لينك التسجيل الصوتي للمقالة علي Sound Cloud:
https://soundcloud.com/user-112011687-312727988/oal6dfawnmay?si=5b29deb3418744b992c665958f20b79e
أي مكان في الدنيا ليه طريقة شغل .. مش حتفرق إذا كان المكان ده نادي أو شركة .. فيه أماكن شغل ماشية بالكوسة .. فيه أماكن شغل ماشية بما يرضي الله .. فيه أماكن شغل إبن صاحب المكان ممسكينه المدير وأبوه سايبه يعيث في الأرض فساداً وكلمته بتمشي علي الكل .. فيه أماكن شغل تانية لازم صاحب المكان يوافق علي نوع البن اللي الأوفيس بوي بيعمله للموظفين .. بروسيا دورتموند هو كمان كده .. إنت ممكن تبصله علي إنه نادي بس أنا حبصله النهاردة علي إنه مكان شغل .. إنت ممكن تبص لبروسيا دورتموند علي إنه النادي اللي بيلعب فيه (ماركو رويس Macro Rues) حبيب قلب أي حد بيتفرج علي كورة بس أنا النهاردة حبصله علي إنه مكان الشغل اللي ماسكه المدير الرياضي (مايكل زورك Michael Zorc) ورئيس النادي (هانز يواكيم واتسيكي Hans-Joachim Watzke) والنهاردة إحنا عايزين نفهم هم الإتنين دول ماسكين مكان الشغل اللي إسمه بروسيا دورتموند إزاي؟
الأندية زيها زي الشركات .. فيه شركات عايزة تكبر وتاخد شغل واسمها يبقي مسمع في السوق وموجود علي اللوح اللي بتطلع وده في حالة الأندية بيتقال عليه إن النادي يجيب بطولات .. فيه شركات بتبقي عايزة تجيب فلوس وخلاص ومش مهم الشهرة ومش مهم المجد ومش مهم إن اسمي يبقي علي كل لسان وده في حالة الأندية إن النادي يقول لنفسه تولع البطولات المهم أجيب فلوس .. وفيه شركات عايزة تعيش اللي هو بتطلع شغل يدوبك يأكل عيش وفي حالة الأندية ده إن النادي يبقي كل همه في الحياة إنه مينزلش دوري المظاليم .. لو حبيت تبص علي بروسيا دورتموند عشان تحدد هو في أنهي فئة من الثلاثة فإنت حتلاقي حاجة غريبة .. قدام الناس الي ماسكين النادي اللي هم (مايكل زورك) و(هانز يواكيم واتسيكي) بيقولوا إحنا طبعا عايزين بطولات ونملا خزاين النادي كؤوس .. إحنا مش نادي قليل .. المشكلة إن الوضع علي الأرض بيقول غير كده خالص وعشان تفهم ده بص علي الرسم البياني اللي قدامك.
ده جدول بيوريك أسامي وأسعار اللاعيبه اللي سنهم كان أقل من 21 سنة والنادي باعهم من سنة 2012 لحد دلوقتي .. لما تيجي تجمع الفلوس اللي دخلت للنادي من الأسامي دي كلها علي بعض حتلاقيهم 378 مليون جنيه إسترليني بس أقسملك بالله مش هي دي المشكلة .. المشكلة بتبدأ تظهر لما تبص علي أسامي اللاعيبه اللي إتباعت .. أهم إسم وأول إسم هو (عثمان ديمبيلي Ousman Dembele) .. ده لاعيب إدارة بروسيا دورتموند إشترته ب13.5 مليون جنيه إسترليني .. لعب معاهم موسم يتيم .. بعد كده باعوه لبرشلونة ب124 مليون جنيه إسترليني .. ثاني لاعيب في الجدول هو (كريستيان بوليسيك Christian Pulisic) .. ده لاعيب كشافين المواهب بتوع النادي لقطوه من حواري أميركا صنفروه وعلموه يعني إيه كرة قدم و بعد كده باعوه لتشيلسي ب58 مليون جنيه إسترليني .. بدأت تفهم أنا رايح فين؟ .. الغريب إن فيه لاعيب مش في الجدول ده هو (جايدن سانشو Jaden Sancho) .. ده لاعيب إنجليزي عنده 20 سنة النادي دفع فيه 8 مليون جنيه إسترليني لنادي مانشستر سيتي عشان ياخدوه وهو لسه ناشيء ملعبش حتي ماتش يتيم في الدوري ودلوقتي فيه كلام علي إن مانشستر يونايتد عايزه وإدارة بروسيا دورتموند راسها وألف سيف إن يا يتدفع فيه 120 مليون جنيه إسترليني يا بلاش .. ده لو إتباع سواء دلوقتي أو في يناير الجاي حيخلي أرباح النادي تنط في 8 سنين اللي فاتوا توصل 500 مليون جنيه إسترليني.
