غمض عينك و حاول تحط نفسك مكان واحد مثلاً إسباني شغال في إتحاد الكورة بتاع إسبانيا و قاعد في إجتماع في مقر الإتحاد الدولي لكرة القدم FIFA .. هو كان إجتماع ممل ملوش أي ستين لازمة فإنت عشان تسلي وقتك ماسك الSmartphone بتاعك بتلعب كاندي كراش .. الكلام ده كان سنة 2010 أيام ما كانت جنوب أفريقيا بتنظم كأس العالم و تقريباً البني أدمين اللي بيتفرجوا علي كورة وقتها أغلبهم إن لم يكن كلهم كانوا شايفين ان اللي حصل ده غلطة و مينفعش تتكرر تاني و بقي رأيكوا إن كأس العالم ده يا يتنظم في أوروبا يا إما أميركا الجنوبية و ياريت في أوروبا .. المهم .. إنت واحد قاعد في إجتماع و فجأة يطلعلك واحد عرفت بعدين إن إسمه (حسن الذوادي) لابس جلابية بيضا و عمة علي راسه إنت أول ما شفته إفتكرته أراجوز جاي يقدم فقرة الساحر و بيقولك إن شاء الله علي سنة 2022 قطر عايزة تنظم كأس العالم.
قبل ما تعرف إن (حسن الذوادي) ده يبقي رئيس اللجنة العليا لتنظيم كأس العالم في قطر و قبل ما تحط الموبايل علي الطرابيزة عشان تقوله إنت إيه الهبد اللي إنت بتقوله ده؟ لقيته بيقولك و معلش عشان الجو عندنا حر في الصيف فإحنا عايزين كأس العالم يتلعب في الشتاء مش في الصيف و ده معناه إن أجندة ماتشات أغلب بطولات العالم كلها تقريباً حتتشقلب .. لسه حتهبد إيدك علي المكتب و تزعقله و تقوله إنت إيه اللي إنت بتقوله ده يا جدع إنت؟ لقيته بيقول لا كمان إحنا عشان برده في الشتاء الدنيا عندنا حر عليكوا فإحنا حنعمل إستادات مكيفة بالكامل .. إنت واقف مستني إن باقي الأعضاء بتوع الFIFA هم كمان يكون دمهم محروق زيك بس لقيتهم مبسوطين أوي من اللي بيسمعوه و هنا إنت بقي عندك إقتناع إن فيه حاجة غلط .. أصل أكيد فيه حاجة غلط.
بالورقة و القلم إن قطر تقدر تنظم كأس العالم عامل بالضبط زي إنك تكون لسه مخلف و عايز تعمل عقيقة لإبنك تعزم فيها الشارع كله بس إنت عايش في شقة أوضة و صالة .. قطر بلد مفيهاش إلا مدينة واحدة اللي هي العاصمة الدوحة .. قطر بلد عايش فيها 300,000 بني أدم معاهم الجنسية القطرية .. فكك من المغتربين اللي وصل عددهم 1.7 مليون لإن إنت مش بتقيس عدد سكان بلد بناء علي المغتربين اللي فيها بس 300,000 بني أدم دول ولا حاجة .. حي فيصل في الجيزة عايش فيه أكتر من 300,000 بني أدم .. صحيح إن قطر هي أعلي معدل دخل للفرد في العالم بس ده مش كفاية .. اللي حتكلم عنه النهاردة هو إزاي قطر عملت كل ده؟ .. أيا كان موقفك من الناس دول فحط مشاعرك علي جنب دلوقتي .. في المقالة دي أنا ححاول أجاوب علي شوية أسئلة أكيد بتلعب في دماغك من ساعة ما عرفت إن قطر فازت بشرف تنظيم كأس العالم:
- إيه هي حقيقة الإتهامات اللي بتوجه للقطريين إنهم سرقوا شرف تنظيم كأس العالم بإنهم دفعوا رشاوي؟
- هو كأس العالم ده حيتلعب فين في قطر لإن قطر دي بالضبط أوضة و صالة؟
- هل الخناقة بين قطر و جيرانها حتؤثر علي فرصتها في إن التنظيم يمشي زي السكينة في الجاتوه؟
خليني أبدأ بالسؤال الأهم .. هي إيه حقيقة إتهامات الفساد اللي كانت عماله تنزل فوق دماغ قطر من ساعة ما عرفنا إنها هي اللي حتنظم كأس العالم؟
