اللي أنا عايز أتكلم عنه النهاردة هو نادي من أعرق أندية إيطاليا و أوروبا كلها .. نابولي .. نابولي دي تبقي الصعيد بتاع إيطاليا .. حاول و إنت بتقرأ المقالة دي تتخيل إنك بتتكلم عن نادي مركز شباب نابولي في محافظة سوهاج لإن دماغ الصعايده و هنا أنا بتكلم عن الإحساس بأهمية الصح و الغلط و إن فيه حاجة إسمها عادات و تقاليد و يمكن أهم حاجة هي تنشيف الدماغ دي صفات مشتركة بين الصعايده في أي حتة في العالم .. صعايدة أميركا هم هم صعايدة إيطاليا هم هم صعايدة مصر حبايبنا .. نفس الدماغ .. نفس المباديء تقريباً .. هنا يجي الكلام عن أهم شخصية في اللي بيحصل في نابولي دلوقتي .. (أوريليو دي لورينتيس Aurelio De Laurentiis) مالك نادي نابولي و (مرتضي منصور) بتاعهم .. فيه حاجتين لازم تكون فاهمهم عن الرجل ده .. الحاجة الأولانية إن بحكم شغلته كمنتج سينما فالرجل ده يستحق فعلاً إنه يتقال عليه دراما كويين Drama Queen .. ده رجل بيعشق النكد و بيلاقي نفسه في الخناق و المشاكل .. مبيعرفش يقعد من غير ما يشد ما حد أو إنه يحرق أعصابه .. الحاجة الثانية هي إنه من الشخصيات اللي مبتعرفش تقول أنا أسف يا جماعة أنا غلطان .. هو من الشخصيات اللي عنده استعداد يغلّط الدنيا كلها و يقنع نفسه إن فيه مؤامرة كونية عليه بس ميطلعش يقول قدام الناس سامحوني أنا غلطان .. عارف إنك و إنت بتقرأ الكلام ده بتقول لنفسك يا سبحان الله يخلق من الشبه أربعين بس إستني إتقل و إنت حتشد في شعرك كمان شوية.
لو إنت ربنا إبتلاك بإنك تتعامل مع حد زيه كده في حياتك سواء حياتك الشخصية أو في شغلك فإنت أكيد حتفهمني لو قلتلك إن التعامل مع الشخصيات دي صعب فشخ .. إنت بتفضل تستحمل تستحمل لحد ما بتيجي في مرة تنفجر في وشه و بتبقي خناقة لرب السما .. إنفجارك الفجائي مش بيكون سببه إنه عمل غلطة كبيرة .. لا خالص .. هي تراكمات إنت عمال تجمعها لحد ما بتلاقي نفسك مش قادر تستحمل و البكابورت بيطفح .. ده بمنتهي البساطة اللي حصل بين (أوريليو دي لورينتيس) و بين لاعيبه فرقة نابولي و معاهم المدير الفني للفرقة (كارلو أنشيلوتي Carlo Ancelotti) يوم 5 نوفمبر اللي فات .. في اليوم ده إتلعب ماتش في دور المجموعات من بطولة Champions League بين نابولي و بين فرقة إسمها ريد بول سالزبورج خلص 1-1 .. بعد الحكم ما صفّر و الناس مروحة واحد صحفي سأل (أوريليو دي لورينتيس) هو إنت إيه رأيك في أداء لاعيبتك فقال إنه عقاباً ليهم علي التعادل حيخصم منهم ربع مرتبهم .. بعد ما اللاعيبة رجعت نابولي و في أول يوم تدريب ليهم لقوا الأخ ده حضر التدريب و رأسه و ألف سيف يعمل معاهم إجتماع مغلق عشان يهزقهم و ولا اللاعيبة ولا المدير الفني نفسه رضي إنه يحضر الإجتماع ده .. من بعدها و الفرقة دخلت في تمرد مفتوح ضده .. دي المشكلة اللي خلت البكابورت يطفح بس قبلها في تراكمات كتير فشخ بتوريك قد إيه صعب إنك تتعامل مع رجل بالدماغ دي.
واحد من أهم لاعيبة الفرقة (جوخان إنلير Gokhan Inler) لما (أوريليو دي لورينتيس) إشتراه أجبره يلبس ماسك مطاط عليه وش أسد و يتصور به و هو لابس تي شيرت النادي زي ما يكون أراجوز و دي حاجة زعلت اللاعيب و حتي رئيس النادي مفكرش يقوله أنا اسف .. فيه لاعيب في الفرقة إتفرضت عليه غرامة قاسية أوي عشان إتصور بالبوكسر بس في مجلة بتدعم حقوق الشواذ في إيطاليا .. في مرة تالتة لما رئيس النادي إتقاله إن لاعيبة كتير في الفرقة بتفكر تروح الدوري الإنجليزي عشان الفلوس صرخ في وش الصحفيين دول الستات الإنجليز مش بيغسلوا أعضائهم التناسلية أنا مش فاهم اللاعيبة دي بتفكر إزاي قال يعني أي لاعيب في الفرقة بيجيله عرض من نادي إنجليزي أول حاجة بيفكر فيها هي إزاي ينام مع بنات إنجلترا مع إن فيه لاعيبة كتير في الفرقة متجوزين و تصريح زي ده حساس أوي بالنسبة ليهم.