طب أزيدك من الشعر بيت علي رأي (عمرو أديب) .. فيه أسامي في الجدول ده تستحق فعلاً إنك تبصلها وتهرش في شعرك .. فيه لاعيب إسمه (جايكوب برون لارسين Jacob Bruun Larsen) .. ده كان لاعيب دانمركي إتقال عليه إن الواد ده كأنه (زين الدين زيدان) بُعث من جديد بس طلع فنكوش .. تفتكر إدارة بروسيا دورتموند تعمل إيه؟ .. باعوه لنادي هوفينهايم ب8 مليون جنيه إسترليني .. اسم تاني اللي هو (ماتياس جينتر Matthias Ginter) .. ده كان قب دفاع إتقال عليه إنه (أليساندرو نيستا Alesandro Nesta) الجديد بس طلع فشنك برده ورغم كده برده إدارة بروسيا دورتموند كسبت فيه 70% من ثمنه لما باعوه لبروسيا مونشنجلادباخ ب15 مليون جنيه إسترليني .. اسم ثالث هو (إيمري مور Emre Mor) .. الواد ده إتقال عليه إنه (ليونيل ميسي Lionel Messi) بتاع تركيا .. إشتروه ب9 مليون جنيه إسترليني وقضي معاهم موسم ولا (مروان محسن) مع الأهلي ورغم كده باعوه لنادي سيلتا فيجو الإسباني ب12 مليون جنيه إسترليني يعني كسبوا فيه برده.
اللي أنا عايز أقوله إن (مايكل زورك) و(هانز يواكيم واتسيكي) بيمشوا الشغل علي أساس إن إحنا نادي بيجيب لاعيبه محدش يعرف عنها حاجة وبنعلمهم ونصرف عليهم ونصنفرهم و نخليهم يلعبوا كرة قدم حلوة تحب تتفرج عليها ولو جه زبون فلوسه حاضره علي الطرابيزة عايز يشتري حد فيهم فإحنا معندناش أي مشكلة نبيع ونكسب قرشين حلوين .. مجرد اللي أنا قلته ده يخليك تقول يبقي كده بروسيا دورتموند هو نادي كل اللي بيفكر فيه إنه يجيب فلوس لإن لو كان بيفكر في البطولات كان إحتفظ باللاعيبه اللي تقدر تجيبله بطولات .. لو ده رأيك فأنا أحب أقولك إن ده رأيي برده .. لكن .. علي الناحية الثانية بتلاقي دايماً الثنائي (مايكل زورك) و(هانز يواكيم واتسيكي) بيطلعوا يقولوا يا جدعان أنتوا فاهمين غلط .. بروسيا دورتموند طول عمره فريق بطولات وعايز بطولات وبيدور علي البطولات .. تيجي تسألهم طب بالصلاة علي النبي من 2012 لحد دلوقتي في ال8 سنين اللي أنتوا جبتوا فيهم صافي ربح 378 مليون جنيه إسترليني ممكن تقولي إيه الإنجازات اللي حققتوها؟ .. الإجابة سيدي القاريء هي بطولة كأس ألمانيا يتيمة في 8 سنين .. وصلوا لنهائي Champions League مرة يتيمة في 8 سنين .. طب خد التقيلة بقي .. لو جيت تحسب فرق النقط بينهم وبين بايرن ميونيخ في ال8 سنين دول في الدوري الألماني حتلاقيهم 149 نقطة.
