غالباً إسم (جوزيه مورينيو Jose Mourinho) لما بتسمعه بيطلع منك رد فعل علي حسب إنت بتشجع مين .. لو إنت تشيلساوي فحتلاقي نفسك سرحت كده و غمضت عنيك بتنهيدة خفيفة و كأنك بتفتكر أيام الإيكس بتاعتك .. لو إنت مانشستراوي فإنت غالباً ضغطك بيعلي و حتقلع اللي في رجلك تضربني به و إنت بتزعق متجيبش سيرة البني أدم ده قدامي تاني .. سواء إنت بتحب الرجل ده أو بتكرهه فإنت لازم لما تبص لCareer بتاعته تحترمه .. حنفهم إيه اللي حصله في أخر أيامه كمان شوية بس خليني الأول أخدك في رحلة سريعة لحلاوة البدايات قبل ما نوصل لخوازيق النهايات .. ده رجل عمره ما لعب كرة قدم كمحترف و رغم كده بقي واحد من أنجح المديرين الفنيين اللي الكورة شافتهم في تاريخها .. ده بالضبط لما تبقي عمرك ما مثلت في حياتك ولا حتي شكلك حلو في الصور بس يمر بيك الزمن و تاخد أوسكار أحسن ممثل.
(مورينيو) إتعلم كل حاجة هو يعرفها من كرة القدم بإنه كان بيتفرج .. 15 سنة بيتفرج و بيتعلم من مدربين كان شغال مترجم ليهم لحد في الأخر السنين دي كلها إترجمت في طريقة لعب .. إركن الأوتوبيس و إلعب علي المرتدات .. من أول ما العالم صحي علي خبر إن (مورينيو) بقي المدير الفني لنادي بورتو البرتغالي مرورا بالسنين اللي قضاها في تشيلسي و إنترميلان و ريال مدريد و مفيش فرقة في العالم بتدافع و تلعب علي المرتدات زي الفرق اللي هو بيدربها .. طريقة لعب (مورينيو) زي ما هو شخصياً شرحها بتتلخص في إن لو أنا معايا عربية فيراري Ferrari و بتسابق مع (مورينيو) اللي كان معاه عربية FIAT فعشان هو يكسبني يا يخبطني خبطة جامدة تخلي العجل بتاعي يفك من عربيني يا إما يحطلي مياه في تنك البنزين .. اللي هو بإختصار عجّز الفرقة اللي قدامك بإنك متسبلهاش مساحات و إضربها بالمرتدات .. علي رأي الست (ليلي مراد) الله يرحمها كلام جميل كلام معقول مقدرش أقول حاجة عنه.
خلال أول 10 سنين في شغلانة التدريب دي مفيش حد حقق الأرقام بتاعته .. بطولتين Champions League .. أربع بطولات دوري في 4 دول مختلفة .. الرجل فضل 9 سنين محدش عارف يكسب الفرق اللي هو بيدربها علي أرضهم .. زي ما ناس كانت ولازالت الحقيقة بتقول إن المنافسة بين (ليونيل ميسي Lionel Messi) و (كريستيانو رونالدو Cristiano Ronaldo) هي أعظم منافسة بين إتنين لاعيبه كورة في التاريخ فأيام ما كان (مورينيو) بيدرب ريال مدريد و كان (بيب جوارديولا Pep Guardiola) بيدرب برشلونة كانت الناس بتقول إن دي أعظم منافسة بين عقلية إتنين مدربين في العالم .. فكر فيها كده .. (مورينيو) معاه (رونالدو) و (جوارديولا) معاه (ميسي) .. واحد بيلعب عشان يدافع و الثاني بيلعب عشان يهاجم .. بلا Game of Thrones بلا بتاع.
