فيه كمية هبد و هري و فتي إتقالت علي فكرة League of Nations أو Nation’s League زي ما ناس تانية بتسميها لدرجة إني حسيت إن مينفعش محاولش أشرحها عشان الناس تفهمها لإن كده كتير الصراحة .. بص يا ضنايا .. الفكرة و ما فيها إن الإتحاد الأوروبي لكرة القدم أو UEFA زهق من الFIFA Week .. الFIFA Week ده يبقي أسبوع كل كام شهر بتتلعب فيه ماتشات ودية بين المنتخبات و بتقف فيه الدوريات الأوروبية كلها .. ده الأسبوع اللي كلنا كناس بتحب نتفرج علي كورة القدم بنسب و نلعن فيه لحد ما يخلص .. أسبوع كامل المنتخبات الكبيرة مش لاقيه حد تلاعبه فبيروحوا يلعبوا فرق من تحت بير السلم لمجرد إن الأسبوع يعدي و مدربين المنتخبات يحللوا اللقمة اللي هم بياكلوها .. من هنا إتولدت فكرة League of Nations عشان الماتشات المملة اللي محدش بيتفرج عليها دي تنتهي و تحل محلها ماتشات جامدة المنتخبات الأوروبية تاخدها جد لإن حيبقي ليها تأثير علي مين اللي يتأهل لبطولة الأمم الأوروبية EURO 2020 .. المقالة دي حتبقي عبارة عن شوية أسئلة بخصوص البطولة أكيد كلنا بنسألها لنفسنا و مش عارفين إجابتها.
هي بالصلاة علي النبي البطولة دي بتتلعب إزاي؟
كل منتخبات أوروبا ال54 إتقسمت لأربع فئات كل فئة بتتسمي League .. يعني دلوقتي إنت عندك League A و League B و League C و League D .. حاول تتخيل إن كل League فيهم دوري مستقل بذاته و التقسيمة كانت كده:
- الفئة الأولي League A أو اللي تقدر تسميه الدوري الممتاز لو حبيت فيه دول ألمانيا و البرتغال و بلجيكا و إسبانيا و فرنسا و إنجلترا و سويسرا و إيطاليا و بولندا و أيسلندا و كرواتيا و هولندا.
- الفئة الثانية League B و ده يبقي لو حبيت تشبهه حيبقي عامل زي دوري الدرجة الثانية أو دوري المظاليم فيه دول النمسا و ويلز و روسيا و سلوفاكيا و السويد و أوكرانيا و جمهورية أيرلندا و البوسنة و أيرلندا الشمالية و الدانمرك و التشيك و تركيا.
- الفئة الثالثة League C و ده ممكن تقول عليه دوري الدرجة الثالثة فيه دول المجر و رومانيا و سكوتلندا و سلوفينيا و اليونان و صربيا و ألبانيا و النرويج و الجبل الأسود و إسرائيل و بلغاريا و فنلندا و قبرص و أستونيا و ليثوانيا.
- الفئة الرابعة League D أو دوري الدرجة الرابعة أو دوري بيبسي للمدارس فيه دول أزربيجان و مقدونيا و بيلاروسيا و جيورجيا و أرمينيا و لاتفيا و جزر فارو و لوكسمبورج و كازاخستان و مولدوفيا و ليختنشتاين و مالطة و أندورا و كوسوفو و سان مارينو و جبل طارق.
تقسيمة كل دوري أو League بالمنتخبات اللي فيه اللي هم League A و League B و League C و League D.
طب بعد ما قسمناهم دوريات حنعمل إيه بقي؟
هنا بقي عايزك تركز معايا شوية لان الموضوع بيفرق من League لLeague:
- عندك League A و League B الإتنين فيهم 12 منتخب .. الدوري الواحد فيهم حيتقسم علي 4 مجموعات كل مجموعة فيها 3 منتخبات حيلاعبوا بعض رايح جاي.
- عندك League C عشان فيها 15 فرقة حيبقي فيها مجموعة واحده فيها 3 منتخبات و 3 مجموعات كل واحدة فيهم فيها 4 منتخبات برده كل مجموعة المنتخبات اللي فيها حيلاعبوا بعض رايح جاي.
- عندك League D عشان فيها 16 منتخب فهم حيتقسموا علي 4 مجموعات كل مجموعة فيها 4 منتخبات بحيث منتخبات المجموعة الواحدة حيلاعبوا بعض رايح جاي.