أنا مش عايزك تطلع من مقالة دي وإنت متخيل إني بقول علي (مايكل زورك) و(هانز يواكيم واتسيكي) إنهم جوز بهايم لا سمح الله .. لا خالص مش ده قصدي .. أنا اللي عايزك تطلع بيه هو إنك تبقي فاهم هو ليه ده حصل؟ وإزاي بيحصل؟ .. ليه بروسيا دورتموند بقي خط إنتاج بتاع مصنع تصدير المواهب الفشيخة؟ والأهم إزاي خط الإنتاج ده بيشتغل؟
إمتي جت الفكرة لإدارة بروسيا دورتموند إنهم يفتحوا حضانة؟
في الألفينات نادي بروسيا دورتموند كان فعلياً وبدون أدني مبالغة بيتهم بيتخرب .. هم كانوا بيتعرض لأزمة مالية كانت حتجيب ضرف النادي .. في الوقت ده الثنائي (مايكل زورك) و(هانز يواكيم واتسيكي) مسكوا إدارة النادي ومعاهم فكر جديد لانج .. قالك إحنا حنفتح حضانة .. هم مقالوش حضانة يعني حضانة أوي يعني .. هم قالوا إننا حنعمل فرقة كورة مبنية علي العيال الصغيرة .. مش الشباب الصغير .. لا .. العيال الصغيرة .. هم سموا الفكرة دي بالإنجليزي Absurdly Youthful Team اللي هي بالألماني Suddeutsche Zeitung .. وحنجيب مدير فني بيعرف يعمل من الفسيخ شربات اسمه (يورجين كلوب Jurgen Klopp) وثقة في الله نجاح الفرقة دي حتجيب الدوري .. لما فعلاً فرقة بروسيا دورتموند دي خدت الدوري كانت أصغر فرقة تعمل الإنجاز ده في تاريخ الكرة الألمانية .. فرقة متوسط أعمارها 23 سنة وتاخد الدوري ولا تخرج قبل أن تقول سبحان الله.
إزاي خط إنتاج مصنع المواهب ده بيشتغل؟
عشان بس نبقي متفقين .. قطاع الناشئين بتاع بروسيا دورتموند سابق الناس كلها ب3 سنين .. مش فاهمني أنا عارف .. خد عندك مثلاً المهاجم النرويجي (إيرلينج هالاند Erling Haaland) .. الواد ده دلوقتي عنده 20 سنة وبداية إن الناس تسمع اسمه وتاخد بالها منه كان سنة 2019 وهو عنده 19 سنة (معلش أنا عارف إننا فاشلين في الحساب) لما إتقال إن ريال مدريد عايزه .. وقتها إتقال ان ياااااه إدارة ريال مدريد بجلالة قدرها بتتفاوض مع عيل عنده 19 سنة؟ .. أحب أقولك إن من قبلها ب3 سنين لما (هالاند) كان عنده 16 سنة كان قطاع الناشئين في النادي عاملين ملف ليه وبيتفرجوا عليه وعارفينه كويس وبدأوا يتكلموا مع باباه ومامته .. الناس اللي بتتفرج علي بروسيا دورتموند كتير عارفه إن فيه عندهم لاعيب حريف فشخ أمريكاني اسمه (جيو رينا Gio Reyna) .. الواد ده دلوقتي عنده 17 سنة .. الواد دلوقتي أساسي في تشكيلة بروسيا دورتموند .. عارف هم بدأوا يتكلموا مع باباه ومامته وهو عنده كام سنة؟ .. 14 سنة .. ومش لوحده .. زميله دلوقتي في الفرقة عيل إنجليزي اسمه (جود بيلينجهام Jude Bellingham) هو كمان عنده 17 سنة .. من وهو عنده 14 سنة وقطاع الناشئين بتاع بروسيا دورتموند لقطه وهو لسه في مدرسة أشبال نادي بيمرينجهام في إنجلترا وهو بيعلب في حواري بيرمينجهام مع أحفاد (تومي فوكين شيلبي) .. فدي أول نقطة تبقي عارفها وهي إن الناس دي لو إنت شفت لاعيب بيلعب عندهم فهم غالباً بيكونوا فاتحين كلام مع أهله من قبلها ب3 سنين.