خليني أحطهالك علي بلاطة .. مفيش بلد بتنول شرف تنظيم بطولة إياكش حتي تبقي تنظيم بطولة لعب الدومينو علي القهاوي أو بطولة رمي البلي لمسافات طويلة و العملية مش بتبقي فيها مجاملات و هدايا و لعب من تحت الطرابيزة .. إرجع بس بذاكرتك لكم الفضايح اللي كلنا سمعناها من واحد زي (تركي ال شيخ) عن كل التجاوزات اللي كانت بتحصل في كرة القدم المصرية و إنت حتستوعب أنا بقول إيه .. لما الإتحاد الدولي لكرة القدم FIFA عمل لجنة تحقيق تشوف هل فعلاً قطر إرتكبت تجاوزات لقوا نفسهم قدام حقيقة صعبة أوي .. هو مين مش بيتجاوز؟ .. في السباق علي مين ينول تنظيم كأس العالم 2018 اللي إتلعب في روسيا إتقالت إتهامات صعبة أوي علي الحكومة الروسية إنها حتي إستخدمت نفوذ المافيا عشان تخلي أعضاء FIFA يصوتوا لصالح روسيا بس لما لجنة التحقيق بدأت تشوف هل ده حصل أو لا؟ إكتشفوا إن إنجلترا و أستراليا اللي كانوا بينافسوا روسيا إرتكبوا تجاوزات أكبر من دي بكتير و الغريب إن الإنجليز و الأستراليين هم اللي كانوا بيشتكوا .. حتي مكتب التحقيقات الفيدرالي الأميريكي FBI دخل في هوجة التحقيقات في فوز قطر بشرف تنظيم كأس العالم و التقرير بتاعهم قال إنكوا لو عايزين تسحبوا البطولة من قطر فأنتوا تلغوا كأس العالم و تلغوا الدوريات الأوروبية و تلغوا Champions League عشان أنتوا ناس نجسة بتلعب ال3 ورقات و مقضيينها سرقة و رشاوي فالكل حط جزمة في بقه و إتخرس .. خصوصاً إن إتهامات الفساد اللي إتوجهت ضد قطر تحسها إتهام بإنهم بيفهموا في الBusiness أكتر ما هو إتهام فساد و خليني أفهمك أنا قصدي إيه.
وقت لما قطر كانت مقدمة الملف بتاعها لإستضافة كأس العالم كان اللي بيتنافس معاها هو أميركا .. عارف إن منافسة بين قطر و أميركا علي تنظيم كأس العالم عامل بالضبط زي لما يكون الأهلي بيتنافس مع بلدية المحلة علي مين يكسب الدوري بس مش مشكلة خليك معايا للأخر .. في الوقت ده اللي كان ماسك الإتحاد الأوروبي لكرة القدم يبقي أسطورة الكرة الفرنسية (ميشيل بلاتيني Michel Platini) و ده كان مشكلتي معاه إنه بيعرف المشكلة فين بس بيقترح ليها حل يخرب الدنيا .. الله ينور عليه و يباركله عرف إن فيه مشكلة كبيرة و هي إن أندية كرة القدم بتصرف أكتر ما بيجيلها و في الأخر بتلاقي نفسها بتداين و مش عارفة تسدد الفلوس اللي عليها زي ما حصل مع نادي إيه سي ميلان الإيطالي .. يقوم مقترح إن الحل هو لوايح اللعب النظيف FFP اللي كل اللي هي عملته إنها ضمنت إن حتفضل دوريات أوروبا كلها متحكم فيها الأندية الغنية و إن أي نادي فقير يفكر يخاطر و يصرف فلوس عشان ينافس يخاف و يقول لنفسه ليه أحط نفسي في مشكلة لما أنا ماشي جنب الحيط .. المهم إن في نوفمبر 2010 (تميم بن حمد) أمير قطر راح باريس يقابل الرئيس الفرنسي وقتها (نيكولا ساركوزي Nicola Sarkozy) و متفهمش هم قالوا إيه لبعض بس اللي إحنا متؤكدين منه إن (ساركوزي) قعد مع (بلاتيني) و قاله يحط صوته لقطر بدل أميركا و طبعاً لما رئيس الإتحاد الأوروبي لكرة القدم يختار قطر فلازم إتحادات الكرة المحلية في أوروبا كلها تروح وراه و إلا تبقي عيبة في حقه.
يدوبك ده حصل و سمعنا بعدها إن مؤسسة الإستثمارات الرياضية القطرية Qatar Sports Investments إشترت نادي باريس سانجيرمان .. مش كده و بس .. قناة BeIN Sports دفعت فلوس كتير أوفر عشان تشتري حق بث ماتشات الدوري الفرنسي الممتاز مع إن سعره مكنش يستاهل بصراحة الفلوس دي كلها .. مش كده و بس .. شركة Qatar Airways اللي هي الخطوط الجوية القطرية دفعت 19 مليار دولار عشان تشتري 50 طيارة A-320 Airbus من مصنع الشركة في مدينة تولوز الفرنسية.
