من الحاجات اللي عايزك تبقي عارفها عن (كيفن برينس بواتينج Kevin Prince Boating) إنه خد أندية أوروبا كلها كعب داير بس في كرة القدم عادة دي مش بتبقي حاجة حلوة .. لما بنتخرج وبنشتغل بنسمع دايماً بلاش تفضل في شركة واحدة أكتر من 4 سنين لإنك حتزهق ولو زهقت حتبقي مش عايز تتعلم حاجة جديدة وفي نفس الوقت بنسمع بلاش تفضل تتنطط بين الشركات بحيث متكملش في شركة واحدة أكتر من سنة لإن ده بيبعت الرسالة الغلط عن شخصيتك وبيخوف أصحاب الشغل منك .. في كرة القدم نفس الفكرة .. الناس اللي زي (ستيفن جيرارد Steven Gerrard) أو (فرانشيسكو توتي Francisco Totti) إنت تقدر تعجب بإنتماءهم لأنديتهم زي ما إنت عايز بس في نفس الوقت متقدرش تنكر إن اللاعيبه اللي زي دي ضيعت علي نفسها فرصة إنها تكسب بطولات كتير أوي لو كانوا قبلوا يروحوا أندية تانية حفيت عشان تحاول تشتريهم .. في نفس الوقت لما تبص علي الCareer بتاعة لاعيب زي (زلاتان إبراهيموفيتش Zlatan Ibrahimovic) صحيح هو لاعيب كويس بس يمكن عشان مبيقعدش في النادي اللي بيلعب فيه أكتر من سنتين فبرده ضيع علي نفسه فرصة إنه يتقال عليه أسطورة نادي معين .. الكلام اللي أنا قلته ده كله ترميه في الزبالة لما تيجي تتكلم عن لاعيب زي (كيفن برينس بواتينج).
إنت بتتكلم عن لاعيب كورة قبل ما يروح برشلونة بدأ الأول في نادي هيرتا برلين الألماني وبعد كده راح توتنهام الإنجليزي وبعد كده رجع تاني ألمانيا لعب في بروسيا دورتموند .. شوية ورجع تاني إنجلترا عشان يلعب في بورتسموث .. جري الشريط 9 سنين حتلاقيه عدي علي 5 أندية لحد ما وصل لفرقة تحت بير السلم في إيطاليا إسمها ساسولو .. برشلونة يبقي النادي رقم 10 اللي (بواتينج) يلعبله .. ومش دي المعلومة الوحيدة اللي غريبة عنه .. أنا لحد دلوقتي معرفش هو مركزه إيه؟ .. شوية يلعب كمهاجم وشوية يلعب خط نص مهاجم وشوية يلعب جناح ولما كان في ميلان لعب خط نص .. أنا السؤال اللي حموت وأسأله لإدارة برشلونة هو إنتوا بالصلاة علي النبي شفتوا في البني أدم ده إيه خلاكوا تقولوا باااااااس هو ده اللي أنا نفسي فيه من زمان؟
عشان تبدأ تفهم هو (بواتينج) جه برشلونة ليه لازم تفهم الأول هو جه إزاي؟ .. هو جاي من ساسولو إعارة لحد أخر الموسم والعقد بيقول إن لو برشلونة عايزاه بعد ما مدة الإعارة تخلص فهم يقدروا يشتروه ب8 مليون يورو .. يعني برشلونة يدوبك حيدفعوله مرتب ولو عجبهم حيشتروه بفلوس قليلة أوي لإن ال8 مليون يورو دول مش فلوس بأسعار اليومين دول .. إذن إنت جايبه ببلاش ولو حتشتريه فإنت مش حتدفع فيه كتير .. ده معناه إنك مش جايبه عشان إنت حتموت عليه إنت جايبه تسد به خانة عشان لو لا قدر الله حصل حاجة ودي النقطة اللي إنت محتاج تفهمها كويس أوي .. النادي كان عايز مهاجم وهم حطوا لنفسهم شوية معايير عشان بناء عليها يقرروا يشتروا مين:
- كانوا عايزين لاعيب خبرة مستعد يسف التراب عشان خاطر الفرقة لو بدأ كأساسي بس في نفس الوقت معندوش مشكلة يسف التراب برده لو نزل إحتياطي.
