لينك التسجيل الصوتي للمقالة علي Sound Cloud:
https://soundcloud.com/user-112011687-312727988/m4a-8
فاكر لما كنت بتقعد انت وصحابك علي القهوة أو و انتوا بتلعبوا PlayStation .. عارف اني حسستك زي ما تكون عجزت و علي المعاش و بتفتكر أيام الشقاوة بس فاكر انت الأيام دي؟ .. أكيد عدي عليك نقاش هو مين أحسن فريق لعب في الدوري الإنجليزي؟ .. لو انت أرسنالي فأكيد بتقول الفرقة اللي متغلبتش Invincibles بتاعة موسم 2003-2004 .. لو انت مانشستراوي فانت ممكن تقول فرقة مانشستر يونايتد اللي كسبت ثلاثية الدوري و الكاس و دوري الأبطال في موسم 1999-2000 .. لو انت مانشستراوي بس الناحية الثانية فحتقول فرقة مانشستر سيتي تحت إيد (بيب جوارديولا Pep Guardiola) في موسمه الثاني لما كسروا حاجز ال100 نقطة في الدوري .. كلهم فرق علي عيني و علي راسي بس لسبب ما كله بينسي فرقة تشيلسي اللي كسبت الدوري الإنجليزي في موسم 2004-2005 واللي كان ماسكهم وقتها طيب الذكر (جوزيه مورينيو Jose Mourinhu) .. فيه منكوا بيهرش في شعره و بيحاول يفتكر الفرقة دي لإن زي ما قلتلك محدش في الإعلام بيتكلم عنهم فخليني أرصلك شوية أرقام عن اللي عملته فرقة تشيلسي في الموسم ده وحاول تستوعب الأرقام دي معناها ايه:
- تشيلسي كسب الدوري موسم 2004-2005 ب95 نقطة و لحد الوقت ده كان أكتر عدد نقاط توصلها فرقة في موسم وفضل ده أعلي رقم لحد ما في موسم 2017-2018 مانشستر سيتي كسروا الرقم ده و عدوا حاجز ال100 نقطة.
- تشيلسي كسب الدوري الموسم ده ب29 فوز وده رقم قياسي متكسرش إلا موسم 2016-2017 لما تشيلسي برده كسبوا الدوري وقتها.
- تشيلسي كسبوا الدوري بأكتر عدد شباك نظيفة اللي هم 25 .. أنت متخيل فرقة تلعب 25 ماتش في الموسم مدخلش فيهم ولا جون .. انت متخيل؟
- تشيلسي كسبوا الدوري بأقوي دفاع .. موسم كامل مدخلش فيهم إلا 15 جون.
- تشيلسي كسبوا الدوري من غير ما يخسروا ولا ماتش علي أرضهم بس خسروا ماتش واحد طول الموسم وكان قصاد مانشستر سيتي.
- أخيراً ودي إحصائية ممكن متبقاش بأهمية النقاط اللي فاتوا إن تشيلسي كسب الدوري و بينه وبين أرسنال في المركز الثاني 12 نقطة .. اه نسيت أقولك .. أرسنال ده اللي خد المركز الثاني كان هو هو فرقة الInvincibles اللي الموسم اللي قبله كسبوا الدوري من غير ما يخسروا ولا ماتش.