جماهير النادي مش قادرة تنسي إنه كان هو اللي مشي الثلاثي (ماريك هامسيك Marek Hamsik) و (إدينسون كافاني Edinson Cavani) و (إيزيكيال لافيتزي Ezequiel Lavezzi) بعد ما كان لما الثلاثة بيلعبوا جنب بعض الفرقة بتقدم كورة مكنتش بتتشاف في نابولي من أيام (مارادونا Maradona) .. لما قرر (أوريليو دي لورينتيس) إنه يعين (رافا بينيتيز Rafa Benitez) مديرفني للفرقة مفيش حد في نابولي من أصغرها لأكبرها مكنش شايف إن ده غلط .. تقريباً كان فيه إجماع علي إن البيتزا بتاعة نابولي هي أحلي بيتزا تأكلها في إيطاليا و إن (بينيتيز) مش هو الشخص المناسب إنه يمسك الفرقة .. بس هو أصر علي رأيه و عينه و الفرقة لبست في الحيط و برده معترفش بإن اللي عمله ده كان غلط .. تراكمات تراكمات .. يا مؤمن ده حتي (ماوريسيو ساري Mauricio Sarri) اللي مينفعش تعترض لو أنا قلتلك إنه أنجح مدرب يمسك نابولي مسلمش من زفارة لسان (أوريليو دي لورينتيس) اللي قال عليه إنه شيوعي و دي شتيمة تقيلة أوي في إيطاليا .. طب يا سيدي (ساري) ده رجل مبيعرفش يشتغل إلا لما يشربله سيجارتين و غالباً الناس اللي بتحب تشيلسي كل ما تيجي سيرته يقولك متتكلمش عن الرجل ده تاني .. طب (أنشيلوتي)؟ ده رجل يتحط علي الجرح يطيب .. ده يبقي المدير الفني السادس لنابولي في الفترة اللي (أوريليو دي لورينتيس) كان فيها رئيس النادي .. ينفع حد كوباره زيه تبهدله كده؟
أهل نابولي متعودين علي النكد .. الناس دي عاشت أيام ما كان (دييجو مارادونا Diego Maradona) بيلعب عندهم و كانت الشوارع بتبقي فاضية لما نابولي يبقي عندهم ماتش عشان الناس كلها بتتفرج علي الماتش يا في الإستاد يا في التليفيزيون .. دي نفس الناس اللي شافت النادي بتاعها هو بيفلس و بيهبط لدوري الدرجة الثالثة .. دي برده نفس الناس اللي فضلت جنب النادي لحد ما في سنة 2004 (أوريليو دي لورينتيس) مسك النادي و حط فيه فلوس بالملايين و مكنش فارق معاه إنه يبعزق في فلوسه عشان كله يهون عشان خاطر نابولي و يمكن عشان كده جماهير النادي حطته في نفس المكانة اللي كانوا حاطين فيها (مارادونا) .. سنة 2006 (أوريليو دي لورينتيس) دفع من جيبه 25 مليون جنيه إسترليني مش عشان يشتري لاعيب .. لا خالص .. لمجرد إنه يغير إسم النادي من Napoli Soccer لSSC Napoli .. تحت إيده النادي صعد من دوري الدرجة الثانية للدوري الممتاز و سنة 2011 إتأهل للعب لبطولات أوروبا و من ساعتها و النادي مفيش سنة عدت إلا و كان متأهل لبطولة أوروبية .. بس التراكمات اللي أنا حكيتها دي خلت خلاص البكابورت طفح .. جماهير نابولي و (أوريليو دي لورينتيس) بقوا عاملين زي الإتنين المتجوزين بقالهم سنين و كانوا مستحملين بعض و بيعصروا علي نفسهم لمونه إنهم يكملوا في الجوازة اللي كلها نكد دي عشان خاطر الأولاد لحد ما وصلوا لمرحلة يولع الأولاد و لا يروحوا في ستين داهية أنا مش عايز أكمل في الجوازة دي.
الجماهير مبقتش تستني اللاعيبة في المطار بعد كل ماتش يلعبوه في أوروبا .. أوتوبيس النادي الجماهير لما تشوفه تهتف Shame Shame و هنا أي حد كان بيتفرج علي Game of Thrones أكيد ميت علي نفسه من الضحك و لو إنت مش عارف أنا بتكلم عن إيه فإبقي تعلالي في الكومنتات و أنا أشرحلك .. الوضع دلوقتي إن عندك رئيس نادي كل ما حد يكلمه يقوله أنا حرفع قضية علي اللاعيبة (بذمتك مش بيفكرك بحد) .. عندك لاعيبة أعلنت تمردها علي رئيس النادي .. و عندك جماهير بتحب النادي بتاعها و شايفاه بيتدمر قصاد عنيها و بتحمل رئيس النادي و اللاعيبة المسئولية .. إيه اللي حيحصل؟ أبقي كداب لو قلتلك أنا عارف إيه اللي حيحصل .. حالياً نابولي في المركز السادس بفرق 10 نقط عن المتصدر يوفينتوس .. ده في حد ذاته مش كارثة .. ممكن بسهولة أوي الفرقة تشد حيلها و تنط جامد في الجدول بتاع الدوري بس المشكلة إن فيه إنطباع عام بين الناس اللي بتشجع نابولي إن مفيش أمل أصلاً إن الفرقة تشد حيلها و ده سببه في رأيي حاجتين: شخصية (أنشيلوتي) اللي مبتحبش وجع القلب .. شخصية لاعيبة الفرقة اللي بقوا (سوري في الكلمة) بيتعول$% .. و خليني أفهمك أنا قصدي إيه براحة.