- كانوا عايزين حد رخيص ميدفعوش فيه كتير.
- كانوا عايزين حد يجي من غير ما يعمل دوشة ويمشي من غير ما يعمل شوشرة.
لما تبدأ تفكر إنت شخصياً في إسم حد ينطبق عليه الشروط دي فإنت غالباً حتعاني عشان تلاقي حد أصلها شروط صعبة أوي لدرجة إنك حتسأل نفسك طب وهو أنا عليا بإيه لكل ده؟ .. إيه اللي يخليني ألعب عروستي عشان ألاقي مهاجم؟ طب ما أشوف اللاعيب السوبر المتاح وأدفع فيه وأشتري دماغي أصل أنا برده برشلونة يعني مش حرس الحدود .. الحقيقة إن إنت عندك حق بس الوضع اللي برشلونة فيه دلوقتي سببه ميكس غريب شوية بين هبد المدير الفني للفرقة (إيرنستو فالفيردي Ernisto Valverde) وبين فشل إدارة النادي إنها تخلص حبة من الصفقات اللي (فالفيردي) طلبها وبين إن الصفقات اللي (فالفيردي) طلبها وإتجابتله طلعت فشنك ومش قادرين يقدموا الأداء اللي كان متوقع منهم .. بصوا هي حوسة سودا حبتين بس ححاول أفهمالك براحة.
سنة 2018 لما روما طلعت برشلونة من دور ال16 من بطولة Champions League بفضيحة كان السبب في اللي حصل واضح قدام الناس كلها ومش محتاج يتشرح .. فرقة برشلونة مفيهاش دكة بدلاء تنفع تصد وقت الجد .. (لويس سواريز Luis Suarez) مكنش قادر يجري في ماتش العودة قصاد روما ومكنش له بديل .. صحيح إن مع نهاية الموسم النادي كان خد الدوري والكاس وده نجاح في حد ذاته بس الTarget اللي إدارة برشلونة حاطاه لنفسها هي إنها عايزه تكسب Champions League وعشان تكسب Champions League لازم يبقي عندك دكة بدلاء فيها عتاولة يقدروا ينزلوا يغيروا الماتش .. لو مش مصدقني إسأل (زين الدين زيدان) اللي لما الدنيا قفلت في وشه في ماتش النهائي نزل (جاريث بايل Gareth Bale) وهو اللي جابله البطولة في حين إن ليفربول مكنش عندهم البديل اللي كان ينفع يحل محل (محمد صلاح)
المهم إن إدارة برشلونة حطت الأولويات بالنسبة ليهم والأولوية رقم واحد كانت إنهم يجيبوا مهاجم سوبر وكانوا حاطين عنيهم علي (أنطوان جريزمان Antoine Griezmann) بتاع أتليتكو مدريد .. الكل توقع إن خصوصاً بعد ما (جريزمان) خد كأس العالم مع فرنسا إن جه الوقت إنه يطلع من أتليتيكو مدريد بس يا عيني إدارة برشلونة إتصدمت وأنا شخصياً معاهم لما اللاعب قرر يكمل في أتليتيكو وده القرار اللي أنا شخصياً مفهمتوش ومش قادر أفهمه لحد دلوقتي .. إدارة النادي قالت مش مشكلة عندنا (منير الحدادي) ممكن نستخدمه بس حتي (منير) مشي وفترة الإنتقالات الصيفية خلصت ودخلنا في نص الموسم ولسه مجبناش مهاجم .. زي أي حد بيتوتر بدأت إدارة النادي تدور علي أي حد .. أي حاجة أستر بيها نفسي يا ولاد الحلال.
