لينك التسجيل الصوتي للمقالة علي ساوند كلاود:
https://on.soundcloud.com/HxvvM
عشان أبدأ أفهمك أبعاد بيزنس تي-شيرتات كرة القدم أو Kit Business لازم أرجعك شوية لورا لسنة 2016 .. في السنة دي نادي ليستر سيتي الإنجليزي حقق معجزة حقيقية لما كسبوا بطولة الدوري الإنجليزي .. للناس اللي مش متابعه أوي الكرة الإنجليزية تخيل كده إن نادي الإتحاد السكندري كسب بطولة الدوري المصري يعني فرقة من تحت بير السلم تكسب بطولة بيسيطر عليها يا النادي الأهلي يا الزمالك .. أهو ليستر سيتي كان بيتبصله وقتها علي إنه نادي من تحت بير السلم و مش بس الناس العادية اللي كانت شايفاه كده .. فرقة ليستر سيتي وقتها كانت ماضية عقد مع شركة بوما Puma الألمانية .. اه علي فكرة شركة Puma طلعت ألمانية و أنا إستغربت زيك كده بالضبط .. المهم إن العقد اللي شركة Puma مضته مع النادي سنة 2012 يعني قبل ما ليسترسيتي ياخد الدوري ب4 سنين و أيام ما النادي كان لسه بيلعب في دوري المظاليم اللي هو دوري الدرجة الثانية أو الChampionship زي ما الإنجليز بيحبوا يسموه كان بيقول إن النادي حيلبس تي- شيرتات من تصميم و تصنيع الشركة في مقابل إن الشركة تدفع للنادي مليون جنيه إسترليني بس في السنة .. جري الشريط لحد اللحظة اللي كابتن الفرقة (ويس مورجان Wes Morgan) كان بيشيل كاس بطولة الدوري و فجأة اللوجو بتاع شركة Puma بقي بيتشاف في كل حتة في العالم.
المعجزة اللي عملتها فرقة ليستر سيتي ناس كتير شافتها علي إنها ضربة معلم من شركة Puma لإن إذا كانت صحيح إدارة نادي ليستر سيتي دلوقتي ماضية عقد مع شركة أديداس Adidas الألمانية برده بداية من سنة 2018 عشان يلبسوا تي-شيرتاتها و طبعاً بسعر أعلي بكتير من المليون جنيه إسترليني في السنة اللي كانت بتدفعهم شركة Puma إلا إنك و إنت بتعمل أي Search علي الإنترنت عن نادي ليستر سيتي حتطلعلك صورتهم و هم شايلين كاس الدوري و لابسين تي-شيرتات مكتوب عليها Puma.
سبب إني حتكلم عن موضوع الKit Business ده النهاردة هو الخبر اللي إتقال علي إن نادي مانشستر سيتي الإنجليزي مضي عقد مع شركة Puma عشان الفرقة تبدأ تلبس تي-شيرتاتها بداية من موسم 2020 مقابل إن الشركة تدفع للنادي 650 مليون جنيه إسترليني علي 10 سنين يعني كل سنة النادي حياخد من الشركة 65 مليون جنيه إسترليني .. عشان بس أحطك في الصورة .. نادي زي مانشستر سيتي لحد سنة 2019 كان ماضي عقد مع شركة نايكي Nike الأميريكية بقيمة 20 مليون جنيه إسترليني في السنة .. بداية من موسم 2020 إن شاء الله لما فرقة مانشستر سيتي تبدأ تلبس تي-شيرتات Puma فكده النادي حيكون بياخد من Puma فلوس أكتر من ال60 مليون جنيه إسترليني اللي نادي زي تشيلسي بياخدهم من شركة Nike و أقل من ال75 مليون جنيه إسترليني اللي بياخدهم نادي مانشستر يونايتد من شركة Adidas.