أتمني تكون بدأت تستوعب وجهة نظري .. تشيلسي موسم 2004-2005 كان من أحسن الفرق اللي كسبت الدوري الإنجليزي في تاريخه و النهارده انا عايز أقف شوية قصاد إزاي؟ .. إزاي ده حصل؟ .. لإن القصة صحيح وراها فلوس كتير صرفها (رومان أبراموفيتش Roman Abramovich) بعد ما إشتري النادي الموسم اللي قبله اللي هو 2003-2004 بس في نفس الوقت الموضوع أعقد من كده سيكا .. عشان تفهم اللي عمله (مورينيو) لازم أرجعك للسنة اللي قبلها .. هو ايه اللي حصل في موسم 2003-2004؟
لما (إبراموفيتش) مسك تشيلسي جاب مدير فني إيطالي إسمه (كلاوديو رانييري Claudio Ranieri) و الرجل ده إحنا حفظنا اسمه بعدها بسنين لما كسب الدوري الإنجليزي مع لييستر سيتي .. المهم إن (رانييري) من الناس المقتنعة بإن عشان تبني فرقة تعرف تنافس علي بطولة يبقي لازم تحت إيدك عمود فقري ثابت مبيتغيرش .. محتاج حارس مرمي .. محتاج قلب دفاع .. محتاج لاعيب إرتكاز .. محتاج مهاجم .. (رانييري) كان تحت إيده (جون تيري John Terry) وده قلب الدفاع وجاب معاه (بيتر تشيك Peter Czech) كحارس مرمي و جاب (أريين روبين Arjen Robben) كمهاجم .. (رانييري) عمل اللي يقدر عليه مع تشيلسي في الموسم الوحيد اللي إشتغل فيه معاهم .. ده الموسم اللي أرسنال اللي كان ماسكه وقتها (ارسين فينجر Arsene Wenger) بفرقته الInvincibles كسبوا الدوري بس الناس بتنسي إن تشيلسي في الموسم ده كانوا الثاني .. في الموسم ده هم مكسبوش الدوري بسبب ماتش واحد خسروه ضد أرسنال .. في الموسم ده تشيلسي طلع من نص نهائي بطولة Champions League لما خسروا من موناكو مع إنهم كان ممكن يكسبوا البطولة .. يمكن عشان كده (إبراموفيتش) مشي (رانييري)؟ .. الفرقة فضلت ماشيه زي الفل طول الموسم و بسبب خسارتين بس طلعوا من الموسم بلا حمص.
(مورينيو) لما جه مبدأش من الصفر .. هو بني علي نفس الأساسات اللي حطها (رانييري) .. نرجع تاني لأهم نقطة وهي العمود الفقري .. (مورينيو) كان عنده (تشيك) كحارس مرمي .. في الدفاع كان عنده (جون تيري) و جاب جنبه (ريكاردو كارفالو Ricardo Carvalho) .. في الإرتكاز جاب (كلود ماكلاليلي Claude Machalili) .. وفي الهجوم بعد ما كان عنده (روبين) بس جاب جنبه (ديديه دروجبا Didier Drogba) .. (مورينيو) بني عمود فقري قوي جداً لدرجة إنك لو جيت تقارنه بالعمود الفقري لفرقة زي Invincibles بتاعه أرسنال فانت فعلياً مش حتلاقي فروق .. خد عندك مثلاً الهجوم حتلاقي (دروجبا) قصاد (تييري هنري Thierry Henry) .. في خط النص حتلاقي (باتريك فييرا Patrick Viera) قصاد (ماكاليلي) .. في الدفاع حتلاقي (سول كامبيل Soul Campell) قصاد (جون تيري).
(أرسين فينجر) بعد اللي عمله في موسم 2003-2004 كان تحت إيده فرقة جامدة جداً .. 11 لاعيب من أحسن لاعيبه العالم في مراكزهم .. 11 لاعيب جاهز إشتراهم (فينجر) وكان عارف هو بيشتري إيه .. خلال 18 شهر بس كان (فينجر) خد الفلسفة دي اللي هي نشتري لاعيبه جاهزه و رماها في الدرج و بدأ يمشي بإستراتيجية جديدة شبه إستراتيجية برشلونة شوية وهي إنه يروح يشتري لاعيبه صغيرين في السن و يبدأ يجهزهم هو علي حسب دماغه .. (مورينيو) لما جه تشيلسي في موسم 2004-2005 خد فكرة (فينجر) اللي هو رماها في الدرج و بدأ يطبقها .. انا مش حوجع دماغي .. انا حشتري لاعيبه جاهزة بس إمكانياتها ماشية مع طريقة اللعب اللي انا عايز ألعب بيها .. نقطة تانية وهي إن قبل ما تشيلسي ياخد الدوري علي إيد (مورينيو) مكنش حد شايف إن تشيلسي فرقة تقدر تاخد الدوري أصلاً .. هم كانوا زي بيراميدز دلوقتي كده فرقة معاها فلوس تقدر تشتري لاعيبه بس معندهاش التاريخ ولا الشخصية اللي تخليهم ياخدوا الدوري .. من موسم 1995-1996 لحد موسم 2003-2004 مكنش فيه حد بياخد الدوري الإنجليزي غير مانشستر يونايتد و أرسنال.