يمكن الإتهام اللي كان ممكن يجيب أجل ملف تنظيم قطر لكأس العالم مش الفساد قد ما هو حقوق العمال الأجانب بس حتي الحكومة القطرية إشتغلت علي النقطة دي و لغت نظام الكفيل و دلوقتي شغالين علي مبادرات و قوانين كتير بالتعاون مع منظمة العمالة الدولية عشان يحلوا المشاكل دي.
السؤال الثاني و يمكن في رأيي إنه أهم سؤال هو .. هي بالصلاة علي النبي الماتشات دي حتتلعب فين دي قطر كلها أوضة و صالة؟
ماتشات كأس العالم حتتلعب في 8 إستادات .. منهم واحد كان مبني قبل كده و حيتعمله شوية تعديلات بس و 7 إستادات كاملة بتتبني من أول و جديد .. هنا إنت تاخد نفس عميق حبتين خصوصاً لو إنت مهندس موقع .. فيه من ال7 إستادات دول واحد إسمه إستاد لوسيل و ده اللي حيتلعب عليه ماتش النهائي إن شاء الله يوم 18 ديسمبر 2022 .. المهم إن الإستاد ده فكك إنه مكيف بالكامل زي ما قلتلك بس هو معمول عشان يستوعب 80,000 متفرج .. القطريين بيصرفوا فلوس كتير بشكل مخيف علي كأس العالم .. إنت بتتكلم عن 7 إستادات بتتبني From Scratch يعني إستادات جديدة لانج الميزانية المحطوطة لأي واحد فيهم بتتراوح ما بين 8 ل10 مليار دولار .. يعني بتتكلم عن 70 مليار دولار عشان الإستادات بس .. زود عليهم 200 مليار دولار تانيين عشان تعمل مشاريع بنية تحتية متنوعة من ضمنها مشروع مترو الإنفاق اللي حيربط الإستادات دي كلها ببعض .. الإستاد الوحيد اللي كان مبني قبل كده اللي هو إستاد خليفة الدولي و اللي إتسمي علي إسم جد (تميم) اللي أبوه (حمد) أطاح به في إنقلاب عسكري سلمي سنة 1995 إتعملتله التعديلات بتاعته و بقي جاهز يتلعب عليه أي ماتش بداية من 2018.
أما بقي بالنسبة للسؤال الثالث و اللي فعلاً عامل هسهس في دماغ الناس .. هي القطيعة بين دول الخليج و هنا أنا بتكلم عن السعودية و الإمارات و البحرين و معاهم مصر حتؤثر علي فرصة إن قطر تنظم البطولة كويس؟
الحقيقه إن الإجابة لحد فترة قريبة كانت اه لحد ما ربنا بعت للقطريين هدية من السما اللي هي طموح رئيس FIFA الحالي (جياني إنفانتينو Gianni Infantino) إنه يفضل في الكرسي و ميسيبوش .. بص يا سيدي .. جري العرف إن كأس العالم يلعب فيه 32 منتخب أغلبهم جايين من أوروبا بس الرجل عشان داخل إنتخابات علي رئاسة FIFA قريب و عايز يكسب أصوات دول أفريقيا و أسيا فهو عرض فكرة عبيطة أوي و هي يجري حاجة يعني لو المنتخبات اللي حتلعب في كأس العالم تزيد من 32 ل48 منتخب؟ .. عشان ميتقالش إن (إنفانتينو) قال الإقتراح ده مخصوص عشان الإنتخابات جوه FIFA فهو راح كلم إتحاد أميركا الجنوبية لكرة القدم اللي هو كومينوبل CONMEBOL بحيث إن رئيس الإتحاد ده يقدم ورقة لFIFA فيها إقتراح إن إحنا كنا ناويين إن كأس العالم 2026 اللي إن شاء الله حيتلعب بين أميركا و كندا و المكسيك هو اللي يتلعب ب48 منتخب بس مش حيجري حاجة يعني لو قدمنا المقترح ده بحيث الفكرة تتطبق بداية من كأس العالم في قطر 2022.