مشكلة (مورينيو) في رأيي هي حاجة أنا بسميها متلازمة النوكيا 3310 .. فاكر إنت الموبايل الإسطوري ده .. كان قوي جداً مبيتكسرش حتي لو وقع منك و إنت واقف في البلكونة .. بطاريته بسم الله ما شاء الله ممكن تكمل شهر شغل علي شحنة واحدة .. صوت مفيش أنقي من كده .. شوية Games عليه تضيع وقتك فيهم خصوصا الSnake .. عايز جرابات له حتلاقي بكل شكل و لون يعجبك .. النوكيا 3310 كان موبايل متكامل بس إيه اللي حصله .. مطورش من نفسه .. فضل علي حاله .. طلع الموبايل اللي بيتفتح و يتقفل .. طلع الموبايل الTouch Screen .. هوبا لقينا فيه حاجة إسمها Android .. شوية و لقينا فيه وحش نازل إسمه iPhone .. بس فضل النوكيا 3310 محلك سر .. ده بالضبط اللي حصل ل(مورينيو) .. كرة القدم تطورت بشكل مذهل بس هو فضل علي حاله .. لما (مورينيو) بدأ يمرن و الكلام ده كان سنة 2000 كانت الأندية بتقلق إن لاعيبه الكورة وقتها كانوا بيشربوا خمرة كتير و بيسهروا كتير و إفتكر فضايح (رونالدو Ronaldo) البرازيلي و فشخان المنطق اللي كان بيعمله (رونالدينيو Ronaldinho) للناس اللي جيل الثمانينات و التسيعنات .. دلوقتي لاعيبه الكورة بقوا بيتعاملوا مع صحتهم زي ما مراتك بتتعامل مع طقم النيش كده .. لاعيبه الكورة الأوروبيين بقوا بيشربوا القهوه الإسبرسو اللي من غير مياه Dehydrated عشان صحية أكتر .. فرق الكورة بقي فيها ناس موارهومش لا شغلة ولا مشغلة إلا إن معاهم Laptop عمالين يسجلوا عليه اللاعيبه جريت قد إيه في التدريب و شربت كام لتر مياه و كلت الساعة كام و نامت الساعة كام.
التطور الكبير في كرة القدم خلق جيل جديد من المدربين .. إذا كان (مورينيو) هو النوكيا 3310 فالجيل الجديد هو الAndroid و الiPhone .. خد عندك واحد منهم زي (يورجين كلوب Jurgen Klopp) .. الجيل الجديد قال بدل ما نركن الأوتوبيس و نستني الخصم هو اللي ييجي إحنا اللي حنروحله نضغط عليه و نقرفه في عيشته و حنقطع منه الكورة في نص ملعبه .. الفكرة دي بتتسمي الضغط العالي أو Pressing .. هنا أنا مش جاي أقول مين أحسن من مين أو مين صح و مين غلط .. اللي أنا عايز أوصله ليك إن في الوقت اللي كرة القدم فيه بتطور يوم عن يوم فضل (مورينيو) علي قديمه .. خد عندك مثال ثاني اللي هو (جوارديولا) .. ده رجل ورانا إن كرة القدم ينفع تتلعب بطريقة مختلفة لما كان ماسك برشلونة .. جت سنة 2012 لقيناه قرر يقدم إستقالته و ياخد سنة أجازة لإنه إكتشف إن كل أفكاره خلصت .. فيه ناس بتحب تقول إن السبب في إن (جوارديولا) قرر يبطل تدريب هو إن (مورينيو) فك شفرته و الحقيقة إن أنا موافق علي الرأي ده .. السنة دي (جوارديولا) قعدها في أميركا بيحاول يلاقي نفسه أو بيحاول يلاقي أفكار جديدة لحد ما مسك بايرن ميونيخ و هناك أفكاره إتضربت في الخلاط مع فلسفة إجري و متبطلش جري طول الماتش اللي الأندية الألمانية بتلعب بيها .. حيطلعلي حد يقولي اه ما حبيبك (جوارديولا) ده شال سبعة من ريال مدريد أيام ما كان ماسك بايرن ميونيخ .. أمين يا عم الحاج .. دلوقتي إنت لما بتتفرج علي مانشستر سيتي تحت إيده تحس إنك مسكت برشلونة و منتخب ألمانيا خدت من ده شوية و من ده شوية .. اللي أنا عايز أوصله ليك إن فيه ناس بتفضل تطور من نفسها و تطور من أفكارها بس الأخ (مورينيو) عاجباه دماغه فشخ يعني .. (زين الدين زيدان) مثال تاني لواحد خد فكرة تدوير اللاعيبه أو Rotation و خلاها تاخد قرصين فياجرا و ده اللي خلاه يكسب 3 بطولات Champions League ورا بعض .. كل ده و (مورينيو) مفخد و عاجباه دماغه و مش مقتنع إنه محتاج يتغير.
