شهر مايو 2019 اتعمل اجتماع لرؤساء الأندية الأوروبية وفي الاجتماع ده اتكلم (إدوين فان دير سار Edwin van der sar) رئيس نادي أياكس أمستردام عن ازاي النادي بتاعه اللي وصل لنص نهائي بطولة Champions League في نفس السنة وأنا شخصياً كان وشي نحس عليهم لما توقعت إنهم يوصلوا الفاينال بس خرجوا في أخر لحظة قصاد توتنهام حيبقي مضطر إنه يبيع نص الفرقة مش لسبب غير إن بمنتهي البساطة النادي ميقدرش يضمن إنه السنة الجاية حيتأهل أصلاً إنه يلعب في البطولة في موسم 2019-2020 .. كان فيه حلول كتير للمشكلة دي .. كان ممكن (ألكساندر سيفرين Alexander Ceferin) رئيس الإتحاد الأوروبي لكرة القدم مثلاً يعني إنه يخفف شوية من القيود بتاعة لوائح اللعب النظيف عشان يخلي أندية زي أياكس تقدر تصرف فلوس تشتري لاعيبه من غير ما تكون خايفة إن يتوقع عليها عقوبة .. فيه حلول كتير أوي .. بس الرجل قعد يعصر في دماغه لحد ما وصل لفكرة ليه لا الأربع أندية اللي توصل لنص النهائي بطولة Champions League تتأهل بشكل أوتوماتيكي لدور المجموعات من البطولة الموسم اللي وراه؟
بصوا أنا كان ممكن أقبل الفكرة دي لولا البق الحمضان اللي هو برر بيه الفكرة .. هو قال إن الخطوة دي معمولة عشان الإتحاد الأوروبي لكرة القدم يدي فرصة لأندية زي أياكس وموناكو وليستر سيتي .. لحد هنا بقي وستوب يا عينيا .. ليستر سيتي مين يا روح قلبي اللي انت بتتكلم عنه؟
دور المجموعات من Champions League بيلعب فيه كل سنة 32 فرقة .. فيه 19 فرقة من ال32 دول بييجوا من 5 دوريات بس اللي هم الدوري الإنجليزي والإيطالي والإسباني والألماني والفرنسي .. يا ولاد التييت ده لو أياكس أمستردام كسب الدوري الهولندي بتخلوه يخش تصفيات قبل ما يتأهل لدور المجموعات .. غلطة مين دي يا (ألكساندر سيفرين)؟ .. بلاش دي .. أخر مرة فرقة فرنساوي كسبت Champions League كانت مارسيليا سنة 1993 بس زي ما انت عارف الفرنساويين لازم يحطوا التاتش بتاعتهم في الكورة زي ما بيحطوا التاتش بتاعتهم في الأكل .. النهائي كان بين مارسيليا وإيه سي ميلان وكان قبلها فيه ماتش في الدوري الفرنساوي ضد فرقة اسمها فالنينسيان تقوم إدارة مارسيليا دافعه فلوس لإدارة فالينسيان عشان الفرقة تخسر نفسها ومارسيليا يلعب باللاعيبه الاحتياطي عشان اللاعيبه الأساسية تريح لماتش الفاينال .. في السنه دي مارسيليا كسب الدوري كمان .. لما الفضيحة دي اتعرفت اتحاد الكورة الفرنساوي سحب لقب البطولة من النادي والإتحاد الأوروبي لكرة القدم عاقبهم بإنه منع الفرقة تدافع عن لقبها في الموسم اللي وراه وملعبوش في بطولة Champions League .. زي ما انت شايف ده دوري نجس .. يقوم الإتحاد الأوروبي لكرة القدم كل سنة يدي أول 3 أندية فرنسية في الدوري مشاركة أوتوماتيك في دور المجموعات بس الدوري الهولندي هم شايفينه دوري ابن وس$& مينفعش حتي الأول فيه يتأهل بشكل تلقائي.