في المقالة دي ححاول أجاوب عن 3 أسئلة أساسية:
- هو يعني إيه أساساً إن شركة زي Adidas تمضي عقد مع نادي زي ريال مدريد مثلاً إن النادي يلبس تي-شيرتات الشركة؟
- إذا كانت الشركة بتدفع فلوس للنادي طب إزاي الشركة بيجيلها فلوس؟
- ليه شركات تي-شيرتات كره القدم زي Nike و Adidas و Puma بيجروا ورا الأندية الإنجليزية بالذات؟
خليني أبدأ بالسؤال الأول .. هي الليلة بتمشي إزاي؟
إن نادي يمضي عقد مع شركة زي Adidas عشان يلبس تي-شيرتاتها فده بالضبط شبه إن نادي يمضي عقد مع لاعيب بس إعكس الوضع .. زي ما أي عقد بين لاعيب كرة قدم و النادي بتاعه بيقول إن اللاعيب بياخد فلوس زيادة لو مثلاً جاب أكتر من 20 جون في الموسم أو لو النادي كسب بطولة و كان للاعب دور مهم مع الفرقة فكمان العقد بين الشركة بتاعة التي-شيرتات و بين النادي بيقول إن لو النادي كسب بطولة زي مثلاً لو مانشستر سيتي كسب بطولة الدوري الإنجليزي أو كسب بطولة Champions League فده معناه إن الشركة حتدفع فلوس زيادة عن ال65 مليون جنيه إسترليني في السنة .. بس ده مش معناه إن شركة Puma حتفضل تدعي ليل نهار إن مانشستر سيتي مياخدش بطولات عشان ميدفعوش فلوس .. بالعكس .. شركة Puma مفيش حاجة أحب علي قلبها أكتر من إن النادي يكسب بطولات لإن لما ده يحصل فالكاميرات كلها حتصور الفرقة و هي لابسة تي-شيرتات عليها اللوجو بتاع Puma و ده اللي بيقوله (بيجورن جولدين Bjorn Gulden) الCEO بتاع شركة Puma في حواره مع مجلة Financial Times لما قال إن كل ما بندفع فلوس لنادي معين عشان يلبس تي-شيرتاتنا فده معناه إن فيه فرصة أكبر إن أرباحنا تزيد.
طب دلوقتي فهمنا إن الشركة بتدفع فلوس .. طب هي إزاي بتكسب فلوس؟
لما حضرتك تروح تشتري تي-شيرت ريال مدريد مثلاً عليه اللوجو بتاع Adidas بس هنا أنا بتكلم عن الناس التوتو اللي بتروح التوكيل بتاع Adidas تشتري تي-شيرت ريال مدريد و تدفع فيه ال1500 جنيه إنما إحنا بنشتريه هاي كوبي من أبو 200 جنيه .. جزء من الفلوس دي بيروح للنادي و جزء من الفلوس بيروح لAdidas و حتي بيفضل جزء بيروح لشركة طيران الإمارات اللي إسمها مكتوب علي تي-شيرتات الفرقة .. في موسم 2015-2016 لما فرقة ليستر سيتي كسبت الدوري الإنجليزي إتقال إن شركة Puma كانت حاطه في السوق 25,000 تي-شيرت بس علي أساس إن محدش كان عارف مين هم ليستر سيتي دول أساساً بس لما الفرقة خدت الدوري و بقي إسمها علي كل لسان الشركة باعت 100,000 تي شيرت .. قول كل تي-شيرت بيتباع ب70 جنيه إسترليني يعني الشركة كسبت 7 مليون جنيه إسترليني يعني بتتكلم عن 7 أضعاف الفلوس اللي هي بتدفعها للنادي في سنة .. عشان بس أحطك برده في الصورة .. نادي زي مانشستر يونايتد اللي بيلبس تي-شيرتات Adidas بيبيع في السنة بالميت خالص مليون تي-شيرت يعني بتتكلم في أرباح بتوصل 70 مليون جنيه إسترليني.
