال يا جماعة إحنا بنتفاوض مع (سيتيان) بقالنا أسابيع قبل حتي ما نمشي (فالفيريدي) .. في المؤتمر الصحفي الأولاني بتاع (سيتيان) تلاقي (سيتيان) نفسه طلع قال يمين طلاق تلاتة ما حصل انا أساساً إتفاجئت زيي زيكوا بإن برشلونة جابوني.

ثالث مشكلة هي شركة 13 Ventures .. أرجع تاني و أقول إن (بارتيميو) مش أهبل .. ده رجل زي ما بنقول كده يعرف يعيش في التين الشوكي .. الرجل ده عارف إنه هو و مجلس إدارته بيتمسخر بيهم بلاط السوشيال ميديا كل يوم و عشان كده في السر هو إتعاقد مع شركة إسمها 13 Ventures و دي شركة علاقات عامة عشان تحسن من صورته هو و مجلس إدارته علي Social Media .. الشركة دي عامله أكونتات Fake كتير علي كذا موقع سوشيال ميديا زي Facebook و Twitter و الأكونتات دي بتنزل بوستات بتشكر و بتدافع عن (بارتيميو) و رجالته .. لحد دلوقتي مش عيب .. بالعكس دي فكرة حلوة جداً .. العيب إن محطة راديو إسبانية إسمها Cadena SER في فبراير اللي فات طلعت قالت إن (بارتيميو) كان بيخلي شركة 13 Ventures تسوء من سمعة ناس هو شايفهم خطر عليه زي (ميسي) و (تشافي) و (جيرارد بيكيه Gerard Pique) و حتي (بيب جوارديولا Pep Guardiola) .. دي كانت فضيحة إتسمت في إسبانيا Social Media Gate و يمكن بسببها كان فيه إستفتاء لسحب الثقة من (بارتيميو) بس هو قدر يمسك في الكرسي بإيديه و سنانه و دي حاجة غريبة جداً في رأيي .. انت رجل فاضلك سنة و تمشي و بناء علي لايحة النادي انت أساساً مينفعش ترشح نفسك تاني فليه متمشيش من دلوقتي و تخلص و تريح دماغك من الهري ده؟

السؤال دلوقتي .. المستقبل مخبي إيه لبرشلونة؟

الأطراف اللي مصيرها لسه متحددش لحد دلوقتي كتير و إني أحاول حتي إني أجاوب علي سؤال إيه اللي ممكن يحصل في المستقبل فده معناه إني أدخل بيك لمرحلة إننا نشم علي ظهر إيدنا و دي حاجة انا شخصياً مش بحبها بس إحنا ممكن نحط قدامنا الحقايق اللي علي الأرض و منها نشوف إيه اللي ممكن يحصل .. دلوقتي المفروض إن الإنتخابات الرئاسية لنادي برشلونة المفروض علي حسب اللايحة تتعمل في أي معاد بداية من 15 مارس 2021 .. بناء علي اللي حيحصل بعد القعدة اللي (ميسي) قعدها مع (بارتيميو) رئيس النادي ف(ميسي) مجبر إنه يكمل في برشلونة و يقضي أخر سنة في عقده هناك .. ده معناه إن فعلياً (ميسي) من حقه يتفاوض مع أي نادي هو حابب ينتقله بداية من يناير 2021.

الحقيقة اللي إحنا قدامها دلوقتي إن خلاص (ميسي) قاعد و لو علي الأقل لحد أخر الموسم الجاي فده حيخلينا قصاد السؤال المهم .. هو يا تري (رونالد كومان) حاسس بإيه دلوقتي؟ .. السؤال من ناحية تانية .. انت لو مكان (كومان) حيكون أحسنلك إن (ميسي) يمشي ولا يقعد؟ .. لو مشي فانت أولاً لو لا قدر الله فشلت في أول موسم ليك تقدر تطلع للصحفيين و الجماهير و تقولهم و انا مالي يا لمبي ما انا مبقاش معايا أحسن لاعيب في التاريخ .. و ثانياً من غير (ميسي) فانت تقدر تبني الفريق بالطريقة اللي انت شايفها صح .. لكن دلوقتي انت مطالب و ملزم تبني الفريق بما يناسب قدرات و مزاج (ميسي) لإن (ميسي) هو الملك و كلمة الملك لازم تمشي علي أتخن تخين.