أخر مرة فرقة إيطالي تكسب البطولة كانت إنترميلان سنة 2010 بس متفهمش ليه أربع أندية إيطالية بتتأهل بشكل أوتوماتيكي لدور المجموعات؟ .. من سنة 1997 مفيش فرقة ألماني كسبت أم البطولة دي غير بايرن ميونيخ بس برده فيه أربع فرق ألماني بتتأهل بشكل أوتوماتيكي لدور المجموعات .. بس إن أياكس أمسترادم ميقدرش يضمن لنفسه مكان في دور المجموعات تبقي مشكلتهم .. أصلهم فرقة ضعيفة بتلعب في دوري ضعيف .. اللي يغيظك إنك لو جبت فكرة (ألكساندر سيفرين) إنه يخلي الأندية الأربعة اللي توصل لنص النهائي تتأهل بشكل أوتوماتيكي للبطولة الموسم اللي وراه طبقتها علي ال10 سنين اللي فاتو تكتشف إن أكتر الأندية اللي كانت حتستفاد من الفكرة دي هي ريال مدريد (حيتأهل في 8 مواسم من العشرة) .. بايرن ميونيخ (كان حيتأهل 7 مرات من العشرة) .. برشلونة (كان حيتأهل 6 مرات من العشرة) .. طب ليه يا ابن التييييت انت جبت سيرة ليستر سيتي؟ .. أخر مرة ليستر سيتي لعب في البطولة النجسة دي كان في موسم 2017 ووصل لدور الثمانية يعني حتي مكانوش حيستفادوا من الفكرة بتاعتك .. يا مؤمن ده في الموسم ده ليستر سيتي كان بطل الدوري الإنجليزي وكانوا حيلعبوا في Champions League ورغم كده اضطروا يبيعوا أحسن لاعيب في الفرقة وقتها (إنجولو كانتي N’Golo Kante).
أكتر ناس متضايقة من الاقتراح بتاع (ألكساندر سيفرين) هم الأندية الإنجليزية ولو بصيت لدماغهم حتلاقي إن ليهم منطق برده .. زمان وزمان ده اللي هو موسم 2006-2007 لحد موسم 2008-2009 كان من ضمن الأربع أندية اللي بتوصل لنص النهائي دوري أبطال أوروبا بيبقي فيهم 3 أندية إنجليزية اللي هم 3 من الأربع أندية الكبار أو Top Four زي ما كانوا بيتسموا اللي هم أرسنال ومانشستر يونايتد وليفربول وتشيلسي .. لو كنت وقتها قلت إني حطبق فكرة (ألكساندر سيفرين) مكنتش حتفرق .. أصلهم أربع أندية بيلعبوا الكراسي الموسيقية مع بعض في الدوري وبالتالي حيتأهلوا بشكل تلقائي للبطولة .. دلوقتي الوضع إختلف .. دلوقتي بقي عندك معاهم مانشستر سيتي وتوتنهام وإحتمال ينضم ليهم وولفرهامبتون وليستر سيتي تاني .. بتتكلم عن 6 أندية أو أكتر حيقطعوا هدوم بعض عشان ياخدوا الأربع مراكز الأولي للدوري عشان يتأهلوا لChampions League فلما انت تيجي تقولي إن الأندية الأربعة اللي حتوصل نص النهائي حتتأهل بشكل تلقائي لدور المجموعات فانت كده بتقتل المنافسة في الدوري الإنجليزي .. الموسم الجاي إن شاء الله أندية مانشستر سيتي وليفربول وتوتنهام وتشيلسي حيلعبوا في Champions League .. إفرض يعني إن الأربعة وصلوا لنص النهائي ساعتها إيه اللي يخلي فرقة زي أرسنال تموت نفسها عشان تخش ضمن الأربعة الكبار لإن مش حيبقي فيه فايدة خلاص.
انا حابب أختم بس إن (إدوين فان دير سار) بيهري .. معلش أصل أياكس طول عمره حيبقي الإسماعيلي بتاع أوروبا .. يطلع في لاعيبه صغيرة ويبيعها .. ده انت شخصياً يا (فان دير سار) إتبعت سنة 1999 من أياكس ليوفينتوس .. وانت السنة دي بنفسك اللي بايع (فرانكي دي يونج Frankie de Jong) لبرشلونة وبايع (ماتياس دي ليجت Matias de Ligt) ليوفينتوس والناديين باسم الله ما شاء الله أبطال الدوري وحيتأهلوا بشكل أوتوماتيكي للبطولة السنة الجاية .. الحل لمشكلة أياكس إن بطل الدوري الهولندي يتأهل بشكل تلقائي لدور المجموعات من Champions League بس ده مش حيحصل .. تدري ليش؟ .. عشان دول شوية ناس نجسة في بعض مصلحتهم إن تفضل أندية دوريات إنجلترا وفرنسا وألمانيا وإيطاليا وإسبانيا هي اللي مسيطرة علي كرة القدم الأوروبية.
المصدر:
- مقالة بعنوان Ignore the Spin, Protecting the Elite is UEFA’s Only Concern .. نشرت في جرنان The Daily Mail وده لينك المقالة الأصلية:
https://www.dailymail.co.uk/sport/football/article-7238393/MARTIN-SAMUEL-Ignore-spin-protecting-elite-UEFAs-concern.html