غير التي-شيرتات فيه الشورتات و الشرابات و جوانتيهات حراس المرمي .. كل ده بيوريك ليه Puma مستعدة تدفع الفلوس دي كلها عشان فرقة مانشستر سيتي تلبس تي-شيرتات عليها اللوجو بتاعهم .. خلي بالك من نقطة تانية .. مانشستر سيتي مش حاجة واحدة إنما هو جزء من كيان كبير شوية اسمه City Football Group أو CFG .. المفروض إن CFG دي تحتيها كذا نادي متوزعين حول العالم أكبرهم و أشهرهم هو مانشستر سيتي .. الإتفاق اللي إتمضي كان بين شركة Puma و بين CFG عشان فرق كرة القدم رجاله و ستات بتوع نادي مانشستر سيتي و معاهم فرقة جيرونا اللي بتلعب في الدوري الإسباني و فرقة أتليتيكو توركي اللي بتلعب في الدوري الأوروجواياني و فرقة سيشوان جوينيو Sichuan Jiuniu اللي بتلعب في الدوري الصيني يلبسوا تي-شيرتات عاملاها Puma .. الناس اللي قارية شوية في الكورة و بتسأل نفسها هو مش فيه فرقة في الدوري الأميريكي MLS إسمها نيويورك سيتي اللي كان بيلعب فيها (أندريا بيرلو Andrea Pirlo) و (دفيد فيا David Villa) هي كمان تبع CFG؟ .. الناس دي دحيحة أوفر بس أنتوا عندكوا حق و فرقة نيويورك سيتي مش حتلبس تي-شيرتات Puma إنما حتلبس تي-شيرتات Adidas لإن الدوري الأميريكي أو MLS كله علي بعضه ماضي عقد مع Adidas إن كل أندية الدوري تلبس تي-شيرتاتهم و العقد ده إن شاء الله مكمل لحد 2024.
صحيح يبان إن رقم 650 مليون جنيه إسترليني ده رقم كبير و تحس إنك أول ما تسمعه إن Puma دافعه دم قلبها و إن خلاص كده يا جدعان اسم مانشستر سيتي بقي علامة مسجلة زيه زي Apple بس الحقيقة مش كده .. الحقيقة مش كده خالص .. تقريباً أي نادي من ضمن كبار الدوري الإنجليزي الممتاز (ما عدا مانشستر يونايتد حتفهم ليه كمان شوية) لو قرر إنه بكره الصبح يدور علي شركة جديدة تعمله تي-شيرتاته فغالباً حيتدفعله رقم قريب أوي من ده .. خد عندك تشيلسي أو أرسنال مثلاً .. أرسنال كان ماضي عقد مع Puma و بداية من موسم 2020 لحد 2024 حيلبسوا تي-شيرتات Adidas .. تشيلسي ماضي عقد مع Nike مدته 15 سنة بدأت من موسم 2017/2018 و الإتنين بحوالي 79 مليون دولار في السنة.
الحقيقة إن الدوري الإنجليزي شعبيته بتزيد يوم عن يوم و بالتالي شركات كتير بتحاول تحط إسمها جنب أسامي أندية كبيرة .. خد عندك مثال علي كده نادي تشيلسي .. ده نادي ماضي عقد مع شركة Nike عشان هي اللي تعمله التي-شيرتات .. ماضي عقد مع شركة يوكاهاما Yokahama بتاعة كاوتش العربيات عشان إسمها يتحط علي التي-شيرت .. ماضيين عقد مع شركة بيرة إسمها كاراباو Carabao عشان إسمها يتحط علي تي-شيرتات التدريب بتاعة الفرقة .. ماضيين عقد مع شركات Beats بتاعه السماعات و مع شركة EA Sports و مع شركة إيريكسون السويدية Ericsson و مع شركة هيونداي Hyundai الكورية بتاعة العربيات ومع شركة Sony Music ومع دار أزياء إسمه William Hill و مع شركة إسمها هوبولت Hubolt بتاعة ساعات .. هنا إنت محتاج تاخد وقفة و تحط نفسك مكان اللي ماسك شركة Hubolt دي .. دي شركة بتصنع ساعات زيها زي Rolex و زي Omega بس طبعاً محدش عارفها ولا حد حيعرفها و مهما صرفوا ملايين عشان يعملوا إعلانات محدش حيعرفهم .. الحالة الوحيدة إن ولد زي حالاتي يحب إنه يلبس ساعة من ماركة محدش يعرفها هي إنه يشوف إسمها علي تي-شيرت فرقة هو بيشجعها و دي طريقة Marketing فعالة جداً و هي دي اللي شركة زي We عملتها .. سوق الموبايلات في مصر خلاص تشبع و بقينا كلنا عارفينه بOrange اللي لحد دلوقتي فيه ناس بتقول عليها موبينيل و معاها فودافون و إتصالات .. الحاجة الوحيدة اللي حتخلي الناس تعرف إن فيه حاجة إسمها We إنها تعمل عقد رعاية مع فرقه كورة بتتشاف من ملايين الناس في مصر و الحقيقة إن مفيش غير الأهلي اللي ينطبق عليه الكلام ده.