ده بالنسبه للإنتقالات .. بالنسبة لطريقة اللعب نفسها ففيه حاجه مهمة تكون في دماغك إن أندية إنجلترا أغلبها وقتها كانت بتلعب 4-4-2 .. (مورينيو) لما جه كان بيلعب 4-3-3 .. ده معناه إيه؟
- ده معناه إن لو انت بتلعب ب3 في نص الملعب (ماكاليلي) إرتكاز و قصاده (مايكل إيسيان Michael Essien) و جنبه (فرنك لامبارد Frank Lampard) فانت كده بقي عندك زيادة عددية في نص الملعب قصاد أي فرقة تلعب قدامك ب4-4-2 .
- الفكرة كلها في لاعيب الإرتكاز اللي هو (ماكاليلي) .. هو بيلعب بين خطي الدفاع و الوسط .. ده معناه إن لو مفيش حد من الإتنين في وسط ملعب الفرقة اللي ضد تشيلسي راح ضغط عليه ف(ماكاليلي) فعلياً عنده الوقت و الحرية إنه يشوف الملعب كله و يبدأ هجمة .. لو حد من الإتنين في وسط ملعب الفرقة اللي قصاد تشيلسي ضغط علي (ماكاليلي) فده معناه إن يا إما (إيسيان) يا (لامبارد) بقوا فاضيين.
- طريقة 4-4-2 معتمدة إن بيبقي عندك إتنين وينجات بيرفعوا كور عرضية كتير للإتنين المهاجمين .. في طريقة 4-3-3 انت ممكن تخلي الوينجين يضموا لجوه ال18 مع المهاجم و تخلي حد من الباكات بتوعك يا ‘ما (باولو فيريرا Paulo Ferreira) أو (وليام جالاس William Gallas) هو اللي يتقدم و يرفع كورة عرضية .. المدافعين اللي قدامك بدل ما كانوا بيمسكوا إتنين مهاجمين بقوا حيمسكوا 5 لاعيبه جوه منطقةال18.
لو انت بتلعب 4-3-3 قصاد حد بيلعب 4-4-2 فانت لو شغلت مخك وكان عندك لاعيبه بتفهم حتقدر تمسك الملعب منه .. مش بس كده .. (مورينيو) كان معاه مهاجم اللي هو (دروجبا) لازم إتنين مدافعين يمسكوه .. زود علي كده إنه برده كان تحت إيده إتنين وينجات بسهولة أوي يبدلوا مع بعض اللي هم (روبين) و (جو كول Joe Cole) .. (روبين) بيلعب برجله الشمال بس بيلعب علي الوينج اليمين عشان يخش جوه الملعب و يديك واحدة R2 في المقص .. لو الدنيا إتقفلت خالص و تشيلسي مش عارف يجيب جوان ف(مورينيو) بيطلع (إيسيان) و ينزل مكانه لاعيب مهاجم صريح زي (إيدور جودينينسين Eidur Gudjohnson) عشان يلعب كصانع ألعاب جنب (لامبارد) عشان التشكيله تقلب 4-1-4-1 يعني (دروجبا) بيلعب و وراه 4 لاعيبه بتساعده.
لو تيجي تسألني ليه تشيلسي موسم 2004-2005 مش محفور في الذاكرة كواحد من الفرق اللي تتسجل في التاريخ فتقديري الشخصي هو طريقة اللعب .. الكوره أجوان .. دي مش مجرد جملة مشهورة في التعليق كان دايماً بيقولها ربنا يديله الصحة كابتن (ميمي الشربيني) .. فعلاً الكوره جوان .. فرقة الإسماعيلي اللي كسبت الدوري المصري إنجازها محفور في التاريخ وفي دماغنا أكتر من أي دوري تاني كسبه الأهلي في تاريخه .. مش لإن الاهلي بياخد الدوري كتير إنما لإن مفيش فرقة في مصر خدت الدوري وفي نفس الوقت لعبت كورة هجومية و كانت بتجيب جوان بالطريقة اللي الإسماعيلي كان بيلعب بيها .. الإسماعيلي في الموسم ده لعب أحلي كورة ممكن فرقة كسبت الدوري المصري تكون قدمتها في تاريخ الدوري المصري .. نفس الكلام علي برشلونة مع (بيب جوارديولا) .. نفس الكلام علي أرسنال و فرقة Invincibles .. الفرقة كانت بتلعب 4-4-2 بطريقة هجومية أوفر .. الجناحين فيهم لاعيبه زي (روبيرت بيريس) و (فريدي ليونينبيرج) و قدام فيه (هنري) و (دينيس بيركامب) .. تشيلسي كان بيلعب 4-3-3 و راكنين الأوتوبيس و بيلعبوا علي الهجمة المرتدة بشكل مرعب .. صحيح تشيلسي كسبوا كتير و مخسروش خالص تقريباً بس طريقة اللعب كانت المشكلة .. مفيش الجوان الكتير .. مفيش الترقيص الكتير .. ده اللي خلي إسم تشيلسي موسم 2004-2005 ميعلقش في الذاكرة.