و المنتخبات اللي حتتأهل حتتحدد إزاي؟
عشان تجاوب علي السؤال ده لازم تاخد League A لوحده لإن الكلام اللي حيمشي عليه غير الكلام اللي حيمشي علي باقي الLeagues .. مبدأياً انت لازم تكون عارف المجموعات الأربعه و كل مجموعة إيه هي ال3 منتخبات اللي حيلعبوا فيها:
- المجموعة الأولي: ألمانيا و فرنسا و هولندا.
- المجموعة الثانية: بلجيكا و سويسرا و أيسلندا.
- المجموعة الثالثة: البرتغال و إيطاليا و بولندا.
- المجموعة الرابعة: إسبانيا و إنجلترا و كرواتيا.
أوائل المجموعات الأربعة و لنفترض جدلاً إنهم حيبقوا ألمانيا و بلجيكا و البرتغال و إسبانيا مثلاً حيتعمل قرعة بيهم عشان كل إتنين يلاعبوا بعض في دور نص النهائي و الماتشين حيتلعبوا في أول شهر يونيو الجاي إن شاء الله .. عشان النهائي يتلعب يوم 9 يونيو علي كـس إسمه Nations League Cup .. الفرق اللي حتبقي حصالة مجموعتها اللي حيبقوا أربع فرق لنفترض جدلاً برده إنهم هولندا و أيسلندا و بولندا و كرواتيا حيهبطوا لدوري League B .. زي بالضبط أي دوري في الدنيا لما ال3 فرق الأخاري اللي فيه بيهبطوا لدوري الدرجة الثانية.
المجموعات الأربعة بتاعة League A.
و باقي الدوريات حيتعمل فيهم إيه؟
الفكرة إن League B و League C و League D الفرق اللي فيهم بيتنافسوا علي مين يصعد للدوري اللي فوقه لحد ما يوصلوا للعب في الدوري الممتاز اللي هو League A عشان ينافسوا علي الكأس .. أوائل المجموعات جوه كل دوري حتتأهل للدوري الأعلي و حصالات المجموعات حتهبط للدوري الأقل .. عشان كده انت محتاج تعرف كل دوري المجموعات اللي فيه إتقسمت إزاي؟
بالنسبة لدوري League B:
- المجموعة الأولي: سلوفاكيا و أوكرانيا و التشيك.
- المجموعة الثانية: روسيا و السويد و تركيا.
- المجموعة الثالثة: النمسا و البوسنة و أيرلندا الشمالية.
- المجموعة الرابعة: ويلز و جمهورية أيرلندا و الدانمرك.
بالنسبة لدوري League C:
- المجموعة الأولي: سكوتلندا و ألبانيا و إسرائيل.
- المجموعة الثانية: المجر و اليونان و فنلندا و أستونيا.
- المجموعة الثالثة: سلوفينيا و النرويج و بلغاريا و قبرص.
- المجموعة الرابعة: رومانيا و صربيا و الجبل الأسود و ليثوانيا.
بالنسبة لدوري League D:
- المجموعة الأولي: جيورجيا و لاتفيا و كازاخستان و أندورا.
- المجموعة الثانية: بيلاروسيا و لوكسمبورج و مولدوفا و سان مارينو.
- المجموعة الثالثة: أذربيجان و جزر فارو و مالطا و كوسوفو.
- المجموعة الرابعة: مقدونيا و أرمينيا و ليخشتناين و جبل طارق.
الرسم ده بيوريك إيه العلاقة بين بطولة Nation’s League و بين التصفيات المؤهلة لبطولة أمم أوروبا الجاية.
و بعد كل ده بقي إيه علاقة Nations League بمين يتأهل لEURO 2020؟
دلوقتي تصفيات EURO 2020 بتتعمل عن طريق إنك تعمل 10 مجموعات كل مجموعة فيها 5 فرق بيتأهل أول و ثاني كل مجموعة مباشرة للبطولة .. و بعد كده كان بيبقي فيه الملحق بتاع أحسن ثوالث عشان تحدد مين أخر أربع فرق حيتأهلوا .. لا بعد كده مش حيبقي فيه ملحق خلاص .. دلوقتي انت عندك 4 دوريات أو Leagues كل دوري فيه مجموعات .. كلهم علي بعض 16 مجموعة .. تعالي انت هات أوائل كل مجموعة في حالة إنهم متأهلوش في التصفيات .. لو الأول كان إتأهل خلاص هات تاني المجموعة و هكذا .. المهم إن حيبقي عندك 16 منتخب من 16 مجموعة حيلعبوا مع بعض في الملحق اللي حيبقي في شهر مارس 2020 .. حيتلعب دور نص نهائي و دور نهائي عشان ال16 منتخب يصفصفوا علي 4 منتخبات هم اللي حيتأهلوا لEURO 2020.