تاني نقطة تبقي مهمة هي الطريقة اللي بيقنعوا بيها الأب والأم إنهم يخلوا إبنهم يلعب في بروسيا دورتموند .. الأول الهدايا بتيجي لحد باب البيت .. متقلقش مش حاجات غالية .. تي شيرتات النادي الأصلية .. شنطة عليه شعار النادي .. حاجات بسيطة يعني .. شوية وبيتقاله طب تعالي إحضر ماتش في المقصورة الرئيسية عشان تتفرج علي الحيطة الصفرا Yellow Wall في إستاد سيجنال ايدونا بارك وتتخيل إن في يوم من الأيام الجماهير دي كلها حتكون بتهتف بإسمك .. بعد كده العقد بيتحط قدام أبوك وأمك .. الفلوس مش بتكون كتير .. الوعد أو Offer اللي بيتقدم مش إننا حندي إبنكوا عربية مرسيدس وفيلا وفلوس كتير .. لا .. الوعد إننا حنخلي بالنا من إبنكوا .. تعليمه .. أكله وشربه .. مواعيد نومه .. حنحميه من السهر ومن النسوان .. إذا كان Offer بتاع ريال مدريد ولا باريس سانجيرمان هو فلوس فإحنا Offer بتاعنا إن لما إبنكوا يبقي عنده 17 سنة ولو إتجدعن وبقي رجل حيلعب أساسي في ثاني أقوي فرقة في ألمانيا .. الأندية اللي زي ريال مدريد ومانشستر يونايتد بتعرض فلوس .. إحنا بنعرض مستقبل.
عشان تشوف ده بعنيك إتفرج علي إحصائيات Stats بتاعة أول ماتش ليهم في الدوري الموسم ده .. ده كان ماتش ديربي بروسيا ضد بروسيا مونشنجلادباخ .. الإسم اللي لو عرفت تنطقه يبقي إنت حقاً وصدقاً بتفهم في الكورة .. الماتش ده خلص 3-0 لبروسيا دورتموند .. الجون الأول جابه (جيو رينا) والأسيست عمله (جود بيلينجهام) وزي ما قلتلك الإتنين عندهم 17 سنة .. الجون الثاني كان عالمي جابه (هالاند) اللي عنده 20 سنة .. الجون الثالث جابه (هالاند) برده واللي عمل الأسيست كان (جايدن سانشو) اللي هو كمان عنده 20 سنة .. إستني بقي .. تخيل معايا للحظة إن الزمالك بصفته تاني أكبر نادي في مصر رباعي خط الهجوم بتاعه كان متوسط أعمارهم 18 سنة و11 شهر .. تخيلت؟ .. إنت متخيل حجم المسئولية اللي بتترمي علي كتاف عيال صغيرة في السن ده؟ .. ده لما (أسامة فيصل) ناشيء الزمالك جاب الجون الثالث في الأهلي الزملكاوية عملوا فرح .. متخيل كم الشغل والتعليم والتدريب والتربية اللي خدوها في النادي عشان يقدروا يشيلوا المسئولية دي؟ .. تفتكر لو (هالاند) كان راح مانشستر يونايتد كان لعب أساسي؟ .. تفتكر لو (جيو رينا) كان إختار بايرن ميونيخ كان زمانه بيجيب الجون الأول لفرقته في أول ماتش في الدوري؟
تبقي نقطة هل اللي بتعمله إدارة بروسيا دورتموند ده صح ولا غلط؟ .. الحقيقة دي نقطة وجهات النظر .. علي إيدك اليمين الناس اللي بتقول إن ده غلط بدليل إن الفرقة في 8 سنين مجابتش إلا بطولة يتيمة .. قصاد علي إيدك الشمال الناس اللي بتقول لا معلش ثانية واحدة لو اللي بتعمله إدارة بروسيا دورتموند غلط ممكن حد يقولنا ليه أندية زي ليل في فرنسا أو ليستر سيتي أو أرسنال في إنجلترا وحتي ريال مدريد بتحاول تقلدهم؟ .. علي فكرة أرسنال جابوا (سفين ميزلينتات Sven Mislintat) مدير إدارة الناشئين في بروسيا دورتموند عشان يشتغل عندهم.