الحقيقة برده إن فيه ضحية تانية .. أو بلاش كلمة ضحية عشان دي كلمة صعبة .. خلينا نقول فيه حد تاني إتاخد في الرجلين في أزمة (ميسي) مع إدارة برشلونة و هو (أنتوان جريزمان) .. مشكلة (جريزمان) الأزلية إنه بيلعب في نفس مكان (ميسي) .. عشان تاخد من (جريزمان) أحلي شغل لعبه زي ما كان بيلعب في منتخب فرنسا أو في أتليتيكو مدريد .. ورا المهاجم أو متطرف شوية ناحية اليمين .. (جريزمان) مش وينج و مش حيعرف يلعب وينج و عشان كده هو لعب مع برشلونة 48 ماتش مجابش فيهم غير 15 جون و 4 أسيستات اللي هي أرقام شبه بتاعة (مروان محسن) مثلاً .. ده معناه إن (جريزمان) قدامه حل من إتنين .. الحل الأولاني إنه ينفد بجلده من برشلونة .. الحل ده معناه إنه يقبل ياخد مرتب أقل من اللي هو بياخده في برشلونة لإن يمكن أزمة إدارة برشلونة الأزلية إنها بتدفع أعلي مرتبات للاعيبه كرة قدم في العالم .. و لإن مفيش نادي مستعد يدفع ل(جريزمان) اللي هو بياخده في برشلونة فلازم يقبل بمرتب أقل .. ده الحل الأولاني .. الحل الثاني إنه يفضل في برشلونة .. الحل ده فيه ميزة و عيب .. الميزة إن (لويس سواريز Luis Suarez) خلاص ماشي فممكن (جريزمان) يلعب مهاجم صريح .. العيب إن (جريزمان) برده مبيلعبش مهاجم صريح لإن ده مش مركزه برده.

لو حبينا نلعب فانتازي و نشوف فرقة برشلونة اللي ممكن تشوفها في الملعب الموسم الجاي فهي تبان فرقة حلوة أوي .. هي بالضبط عامله زي ما تختار تلعب بفرقة FIFA و تكون الفرقة باورات اللاعيبه بتاعتها حلوة بس في الواقع اللاعيبه دي مش عارفه تلعب مع بعض .. خد خط الهجوم مثلاً .. حتلاقي (جريزمان) و (ميسي) و (ممفيس ديباي Memphis Depay) .. زود عليهم (فيليبي كوتينيو) و (عثمان ديبميلي)  و (أنسو فاتي Ansu Fati) .. لو بتلعب FIFA أو PES فدي فرقة باوراتها حلوة أوي .. السؤال دلوقتي هل الفرقة دي حتعرف تلعب في الملعب؟ .. يمكن انا مشفتش في حياتي فرقة زي برشلونة ممكن تدفع دم قلبها عشان تشتري لاعيب كورة من أحسن لاعيبه العالم و متفهمش ليه بينزل عليه سهم الله أول ما بيلبس تي شيرت النادي.

انا بس عايز أختم بإني فعلياً بقول الله يكون في عون (ميسي) .. الرجل ده طول الموسم الجاي العيون حتبقي عليه بشكل مش طبيعي .. كل تشويحة في الملعب .. كل بصة من عنيه .. كل ماتش وحش يلعبه .. كل حركة تطلع منه الإعلام حيفضل يحللها و يفسرها مرة و إتنين و ثلاثة .. الموسم اللي جاي ده حيبقي موسم غريب للنادي .. نادي برشلونة انا قلت قبل كده إن ماسكه إدارة مش عارفه تبص لمستقبل الفرقة .. و الحقيقة إن مستقبل الفرقة لازم يبقي دماغك إنه مقسوم نصين .. النص الأولاني هو لحد أخر الموسم لحد ما (بارتيميو) يغور في داهية .. النص الثاني هو بعد الإنتخابات الرئاسية الجايه لإن أكيد حنتكلم تاني وقتها عن إيه اللي مستني برشلونة.

المصادر:

مقالة بعنوان Barcelona civil war explained: Why Camp Nou is in crises نشرت في موقع Goal و ده لينك المقالة الأصلية:
https://www.goal.com/en-us/news/barcelona-civil-war-explained-why-camp-nou-is-in-crisis/382uab8vdx0513ozofwpftrnn

فيديو بعنوان Is Antoine Griezmann the biggest loser in the Lionel Messi vs. Barcelona saga? نشر علي YouTube و ده لينك الفيديو:
https://www.youtube.com/watch?v=MEkr8dV5MZ4&t=21s

فيديو بعنوان Messi returns to Barcelona training bit does Koeman even want him? نشر علي YouTube و ده لينك الفيديو:
https://www.youtube.com/watch?v=pRjcEV8V2vM&feature=share&fbclid=IwAR3kHluJT9cXHdD5H13zVJYrogK-FEW76BsEdFQEi9wej4EhfZes58Vz1cg

فيديو بعنوان Barcelona’s starting XI: Where do Depay, Wijnaldum & Griezmann fit in? نشر علي YouTube و ده لينك الفيديو:
https://www.youtube.com/watch?v=nUe2KhS2tVU&t=98s

فيديو بعنوان Lionel Messi at Barcelona feels very ‘The last dance-esque’- Sid Lowe نشر علي YouTube و ده لينك الفيديو:
https://www.youtube.com/watch?v=cXeC7d4974Q&t=71s

مقالة بعنوان How Bartomeu and the board led to F.C. Barcelona’s downfall due to poor planning نشرت في جريدة Barca Times و ده لينك المقالة الأصلية:
https://barcatimes.com/how-bartomeu-and-the-board-led-to-f-c-barcelonas-downfall-due-to-poor-planning/

مقالة بعنوان Lionel Messi has given Barcelona ‘plenty of problems’ and ‘doesn’t care’ about one thing نشرت في مجلة Express و ده لينك المقالة الأصلية:
https://www.express.co.uk/sport/football/1328473/Lionel-Messi-Barcelona-transfer-news-La-Liga