سبب عشق جماهير نابولي ل(ساري) إنه مكنش بيقعد ساكت .. لوايح الإتحاد الإيطالي لكرة القدم مكنتش بتمنعه إنه يدخن و هو بيكتشن الفرقة في الماتشات فكان دايماً عامل دماغ عناب .. لو لاعيب إتدلع بيتهزق و هو واقف .. لو (دي لورينتيس) قل أدبه سواء مع (ساري) أو مع حد من اللاعيبة ف(ساري) كان بيسمعه من المنقي خيار .. (ساري) شخصية مبتسكتش لو حد داسله علي طرف و عشان كده أهل نابولي حبوه أوي .. متنساش إن زي ما قلتلك نابولي هم صعايدة إيطاليا و لإنهم صعايدة فدمهم حامي و أعصابهم بتفلت .. تيجي تشوف (أنشيلوتي) بيعمل إيه فتحسه (كرم مطاوع) الله يرحمه لما كان بيلعب أتاري و هو لابس قميص و بنطلون و كرافت و فوقهم روب .. بني أدم إكسلانس في نفسه لا بيزعق ولا بيحب الصوت العالي .. شخصية زي (أنشيلوتي) دي تبقي مثالية إنها تشتغل في مكان زي باريس سان جيرمان أو تشيلسي أو حتي إيه سي ميلان بس مش في نابولي .. يا رجل ده حتي اللاعيبة عشان أغلبها لاعيبة صيع لما عيارها فلت فشخصية (أنشيلوتي) الإكسلانس في نفسه مخلياه مش عارف إزاي يربيهم.
أخر ماتش ليهم في الدوري كان مع جنوة علي أرضهم و خلص صفر- صفر .. زمان أيام (ساري) كان الماتش ده خلص بسكور لنابولي .. زمان أيام (ساري) نابولي مكانه يا أول يا تاني الدوري .. بعد الماتش طلع لاعيبة تقيلة في الفرقة زي البلجيكي (دريس ميرتينز Dries Mertens) و الإسباني (جوزيه كاليخون Jose Callejon) إن و الله دي نتيجة كويسة و إحمدوا ربنا إننا مخسرناش .. كلام زي ده ميطلعش من لاعيبة نابولي .. تخسر علي أرضك و من جنوة .. إنت عبيط يلا .. ده عطي إنطباع جوه نابولي إن الفرقة محتاجه تتفرمط من أول و جديد .. (ميرتينز) له مع نابولي علامات بس خلاص جه الوقت إنه يشوف مستقبله في حتة تانية و غالباً ده أخر موسم له معاهم و الموسم الجاي يا حيروح روما يا حيروح الصين .. نفس الكلام مع قلب الدفاع السنغالي (كاليدو كوليبالي Kalidou Koulibaly) اللي هو كمان غالباً بيلعب أخر موسم له في نابولي .. الإنطباع العام في إيطاليا إن (أنشيلوتي) مش هو الشخص المناسب للتعامل مع بني أدم وسخ زي (دي لورينتيس) ولا هو عارف يشد علي الفرقة و يبقي قاسي عليها عشان يعلم اللاعيبة الأدب .. أزمة نابولي مش أزمة كبيرة .. فرق 10 نقط بينهم و بين يوفينتوس مش كبير .. في Champions League هم ثاني المجموعة بعد ليفربول و تقريباً ضمنوا التأهل لدور ال16 .. نابولي فعلياً مش في أزمة بس التراكمات هي اللي خلقت الأزمة و حسست الناس إن كده خلاص الجوازة دي مينفعش تكمل والحل هو الطلاق مع ان الموضوع ميستاهلش كل النكد ده.
المصادر:
- مقالة بعنوان Napoli owner Aurelio De Laurentiis loves drama having made his name in the film industry نشرت في جريدة The Daily Mail و ده لينك المقالة الأصلية:
https://www.dailymail.co.uk/sport/football/article-7662623/Napoli-owner-Aurelio-Laurentiis-needs-stop-living-fantasy-world.html - مقالة بعنوان Disgusted fans are telling Napoli’s owner, players and manager how angry they are نشرت في جريدة The Daily Mail و ده لينك المقالة الأصلية:
https://www.dailymail.co.uk/sport/football/article-7664673/Disgusted-Napoli-fans-telling-owner-players-manager-angry-are.html