من الحاجات اللي يمكن تخليك تضحك و تقول اه يا زمن خليت الأعمي ساعاتي لما تعرف إن لما أول موسم للدوري الإنجليزي بصورته الحالية سنة 1992-1993 إتلعب مكنش فيه ولا فرقة لابسه تي-شيرتات عليها اللوجو بتاع Nike .. دلوقتي كل حاجة عليها إعلان و كله بثمنه .. فيه شركة بتصنع مخدات و مراتب إسمها Mlily زي ماستربيد كده عندنا منزله ملايات و مخدات و مراتب عليها اللوجو بتاع مانشستر يونايتد و دي تقريباً مبيشتريهاش حد إلا لما يقرر إنه حيبقي سنجل طول عمره .. حتي الإتحاد الإنجليزي لكرة القدم دلوقتي بيدور علي شركة راعية يتحط إسمها علي مكن VAR اللي المفروض انه حيتم تطبيقه في ماتشات الدوري بداية من موسم 2020.
فيه نقطة مهم تكون في دماغك برده .. العقد اللي بين مانشستر سيتي و بين شركة Nike اللي هي الشركة الراعية للنادي حالياً إتمضي سنة 2013 و بيقول إن الشركة تدفع للنادي 16 مليون دولار في السنة .. علي الورق إن العقد اللي إتمضي بين السيتي و بين Puma يعتبر زيادة فاجرة في الفلوس اللي بتخش للنادي لإن بعد ما كان بيخشله 16 مليون دولار حيخشله 86 مليون دولار يعني بتتكلم في زيادة 81% بس الفلوس دي كلها مش حتروح لجيب مانشتر سيتي لوحده لإن زي ما قلتلك السيتي هو مجرد جزء من كيان كبير إسمه CFG .. بناء علي الحسابات بتاعتهم اللي إتنشرت سنة 2017 فمجموعة CFG دي صحيح إنها بتضم كذا نادي بس أكتر نادي بيجيبلهم فلوس هو مانشستر سيتي .. أكتر من 92% من الأرباح بتاعتهم جايه من السيتي .. ده معناه إن ال86 مليون دولار في السنة مش كلهم حيروحوا للسيتي إنما حيروح منهم 92% بس يعني بتتكلم في حوالي 79 مليون دولار في السنة.
زي ما قلتلك الإستثناء الوحيد هو مانشستر يونايتد اللي ماضي عقد خزعبلي مع شركة Adidas مدته 10 سنين و حيخلص سنة 2026 و اللي بيقول إن الشركة حتدفع للنادي 99 مليون دولار في السنة .. اللي فعلاً كان في إيده إنه يعدي مانشستر يونايتد هو ليفربول .. العقد اللي بين ليفربول و بين New Balance مكمل لحد 2020 و اللي بناء عليه النادي بياخد 45 مليون جنيه إسترليني في السنة ولما العقد خلص سنة 2020 و راحوا مضوا عقد مع شركة Nike بقيمة ما بين 60-70 مليون جنيه استرليني في السنة .. بما إننا جبنا سيرة كل كبار إنجلترا ما عدا توتنهام فخليني أقولك إن ليهم عقد مع Nike بيخليهم يدفعوا للنادي 40 مليون جنيه إسترليني في السنة بس إحنا مش عارفين العقد ده حيخلص إمتي بس اللي أنا متؤكد منه إن بعد إفتتاح توتنهام لاستادهم الجديد فهم يستحقوا عقد رعاية تي-شيرتات جديد و فيه فلوس أكتر من كده.
المصادر:
- مقالة بعنوان Inside the World of Multi-million Pound Kit Deals نشرت في جريدة The Daily Mail البريطانية وده لينك المقالة الأصلية:
https://www.dailymail.co.uk/sport/football/article-6763467/Inside-world-multi-million-pound-kit-deals-Man-City-Puma-agreement.html - مقالة بعنوان City Football Group’s $650m kit deal with Puma has been described as staggering, but it’s not .. نشرت في مجلة Forbes و ده لينك المقالة الأصلية:
https://www.forbes.com/sites/bobbymcmahon/2019/03/04/city-football-groups-650m-kit-deal-with-puma-has-been-described-as-staggering-but-its-not/