إتعرض عليهم (ألفارو موراتا Alvaro Morata) بس لقوا سعره غالي ده غير إنهم حسوا إن لياقته البدنية مش في أحسن حالتها بس الحمد لله (دييجو سيميوني Diego Simeone) لبسه في أتيليتكو مدريد قال يعني هو ناقص يلبس أكتر من كده .. إتعرض عليهم (كريستيان سوتاني Christian Stuani ) اللي بيلعب في نادي جيرونا الإسباني بس لقوا إن الشرط الجزائي في عقده 15 مليون يورو فاستغلوه .. فكروا يرجعوا (كارلوس فيلا Carlos Vela) من أميركا .. شفت اليأس وصلهم لحد فين؟ .. ناس جوه النادي قالت طب ما نصبر لحد الصيف الجاي ونبعزق فلوسنا براحتنا أصل عمرنا ما حنعرف نشتري لاعيب سوبر في يناير .. بس ناس كتير جوه النادي التوتر وإحساس الخوف جواها خلاهم يقولوا نجيب أي حد وخلاص كده كده حيبقي سد خانة لحد ما إتقال إسم (بواتينج) اللي بفكرك إن أخر نادي هو لعب له في إسبانيا كان لاس بالماس.
إدارة برشلونة فعلياً وضعها زي الزفت دلوقتي .. هم بين نارين وفعلياً مش عارفين يعملوا إيه؟
- النار الأولانية إن سوق اللاعيبه دلوقتي مبقاش زي زمان لما كانت أندية أوروبية تتعد علي الصوابع اللي تقدر تشتري لاعيبه بصفقات تخليك تتنح من كتر الفلوس اللي بتتدفع .. دلوقتي اي حد يقدر يدفع .. خصوصاً إن إدارة النادي بتنزف فلوس .. برشلونة أكتر نادي في العالم بيدفع فلوس كمرتبات .. الوضع بقي سخيف لدرجة إن سنة 2018 إدارة النادي اضطرت تخفض ميزانية المرتبات بتاعتها ب28 مليون يورو عشان بدل ما المرتبات كانت بتبلع 70% من ميزانية النادي بقت بتبلع 66% بس وحتي دي نسبة مينفعش يتسكت عليها.
- بعد ما (نيمار Neymar) مشي النادي بقي محتاج يرجع تاني يعمل صفقات سوبر عشان سمعته متبقاش إنه بقي عامل زي الإسماعيلي كده اللي هو بيبيع لاعيبه عشان يصرف علي نشاط الكورة .. كان المفروض إن إدارة النادي تفهم إن ده مش حقيقي ومفيش حد عمره ما حيفكر في كده بس تقول إيه هم جاتلهم حالة رعب بعد ما (نيمار) مشي لدرجة إنهم مبقاش عندهم أي مانع إنهم يكسروا كل القواعد اللي كانوا حاطينها لنفسهم .. يحكي أن (ألبيرت سولير Albert Soler) اللي كان ماسك نشاط الكورة في النادي له تصريح مشهور أوي إن لو برشلونة طلع قال إنه مستعد يدفع 270 مليون يورو عشان يشتري إتنين لاعيبه بس فالناس حتقول عليهم مجانين .. هو قال كده يعني بيقصف جبهة باريس سانجيرمان اللي صرف الفلوس دي عشان يجيب (نيمار) و(كيلان إمبابي Kylian Mbappe) بس تقريباً هو نسي إن برشلونة دفع أكتر من كده عشان يشتري (عثمان ديمبيلي Ousmane Dembele) و(فيليبي كوتينيو Philippe Coutinho) وبعدها (ألبيرت سولير) نفسه مشي.
في وضع زي الزفت زي ده غالباً اللي بيصلح بوصلة النادي هو مجلس الإدارة خصوصاً لو بتتكلم عن نادي كبير زي برشلونة بس المشكلة إن برشلونة دلوقتي مجلس إدارته عامل زي شلة البنات المنفسنة من بعض .. خلال سنتين بس عدي علي برشلونة 4 مديرين لنشاط الكورة .. (راؤول سانيلهي Raul Sanllehi) وراه (ألبيرت سولير) وبعد ما مشي جابوا (إندوني زوبيزاريتا Andoni Zubizarreta) وبعده جه (روبيرت فيرنانديز Robert Fernandez) وهو كمان مشي .. المدير الرياضي (بيب سيجيورا Pep Segura) و(إريك أبيدال Eric Abidal) اللي يبقي سكرتير النادي والمساعد بتاعه (رامون بلانيز Ramon Planes) مشيوا .. وسط كل الهري ده الناس كلها جوه النادي عارفه إن أكتر واحد بيفهم فيهم هو (رامون بلانيز) بس طبيعة منصبه إنه مساعد سكرتير النادي مخلي صوته ميتسمعش .. رئيس النادي (جوزيب بورتميو Josep Bartomeu) اللي غير مجلس الإدارة هو معين حاجه إسمها مجلس المستشارين.