و يا تري مين المستفيد بقي من نظام Nations League ده؟
أكبر مستفيد في رأيي هم الفرق الصغيرة اللي إتحطت في League C و League D .. خلينا نكون صرحا مع بعض فرقة زي أرمينيا ولا لوكسمبورج معندهاش أي فرصة إنها تتأهل لEURO 2020 بالتصفيات .. بس فكرة الملحق بتاع Nations League حيديها فرصة إنها توصل لإن لوكسبورج مثلاً عشان توصل حتلاعب فرق زيها زي جيورجيا أو المجر أو حتي رومانيا .. بالنسبة لينا إحنا كمشجعين كرة في مصر مثلاً فإحنا خلاص مش حنشوف ماتشات ملهاش أي ستين لازمة زي ماتش ألمانيا و جبل طارق .. إحنا نجيب فشارنا و البيبسي و نتفرج علي ألمانيا و فرنسا و هولندا و هم بيقطعوا بعض رايح جاي.
طب انا مفهمتش حاجة و عايزك تشرحلي علي مثال محدد لمنتخب و ليكن مثلاً يعني منتخب إسبانيا .. فهمني إسبانيا حيبقي مطلوب منها إيه؟
دلوقتي إسبانيا متصنفة علي إنها فرقة دوري ممتاز أو League A ضمن 12 منتخب تانيين .. المنتخبات دي حتتقسم علي 4 مجموعات كل مجموعة فيها 3 فرق حيلاعبوا بعض رايح جاي .. مجموعة إسبانيا فيها إنجلترا و كرواتيا .. خلال الفترة من سبتمبر لحد نوفمبر 2018 إسبانيا حتلعب 4 ماتشات .. فيه دلوقتي كذا إحتمال:
- الإحتمال الأول إن إسبانيا تخلص أول مجموعتها .. ساعتها حيبيجوا أوائل المجموعات الأربعة بتوع League A و اللي حيكونوا مثلاً ألمانيا و بلجيكا و إيطاليا .. حيتلعب دور نص النهائي في يونيو 2019 بين مثلاً إسبانيا و ألمانيا علي حسب القرعة و الماتش ده حيتلعب في أرض محايدة .. الكسبان من نص النهائي حيلاعبوا بعض في النهائي و ليكن مثلاً إسبانيا و بلجيكا و الماتش برده حيتلعب في أرض محايدة .. خلي بالك كل ده حيحصل في نفس الوقت اللي إسبانيا حتلعب فيها ماتشات تصفيات EURO 2020 اللي حتبدأ تتلعب ما بين مارس و نوفمبر 2019 و خلينا نفترض إن إسبانيا كانت أول أو ثاني مجموعتها في التصفيات فهي إتأهلت بشكل طبيعي خالص لبطولة EURO 2020.
- الإحتمال الثاني إن إسبانيا كانت أول مجموعتها في League A بس حصلت مصيبة سودا في مشوار تصفيات EURO 2020 و مكانوش أول ولا حتي تاني .. في الحالة دي هم ممكن يتأهلوا لEURO 2020 بالملحق لإنهم زي ما قلتلك أول مجموعتهم في League of Nations.
المصادر:
- مقالة بعنوان UEFA Nations League: How it Works, Tournament Fixtures and Key Dates يعني بطولة دوري الأمم: إزاي بتتلعب و ماتشات البطولة و المواعيد المهمة .. نشرت في جريدة The Daily Mail البريطانية و ده لينك المقالة الأصلية:
https://www.dailymail.co.uk/sport/football/article-5301815/UEFA-Nations-League-works-aids-Euro-2020.html
- مقالة بعنوان UEFA Nations League Explained: How the New European Tournament Will Work and How it Affects EURO2020 Qulaifying يعني بطولة دوري الأمم: إزاي البطولة حتتلعب و إزاي حتأثر علي مشوار تصفيات بطولة أمم أوروبا .. نشرت في جريدة The Daily Mail البريطانية و ده لينك المقالة الأصلية:
https://www.dailymail.co.uk/sport/football/article-2862332/UEFA-Nations-League-explained-new-European-tournament-work-affects-Euro-2020-qualifying.html