إذا كان زمان هو بيتفاخر بنفسه إن الفرق اللي بيمسكها هي شبه العربية الFIAT اللي كان بيقدر يكسب بيهم فرق راكبة فيراري و إنه إزاي أكتر مدير فني في العالم بيعرف يعمل من الفسيخ شربات بس لما مسك مانشستر يونايتد إدارة النادي عطته مفتاح عربية لامبورجيني و قالوله سوق يا معلم بس عايزين بطولات .. 370 مليون جنيه إسترليني ميزانية شراء لاعيبه إتحطت قدامه يبعزق فيها زي ما هو عايز .. مش كده و بس .. كان تحت إيده أكتر فرقة بتاخد مرتبات في إنجلترا .. إنت بتتكلم عن فرقة بتصرف علي المرتبات بس 6.5 مليون جنيه إسترليني في الإسبوع .. عشان أحطك في الصورة .. فرقة مانشستر سيتي اللي تعتبر أغلي فرقة في العالم بيتصرف عليها مرتبات 6 مليون جنيه إسترليني في الإسبوع .. فرقة ليفربول بتصرف 4.9 مليون جنيه إسترليني مرتبات .. أنا من الناس المؤمنة جداً إن أكتر حاجة بتوريك مدي رغبة النادي في النجاح مش كم الفلوس اللي هم بيصرفوها علي الصفقات الجديدة قد ما هم مستعدين يدفعوا كام مرتبات .. إنت يا (مورينيو) كان وراك إدارة مستعدة تديك عنيها بس تتنيل علي عينك تكسب بس للأسف جبلة.
في الوقت اللي كرة القدم الحديثة بقت بتدور حول إزاي تمسك كرة كتير و إزاي تجري كتير فشخ كان الأخ (مورينيو) بيعلم فرقته إزاي يأنتخوا ورا .. إزاي يركنوا الأوتوبيس .. تدري ليش؟ .. لإن دي الطريقة اللي هو ميعرفش غيرها .. دي الطريقة اللي هو نجح بيها و مش ناوي يغيرها .. الإحصائيات لوحدها توريك إزاي الرجل ده كان متأخر أوي في التفكير عن بقية مدربين إنجلترا و أوروبا كلها .. في موسمه الثالث و الأخير مع مانشستر يونايتد الفرقة كانت بتجري في المتوسط 106 كيلومتر في الموسم و ده أقل معدل جري وسط كل أندية إنجلترا .. عشان برده تتحط في الصورة … أكتر فرقتين كانوا بيجروا في الموسم كانوا ليفربول ب116.9 كيلومتر في الموسم و وراهم مانشستر سيتي ب115 كيلومتر في الموسم .. لاعيبه مانشستر يونايتد حققوا أقل عدد سبرينتات من تلتين أندية الدوري الإنجليزي .. (مورينيو) لإنه النوكيا 3310 بتاع الكرة فضل متخيل إن أحسن طريقة للفوز في وقتنا ده هو تقفيل المساحات و الدفاع الكويس و اللعب علي الهجمة المرتدة .. المشكلة إننا يا (مورينيو) في عصر السرعة .. عصر اللاعيبه مش بتبطل جري.
أسوأ خصلة في شخصية البني أدم هي العند .. إنه يفضل مقتنع بإن رأيه هو اللي صح حتي لو كل الأدلة و الإثباتات عماله تتحدف فوق دماغه إن فيه حاجة غلط و إنه محتاج يتغير .. في الأول العند بيبقي في الإصرار علي لا إن أنا صح و أنتوا اللي غلط .. شوية الأعصاب بتبدأ تفلت و يبدأ يدافع عن موقفه بزعيق و شتيمة و ممكن يغلط في اللي بينتقدوه .. نجاحاته القديمة بتفضل تقوله إنت مش محتاج تتغير .. إنت ناجح .. متسمعش لكلام أي حد .. بس إذا كان النوكيا 3310 مات بهدوء وسط إحترام الناس كلها له إلا إن (مورينيو) مشي من اليونايتد و الناس كلها بتسب و تلعن فيه .. المستقبل رايح ب(مورينيو) علي فين؟ الحقيقة أنا معرفش .. فيه ناس بتقول إنه رايح باريس سانجيرمان .. فيه ناس بتقول إنه رايح يوفينتوس .. أنا شخصياً نفسي أشوفه بيمرن تاني بس مش دلوقتي .. أنا نفسي إنه يهدي و يلاقي نفسه و يعرف إنه محتاج يتغير و يتطور و يتجدد .. التجديد سُنة الحياة .. (أرسين فينجر Arsene Wenger) فضل محلك سر و شوف في الأخر أهو إترمي في مزبلة تاريخ أرسنال أو علي الأقل ده رأي جمهور النادي .. أتمني إن ده ميكونش مصير (مورينيو).
المصدر:
مقالة بعنوان How Jose Mourinho failed to reinvent himself as football evolved .. نشرت في مجلة Financial Times و ده لينك المقالة الأصلية:
https://www.ft.com/content/56acdd82-02d2-11e9-99df-6183d3002ee1