ده معناه إن (فالفيردي) هو مجرد مدرب للفرقة أو Coach مش مدير فني Manager يعني حتي هو مستقبله في النادي مش مضمون .. تيجي تشوف مين المسئول عن الإنتقالات؟ تلاقي مولد .. صفقة (بواتينج) اللي خلصها واحد إسمه (أرييدو برايدا Ariedo Braida) وده واحد جوه مجلس الإدارة ملوش شغلة ولا مشغلة وزهق إنه ملوش حساب فقرر يعمل أي حاجة عشان يظهر .. (روبيرت فيرنانديز) اللي بفكرك إنه كان ماسك نشاط الكورة هو اللي جاب (أرتور Arturr) يمكن اللاعيب الوحيد اللي برشلونة إشتراه في الفترة اللي فاتت اللي ينفع فعلاً تقول عليه ينفع يلعب في برشلونة بس الرجل مشي ومكملش .. صفقات برشلونة بسبب العشوائية في صنع القرار جوه مجلس الإدارة ماشية بمبدأ الفوضي الخلاقة .. هم جابوا (باولينيو Paulinho) رغم إعتراض ناس كتير بس الرجل أدي كويس وكان مهم للفرقة بس يدوبك قضي موسم ورجع تاني علي الصين اللي هو تبص لمجلس الإدارة وتسألهم طب مخلتهوش يقعد ليه؟ .. جابوا (أروترو فيدال Artuto Vidal) ولما جه إتقال إن يا جماعة إحنا جايبين لاعيب الخالق الناطق (باولينيو) بس الحقيقة إن الإتنين غير بعض وأديه قاعد علي الدكة مش عارف يطلع منها .. نفس الكلام علي (كوتينيو) اللي إتقال إنه خليفة (أندريس إنييستا Andres Iniesta) بس حتي الصفقة دي طلعت فشنك.
أظن إن خلاصة اللي عايز أفهمولك هو إن (بواتينج) جاي عشان (فالفيردي) يعرف يريح (لويس سواريز) شوية .. بس مش هو الحل الطويل الأجل اللي برشلونة محتاجه .. هم الحمد لله خلصوا صفقة (فرانكي دي يونج Frankie De Jong) من أياكس أمستردام علي أمل إنه يبقي خليفة (إنيستا) بس فيه خلايف كتير ناقصين .. دلوقتي خلاص قلتوا إن (أرتور) هو خليفة (تشافي Xavi) وإن شاء الله (دي يونج) هو خليفة (إنييستا) طب هو بالصلاة علي النبي مين خليفة (سيرجيو بوسكيتس Sergio Busquets)؟ أقرب لاعيب كان ينفع هو (رودري Rodri) وحفيتوا وراه عشان تجيبوه وفي الأخر راح أتليتكو مدريد .. ومين اللي مش حقول خليفة بس مين اللي حيلعب جنب (لويس سواريز)؟ .. إداره برشلونة مقتنعة إن الحل هو (جريزمان) وأراهنك إنهم حيرجعوا يجروا وراه الموسم اللي جاي بس إلي حين ما ده يحصل ففرقة برشلونة دلوقتي بالضبط عامله زي ما تكون مسافر من إسكندرية لأسوان ومعكش عجلة إستبن .. إنت معرض في أي لحظة إن الكاوتش يفرقع وساعتها حتفضل محتاس في الطريق.
المصدر:
- مقالة بعنوان How Did Barcelona End Up Signing Kevin-Prince Boating? .. ازاي برشلونة راحوا في الاخر إشتروا (كيفن برينس بواتينج)؟ .. نشرت في جريدة The Guardian البريطانية وده لينك المقالة الأصلية:
https://www.theguardian.com/football/2019/jan/22/barcelona-kevin-prince-boateng-transfer-planning