طبعاً لو ده حصل ففرصة إن منتخبات أفريقية و أسيوية مكنتش تحلم إنها في يوم من الأيام تلعب في كأس العالم حتزيد .. ده معناه إن شعبية (إنفانتينو) حتضرب في السما و بكده يكون ضمن إنه حيكسب الإنتخابات الجايه .. بس الأهم إن ده معناه إن إحتمال كبير قطر متقدرش تستوعب لوحدها كم الماتشات ده كله يعني فيه ماتشات لازم تتلعب بره قطر .. هنا ريق السعودية و خصوصاً الإمارات بيجري .. ماتشات كأس عالم يعني إهتمام إعلامي يعني سياحة يعني فلوس .. ساعتها الإماراتيين حيبصوا للسعوديين و يقولولهم الصلح خير يا أبونواف و محصلش حاجة يعني و إحنا أخوات.
طبعاً القطريين بيلعبوا لعبة Hard to Get اللي هي إتقل عشان ميتقالش عليك مدلوق ترجع العلاقات تاني .. تلاقي إن (حسن الذوادي) اللي بفكرك إنه رئيس لجنة تنظيم قطر لكأس العالم إتسأل علي إحتمالية إن قطر تتشارك مع جيرانها في إستقبال ماتشات خصوصاً بعد ما عدد الفرق اللي حتلعب يزيد ل48 كان رده يا جماعة المشكلة في التفاصيل يعني إزاي الفرق حتتمرن؟ و هل الدول اللي جنبنا عندها إستادات مؤهلة و ملاعب تدريب تستوعب؟ .. إنت ملاحظ إنه لو كان رافض الفكرة خالص كان قال لا و سكت .. مجرد إنك ترص المشاكل فده معناه إنك بتقول للطرف الثاني لو إنت عايز تعالي نقعد نحل المشاكل دي سوا و نمشي في سكة المشاركة في إستقبال الماتشات .. (حسن الذوادي) بإختصار رمي الكورة في ملعب السعوديين و الإماراتيين و إستني ردهم.
تبقي مشكلة قطر مع تنظيم كأس العالم في رأيي حاجتين:
- الحاجة الأولانية هي العنصرية الطبقية تجاه العمال الأجانب خصوصاً اللي جايين من الهند و باكستان و بنجلاديش .. بص أنا مستعد أسمع كلام من هنا لحد السنة الجايه عن قد إيه الحكومة القطرية بتسعي بجد إنها تخلي ظروف شغل العمال الأجانب دول أدمية و إن التفرقة الطبقية بين سكان قطر القطريين و بين العمال الأجانب متوصلش إنك تقول عليها تفرقة عنصرية .. و في نفس الوقت مستعد أسمع من هنا للسنة الجايه برده قصص عن إزاي الأمن في سوق واقف مثلاً بيمنع مواطن هندي شغال في قطر إنه يروح يتفسح في السوق عشان يخلوه مكان معمول بس للقطريين و للسياح الأجانب .. إزاي قطر حتتعامل مع القضية دي بالذات هي اللي حتحسم نجاح أو فشل البطولة.
- الحاجة الثانية و هي إن قطر زيها زي دول الخليج مفيهاش حتة تتراح عشان تتفسح فيها إلا المولات .. دلوقتي أنا حروح أشجع منتخب مصر اللي إن شاء الله يعني من غير مقاطعة يتأهل للبطولة فأنا مش حقضي أيامي كلها في الإستاد .. أكيد ححتاج أتفسح .. و عشان أتفسح في الدوحة يا حروح سوق واقف يا إما حروح أي مول .. غير كده مش حلاقي حتة أروحها.
ناس كتير حتلاقيها بتتكلم عن حاجات تانية زي مثلاً إن قطر بلد مينفعش تسكر فيها في الشارع .. هي مش السعودية في إنك ممكن تبقي ماشي في الدوحة تلاقي واحدة ست لابسه هوت شورت عادي جداً بس نقطة الخمور و نقطة تجريم الشذوذ الجنسي بالذات حتلاقي ناس ماسكين فيهم ولا المثل اللي بيقولك يابا علمني أبقي مهم قاله تعالي في الهايفة و إتصدر .. أصل معلش مش مشجعين دول العالم اللي جايين يشجعوا منتخبات بلدهم في كأس العالم كلهم شواذ يعني .. و لو علي الخمرة لو حتموت و تسكر روح أي بار مرخص أو في الفندق بتاعك إشرب منقوع البراطيش بتاعك براحتك .. لكن منسيبش الإستادات و البنية التحتية و الطرق و المواصلات و الVAR و هل فنادق الدوحة حتكفي ولا لا و نمسك في قضية الخمور و الشواذ و كأن هو ده شغلنا الشاغل يعني.
المصدر:
مقالة بعنوان Four Years to Go: Qatar on Course for its Improbable World Cup .. نشرت في جريدة The Guardian البريطانية و ده لينك المقالة الأصلية:
https://www.theguardian.com/football/2018/nov/20/four-years-to-go-qatar-on-course-for-its-improbable-world-cup