اللي مخليني واقف أوي قصاد موسم تشيلسي 2004-2005 أكتر من الأرقام و أكتر من إنهم كسبوا الدوري و أكتر من إنهم مخسروش إلا ماتش واحد و مخسروش ولا ماتش علي أرضهم هو معلومة إن ده كان الموسم الأول ل(جوزيه مورينيو) كمدير فني و الموسم الأول لكتير من لاعيبته في الدوري الإنجليزي وده يخليك تسأل نفسك سؤال وجودي أوي .. هل معني كده إن فكرة إن اللاعيب أو المدير الفني محتاج وقت عشان يتعود علي الأجواء الإنجليزية دي أسطورة؟ .. انا من الناس اللي كتير كتبت عن (مورينيو) و وصفته بإنه Nokia 3310 بتاع التدريب في الوقت اللي الناس كلها ماسكه موبايلات iPhone أو Android بس مينفعش تقول علي نفسك بتفهم كورة من غير ما تقف قصاد اللي عمله (مورينيو) و تستعجب .. أول موسم ليك بس تاخد الدوري .. بتلعب بطريقة دفاعية بدليل إن مدخلش فيك طول الموسم غير 15 جون و في نفس الوقت بتلعب بثلاثي هجومي من (دروجبا) و (روبين) و (داميان داف Damien Duff) و وراهم (فرانك لامبارد) .. انا واقف قدام فكرة الإهتمام بالتفاصيل أوي .. فرقة Invnivibles بتاعة أرسنال ناس كتير متعرفش إنهم إتعادلوا 11 ماتش في موسم 2003-2004 .. تشيلسي مخسروش إلا ماتش واحد .. هل الافضل إنك متخسرش خالص ولا إنك تكسب الدوري بأكبر عدد نقاط؟ .. انت مش متخيل كم الإهتمام بالتفاصيل اللي (مورينيو) كان مخلي لاعيبه تشيلسي توصله عشان ميدخلش فيهم إلا 15 جون في موسم.
فرقة تشيلسي موسم 2004-2005 كانت فرقة علي درجة عالية من الكفاءة .. هم كانوا تويوتا كورولا بتوع فرق الكورة .. تويوتا كرولا مش عربية سيكسي .. هي مش زي الفورد اللي مجرد إسمها يحسسك إن اللي راكبها ابن ناس .. وفي نفس الوقت هي مش زي الفولكس فاجن باسات اللي وانت سايق بيها بتدعي ربنا إن الفتيس بتاعها ميندلش معاك .. هي عربيه مش سيكسي .. شكلها مش حلو .. مش حتلاقي بنت راكباها .. بس هي عربية تعتمد عليها وانت مغمض .. هي دي فرقة تشيلسي موسم 2004-2005 .. فرقة مقدمتش كورة حلوة .. بس لو انت ماسك فرقة نفسك تاخد الدوري المصري من الأهلي ولا الزمالك كل اللي عليك تعمله تمسك الكاتالوج بتاع (جوزيه مورينيو) في الموسم ده تطبقه زي ما هو و حتعلم علي أي فرقة فيكي يا مصر.
المصادر:
فيديو بعنوان Were Chelsea’s 2004-2005 Premier League Title Winners Better than Arsenal’s Invincibles? نشر علي YouTube وده لينك الفيديو:
https://www.youtube.com/watch?v=UFcyWE5qzAU&t=141s
مقالة بعنوان Teams of the Decade #13: Chelsea 2004-2006 نشرت علي موقع Zonal Marking وده لينك المقالة الأصلية:
http://www.zonalmarking.net/2010/01/25/teams-of-the-decade-13-chelsea-2004-06/