هي المشكلة سعادتك في جملة كنا بنسمعها زمان وإحنا صغيرين في فقرة حكمة اليوم في الإذاعة المدرسية بس مكناش بنركز فيها أوي وبنحاول نفهمها لإن أغلبنا كان بيتاوب وهو واقف في الطابور .. الحكمة دي بتقول إن الشيء لو زاد عن حده بينقلب لضده .. مش عيب إنك تعتمد علي الناشئين .. بالعكس دي حاجة جميلة خالص .. العيب إن كل سنة تيجي تبيع أكتر من نص الفرقة وتصعد ناشئين جداد يحلوا محلهم .. فين الإستمرارية؟ .. فين الحفاظ علي المستوي؟ .. فين التفاهم بين اللاعيبه؟ .. مفيش إستقرار سعادتك .. دي مش تريقة دي حقيقة .. عشان كده (أولي هوينس Uli Hoeness) مدير بايرن ميونيخ لما إتسأل عن رأيه في سياسة بروسيا دورتموند قال حاجة مهمة أوي .. معلش يعني لما كل موسم تبيعلي نص الفرقة فإمتي بالصلاة علي النبي حتزرع في لاعيبتك روح الفانلة الصفرا؟ .. إنت خليت اللاعيب من اليوم الأول اللي يبقي فيه في النادي بقي عارف إنه لو إتجدعن وشد حيله وأثبت نفسه فالموسم الجاي بالكتير حيتباع .. ده السبب إن من 2012 لحد دلوقتي بروسيا دورتموند هو دايماً ثاني الدوري .. تلاقيهم نفسهم في قفا بايرن ميونيخ طول الموسم وبسم الله ما شاء الله ويارب ما يقطع عنهم عادة يجوا في أخر جولتين تلاتة يتدلعوا ويخسرولهم ماتش ولا ماتشين مضمونين ويضيع منهم الدوري .. في رأي (أولي هوينس) طول ما سياسة بروسيا دورتموند دي مكملة عمرهم ما حيبقي عندهم ال10% اللي ناقصين عشان يبقوا فعلاً أبطال ألمانيا ويمكن أبطال أوروبا كمان.
أنا شخصياً شايف إن (أولي هوينس) عنده حق .. بص علي الصور اللي تحت دي .. دي تشكيلة فرقة بروسيا دورتموند اللي لعبت أول ماتش في الدوري من أول موسم 2016 لحد موسم 2020 .. بتتكلم عن 5 مواسم أكتر من نص الفرقة بيتغير كل موسم .. أرجع وأقولك مفيش إستقرار سعادتك .. يمكن عشان كده إنتقال (جايدن سانشو) الموسم ده لمانشستر يونايتد بالنسبة لي علي الأقل مؤشر مهم أوي .. هل الفلوس حتزغللل عين إدارة بروسيا دورتموند؟ ولا حيقرروا يشربوا بيريل ويسترجلوا ويقولوا مفيش حد حيتباع الموسم ده ويبقي لأول مرة الفرقة ليها أمل إنها تنافس بايرن ميونيخ لحد أخر صفارة في أخر ماتش في الدوري؟
المصدر:
- مقالة بعنوان Borussia Dortmund: Where dreams are made or a glorified feeder club? نشرت في جريدة The Guardian و ده لينك المقالة الأصلية:
https://www.theguardian.com/football/2020/sep/30/borussia-dortmund-where-dreams-are-made-or-a-glorified-feeder-club
